Search form

Login - Register | FOLLOW US ON

Logo of Phnom Penh Post newspaper Phnom Penh Post - បាញ់គួង​តម្លៃ​៥​ពាន់​រៀល​ម្ដុំ​ផ្សារ​អូរឫស្សី

បាញ់គួង​តម្លៃ​៥​ពាន់​រៀល​ម្ដុំ​ផ្សារ​អូរឫស្សី

130709_22c
បាញ់គួង ឬគុយទាវកាត់វៀតណាម មានខ្ទឹមក្រហមបំពង សាច់ជ្រូកចិញ្រ្ចាំ និងប៉ាត់តេ

ភ្នំពេញ : វិថី​ឧកញ៉ានូកន ដែល​ស្ថិត​នៅ​ចន្លោះ​ផ្លូវ​សុកហុក និង​មហាវិថី​ព្រះមុនីវង្ស​នោះ​គឺជា​កន្លែង​ដែល​សម្បូរ​អាហារ​វៀតណាម​បំផុត​មិន​ថា​ពេល​ព្រឹក ពេល​ថ្ងៃ​ត្រង់ ឬ​ពេល​យប់​ឡើយ។

ស្ថិត​នៅ​ខាង​លិច​ផ្លូវ​ឧកញ៉ានូកន កែង​ជាមួយ​ផ្លូវ​លេខ​១៩៨ មាន​ហាង​អាហារ​មួយ​ដែល​មិន​មាន​លើក​ស្លាក​យីហោ​អ្វី​ឡើយ ប៉ុន្តែ​ល្បី​ខាង​មាន​គុយទាវ​កាត់វៀតណាម ឬ​បាញ់គួង​ដ៏​ឆ្ងាញ់​ពិសា។

ខុស​ប្លែក​ពី​គុយទាវ​កាត់​ទូទៅ​ដែល​គ្មាន​ស្នូល​នោះ បាញ់គួង​មាន​ស្នូល​ធ្វើ​ពី​សាច់ជ្រូក​ចិញ្ច្រាំ​លាយ​ជាមួយ​ផ្សិត​ត្រចៀកកណ្ដុរ និង​ខ្ទឹមក្រហម ដែល​រុំ​ដោយ​បន្ទះ​គុយទាវ​ពណ៌​ស​ដ៏​រលើបរលោង​គួរ​ឲ្យ​ចង់​ទទួលទាន។

បាញ់គួង​មាន​ប្រភព​ដើម​មកពី​ប្រជាជន​វៀតណាម​ខាង​ជើង ហើយ​ប្រជាជន​នៅ​ទីក្រុង​ហាណូយ​និយម​ទទួលទាន​វា​ជា​អាហារ​ពេល​ព្រឹក។

ក្រៅពី​បន្ថែម​ដោយ​សាច់​ប៉ាត់តេ ណែម និង​សាច់ជ្រូក​អាំង​នោះ គេ​និយម​ញ៉ាំ​បាញ់គួង​ផ្ទាប់​ជាមួយ​បន្លែ​ត្រសក់ ជីរ និង​សណ្ដែកបណ្ដុះ ហើយ​ជ្រលក់​ទឹកត្រី​ផ្អែម។ អ្វី​ដែល​ធ្វើ​ឲ្យ​បាញ់គួង​មាន​ក្លិន​ឈ្ងុយ​នោះ​គឺ​ខ្ទឹមក្រហម​បំពង​តែ​ម្ដង។

និយាយ​ពី​បាញ់គួង​នៅ​ហាង​ម្ដុំ​ផ្សារ​អូរឫស្សី​នោះ​វិញ រសជាតិ​របស់​វា​ពិតជា​ឆ្ងាញ់​ណាស់។ នៅ​ពេល​ដែល​យើង​ទំពា​វា សាច់​គុយទាវ​កាត់​ដ៏​ទន់​ល្មើយ លាយឡំ​នឹង​សាច់ជ្រូក​ចិញ្រ្ចាំ​ដ៏​ម៉ដ្ឋ និង​ភាព​ស្រួយ​ច្រុប​ៗ​នៃ​ផ្សិត​ត្រចៀក​កណ្ដុរខ្មៅ​ផង​នោះ វា​ពិតជា​ពិសេស​មែន។

បាញ់គួង​ដែល​មាន​សាច់​ប៉ាត់តេ ណែម សាច់​ជ្រូក​អាំង​មួយ​ចាន​ពេញ​នោះ មាន​តម្លៃ​តែ​៥​ពាន់រៀល​ប៉ុណ្ណោះ៕

0

Comments

Please, login or register to post a comment