Search form

Login - Register | FOLLOW US ON

Logo of Phnom Penh Post newspaper Phnom Penh Post - អណ្តាត​គោ​កញ្ឆែត​ឆា​អង្ក្រង​ពី The ឆ្ងាញ់​

Content image - Phnom Penh Post

អណ្តាត​គោ​កញ្ឆែត​ឆា​អង្ក្រង​ពី The ឆ្ងាញ់​

ភ្នំពេញ: ជាមួយ​នឹង​ស្លាក​យីហោ​ភាសា​អង់គ្លេស​​លាយ​ខ្មែរ​ដែល​គ្រាន់​តែ​ស្ដាប់​ក៏​ប្លែក​ត្រចៀក​ហើយ​នោះ​ ភោជនីយដ្ឋាន «The ឆ្ងាញ់» នៅ​មាន​មុខម្ហូប​ច្នៃប្រឌិត​ប្លែកៗ​គួរ​ឲ្យ​ទាក់​ទាញ​ផង​ដែរ។

ថ្ងៃ​នេះ ភ្នំពេញ ប៉ុស្ដិ៍ នឹង​នាំ​លោក​អ្នក​ទៅ​ស្គាល់​មុខម្ហូប​ថ្មី​មួយ​​ឈ្មោះ​ថា «អណ្តាត​គោ​កញ្ឆែត​ឆា​អង្ក្រង» ដែល​មាន​គ្រឿង​ផ្សំ និង​វិធី​ចម្អិន​​ដូច​ខាង​ក្រោម។

គ្រឿង​ផ្សំ​ដែល​យើង​ត្រូវ​ការ​មាន អណ្តាត​គោ ​៣ ​ខាំ​កោស​លាង​ឲ្យ​ស្អាត រួច​ហាន់​ជា​បន្ទះ​ស្ដើង​ល្មម អង្ក្រង ១​ខាំ​លាង​ទឹក​ឲ្យ​ស្អាត​​ ម្ទេស​ដៃនាង ៣ ផ្លែ កញ្ឆែត​ ១ដុំ​បេះ​ដើម​ចាស់​ៗ​ចេញ​ ខ្ទឹម​ស​ ៥​កំពឹស​ហាន់​ស្តើង​ៗ​ ប្រេង​ខ្យង​​ ២​ ស្លាប​ព្រា​បាយ ទឹក​អំពិល​ទុំ ទឹក​ប៉េងប៉ោះ ស្ករស ១ ​កូន​ស្លាបព្រា​ អំបិល​កន្លះ​កូន​ស្លាបព្រា​ ម្សៅ​ស៊ុប ១ ​កូន​ស្លាបព្រា និង​ប្រេង​ឆា។

សម្រាប់​វិធីធ្វើ ​ដំបូង​ត្រូវ​យក​ឆ្នាំង​មួយ​ចាក់​ទឹក​ចូល​ហើយ​ដាំ​ឲ្យ​ពុះ​ រួចបង់​អំបិល​ ១​ចឹប ហើយ​ច្រូច​​ប្រេងឆា​ពីរ​បី​​តំណក់​ចូល។ ពេល​ទឹក​កំពុង​ពុះ ត្រូវ​ដាក់​កញ្ឆែត​ចូល​ហើយ​ពន្លត់​ភ្លើង​ភ្លាម​។ ​ចាប់​ផ្ដើម​សម្រិត​​​ទឹក​ចេញ ​ហើយ​ដាក់​ទឹក​ថ្មី​​ចូល​​ដើម្បី​ត្រាំ​កញ្ឆែត​នោះ។ បន្ទាប់​មក​ត្រូវស្រុស​អណ្ដាត​គោ​ជាមួយ​ស្លឹក​ក្រូច​សើច រំដេង ឬ​ស្លឹក​គ្រៃ​ដើម្បី​កាត់​​ឆ្អាប។

Content image - Phnom Penh Post

ក្រោយ​មក​ទៀត​ សឹម​យក​ខ្ទះ​ដាក់ប្រេង​ឆា​ និង​ខ្ទឹមស ហើយ​ឆា​រហូត​មាន​ក្លិន​ឈ្ងុយ ​សឹម​ដាក់​អណ្ដាត​គោ​កូរ​ជា​មួយ​ខ្ទឹម។ ដំណាក់​កាល​បន្ត​ត្រូវ​ដាក់​ស្ករ​ត្នោត ​អំ​បិល ​ម្សៅស៊ុប និង​ប្រេង​ខ្យង ​ហើយ​កូរ​ចូល​គ្នា​ឲ្យ​ចូលជាតិ សឹម​ដាក់​អង្ក្រង ​កញ្ឆែត​ និង​ម្ទេស​ចូល ​និង​ភ្លក្ស​សាប​ប្រៃ​តាម​ចំណូល​ចិត្ត។ ចុង​បញ្ចប់​ត្រូវ​ច្របល់​ឆា​ឲ្យ​ញាប់​ដៃ​បន្តិច​រួច​សឹម​ពន្លត់​ភ្លើង​ជា​ការ​ស្រេច។

ភោជនីយដ្ឋាន The ឆ្ងាញ់ មាន​បម្រើ​អាហារ​​ប្លែកៗ​ដូចជា បាយ​អប់​បំពង់​ឫស្សី ការីបី​សាសន៍ ចេក​កាច់​រាង សាច់គោ​បុក​ម្អម ឆា​កែង​សាច់មាន់ និង​មីឆា​ត្រប់​សាច់ជ្រូក​ចិញ្ច្រាំ​ជាដើម។ ​នៅ​ភោជនីយដ្ឋាន​នេះ​​មុខម្ហូប​នីមួយៗ​មាន​​តម្លៃ​​ចាប់​ពី​ ៥ ពាន់​​រៀល​​រហូត​ដល់​ ៤ ម៉ឺន​រៀល។

ហាង​ស្ថិត​​នៅ​ខាង​ក្រោយ​មន្ទីរពេទ្យ​ព្រះកុសុមៈ (ពេទ្យ​លោក​សង្ឃ) អគារ​លេខ ២៨៥ ផ្លូវ​១៥០ សង្កាត់​ទឹកល្អក់​២ ខណ្ឌ​ទួលគោក៕​​​

0

Comments

Please, login or register to post a comment