ក្រុងអូស្ទីន: Sony ចូលរួមព្រឹត្ដិការណ៍ SXSW ក្នុងក្រុងអូស្ទីនរៀងរាល់ឆ្នាំ បំណងចម្បងគឺបង្ហាញផលិតផលគំរូថ្មីៗ និងគម្រោងក្ដីស្រមៃ ជាផ្នែកមួយ នៃកម្មវិធីពិសោធនាពេលអនាគតដោយផ្ដោតលើ R&D។
នៅក្នុងព្រឹត្ដិការណ៍ យើងបានចាប់អារម្មណ៍បច្ចេកវិទ្យាម៉ាស៊ីនបញ្ចាំងពន្លឺថាច់ស្គ្រីន និងកាសតន្ដ្រីគ្មានសំឡេងរំខាន តែឆ្នាំនេះ Sony បានបោះជំហានឈានដល់ឧបករណ៍បច្ចេកវិទ្យាថ្មី សម្រាប់ពាក់នឹងដៃដែលប្រើចលនាគ្រប់គ្រងសំឡេង។
កងដៃ ជាអ្វីដែលក្រុមហ៊ុនបានហៅថា គម្រោង Motion Sonic បំពាក់សេនស័រ និងក្បាលមេក្រូ ដើម្បីចាប់យកទិន្នន័យ លើការបង្វិល ពន្លឿនល្បឿន ព្រមទាំងចលនាដៃ និងជើង។
ឧបករណ៍នេះ នឹងបំប្លែងទៅជាសំឡេងមួយក្នុងចំណោមមុខងារចំនួន ៥ ដែលប្រែក្លាយចលនាដៃជើងទៅជាឧបករណ៍តន្ដ្រី ដោយអ្នកបន្ថែម និងគ្រប់គ្រងរលកសំឡេងមានស្រាប់ និងលេងជាចង្វាក់ភ្លេងផ្សេងៗទៀត។
ឧទាហរណ៍ជាក់ស្ដែងមួយចំនួន រួមមាន ការទះដៃ ឬគោះជង្គង់ដើម្បីផលិត និងគ្រប់គ្រងមេឡូឌី និងជាវិធីបំប្លែងចលនាលេងហ្គីតាខ្យល់ទៅជាសំឡេងហ្គីតាពិត។
Sony បានបង្ហោះវីដេអូលើយូធូប ដោយបង្ហាញពីដំណើរការនៃផលិតផលគំរូ និងតេស្ដការប្រើប្រាស់។ ឧបករណ៍ពាក់ដៃ ដែលបង្កើតសំឡេងភ្លេងចេញពីចលនាដៃជើង នេះនៅតែទាមទារបាសប្ល៊ូធូសដើម្បីចាក់សំឡេងតន្ដ្រីនោះចេញមក។
ដូច្នេះ ផលិតផលគំរូ ដែលមិនទាន់បញ្ចេញកាលបរិច្ឆេទលក់ និងតម្លៃនេះ គ្រាន់តែជាក្ដីស្រមៃនៅឡើយទេ៕HR