.jpg)
គំរូឌីហ្សាញយានបក្សីខ្មៅ របស់ Boeing មានល្បឿនជាង ៦ ពាន់ Km/h។
ក្រុងអូកឡេនដ៍: យានចម្បាំងថ្មីនឹងចូលខ្លួនមកជំនួសយន្ដហោះល្បឿនលឿនជាងសំឡេង SR-71-“Black-bird” ដ៏ល្បីល្បាញរបស់ក្រុមហ៊ុន Lockheed Martin ក្រោយពីសប្ដាហ៍នេះក្រុមហ៊ុន Boeing បានបង្ហាញគំរូយន្ដហោះអនាគតកាលដែលនាំយកបច្ចេកវិទ្យាកំពូលល្បឿនបោះជំហានទៅមុខបន្ថែមទៀត។
ដោយមានឈ្មោះថា «កូនបក្សីខ្មៅ» ការឌីហ្សាញគំរូយន្ដហោះរបស់ក្រុមហ៊ុន Boeing គឺជាដៃគូប្រកួតចម្បងជាមួយ Lockheed ដែលកំពុងផលិត SR-72 និងអាចមានល្បឿនលឿនជាងសំឡេង (Mach 5) ៥ ដង ឬ ៦១៧៤ គីឡូម៉ែត្រក្នុងមួយម៉ោង។
ដើម្បីដំណើរការទស្សនវិស័យនេះ ម៉ូដែលហួសសម័យ Boeing 787 Dreamliner មានល្បឿនត្រឹមតែ ៩០៣ គីឡូម៉ែត្រក្នុងមួយម៉ោង ខណៈយន្ដហោះប្រយុទ្ធ McDonnell Douglas F15 Eagle ប្រើល្បៀនកាំជ្រួច ២៦៦៥ Km/h។
ច្បាស់ណាស់ ជិះយន្ដហោះអនាគតរបស់ Boeing នេះប្រាកដជាធ្វើឲ្យអ្នកដាក់ភ្នែកនៅកញ្ចឹង ក និងស្រៀវស្រើបអស់ពោះវៀនមិនខាន។
លោក Kevin Bowcutt ប្រធានផ្នែកវិទ្យាសាស្ដ្រក្រុមហ៊ុន Boeing បាននិយាយថា Boeing កំពុងអភិវឌ្ឍយន្ដហោះនេះជា ២ ដំណាក់កាល ដោយដំបូងទាក់ទងនឹងការហោះហើរសាកល្បងប្រភេទទំហំ F16 ជាយន្ដហោះម៉ាស៊ីន ១ ដើម្បីឲ្យស័ក្ដិសមនឹងការឌីហ្សាញ។
ក្រោយមក ក្រុមការងារមានបំណងនឹងអភិវឌ្ឍទៅជាយានពេញលក្ខណៈដោយបំពាក់ម៉ាស៊ីន ២ ទំហំប្រហាក់ប្រហែលនឹង SR-71 ប្រវែង ៣២ ម៉ែត្រ៕HR
