ក្រុងតូក្យូ: ក្រុមហ៊ុនវិស្វកម្មតូចមួយក្នុងប្រទេសជប៉ុន បានអះអាងថា ខ្លួនបានផលិតរថយន្ដស្របច្បាប់ដំបូងក្នុងលោកដែលមានសម្ទុះល្បឿនពី ០ ទៅ ១០០ គីឡូម៉ែត្រ ក្រោមថិរវេលាមិនដល់ ២ វិនាទី។
Aspark Owl ត្រូវបានតាំងបង្ហាញនៅពិព័រណ៍រថយន្ដហ្រ្វេងហ្វឺត កាលពីឆ្នាំមុន ហើយអ្នកផលិតបាននិយាយថា វាមានកម្លាំង ៤៣០ សេះ ថាមពលបង្វិល ៥៦៣ ផោនហ្វីត។ បច្ចុប្បន្ន Aspark បានបញ្ចេញវីដេអូឃ្លីបដ៏អស្ចារ្យបង្ហាញពីកំពូលរថយន្ដអគ្គិសនីមានសម្ទុះល្បឿនតិចជាង ២ វិនាទី មកត្រឹមតែ ១,៩២១ វិនាទីប៉ុណ្ណោះ លឿនជាងរថយន្ដប្រណាំង Formula 1 គ្រប់សែស្រឡាយទាំងអស់។
យោងតាមព័ត៌មានពី ក្រុងហ្រ្វេងហ្វឺត កាលពីឆ្នាំមុន រថយន្ដ Aspark Owl បានដំណើរការម៉ូទ័រ ៤០ គីឡូវ៉ាត់មួយគូ ដោយផ្ដល់នូវកម្លាំង ៤២៩ សេះ និងថាមពលបង្វិល ៥៦៣ ផោនហ្វីត។
នៅមានអាគុយមួយ និងប្រព័ន្ធប្រដាប់បញ្ចូលភ្លើងភ្លោះ (បញ្ចូលថាមពលក្រោយជាន់ហ្រ្វាំង) ថែមទៀត។
ថាមពលត្រូវបានបញ្ជូនទៅកាន់កង់ទាំង ៤ ដែលជំរុញល្បឿនឲ្យកាន់តែលឿនអស្ចារ្យ ហើយម៉ូទ័ររបស់វាមានទំហំតូច ដោយរថយន្ដមានទម្ងន់ត្រឹមតែ ៨៥០ គីឡូក្រាម និងកម្ពស់តែ ៩៩០ មិល្លីម៉ែត្រពីដី។
Aspark បានបង្កើនសមត្ថភាពល្បឿនកំពូលរបស់ Owl ដល់ ២៨០ គីឡូម៉ែត្រក្នុងមួយម៉ោង ជាល្បឿនដ៏មហាសែនលឿនដែលអាចប៉ះពាល់ដល់សមត្ថភាពថាមពលអគ្គិសនីដោយកំណត់ត្រឹម ១៥០ គីឡូម៉ែត្រក្នុង ១ ម៉ោង។
Aspark បានឲ្យដឹងថា ក្រុមហ៊ុនគ្រោងផលិតរថយន្ដនេះ ៥០ គ្រឿង ហើយអតិថិជននឹងត្រូវហ៊ានចាយ ៤,១៩ លានដុល្លារដើម្បីក្លាយជាម្ចាស់កំពូលរថយន្ដនេះ។
ការបើកបរសាកល្បងទំនងជាត្រូវបានធ្វើឡើងនៅទីលានក្រោយក្រុមហ៊ុន ជាទីកន្លែងដែលកំពូលរថយន្ដនេះត្រូវបានផលិតឡើង។ ទោះមានការបង្ហាញពីវីដេអូ អ្នកនិយមរថយន្ដខ្លះបានបង្ហាញនូវមន្ទិលមួយចំនួន។
ពួកគេបានចង្អុលបង្ហាញថា គ្មានឧបករណ៍វាស់ល្បឿន ឬវាស់ពេលវេលា ឬល្បឿនត្រូវបានលាតត្រដាងជាក់លាក់ឡើយ។ ពួកគេក៏បាននិយាយថា ទីតាំងបើកបរសាកល្បងមានទំហំតូចសម្រាប់បញ្ចេញសមត្ថភាពរថយន្ដជាន់ដល់ល្បឿនពី ០ ទៅដល់ ១០០ គីឡូម៉ែត្រក្នុង ១ ម៉ោង។
ក្រុមជំនាញតាមដានរថយន្តទំនើបក៏បានកត់សម្គាល់ឃើញថា រថយន្ដគំរូនេះត្រូវបានបំពាក់ជាមួយប្រភេទកង់រថយន្ដប្រណាំង ខុសពីច្បាប់បើកបរលើដងផ្លូវ ដែលកាន់តែជួយឲ្យរថយន្ដបង្កើនល្បឿនកាន់តែលឿនថែមទៀត៕HR