.jpg)
រថយន្ត Byton ដែលមានសមត្ថភាពបើកបរស្វយ័តវៃឆ្លាតកម្រិត ៣។ AFP
ក្រុងឡាសវេហ្គាស: ក្រុមហ៊ុនចិនមួយបានបង្ហាញរថយន្ដអនាគតកាលរបស់ខ្លួនកាលពីថ្ងៃអាទិត្យ ដោយបានសន្យាចេញរថយន្ដ «ស្គាល់ពីអារម្មណ៍ និងវៃឆ្លាត» ទៅកាន់ទីផ្សារសកលលោកនៅឆ្នាំក្រោយដោយមានតម្លៃចាប់ពី ៤៥០០០ ដុល្លារ។
រថយន្ដក្នុងក្ដីស្រមៃដើរដោយថាមពលអគ្គិសនីដែលត្រូវបានបង្ហាញដោយក្រុមហ៊ុន Byton នៅពិព័រណ៍ អេឡិចត្រូនិកឆ្នាំ ២០១៨ ក្រុងឡាសវេហ្គាស ទទួលស្គាល់ជាឧបករណ៍កុំព្យូទ័រលើកង់ទាំង ៤ បំពាក់ជាមួយនូវកាប៊ីនឌីជីថល រំលេចនូវទស្សនីយភាពប៉ារ៉ូណាម៉ាដោយមានមុខងារជាកន្លែងកាច់ចង្កូត ការកម្សាន្ដ និងថែមទាំងត្រួតពិនិត្យសុខភាពអ្នកបញ្ជាផងដែរ។
Byton ដឹកនាំដោយអតីតក្រុមប្រតិបត្ដិមកពី Tesla, BMW, Apple និង Google បានឲ្យដឹងថា ខ្លួននឹងបើកសម្ពោធនៅប្រទេសចិនក្នុងឆ្នាំ ២០១៩ ព្រមទាំងសហរដ្ឋអាមេរិក និងអឺរ៉ុបនៅឆ្នាំ ២០២០។
រថយន្ដរបស់ Byton នឹងប្រើបច្ចេកវិទ្យាដោះសោតាមទម្រង់ផ្ទៃមុខ និងចេះបន់បែនតាមអ្នកបើកបរ ការបញ្ជាតាមសំឡេង ការបញ្ជាតាមការស្ទាបកាន់ និងកាយវិការ។
វាក៏នឹងបន្ថែមប្រព័ន្ធទំនាក់ទំនង 5G ដើម្បីភ្ជាប់អ៊ីនធឺណីតល្បឿនលឿន និងបង្កើនសមត្ថភាពមុខងារខួរក្បាលសិប្បនិម្មិត។ វាមានសមត្ថភាពបរបានចម្ងាយផ្លូវ ៥០០ គីឡូម៉ែត្រមុនពេលត្រូវការសាកថ្ម ដែលត្រូវចំណាយពេលសាកពី ១៥ ទៅ ៣០ នាទី។
វានឹងត្រូវបានផ្ដល់ស្ដង់ដារកម្រិតទី ៣ ដែលជាប្រភេទរថយន្ដគ្មានមនុស្សបើក និងអាចឈរកម្រិតទី ៤ ចាប់ពីឆ្នាំ ២០២០ ទៅមុខ៕
