Search form

Login - Register | FOLLOW US ON

Logo of Phnom Penh Post newspaper Phnom Penh Post - រថយន្ត​ Portal ឆ្លាតវ័យ​ចេះស្គាល់​ម្ចាស់​ ជិត​បង្ហាញខ្លួន

Content image - Phnom Penh Post
រូបរាង​រថយន្ដ​ប្រភេទ​វ៉ែននៅ​ថ្ងៃអនាគត Portal Concept ពីក្រុមហ៊ុន Chrysler មុនថ្ងៃ​សម្ពោធ​។

រថយន្ត​ Portal ឆ្លាតវ័យ​ចេះស្គាល់​ម្ចាស់​ ជិត​បង្ហាញខ្លួន

ក្រុងឡាសវេហ្គាស: ក្រុមហ៊ុន​រថយន្ដ Chrysler បាន​ប្រើពាក្យ​ស្លោក​ចំពោះ​ម៉ូដែលថ្មី​ក្នុងក្ដី​ស្រមៃ Portal Concept «បង្កើត​ឡើង​ដោយ​សហស្សវត្សរ៍​សម្រាប់​សហស្សវត្សរ៍» រថយន្ដ​មីនីវ៉ែន​អគ្គិសនី ១០០ ភាគរយ​ដែល​គ្រោង​បង្ហាញ​វត្ដមាន​ក្នុងពេល​ឆាប់ៗនេះ​នៅពិព័រណ៍​គ្រឿង​អេឡិចត្រូនិក (CES) ​ក្រុង​ឡាសវ៉េហ្គា។

គ្រាន់តែ​ក្រឡេក​មួយភ្លែត​ម៉ូដែល​សហស្សវត្សរ៍​នេះគឺជា​រថយន្ដ​វ៉ែន​ប្រអប់​ស្រោប​កញ្ចក់​ និង​បច្ចេកវិទ្យា LED។ ជាមួយ​រូបភាព​ប៉ុន្មាន​សន្លឹក​ដែលចេញ​ផ្សាយ​មុនពេល​សម្ពោធ​ផ្លូវការ​ វ៉ែន​អគ្គិសនី​របស់ Chrysler នេះមាន​រូបរាង​ដូចជា​គំនូរ​ក្នុងក្តី​ស្រមៃ។

Portal Concept មាន​ប្រវែង​ភ្លៅ​ ៣ ម៉ែត្រ​ និងមាន​លក្ខណៈ​ខុសប្លែក​ត្រង់ការ​បើកទ្វារ​រុញទាំង​សងខាង​ បំពាក់​តាបឡូ​ LCD ស្ដើង​តូចវែង​ និង​អេក្រង់ធំ​ខាង​ក្រោម​ចំកណ្ដាល​តែម្ដង។ ប្រាកដណាស់ អេក្រង់​ទាំងពីរ​នេះអាច​ត្រូវបាន​ផ្លាស់ប្ដូរ​ទីតាំង​ទៅតាម​តម្រូវការ។

មានរន្ធដោត​ចំនួន ១០ កន្លែង​សម្រាប់​សាក​ទូរស័ព្ទភ្ជាប់​ទូរស័ព្ទ ឬថេប្ល៊ិត។ Fiat Chrysler Automobiles (FCA) ធ្វើការ​ជាមួយ Panasonic ដើម្បី​អភិវឌ្ឍ​ឲ្យ​កាន់តែ​ប្រសើរ​សម្រាប់​អតិថិជន​ប្រើប្រាស់​ រថយន្ត Portal នេះ។

Content image - Phnom Penh Post
ទ្វារ​រថយន្ដ ​Portal Concept មានទ្វារ​រុញបើក​ចេញ​ពីគ្នា​។

Chrysler បានហៅ​បរិវេណ​ផ្ទៃក្នុង​ម៉ូដែល Portal Concept ជា​កន្លែងទី ៣ បន្ទាប់​ពីផ្ទះ និងកន្លែង​ធ្វើការ។ កៅអី​ទាំងអស់​បំពាក់​លើរ៉ៃ​ដែក​សម្រាប់​ងាយស្រួល​បត់បែន បត់​ទុកដាក់ ឬរើរុះ​ចេញពី​រថយន្ដ​។

កម្រាល​រាបស្មើ​ស្ថិតនៅ​ពីលើ​អាគុយ​អគ្គិសនី​មានកម្លាំង ១០០ គីឡូវ៉ាត់​ម៉ោង​។ វាមាន​សមត្ថភាព​គ្រប់គ្រាន់​ក្នុងការ​រត់ចម្ងាយ​ផ្លូវជាង​ ៤០០ គីឡូម៉ែត្រ។

ឆ្នាំងសាក​ល្បឿន​លឿន​ ៣៥០ គីឡូ​វ៉ាត់ អាច​បំពេញ​ចម្ងាយ​ផ្លូវ ២៥០ គីឡូម៉ែត្រ​ទៀត​ក្រោម​ថេរ​វេលា​តិចជាង ២០ នាទី​។ ម៉ូទ័រ​អគ្គិសនី​តែត្រូវ​បានផ្ដល់​ថាមពល​កម្លាំង​ទៅកាន់​កង់​ខាងមុខ។

Portal មាន​សមត្ថភាព​បើកបរ​ស្វ័យប្រវត្ដិ SAE Level Three ដែល​មានន័យ​ថា អ្នកបើកបរ​អាច​ប្រគល់​ភារ​បើកបរ​ទៅឲ្យ​រថយន្ដ​ផ្ទាល់​ចំពោះ​ស្ថានភាព​ផ្លូវ​ហាយវ៉េ។ ជា​គុណសម្បត្ដិ​ចំពោះ​បច្ចេកវិទ្យា​បើកបរ​ស្វ័យប្រវត្ដិ Chrysler បន្ដថា Portal អាច​ត្រូវបាន​ធ្វើឲ្យ​កាន់តែ​ប្រសើរ​។ បច្ចេកវិទ្យា​ស្គាល់​ទម្រង់​មុខនិង​សំឡេង​អនុញ្ញាត​ឲ្យ Portal ស្គាល់​ម្ចាស់​របស់​ខ្លួន។

ដូច្នេះ វាអាច​សម្រប​ខ្លួន​ទៅកាន់​ការចង់​បាន និង​បំណង​របស់​ម្ចាស់។ បណ្ដាញ​ឥតខ្សែ​ខាងក្នុង​អាចឲ្យ​អ្នកដំណើរ​ចែក​រំលែក​តន្ដ្រី រូបភាព វីដេអូ ឬអ្វីៗ​គ្រប់យ៉ាង​ និងការ​ប្រែក្លាយ​ដំណើរ​លើ​ដងវិថី​ទៅជា​អនុស្សាវរីយ៍​មិនអាច​បំភ្លេច​បាន។

នៅមាន​គុណប្រយោជន៍​ច្រើន​សន្ធឹក​ទៀត​ចំពោះម៉ូដែល​ក្នុងក្ដី​ស្រមៃ Portal Concept នេះ ដែល​នឹងត្រូវ​សម្ពោធ​ជាផ្លូវ​នៅពិព័រណ៍​គ្រឿង​អេឡិចត្រូនិក CES៕HR

0

Comments

Please, login or register to post a comment