ក្រុងមីឈីហ្គេន: ក្នុងទីក្រុងដេទ្រូត សប្ដាហ៍នេះ ក្រុមហ៊ុន Nissan បានបង្កើតភាពលេចធ្លោនូវអ្វីដែលជាម៉ូដែលរថយន្ដ Rogue ឬ Pathfinder នៃថ្ងៃអនាគតត្រូវបានបង្ហាញ ដែលគ្រោងបង្ហាញវត្ដមាននៅក្នុងឆ្នាំ ២០២០។
Nissan Xmotion ឬ (Cross Motion) ៣ ជួរសម្រាប់អ្នកដំណើរ ៦ នាក់ បន្ថែមរចនាប័ទ្មហត្ថកម្ម និងឌីហ្សាញបែបជប៉ុន និងអាមេរិក រួមនឹងបច្ចេកវិទ្យា Nissan Intelligent Mobility ចុងក្រោយបំផុត។
Xmotion Concept ស្រោបពណ៌ប្រាក់ ត្រូវបានដាក់តាំងបង្ហាញនៅពិព័រណ៍រថយន្ដអន្ដរជាតិអាមេរិកខាងជើងឆ្នាំ ២០១៨ ក្នុងក្រុងដេត្រយ ដែលបញ្ចូលរចនាប័ទ្មវប្បធម៌លោកខាងលិចនិងខាងកើតជាមួយបច្ចេកវិទ្យាអ៊ីនធឺណិតជាន់ខ្ពស់។
ចំពោះរូបរាងខាងក្រៅ Nissan បានបង្ហើបប្រាប់ពីសាមញ្ញភាពជាមួយរូបរាងអក្សរ «U» ចម្រឹងខ្យល់រាងអក្សរ «V» និងចង្កៀងមុខរាងផ្លែដាវ។ Xmotion Concept បំពាក់កង់យ៉ាន់អាលុយមីញ៉ូមទំហំ ២១ អ៊ិញដែលអាចប្រើជាមួយប្រភេទកៅស៊ូកង់សម្រាប់បើកបរគ្រប់ស្ថានភាពផ្លូវទាំងអស់។
ជាមួយគម្លាតភ្លៅឆ្ងាយ ទំហំទទឹងធំនិងទ្វារបើកឡើងធំទាំងសងខាង Xmotion បានបន្ថែមប្រអប់ជាប់ដំបូលដែលអាចទាញចេញចូលបាន និងការឌីហ្សាញភ្លើងគូទក្រោយរត់ប្រដេញយ៉ាងស្រស់ស្អាតដែលយកលំនាំតាមហ្គេមផ្គុំរូបឈើជប៉ុន។
បរិក្ខារផ្ទៃក្នុង Xmotion Concept ត្រូវបានឌីហ្សាញឡើងដើម្បីផ្ដល់ទីធ្លាធំទូលាយសម្រាប់សមាជិកគ្រួសារដែលមានកូន និងសត្វចិញ្ចឹម។ ឆ្លុះបញ្ចាំងពីធម្មជាតិ បរិក្ខារផ្ទៃក្នុងរចនាប័ទ្មជប៉ុនត្រូវបានឌីហ្សាញឡើងជាមួយរូបភាពទន្លេលើកម្រាល និងបរិវេណថតកណ្ដាលជាស្ពានឈើ។
រចនាពណ៌ផ្ទៃក្នុងមានដូចជា ក្រហមឆ្អៅ ស និងខ្មៅ ជា និមិត្តរូបព្រះអាទិត្យ ភាពល្អបរិសុទ្ធ និងប្រពលភាព។ គំនូរម៉ូដ និងស្នាដៃហត្ថកម្មជប៉ុនតាមរឹមភ្លី និងក្បាច់ក្បូរផ្សេងៗមានលក្ខណៈសម្បូរបែបសម្បូរតែនៅក្រោយកៅអីរថយន្ដ។
ក្រៅពីការរចនាបែបប្រពៃណី ធម្មជាតិដ៏ស្មុគស្មាញរបស់ជប៉ុន Xmotion Concept ក៏បានបន្ថែមបច្ចេកវិទ្យាជំនួយដល់អ្នកបើកបរនិងអ្នកដំណើរចុងក្រោយបំផុតគ្រប់ម៉ូដែលខ្ពស់ SUV ដែលបញ្ជាដោយកាយវិការ រចនាភ្នែក និងសំឡេង។
កាប៊ីនមុខបំពាក់អេក្រង់ឌីជីថលចំនួន ៧ ដោយមាន ៣ ផ្នែកធំៗ ទាំងខាងឆ្វេង និងខាងស្ដាំ ដែលលាតសន្ធឹងពេញតាប្លូ។ នៅមានកញ្ចក់ឌីជីថលមួយទៀតនៅពីលើពិតាន និងនៅថតចន្លោះកៅអីមុខទាំង ២។
រថយន្តគំរូនេះមិនមានព័ត៌មានពីតម្លៃទេ៕HR