.jpg)
ឧបករណ៍ស្ដើងស្រដៀងនឹងបន្ទះកៅអៀក អាចតាមដានសុខភាពបាន។ AFP
ក្រុងតូក្យូ: ឧបករណ៍ស្រដៀងនឹងបន្ទះកៅអៀក កម្រាស់តែ ១ មីល្លីម៉ែត្រ និងអាចតាមដានទិន្នន័យសុខភាពដ៏សំខាន់ ព្រមទាំងបញ្ជូន និងទទួលសារថែមទៀត រួមទាំង រូបសញ្ញាអេម៉ូជី។
លោក តាកាអុ សូម៉េយ៉ា ជាសាស្ដ្រាចារ្យសាកលវិទ្យាល័យក្រុងតូក្យូ ដែលបានផលិតឧបករណ៍នេះ បានចាត់ទុកវាជាជំនួយការសម្រាប់អ្នកជំនាញវេជ្ជសាស្ដ្រដោយប្រើលើអ្នកជំងឺសម្រាកលើគ្រែ ឬនៅឆ្ងាយ ព្រមទាំងក្រុមគ្រួសាររស់នៅឆ្ងាយពីគ្នា។
លោកបានប្រាប់ AFP ថា៖ «ជាមួយឧបករណ៍នេះ ទោះស្ថិតក្នុងការថែទាំនៅផ្ទះ លោកអ្នកអាចចែករំលែកនូវទិន្នន័យវេជ្ជសាស្ដ្រគ្មានដែនកំណត់ជាមួយវេជ្ជបណ្ឌិតប្រចាំគ្រួសារ ដែលបន្ទាប់មក នឹងអាចធ្វើការទាក់ទងទៅកាន់អ្នកជំងឺវិញ»។
លោកបានបន្ថែមថា៖ «ខ្ញុំគិតដល់ ជីតាម្នាក់ ដែលទទួលសារដោយសរសេរថា (ចៅស្រឡាញ់តា) ពីចៅរបស់គាត់ ពួកគេប្រាកដជាមានអារម្មណ៍កក់ក្ដៅណាស់»។
ការបង្ហាញនោះមានអេក្រង់ LED ធុនតូចទំហំ ១៦ គុណ ២៤ និងអាចទាញដូចជ័រទន់។ វាក៏បំពាក់សេនស័រទម្ងន់ស្រាលផ្ទុកអេឡិចត្រុង «Nanomesh» សម្រាប់ខ្យល់ចេញចូល និងប្រព័ន្ធទាក់ទងឥតខ្សែ។ វាត្រូវបានបំពាក់លើរាងកាយមនុស្សមួយសប្ដាហ៍ ដោយវាមានទម្ងន់ស្រាល ដែលអ្នកប្រើប្រាស់អាចភ្លេចថា ខ្លួនកំពុងពាក់ឧបករណ៍តាមដាននេះទៀត។
លោក សូម៉េយ៉ា បានផលិតឧបករណ៍នេះដោយសហការជាមួយក្រុមហ៊ុនយក្សជប៉ុន Dai Nippon Printing ដែលរំពឹងថានឹងដាក់លក់លើទីផ្សារនៅពេល ៣ ឆ្នាំទៀត៕
