.jpg)
ការចេញចូលរថយន្តត្រូវបានបញ្ជាដោយទូរស័ព្ទស្មាតហ្វូនដើម្បីបើកទ្វារស្លាបមេអំបៅត្រដាងឡើងលើ។
ក្រុងឡាសវេហ្គាស: Fisker EMotion បានបង្ហាញវត្ដមានយ៉ាងស្រស់សង្ហានៅពិព័រណ៍អេឡិចត្រូនិក (CES) ឆ្នាំ ២០១៨ នៅក្រុងឡាសវេហ្គាស កាលពីប៉ុន្មានថ្ងៃមុននេះ។
Fisker EMotion បំពាក់ថាមពលដោយម៉ូទ័រអគ្គិសនីមួយសំណុំដែលបញ្ចេញថាមពលយ៉ាងតិច ៥៧៥ គីឡូវ៉ាត់ និងបញ្ជូនថាមពលទៅកាន់កង់ទាំង។ Fisker EMotion មានទំហំកង់ ២៤ អ៊ិញស័ក្ដិសមនឹងកៅស៊ូកង់ធន់នឹងការមុតធ្លាយ Pirelli។
ក្រុមហ៊ុនបានអះអាងថា រថយន្ដនេះអាចមានល្បឿនស្ទុះពី ០ ទៅ ១០០ គីឡូម៉ែត្រក្នុង ១ ម៉ោងនូវថិរវេលាស្ដង់ដារក្រោម ៣ វិនាទី និងល្បឿនកំពូលដល់ទៅ ២៥៩ គីឡូម៉ែត្រក្នុងមួយម៉ោង។
ពេលបើកសម្ពោធ Fisker EMotion នឹងអាចមានសមត្ថភាពបរលើចម្ងាយផ្លូវ ៦៤៤ គីឡូម៉ែត្រ។ តែបន្ទាប់ពីបំពាក់ជាមួយប្រភេទអាគុយស៊េរីថ្មីនាពេលអនាគត Fisker EMotion នឹងបង្កើនសមត្ថភាពដល់ ៨០៥ គីឡូម៉ែត្រ ហើយពេលសាកថ្មត្រឹមតែមួយនាទីប៉ុណ្ណោះ។
ការចេញ និងចូលរថយន្ដម៉ូដែលអគ្គិសនីនេះត្រូវបានគ្រប់គ្រងដោយស្មាតហ្វូនដែលអាចបញ្ជាទ្វារស្លាបមេអំបៅ ឲ្យបើកបិទ។ ទ្វារនីមួយៗប្រើសេនស័រស្ទាប និងនៅក្បែរ ដែលវាអាចបើកបិទយ៉ាងរលូនតាមតម្រូវការ។
បរិក្ខារខាងក្នុងរថយន្តមានភាពប្រណីតជា លក្ខណៈរថយន្តស្ព័រ។
កាប៊ីនរថយន្ដស្រោបនូវស្បែកទន់ល្មើយ ជាមួយនឹងជម្រើសបរិក្ខារផ្ទៃក្នុងបែបអ្នកនិយមបរិស្ថាន។ នៅផ្នែកខាងមុខ មានអេក្រង់បញ្ជាការបើកបរចំនួន ៣ រួមទាំង អេក្រង់កោងចំកណ្ដាលតាប្លូមួយ។ នៅផ្នែកខាងក្រោយ EMotion អាចបំពាក់អេក្រង់កោងទំហំ ២៧ អ៊ិញមួយទៀត។
EMotion មានកៅអី ៤ ភ្ជាប់ជាមួយនូវម៉ូទ័រអគ្គិសនីសេរ៉េទីតាំងកៅអីគ្រប់ទាំង៤ ឬក៏ប្រភេទកៅអី ៥ ជាមួយបង់វែងមួយនៅខាងក្រោយ។ បរិក្ខារផ្សេងៗទៀត រួមមាន រន្ធសាកថ្មទូរស័ព្ទ និងដំបូលកញ្ចក់អគ្គិសនីកែសម្រួលទៅតាមអាកាសធាតុ ៤ រដូវ។
បំពាក់សេនស័រ LIDAR ចំនួន ៥ គេជឿថា រថយន្ដ Fisker EMotion អាចមានសមត្ថភាពបើកបរស្វ័យប្រវត្ដិដល់កម្រិតទី ៤។
ផលិតផលរថយន្ដអគ្គិសនី Fisker EMotion នឹងបង្ហាញវត្ដមាននៅទីផ្សារសហរដ្ឋអាមេរិកកណ្ដាលឆ្នាំ ២០១៨ និងទីផ្សារសកលចាប់ពីឆ្នាំ ២០១៩ ទៅក្នុងតម្លៃចាប់ពី ១២៩០០០ ដុល្លារ៕HR
