.jpg)
រថយន្ត Lexus LF-1 ជាម៉ូដែលគំរូនៃថ្ងៃអនាគត ត្រូវបានបង្ហាញក្នុងពិព័រណ៍រថយន្តមុននេះ។ AFP
ក្រុងញូវយ៉ក: Lexus បានបង្ហាញនូវម៉ូដែល crossover អនាគតប្រណីតថ្មីសន្លាងនៅពិព័រណ៍រថយន្ដអន្ដរជាតិអាមេរិកខាងជើង នាសប្ដាហ៍នេះឈ្មោះ The LF-1 Limitless ដែលមានរាងស្លីម ស្ព័រ រួមទាំងការឌីហ្សាញទៅតាមចំណូលចិត្ដអតិថិជនថែមទៀត។
Lexus LF-1 ត្រូវបានរចនាឡើងសម្រាប់ប្រើថាមពលទាំងម៉ាស៊ីនម៉ាស៊ូត កូនកាត់ សាំង ឬថាមពលអគ្គិសនីទាំងស្រុង ហើយនេះជាអ្វី ដែល Lexus កំពុងស្វះស្វែងដាក់ឲ្យដំណើរការប្រព័ន្ធថាមពលនេះលើម៉ូដែលរថយន្ដរបស់ខ្លួនទាំងអស់នៅមុនឆ្នាំ ២០២៥ ខាងមុខ។
រថយន្ដនេះក៏បានបំពាក់នូវអំពូល LED ជុំវិញចម្រឹងខ្យល់ខាងមុខសម្រាប់ជាសញ្ញាដល់អ្នកបើកបរខាងមុខ និងអ្នកដទៃបានដឹង ហើយពន្លឺខ្សែបណ្ដែតរបស់វាបង្ហាញពីសមត្ថភាពជារថយន្ដស្ព័រ ព្រមទាំង ចេះប្រែប្រួលតាមកាលៈទេសៈ។
Lexus IS ក៏បានប្រើបច្ចេកវិទ្យាស្វ័យប្រវត្ដិមួយចំនួន ដូចជា ការចូលចតដោយខ្លួនឯង និងប្រព័ន្ធគ្រប់គ្រងទិសដៅចង្កូតតាមរយៈម៉ូទ័រអគ្គិសនី និងសញ្ញាហ្រ្វាំងជាដើម។
រថយន្ដនេះ ក៏បំពាក់បច្ចេកវិទ្យា ដែលក្រុមហ៊ុនបានហៅថា «ប្រព័ន្ធបញ្ជាចង្កូត ៤ សណ្ឋាន»។ វាមានន័យថា រថយន្ដថ្មីសន្លាងនេះប្រើជំនួយបច្ចេកវិទ្យាឆ្លាតវៃ សម្រាប់គោលដៅបន្ទាប់ដោយអាស្រ័យលើគម្រោង និងព័ត៌មានផ្ទាល់ខ្លួនរបស់អ្នក។
រថយន្ដនេះ អាចស្នើសុំអ្នកបើកបរឈប់សម្រាកមួយភ្លែត និងអាចណែនាំសណ្ឋាគារសម្រាប់ស្នាក់នៅ ហើយវាថែមទាំងធ្វើការកក់សំបុត្រយន្ដហោះទៀតផង។ Lexus បានហៅវាថា «អាសម្លាញ់ចេះយល់ចិត្ដ»។
បរិក្ខារខាងក្នុងរថយន្តបំពាក់បច្ចេកវិទ្យាដ៏ឆ្លាតវៃបំផុត។ AFP
ស្ដាប់ទៅ វាហាក់បីដូចជាជំនួយការផ្ទាល់ខ្លួនដ៏វៃឆ្លាតម្នាក់ដែលផ្សារភ្ជាប់ទំនាក់ទំនងតាមរយៈទូរស័ព្ទស្មាតហ្វូន។
កាប៊ីនមុខបំពាក់អេក្រង់រាងត្រីកោណ តែវាមិនស្ថិតនៅចំពីមុខនោះទេ។ អេក្រង់ត្រីកោណទាំងនេះស្ថិតនៅក្រោមក្រសែភ្នែកអ្នកបើកបរ។ មានវិធីចូលក្នុងរថយន្ដ ២ បែប ដោយទី ១ ការប្រើប្រាស់កម្មវិធីទូរស័ព្ទ ខណៈអ្នកដំណើរដទៃអាចចូលក្នុងរថយន្ដដោយការចុចលើដៃទ្វាររថយន្ដផ្ទាល់។ ការគ្រប់គ្រងពន្លឺ និងទ្វារគឺស្ថិតនៅលើបន្ទះកញ្ចក់ខាងលើ។
អ្នកដំណើរដែលអង្គុយកៅអីក្រោយ សុទ្ធមានអេក្រង់ផ្ដល់មុខងារកម្សាន្ដដ៏សម្បូរបែបរៀងៗខ្លួន ហើយការគ្រប់គ្រងលើកម្ដៅកៅអី ពន្លឺ និងបច្ចេកវិទ្យាផ្សេងៗ សុទ្ធតែប្រើលើប៊ូតុងថាច់ស្គ្រីនទាំងអស់។
នៅមានប៊ូតុងថាច់ស្គ្រីនបង្កប់ក្នុងរថយន្ដទាំងនៅលើទ្វារ និងក្រោមតាប្លូថែមទៀត។ លើសពីនេះ Lexus LF-1 បំពាក់នូវប្រព័ន្ធតាមដានចង្វាក់បេះដូងសម្រាប់អ្នកបញ្ជាចង្កូតរថយន្ដផងដែរ៕HR
