Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​បំពេញ​ចន្លោះ​ប្រហោង​ក្នុង​វិស័យ​ពាណិជ្ជកម្ម​អនឡាញ

Content image - Phnom Penh Post
ការ​ដឹក​ជញ្ជូន​ទំនិញ​របស់ Amazon ពី​ទីតាំង​ដើម​នៅ​សហរដ្ឋអាមេរិក​តាមរយៈ Prime Now នៅ​សិង្ហបុរី​កំពុង​មាន​ការ​រីក​លូតលាស់​ខ្លាំង​យ៉ាង​ឆាប់​រហ័ស​។ រូបថត supplied

ការ​បំពេញ​ចន្លោះ​ប្រហោង​ក្នុង​វិស័យ​ពាណិជ្ជកម្ម​អនឡាញ

ទីបំផុត​គេហទំព័រ​លក់​ទំនិញ​អនឡាញ amazon.com បាន​មក​ដល់​អាស៊ី​អាគ្នេយ៍​ហើយ ប៉ុន្តែ​អ្នក​លក់​ផលិតផល​ធំៗ​នៅ​លើ​គេហទំព័រ​ខ្នាត​យក្ស​នេះ​នៅ​តែ​មិន​ទាន់​មាន​សេវា​បញ្ចូន​មក​ក្នុង​ប្រទេស​កម្ពុជា​នៅ​ឡើយ​ដដែល​។

បើ​ទោះ​ជា​យ៉ាង​នេះ​ក្តី​មាន​ក្រុមហ៊ុន​ក្នុង​ស្រុក​ចំនួន​ ២ ដែល​ផ្តល់​សេវា​នេះ​ដើម្បី​បំពេញ​ចន្លោះ​ដែល​កម្ពុជា​មិន​ទាន់​មាន​ហើយ​សេវា​របស់​ក្រុមហ៊ុន​ទាំង​​ ២ ​នេះ​អនុញ្ញាត​ឲ្យ​ប្រជាជន​កម្ពុជា​អាច​ធ្វើការ​កុម្ម៉ង់​ទិញ​អីវ៉ាន់​បាន​ច្រើន​ប្រភេទ​ហើយ​អាច​ដឹកជញ្ជូន​ដល់​គេហដ្ឋាន​នៅ​កម្ពុជា​តែ​ម្តង​។

នៅ​ពេល​គេហទំព័រ​លក់​ផលិតផល​អនឡាញ​ខ្នាត​យក្ស​មួយ​នេះ​បាន​ចាប់ផ្តើម​សេវា​របស់​ខ្លួន​ឈ្មោះ​ថា Prime Now ក្នុង​ប្រទេស​សិង្ហបុរី​កាលពី​ប៉ុន្មាន​ខែ​កន្លង​ទៅ​នេះ​វា​បាន​ទទួល​ការ​កុម្ម៉ង់​យ៉ាង​ច្រើន​កុះករ​។

ក្នុង​រយៈពេល​តែ​ប៉ុន្មាន​ម៉ោង​បន្ទាប់ពី​គេហទំព័រ​នេះ​ចាប់ផ្តើម​ទទួល​ការ​កុម្ម៉ង់​ចំនួន​នៃ​ការ​កុម្ម៉ង់​នោះ​បាន​ធ្វើ​ឲ្យ​កម្មវិធី​សេវា​ដឹកជញ្ជូន​គាំង​លែង​ដំណើរការ​។ ដើម្បី​ឆ្លើយតប​ទៅ​នឹង​តម្រូវការ​យ៉ាង​ច្រើន​កុះករ​នេះ Amazon បាន​សម្រេច​ចិត្ត​ជួល​រថយន្ត​តាក់ស៊ី និង​រថយន្ត Uber ឲ្យ​ដឹក​ទំនិញ​ជូន​អតិថិជន​របស់​ខ្លួន​បន្ថែម​ទៀត​។

ប្រទេស​សិង្ហបុរី​គឺជា​ប្រទេស​ដំបូង​គេ​នៅ​អាស៊ីអាគ្នេយ៍​ដែល Amazon បាន​មក​បោះ​ទីតាំង​ហើយ​កម្មវិធី Prime Now ដ៏ធំ​នៅ​ប្រទេស​នេះ​បាន​និង​កំពុង​តែ​បើក​ទ្វារ​ឲ្យ​អតិថិជន​ក្នុង​ប្រទេស​នេះ​ធ្វើការ​កុម្ម៉ង់​មុខ​ទំនិញ​រាប់ពាន់​មុខ​ទាំង​គ្រឿង​ទេស​សម្លៀក​បំពាក់ និង​ឧបករណ៍​អេឡិចត្រូនិក ទន្ទឹម​នឹង​ការ​ប្តេជ្ញា​ដឹកជញ្ជូន​ទំនិញ​ពី​ឃ្លាំង​របស់​ខ្លួន​ទៅ​ដល់​អាសយដ្ឋាន​កុម្ម៉ង់​គឺ​តែ​ក្រោម​រយៈពេល​ ២ ​ម៉ោង​ប៉ុណ្ណោះ​។

ខណៈ​ដែល​ស្តុក​ទំនិញ​របស់​កម្មវិធី Prime Now នៅ​មាន​កំណត់ បើ​ធៀប​ទៅ​នឹង​ស្តុក​ធំៗ​នៅ​សហរដ្ឋ​អាមេរិក​ដែល​មាន​ទំនិញ​ដល់​ទៅ​ជាង​ ៤០០ ​លាន​មុខ​រាប់​ទាំង​ទំនិញ​របស់​ក្រុមហ៊ុន និង​អ្នក​លក់​ឯកជន​នៅ​លើ​គេហទំព័រ​នេះ​កម្មវិធី​នេះ​ត្រូវ​បាន​គេ​រំពឹង​ថា​នឹង​រីក​លូតលាស់​យ៉ាង​ខ្លាំង​។

នេះ​អាច​ជា​ដំណឹង​ដ៏ល្អ​បំផុត​មួយ​ប្រសិន​បើ​អ្នក​រស់នៅ​ប្រទេស​សិង្ហបុរី ​ប៉ុន្តែ​សម្រាប់​អ្នក​នៅ​ប្រទេស​កម្ពុជា​វិញ​មុខ​ទំនិញ​ជាច្រើន​នៅ​គេហទំព័រ​មួយ​នេះ​នៅ​តែ​មិន​ទាន់​អាច​ដឹក​មក​ប្រទេស​នេះ​បាន​នៅ​ឡើយ​។ រាល់​ពេល​អ្នក​ព្យាយាម​ទិញ​ទំនិញ​លើ​គេហទំព័រ​នេះ​អ្នក​នឹង​ទទួល​បាន​សារ​ធ្វើ​ឲ្យ​អ្នក​មិន​សប្បាយ​ចិត្ត​ថា៖ «​យើង​សូម​អភ័យទោស​។ ​មុខ​ទំនិញ​នេះ​មិន​អាច​ដឹក​ជញ្ជូន​ទៅ​គោលដៅ​ដែល​អ្នក​បាន​ជ្រើសរើស​នោះ​ទេ​។​»

ប៉ុន្តែ​ជា​សំណាង​ល្អ​សម្រាប់​អ្នក​ដែល​ចង់​ទិញ​អីវ៉ាន់​នៅ​លើ​គេហទំព័រ​នេះ គឺ​មាន​មធ្យោបាយ​ដែល​អាច​ជួយ​បាន​។ តាំងពី​ឆ្នាំ​ ២០១៤ Cambo Quick គឺជា​ភ្នាក់ងារ​នាំ​យក​ទំនិញ​ពី​គេហទំព័រ​នេះ​ដោយ​ទទួល​ការ​កុម្ម៉ង់​ពី​ប្រទេស​កម្ពុជា តែ​ម្តង​ដោយ​ភ្នាក់ងារ​ទទួល​បន្ទុក​គ្រប់​យ៉ាង​ក្នុង​ការ​បំពេញ​ឯកសារ​ផ្សេងៗ​ហើយ​ដឹក​ជូន​ដល់​ដៃ​អ្នក​កុម្ម៉ង់​តែ​ម្តង​។

ស្ថាបនិក Cambo Quick ដែល​មាន​ឈ្មោះ​ថា Michael បាន​ថ្លែង​ថា​សេវា​ដឹកជញ្ជូន​របស់​លោក​បាន​ចាប់ផ្តើម​នៅ​ពេល​ដែល​លោក​ស្វែងរក​វិធី​ដឹក​អីវ៉ាន់​ដែល​លោក​ចង់​ទិញ​ពី Amazon​។

ដូច​គ្នា​ទៅ​នឹង​សេវា​ដឹក​អីវ៉ាន់​បន្ត​ដែរ Cambo Quick ធ្វើការ​កុម្ម៉ង់​អីវ៉ាន់​ទៅ​អាសយដ្ឋាន​ដើម​នៅ​សហរដ្ឋ​អាមេរិក​បន្ទាប់មក​សរុប​មុខ​ទំនិញ​ហើយ​បញ្ចូន​បន្ត​មក​អាសយដ្ឋាន​នៅ​វៀតណាម​រៀងរាល់​មួយ​សប្តាហ៍​ម្តង​។ បន្ទាប់​មក​ទៀត​គេ​ផ្ទេរ​ទំនិញ​ទាំង​នេះ​មក​ប្រទេស​កម្ពុជា​តាមរយៈ​រថយន្ត-ក្រុង​ដោយ​ចាប់​ផ្តើម​ទទួល​ការ​កុម្ម៉ង់​ចាប់ពី​ ២៥ ​ដុល្លារ​ឡើង និង​មិន​គិត​ថ្លៃ​ដឹក​ជញ្ជូន​ក្នុង​ទីក្រុង​ភ្នំពេញ​។

អត្រា​កម្រៃ​សេវា​គឺ​ស្តង់ដារ​៖ Amazon ចេញ​វិក្កយបត្រ​មួយ​ដឹក​ទៅ​អាសយដ្ឋាន​នៅ​សហរដ្ឋអាមេរិក​ដោយ Cambo Quick យក​កម្រៃ​ដឹក ៦ ​ដុល្លារ​ក្នុង​ ១ ​ផោន​ (​ប្រហែល​​ ១៣ ​ដុល្លារ​ក្នុង ១ ​គីឡូ​) សម្រាប់​ការ​ដឹក​ឆ្លង​ប្រទេស​តាម​ជើង​ហោះហើរ​ក៏​ដូចជា​ការ​យក​កម្រៃ​ ៥ ​ភាគរយ​ប៉ុណ្ណោះ​សម្រាប់​សេវា​រត់​ការ​យក​ទំនិញ​ដើម្បី​បង់​ថ្លៃ​ពន្ធ​អីវ៉ាន់​ថ្លៃៗ​គ្រប់គ្រង និង​សេវា​ធានា​រ៉ាប់រង​ក៏​ដូចជា​ «​ថ្លៃ​សេវា​សម្របសម្រួល​» ដើម្បី​កាត់បន្ថយ​ការ​បង់ពន្ធ​ផង​ដែរ​។

លោក Michael និង​បុគ្គលិក​ចំនួន​ ២ ​រូប​ទៀត​ជា​អ្នក​រ៉ាប់រ៉ង​រត់​ការ​បំពេញ​ឯកសារ​ចាំបាច់​នានា​សម្រាប់​ការ​ដឹក​ជញ្ជូន​នៅ​ព្រំដែន​កម្ពុជា បើ​ទោះ​ជា​ទំនិញ​ខ្លះ​ដែល​មាន​តម្លៃ​ទាប​ជាង​ ២០០ ​ដុល្លារ​អាច​នាំ​ចូល​មក​កម្ពុជា​ដោយ​ពុំ​ចាំបាច់​បង់ពន្ធ​ក្រោម​ច្បាប់​អនុគ្រោះ​ជា​ទ្រព្យសម្បត្តិ​ផ្ទាល់​ខ្លួន​ក៏ដោយ​។

លោក​ថ្លែង​ថា៖ «​ខ្ញុំ​ជា​អ្នក​ចេញ​មុខ​តំណាង​ឲ្យ​អតិថិជន​ក្នុង​ការ​រត់ការ​ឯកសារ​សម្រាប់​ការ​ដឹកជញ្ជូន​ទំនិញ​មក​កម្ពុជា​។ ទំនិញ​ទាំង​នេះ​មិនមែន​សម្រាប់​លក់​វិញ​នោះ​ទេ ដូច្នេះ​ការ​រត់​ការ​ត្រូវ​ឆ្លង​កាត់​ការិយាល័យ​តិច​ជាង​។ រីឯ​ការ​បង់​ពន្ធ​ក៏​មាន​ភាព​ងាយស្រួល​សម្រាប់​អីវ៉ាន់​ទិញ​ពី Amazon ផង​ដែរ​»​។

Cambo Quick ទទួល​ការ​កុម្ម៉ង់​ប្រមាណ​ចំនួន​ ៣០០ ​លើក​ក្នុង​ ១ ​ខែ​ដោយ​តួលេខ​កើន​ខ្ពស់​ក្នុង​អំឡុង​រដូវកាល​ឈប់​សម្រាក​។

លោក Michael ថ្លែង​ថា​លោក​អាច​នាំ​ចូល​អ្វី​ក៏​បាន ប៉ុន្តែ​អ្នក​ប្រហែល​ជា​មិន​ចង់​កុម្ម៉ង់​ទូទឹកកក​ទ្វារ បែប​បារាំង ឬ​ឈុត​តុ​ញ៉ាំ​បាយ​នោះ​ទេ​។ លោក​ផ្តល់​ជា​យោបល់​ថា​គួរ​ទិញ​សម្ភារ​ណា​ដែល​ «​មាន​តម្លៃ​ខ្ពស់​ប៉ុន្តែ​តូច​ស្រាល​វិញ​» ដោយ​បន្ថែម​ថា​អីវ៉ាន់​ចាប់ពី ២០០ ​គីឡូ​ឡើង​ទៅ​អាច​ដឹក​មក​បាន​មាន​តម្លៃ​ថោក​ជាង​តាមរយៈ​កប៉ាល់​ផ្លូវ​សមុទ្រ​។

ប្រាកដ​ណាស់​ថា​មាន​មធ្យោបាយ​មួយ​ទៀត​។ នោះ​គឺ​គេហទំព័រ និង​ទំព័រ​ហ្វេសប៊ុក Fado168 ដែល​អាច​ទទួល​ការ​កុម្ម៉ង់​ពី​ក្នុង​ស្រុក​សម្រាប់​ទំនិញ​ណា​ក៏​បាន​ពី Amazon​។ អតិថិជន​អាច​ជ្រើសរើស​ទំនិញ​ពី Fado168 ឬ​គ្រាន់​តែ​កូពី និង​ដាក់ link របស់​ទំនិញ​ពី Amazon ដើម្បី​ទទួល​បាន​ការ​គណនា​តម្លៃ​ដឹក​ជញ្ជូន​ទៅ​កាន់​អាសយដ្ឋាន​នៅ​កម្ពុជា​។ ទំនិញ​ដែល​បាន​កុម្ម៉ង់​នឹង​មក​ដល់​ចន្លោះ​ពី​ ១០ ​ថ្ងៃ​ទៅ​ ២០ ​ថ្ងៃ​ដោយ​រាប់​បញ្ចូល​តែ​ថ្ងៃ​ធ្វើការ​ប៉ុណ្ណោះ​។

«​គ្រាន់តែ​ផ្ញើ link ផលិតផល​របស់​អ្នក​នោះ Fado168 នឹង​ផ្តល់​ការ​គណនា​តម្លៃ និង​ការ​ដឹក​ទំនិញ​ទាំង​នោះ​ពី​សហរដ្ឋ​អាមេរិក​មក​ដល់​ដៃ​អ្នក​នៅ​កម្ពុជា​» នេះ​ជា​ការ​លើក​ឡើង​ក្នុង​គេហទំព័រ​របស់​ក្រុមហ៊ុន​នេះ​។

ចាប់​តាំងពី​ថ្ងៃ​ចាប់​កំណើត Fado168 បាន​ទទួល​ការ​កុម្ម៉ង់​ច្រើន​ជាង​ ២ ​សែន​លើក​ហើយ​ទទួល​ការ​ទូទាត់​ប្រាក់​តាមរយៈ​ភ្នាក់ងារ Wing កាត​ឥណទាន​ដាក់​ប្រាក់​ក្នុង​គណនី​ធនាគារ ឬ​បង់ប្រាក់​ផ្ទាល់​នៅ​ការិយាល័យ​របស់​ខ្លួន​ក្នុង​ទីក្រុង​ភ្នំពេញ​។

Amazon កំពុង​តែ​ជួប​នឹង​ដៃគូ​ប្រជែង​ដ៏ធំ​របស់​ខ្លួន​នៅ​អាស៊ីអាគ្នេយ៍​គេហទំព័រ​ចិន Alibaba ដែល​បាន​ឈាន​ជើង​ចូល​ទីផ្សារ​ក្នុង​តំបន់​នេះ​កាលពី​ឆ្នាំ​មុន នៅពេល​ដែល​ក្រុមហ៊ុន​នេះ​បាន​ទិញ​ភាគហ៊ុន​ដ៏ធំ​នៅ​អាស៊ី-អាគ្នេយ៍​ពី​គេហទំព័រ​លក់​ទំនិញ​អនឡាញ​ដ៏ធំ​បំផុត​នៅ​អាស៊ី-​អាគ្នេយ៍​ដែល​មាន​ឈ្មោះ​ថា Lazada​។ ខណៈ​គេហទំព័រ​ខ្នាត​យក្ស​ចំនួន​ ២ ក្នុង​តំបន់​នេះ​កំពុង​ពង្រីក​ខ្លួន​ហើយ​គេហទំព័រ​ក្នុង​ស្រុក​ពង្រីក​មុខ​ទំនិញ​ដែល​អាច​កុម្ម៉ង់​បាន​ដែរ​នោះ​សេវា​ដឹក​ជញ្ជូន​ក្នុង​ស្រុក​ដែល​កំពុង​ដំណើរការ​ទាំងនេះ​អាច​នឹង​ជួប​ភាព​ធ្លាក់​ចុះ​នៃ​សេវាកម្ម​ប្រើប្រាស់​ដោយ​ចៀស​មិន​ផុត​។

លោក Michael ថ្លែង​ថា ៖ «​នៅពេល Amazon បើក​ការ​ដឹក​ជញ្ជូន​មក​ប្រទេស​កម្ពុជា​ដែរ​នោះ​វា​គឺជា​ពេល​ដែល Cambo Quick លែង​មាន​តម្រូវការ​តទៅ​ទៀត​» ​ហើយ​៕

0

Comments

Please, login or register to post a comment