Search form

Login - Register | FOLLOW US ON

Logo of Phnom Penh Post newspaper Phnom Penh Post - ទស្សនៈ​ឆ្លុះ​បញ្ចាំង​របស់​លោក​និពន្ធ​នាយក

Content image - Phnom Penh Post
លោក កៃ គឹមសុង ថតរូប​អនុស្សាវរីយ៍​ជាមួយ​លោក​រដ្ឋមន្ដ្រី​ក្រសួង​ព័ត៌មាន ខៀវ កាញារីទ្ធ នៅ​ស្ថានីយ​ទូរទស្សន៍ PNN ក្នុង​ខណ្ឌ​ព្រែកព្នៅ ជាយ​ក្រុង​ភ្នំពេញ​។ រូបថត សហការី

ទស្សនៈ​ឆ្លុះ​បញ្ចាំង​របស់​លោក​និពន្ធ​នាយក

ភ្នំពេញៈ នៅ​ពេល​បោះ​ជំហាន​ចូល​ទៅ​ក្នុង​ការិយាល័យ​របស់​លោក​ ​កៃ គឹមសុង និពន្ធ​នាយក​កាសែត​ភ្នំពេញ ប៉ុស្តិ៍​ភាសា​ខ្មែរ​ភ្លាម​អ្វី​ដែល​យើង​កត់សម្គាល់​ដំបូង​នោះ គឺ​ស៊ុម​ព្រះឆាយាល័ក្ខណ៍​របស់​ព្រះមហាក្សត្រ​នរោត្តម សីហមុនី នៅ​ថ្ងៃ​ដែល​ព្រះអង្គ​ឡើង​គ្រងរាជ្យ និង​មាន​រូបថត​របស់​មេដឹកនាំ​អាស៊ាន​មួយ​ចំនួន​ទៀត​ដែល​យើង​ឃើញ​ព្យួរ​នៅ​លើ​ជញ្ជាំង​ក្នុង​ការិយាល័យ​របស់​លោក​។

លោក​ថ្លែង​ថា​៖ «​យើង​គឺជា​គ្រួសារ​តែ​មួយ​។ រូបថត​ពួកគេ​បាន​ធ្វើឲ្យ​ខ្ញុំ​មាន​អារម្មណ៍​ថា ខ្ញុំ​ដូច​បាន​និង​កំពុង​រស់នៅ​ជាមួយ​ប្រជាជន​ជាង ៦០០ លាន​នាក់​ផ្សេង​ទៀត​»​។

លោក កៃ គឹមសុង ចាប់ផ្តើម​ការងារ​ដំបូង​ជា​ប្រធាន​ក្រុម​អ្នក​យក​ព័ត៌មាន​របស់​កាសែត​ភ្នំពេញ​ប៉ុស្តិ៍ ភាសា​អង់គ្លេស​នៅ​ក្នុង​ឆ្នាំ​ ២០០៨ មុន​ពេល​លោក​ទទួល​បាន​តំណែង​ជា​និពន្ធនាយក កាសែត​ភ្នំពេញ ប៉ុស្ដិ៍ ជា​ខេមរភាសា​នៅ​ក្នុង​ឆ្នាំ​ ២០០៩​។ មុន​ពេល​មក​ធ្វើការ​នៅ​កាសែត​ភ្នំពេញ ប៉ុស្តិ៍​លោក​ធ្លាប់​បាន​ចំណាយ​ពេល​មួយ​ទសវត្សរ៍​ធ្វើ​ជា​អ្នក​កាសែត​ឲ្យ​កាសែត The Cambodia Daily ។

នៅ​ពេល​សួរ​អំពី​ការ​ផ្លាស់ប្តូរ​សំខាន់ៗ​ដែល​បាន​កើតឡើង​នៅ​ក្នុង​ប្រទេស​កម្ពុជា​ក្នុង​រយៈពេល​ជាង​ ២៥ ​ឆ្នាំ​មក​នេះ លោក​បាន​បង្ហាញ​ពី​ឆ្នាំ​ជាក់លាក់​ចំនួន​បី​គឺ​ឆ្នាំ​ ១៩៩៣,១៩៩៨ និង​ឆ្នាំ​ ២០០០ ​។

លោក​ថ្លែង​ថា​នៅ​ក្នុង​ឆ្នាំ​ ១៩៩៣ ប្រទេស​កម្ពុជា​បាន​រៀបចំ​ការ​បោះឆ្នោត​ជាតិ​លើក​ដំបូង​របស់​ខ្លួន​ដែល​គាំទ្រ​ដោយ​អាជ្ញាធរ​អន្តរកាល​របស់​អង្គការ​សហប្រជាជាតិ​ហៅ​កាត់​ថា (​អ៊ុនតាក់​)​។

លោក​ គឹមសុង ថ្លែង​ថា​៖ «​វា​គឺជា​ការ​បោះឆ្នោត​លើក​ដំបូង​បន្ទាប់ពី​របប​ខ្មែរក្រហម​។ នៅ​ពេល​ដូច​គ្នា​នេះ​ដែរ​លទ្ធិប្រជាធិបតេយ្យ សិទ្ធិមនុស្ស និង​សេរីភាព​សារព័ត៌មាន​បាន​ចាប់កំណើត​ឡើង​។ រដ្ឋាភិបាល​បាន​អនុញ្ញាត​ឲ្យ​មាន​ប្រព័ន្ធ​ផ្សព្វផ្សាយ​ដែល​មាន​ជនបរទេស​ជា​ម្ចាស់​នៅ​ក្នុង​ប្រទេស​។ កាសែត​ភ្នំពេញ​ប៉ុស្តិ៍​ត្រូវ​បាន​បង្កើតឡើង​នៅ​ក្នុង​ឆ្នាំ​ ១៩៩២ ហើយ​ជា​បន្តបន្ទាប់​ក្រោយមក​ទៀត​មាន​ប្រព័ន្ធ​ផ្សព្វផ្សាយ​ដែល​គ្រប់គ្រង​ដោយ​បរទេស​ជាច្រើន​បាន​ចូល​មក​ប្រទេស​នេះ​»​។

លោក​បាន​បន្ត​ថា​៖ «​ចំណុច​សំខាន់​បន្ទាប់​គឺ​សន្តិភាព និង​ស្ថិរភាព​នៅក្នុង​រយៈពេល​ ២៥ ​ឆ្នាំ​មក​នេះ​។ សង្គ្រាម​ត្រូវ​បាន​បញ្ចប់​ទាំង​ស្រុង​នៅ​ក្នុង​ឆ្នាំ​ ១៩៩៨ នៅ​ពេល​លោក ហ៊ុន សែន នាយក​រដ្ឋមន្ដ្រី​កម្ពុជា​បាន​ប្រើ​គោលនយោបាយ​ឈ្នះ-ឈ្នះ​ដោយ​បាន​អញ្ជើញ​ពួក​ខ្មែរក្រហម​ឲ្យ​ចុះ​ចូល​ជាមួយ​រដ្ឋាភិបាល​។ ពួកគេ​មាន​តួនាទី​ក្នុង​រដ្ឋាភិបាល​ខ្លះ ប៉ុន្តែ​ពួកគេ​ស្ថិត​នៅ​ក្រោម​ការ​គ្រប់គ្រង​របស់​រដ្ឋាភិបាល​។ ពួកគេ​ត្រូវ​ផ្លាស់ប្តូរ​ផ្នត់​គំនិត​ និង​គោល​នយោបាយ​របស់​ពួកគេ ហើយ​ត្រូវ​ទទួល​យក​បទបញ្ជា​ពី​រដ្ឋាភិបាល​»​។

ដោយ​បាន​បង្ហាញ​ភាព​រីករាយ​តាមរយៈ​កែវភ្នែក​លោក​ គឹមសុង បាន​ហៅ​ទសវត្សរ៍ ឆ្នាំ​ ២០០០ ថា​ជា​ឆ្នាំ​នៃ​សហស្សវត្សរ៍​ថ្មី ឬ​ទំព័រ​ថ្មី​របស់​កម្ពុជា​។

Content image - Phnom Penh Post
លោក កៃ គឹមសុង មាន​វត្តមាន​នៅ​ពី​មុខ​ស្លាក​យីហោ ក្រុមហ៊ុន​ប៉ុស្ដិ៍ មេឌីយ៉ា លីមីតធីត ។ ស្រេង ម៉េងស្រ៊ុន

លោក​បាន​បញ្ជាក់​ថា​៖ «​ការ​អភិវឌ្ឍ​ភ្ញៀវទេសចរ​ ប្រាក់ចំណូល និង​ការ​វិនិយោគ បាន​ហូរ​ចូល​មក​។ ចាប់​តាំងពី​ពេល​នោះ​មក កំណើន​ផលិតផល​ក្នុង​ស្រុក​សរុប (GDP) ប្រចាំ​ឆ្នាំ​បាន​កើនឡើង​ជា​មធ្យម​ប្រហែល​ប្រាំពីរ​ភាគរយ​»​។

បើ​យោង​តាម​លោក​ គឹម ​សុង ​ប្រទេស​កម្ពុជា​ទទួល​បាន​នូវ​ការ​ផ្លាស់ប្តូរ​ដ៏គួរ​ឱ្យ​កត់សម្គាល់​គិត​ចាប់​តាំងពី​ដើម​សតវត្សរ៍​ទី​​ ២១ ​នេះ​មក​។

លោក​មាន​ប្រសាសន៍​ថា​៖ «​កម្ពុជា​មាន​ផ្លូវថ្នល់ សាលារៀន មន្ទីរពេទ្យ ភោជនីយដ្ឋាន ជាច្រើន​បាន​កើតឡើង​ហើយ​ប្រជាពលរដ្ឋ​កំពុង​ទទួល​បាន​ការ​អប់រំ​កាន់តែ​ល្អ​ប្រសើរ​ជាង​មុន​។ គ្រប់​គ្នា​និយាយ​ថា​ប្រទេស​កម្ពុជា​បាន​ឈាន​ចូល​ដល់​សករាជ​ថ្មី​មួយ​គិត​ចាប់​តាំងពី​ឆ្នាំ​ ២០០០ មក​»​។

សម្រាប់​លោក​ គឹមសុង ទោះបី​ជា​សន្តិភាព និង​ការ​អភិវឌ្ឍ​កំពុង​មាន​វត្តមាន​នៅ​ក្នុង​សង្គម​កម្ពុជា​កាន់តែ​ច្រើន​ក្តី ប៉ុន្តែ​រឿងរ៉ាវ​ជាច្រើន​ទៀត​ដែល​ត្រូវ​ធ្វើ​ដើម្បី​កែលម្អ​សង្គម​ឲ្យ​កាន់តែ​មាន​លក្ខណៈ​ល្អប្រសើរ​ឡើង​។

លោក​បាន​ថ្លែង​ថា​៖ «​ជំងឺ​ខ្វះ​យុត្តិធម៌​សង្គម​នៅ​ទី​នេះ​គឺ​អំពើ​ពុករលួយ​។ រាជរដ្ឋាភិបាល​គ្រាន់​តែ​យក​ចិត្ដ​ទុក​ដាក់​ចំពោះ​តែ​សន្តិភាព និង​ការ​អភិវឌ្ឍ​ប៉ុណ្ណោះ​។ ប៉ុន្តែ​សន្ដិភាព និង​ការ​អភិវឌ្ឍ​នេះ​អាច​ត្រូវ​បាន​បំផ្លាញ​ដោយសារ​តែ​គ្មាន​យុត្តិធម៌​សង្គម​។ ប្រជាពលរដ្ឋ​ត្រូវការ​ជីវិត​រស់នៅ​ដែល​មាន​យុត្តិធម៌​»​។

នៅ​ពេល​និយាយ​ដល់​ឥទ្ធិពល​នៃ​ការ​បោះពុម្ព​ផ្សាយ​កាសែត​ភ្នំពេញ-ប៉ុស្តិ៍​ក្នុង​រយៈពេល​ជាង​ ២៥ ​ឆ្នាំ​មក​នេះ​លោក​ គឹមសុង បាន​កត់សម្គាល់​ថា​វា​បាន​ជួយ​ផ្ដល់​នូវ​សេរីភាព​សារព័ត៌មាន​ដែល​កម្ពុជា​កំពុង​រីករាយ​ទទួល​បាន​នាពេល​បច្ចុប្បន្ន​នេះ​។

លោក​បាន​បញ្ជាក់​បន្ថែម​ទៀត​ថា​៖ «​យើង​គឺជា​គំរូ​មួយ​។ ឯករាជភាព អព្យាក្រឹត ហើយ​យើង​និយាយ​ការពិត​ជាមួយ​អ្នកអាន​របស់​យើង ទោះ​ជា​នៅ​ក្នុង​លក្ខខណ្ឌ​ណា​ក៏ដោយ​។ យើង​ទទួល​បាន​នូវ​ការ​គោរព​យ៉ាង​ច្រើន​ពី​សាធារណជន​។

កាសែត​ ភ្នំពេញ​ ប៉ុស្តិ៍​ គឺជា​សាកល​វិទ្យាល័យ​នៃ​ប្រព័ន្ធ​ផ្សព្វផ្សាយ និង​សារព័ត៌មាន​ដ៏ល្អ​មួយ​។ នៅពេល​ដែល​ខ្ញុំ​បាន​ចាប់ផ្តើម​ធ្វើ​ជា​អ្នក​កាសែត​នៅ​ពេល​នោះ​មិន​មាន​សាលារៀន​កាសែត​ទេ​គឺ​មាន​តែ​ការ​អនុវត្ត​ប៉ុណ្ណោះ​។

កាសែត​ភ្នំពេញ ប៉ុស្តិ៍ បាន​ផ្តល់​នូវ​សំឡេង​មួយ​ដល់​សាធារណជន​នៅ​ក្នុង​រយៈពេល ២៥ ​ឆ្នាំ​កន្លង​មក​នេះ​ហើយ​ខ្ញុំ​ជឿជាក់​ថា​មាន​រឿង​ដែល​មាន​គុណភាព​ជាច្រើន​ដែល​យើង​បាន​បោះពុម្ព​ផ្សាយ​»​។

ជា​ឧទាហរណ៍​លោក​ គឹមសុង បាន​ចង្អុល​បង្ហាញ​ថា​កាល​ពី​ឆ្នាំ​ ១៩៩៧ ​នៅពេល​ដែល​លោក Nate Thayer ជា​អតីត​អ្នក​កាសែត​ឯករាជ្យ​ដែល​បាន​ធ្វើការ​ឲ្យ​កាសែត​ភ្នំពេញ​ប៉ុស្តិ៍​លោក​បាន​ទៅ​ធ្វើ​បទសម្ភាស​មួយ​ជាមួយ​លោក ប៉ុល ពត នៅ​ស្រុក​អន្លង់វែង ខេត្ត​ឧត្តរមានជ័យ ក្បែរ​ព្រំដែន​ថៃ​មុន​ពេល​គាត់​ស្លាប់​។

លោក​ថ្លែង​ថា​៖ «​យើង​បាន​ធ្វើ​រឿង​ហ្នឹង​មុន​គេ​។ លោក [Thayer] គឺជា​មនុស្ស​តែ​ម្នាក់​គត់​ដែល​បាន​ធ្វើ​រឿង​នេះ ហើយ​ក្រោយ​មក​រឿង​នេះ​បាន​ល្បី​សុសសាយ​»​។

លោក​ គឹមសុង បាន​បន្ដ​ថា​៖​ «​យើង​ក៏​បាន​ផ្ដល់​ការ​អប់រំ​ដោយ​ប្រយោល​ដល់​ប្រជាជន​ខ្មែរ​រាប់​លាន​នាក់​តាមរយៈ​កាសែត និង​ប្រព័ន្ធ​ផ្សព្វផ្សាយ​សង្គម​ផង​ដែរ​។ ក្នុង​ផ្នែក​ធំៗ​ទាំង​ប្រាំ​នៅ​ក្នុង​កាសែត​ភ្នំពេញ​ប៉ុស្តិ៍ រឿងរ៉ាវ​ស៊ីជម្រៅ​របស់​យើង​បាន​ជួយ​ឱ្យ​ពួកគេ​យល់​អំពី​សង្គម​របស់​ពួកគេ​។ មាន​មេរៀន​មួយ​ចំនួន​គឺ​នៅឯ​សាលា​មិន​មាន​បង្រៀន​នោះ​ទេ ប៉ុន្តែ​នៅក្នុង​ប្រព័ន្ធ​ផ្សព្វផ្សាយ​មាន​គ្រប់​បែប​យ៉ាង​»​។

លោក គឹមសុង បាន​បន្ថែម​ទៀត​ថា​កាសែត​ភ្នំពេញ​ប៉ុស្តិ៍​ជា​ភាសា​ខ្មែរ បាន​ក្លាយ​ទៅ​ជា​កាសែត​មួយ​សម្រាប់​ប្រជាជន​ខ្មែរ​ធ្វើការ​ផ្ទៀងផ្ទាត់​ព័ត៌មាន​ផ្សេងៗ​ដែល​នៅ​ជុំវិញ​ពួកគេ​។ លោក​បាន​រៀបរាប់​នៅ​ពេល​ដែល​កាសែត​ភ្នំពេញ ប៉ុស្តិ៍ ភាសា​ខ្មែរ​បាន​ចាប់ផ្តើម​ដំបូង​នៅ​ថ្ងៃ​ទី ៩ ខែ​កញ្ញា ឆ្នាំ​ ២០០៩ គឺ​នៅ​ពេល​នោះ​ប្រធាន​ផ្នែក​ទីផ្សារ​បាន​យក​កាសែត​ទៅ​លក់​នៅ​ខេត្ត​កំពត​។

Content image - Phnom Penh Post
លោក កៃ គឹមសុង ធ្វើការ​ពន្យល់​និស្សិត​សារព័ត៌មាន​ជប៉ុន​ដែល​មក​ធ្វើ​ទស្សនកិច្ច​នៅ​ការិយាល័យ​កាសែត​ភ្នំពេញ ប៉ុស្ដិ៍​។ ហេង ជីវ័ន

លោក​ គឹមសុង ​ថ្លែង​ថា​៖ «​គ្រប់​គ្នា​រត់​មក​កាន់​រថយន្ត​របស់​យើង ហើយ​សួរ​ថា​តើ​ពួក​ខ្ញុំ​អាច​សុំ​កាសែត​ខ្លះ​បាន​ទេ​? យើង​រំពឹង​ថា​ពួកគេ​ប្រាកដ​ជា​ចង់​អាន​កាសែត ប៉ុន្តែ​តាម​ការពិត​មិនមែន​អ៊ីចឹង​ទេ​គឺ​ពួកគេ​ចង់​បាន​កាសែត​ដើម្បី​យក​ទៅ​រុំ​ផ្លែ​ទុរេន និង​យក​ទៅ​ខ្ចប់​ត្រីងៀត និង​ក្តាម​របស់​ពួកគេ​តែ​ប៉ុណ្ណោះ​។ ខ្ញុំ​ពិតជា​មាន​ការ​អស់​សង្ឃឹម​ណាស់ ប៉ុន្តែ​ខ្ញុំ​បាន​ប្រាប់​ខ្លួនឯង​ថា ខ្ញុំ​ត្រូវ​តែ​ខំប្រឹងប្រែង​ធ្វើឲ្យ​បាន​ល្អ ជាង​នេះ​។ ក្រុម​ការងារ​របស់​​ខ្ញុំ និង​ខ្ញុំ​ផ្ទាល់​បាន​បូជា​ច្រើន​ណាស់​ចំពោះ​កាសែត​នេះ​។ វា​ប្រៀប​ដូចជា​កូន​របស់​យើង​អ៊ីចឹង​ដែល​ឥឡូវ​នេះ​កុមារ​នេះ​បាន​លូតលាស់​ធំធាត់​នៅ​​ក្នុង​កេរ្តិ៍ឈ្មោះ​ដ៏សមរម្យ​មួយ​របស់​វា​ហើយ​»​។

ឈាន​មក​ដល់​សម័យ​បច្ចុប្បន្ន​នេះ​លោក​ គឹមសុង បាន​កត់សម្គាល់​ថា​ឥឡូវ​នេះ​កាសែត​នេះ​បាន​ឈាន​មក​ដល់​សម័យកាល​ឌីជីថល​ហើយ​។ វា​ជា​ជំហាន​បន្ទាប់​ដែល​កាសែត​នេះ​បាន​និង​កំពុង​កែប្រែ​មុខមាត់​ថ្មី​ទៅ​សម័យកាល​បច្ចេកវិទ្យា​ទំនើប​។

លោក​មាន​ប្រសាសន៍​ថា​៖ «​យើង​ជា​ [​ប្រព័ន្ធ​ផ្សព្វផ្សាយ​បែប​ប្រពៃណី​] ប្រៀប​ដូចជា​កីឡាករ​ប្រដាល់​ប៉ាក់គីអៅ​អ៊ីចឹង​ដែរ ប៉ុន្តែ​ប្រព័ន្ធ​ផ្សព្វផ្សាយ​សង្គម (Social Media) គឺ​ដូច​កីឡាករ​ប្រដាល់​គីឡូ​ធ្ងន់ ម៉ៃ ថៃសាន់ ដែល​គាត់​វ៉ៃ​ប្រព័ន្ធ​ផ្សព្វផ្សាយ​បែប​ប្រពៃណី​ឲ្យ​សន្លប់​បាន​នាពេល​អនាគត​។ ខ្ញុំ​ខ្លាច​ថា​មិន​ដល់​ដប់​ឆ្នាំ​ទៀត​ទេ កាសែត​នៅ​ក្នុង​ប្រទេស​កម្ពុជា​នឹង​បាត់​វត្តមាន​ពី​លើ​តុ​»​។

ដើម្បី​បន្ត​រស់រាន​មាន​ជីវិត​បាន លោក​ គឹមសុង ​មាន​អារម្មណ៍​ថា​កាសែត​តាម​បែប​ប្រព័ន្ធ​ឌីជីថល​គឺជា​រឿង​ដែល​ចៀស​មិន​រួច​។

លោក​ថ្លែង​ថា​៖ «​នេះ​គឺជា​គំរូ​អាជីវកម្ម​ថ្មី​ដែល​យើង​កំពុង​សម្លឹង​ឆ្ពោះ​ទៅ​មុខ​។ នៅ​ក្នុង​ដំណាក់កាល​នេះ​គឺ​យើង​កំពុង​ប្រើប្រាស់​រូបមន្ត ៥០-៥០ ​។ មាន​ន័យ​ថា ៥០ ភាគរយ​គឺ​ការ​បោះពុម្ព និង ​៥០ ​ភាគរយ​ទៀត​គឺ​តាម​បែប​ឌីជីថល​។ យើង​ត្រូវ​តែ​ធ្វើ​ទាំង​ពីរ​ដើម្បី​ធានា​ថា​យើង​ទទួល​បាន​ប្រាក់​ចំណូល​គ្រប់គ្រាន់​ដើម្បី​រក្សា​ឲ្យ​សារព័ត៌មាន​ដែល​មាន​ជំនាញ​វិជ្ជាជីវៈ​នៅ​រស់រាន​មាន​ជីវិត​បន្ត​ទៀត​បាន​»​។

ប៉ុន្តែ​លោក​នៅ​តែ​សង្ឃឹម​ថា​កាសែត​ភ្នំពេញ ប៉ុស្តិ៍​នឹង​បន្ត​រីកចម្រើន​បាន​យូរ​អង្វែង​ទៅ​មុខ​ទៀត​ដោយ​មើល​ឃើញ​ថា​វា​ដូច​ប្រៀប​ជា​បុរស​ខ្លាំង​ពូកែ​ម្នាក់ ដែល​ទទួល​បាន​ការ​គោរព​ពី​អ្នកអាន​គ្រប់​ឋានៈ និង​អ្នក​ផ្សាយ​ពាណិជ្ជកម្ម​ភាគច្រើន​។ មនុស្សម្នា​នៅ​តែ​ចង់​ឲ្យ​កាសែត​យើង​បន្ដ​ដើរតួ​ជា​កាសែត​ឯករាជ្យ អព្យាក្រឹត ពិសេស​គឺ​ផ្ដល់​ដំណឹង​ពិតប្រាកដ​ដល់​សាធារណជន​។

លោក​បាន​បន្ត​ថា​៖ «​ខ្ញុំ​ចង់​ឲ្យ​កាសែត​ភ្នំពេញ ប៉ុស្តិ៍ នេះ​បន្ដ​ពាក់អាវ​ជំនាញ​វិជ្ជាជីវៈ ស្លៀកខោ​ការពិត និង​ពាក់មួក​អព្យាក្រឹត​។ បំណង​ប្រាថ្នា​ធំ​មួយ​របស់​កាសែត​ភ្នំពេញ ប៉ុស្តិ៍ គឺ​សប្បុរស​ហើយ​វា​នឹង​ចែករំលែក​ផ្នែក​ប្រាជ្ញា​ស្មារតី​ជាមួយ​ប្រជាជន​កម្ពុជា​»​។

ផ្អែក​ទៅ​កៅអី​អង្គុយ​របស់​គាត់​លោក​ គឹមសុង ​ញញឹម​ទាំង​គិត រួច​លោក​បាន​សង្កត់​ធ្ងន់​ថា​៖ «​នៅក្នុង​ជីវិត​របស់​ខ្ញុំ ខ្ញុំ​ចង់​ឃើញ​ពលរដ្ឋ​ខ្មែរ​គ្រប់​រូប​អាច​អាន​សារព័ត៌មាន​ជា​ភាសា​របស់​ខ្លួន​បាន​គ្រប់ៗ​គ្នា​។ ប្រសិន​បើ​វា​កើតឡើង​​មែន នោះ​ខ្ញុំ​ពិត​ជា​ពេញចិត្ត​ណាស់​ទៅ​ហើយ​» ៕ NS

Content image - Phnom Penh Post
លោក គឹមសុង (​ឆ្វេង​) ជាមួយ​លោក ចាងហ្វាង Bill Claugh និង​សហការី​។

Content image - Phnom Penh Post
លោក កៃ គឹមសុង នៅ​អគារ Canadia Tower ក្រុង​ភ្នំពេញ​។ រូបថត កែវ រតនា

0

Comments

Please, login or register to post a comment

ព័ត៌មានពាក់ព័ន្ធ