Search form

Login - Register | FOLLOW US ON

Logo of Phnom Penh Post newspaper Phnom Penh Post - ព័ត៌មាន​ខ្លីៗ​ ទាក់ទង​វិស័យ​ហិរញ្ញវត្ថុ និង​ធានា​រ៉ាប់រង ប្រចាំ​ត្រី​មាស​ទី៣

Content image - Phnom Penh Post
អគារ​ធនាគារ​ជាតិ​នៃ​កម្ពុជា​។ រូបថត សហការី

ព័ត៌មាន​ខ្លីៗ​ ទាក់ទង​វិស័យ​ហិរញ្ញវត្ថុ និង​ធានា​រ៉ាប់រង ប្រចាំ​ត្រី​មាស​ទី៣

វិស័យ​ហិរញ្ញវត្ថុ និង​ ធនាគារ នៅ​ព្រះ​រាជា​ណាចក្រ​កម្ពុជា​បាន​​និង​កំពុងតែ​កើនឡើង​យ៉ាង​ឆាប់រហ័ស​ក្នុង​រយៈពេល​ថ្មីៗ​ ចុង​ក្រោយ​នេះ ដោយ​តាមរយៈ​តួលេខ​បានបង្ហាញ​នូវ​កំណើន​ទុនវិនិយោគ​របស់​បរទេស​មកកាន់​វិស័យ​ធនាគារ​នៅ​កម្ពុជា ដែលជា​ចំនួន​ស្ទើ​រតែ​ស្មើនឹង​ពីរដង​ក្នុង​ត្រីមាស ​នៃ​ឆ្នាំ​ ២០១៧​ នេះ ខណៈ​ប្រទេស ​ថៃ និង ​កម្ពុជា បាន​ចុះហត្ថលេខា​ជា​​​ផ្លូវការ​លើ​កិច្ចព្រមព្រៀង​ពន្ធដារ​រ​ចំនួន​ ២ ​ក្នុងពេល​តែមួយ ដែល​​​ច្បាប់​នេះ​ការពារ​ប្រជាជន​នៃ​ប្រទេស​ទាំង ២ ​ក្នុងការ​បង់ពន្ធ​ ២ ​ដង។

ព័ត៌មាន​ផ្សេងទៀត​ទាក់ទង​ទៅនឹង​វិស័យ​ធនាគារ​កាលពី​រយៈពេល ៣​ ខែ កន្លងទៅ​ រួមមាន​ទាំង​​ការ​សម្រេច​ចិត្ត​ដោយ​នាយក​ដ្ឋាន​ពន្ធដារ​រ​ក្នុងការ​ផ្អាក​ប្រកាស​ពន្ធ VAT ដ៏​ស្មុគ​ស្មាញ​ ដោយ​សារ​តែ​មាន​ការ​រិះគន់​ខ្លះ​ពី​សំណាក់​ក្រុមហ៊ុន​ឯកជន​ជា​ច្រើន។

ថ្ងៃទី​២៨ ខែមិថុនា​

មន្ត្រី​ពន្ធដារ​កម្ពុជា​ជួប​នឹង​ដៃ​គូ​របស់​ខ្លួន​នៅ​ទីក្រុង ​ហុងកុង គឺជា​ផ្នែក​មួយ​នៃ​ការ​ពិភាក្សា​វគ្គ​ដំបូង​សម្រាប់​ការ​ព្រាង​កិច្ច​ព្រម​ព្រៀង​ពន្ធដារ​ពីរ​ក្នុង​ពេល​តែមួយ (Double Taxation Agreement - DTA) ក្នុង​គោល​បំណង​ដើម្បី​បង្ការ​ពី​ការ​យក​ពន្ធ​២ដង និង​ការ​បំពាន​លើ​ការ​យក​ពន្ធ​រវាង​រដ្ឋាភិបាល​ទាំងពីរ នេះ​បើ​យោង​តាម សម្តី​របស់​អគ្គនាយកដ្ឋាន​ពន្ធដារ (GDT) ថ្លែង​ក្នុង​ពិធី​សន្និ​សីទ​កាសែត​មួយ​នា​ពេល​កន្លង​ទៅ។

ការ​ពិភាក្សា​រវាង GDT និង​មន្ត្រី​នាយកដ្ឋាន​ប្រាក់​ចំណូល​នៅ​ទីក្រុង​ហុងកុង (Hong Kong Inland Revenue Department) បាន​ប្រព្រឹត្ត​ទៅ​រយៈពេល​ ៥ ​ថ្ងៃ ចាប់ពី​ថ្ងៃ​ទី​ ១៩ ដល់​ថ្ងៃទី​ ២៣ ខែ​ មិថុនា ឆ្នាំ​ ២០១៧ នេះ​បើ​យោង​តាម​ការ​ប្រកាស​ព័ត៌មាន។

ថ្ងៃទី​២៩ ខែ​មិថុនា

​លំហូរ​នៃ​វិនិយោគទុន​កាន់​តែ​ច្រើន​ថែម​ទៀត​របស់​ជនជាតិ​ជប៉ុន ត្រូវ​បាន​គេ​រំពឹងថា នឹង​បន្ត​កើន​ឡើង​សម្រាប់​គម្រោង​អគារ​ពាណិជ្ជកម្ម​ដ៏​ធំៗ​ចំនួន​២ ព្រម​ទាំង​ការ​និយម​រស់នៅ និង​ធ្វើការ​នៅ​ប្រទេស​កម្ពុជា​របស់​ជនជាតិ​ជប៉ុន​កាន់​តែ​មាន​ការ​កើន​ឡើង នេះ​​បើ​យោង​តាម​មន្ត្រី​ផ្នែក​វិនិយោគ​។

ចំនួន​ទឹក​ប្រាក់​វិនិយោគ​សរុប​របស់​ជប៉ុន​មក​កាន់​ប្រទេស​កម្ពុជា រាប់​ចាប់ពី​ ២៥​ ឆ្នាំ​មុន​ មក​ដល់​បច្ចុប្បន្ន​នៅ​ខែ ​ឧសភា ឆ្នាំ​ ២០១៧​ នេះ មាន​ចំនួន​រហូត​ដល់​ទៅ ​១,៥០​ កោដិ​ដុល្លារ​អាមេរិក ដែល​នេះ​ជា​តួលេខ​រួម​របស់​ក្រុម​ប្រឹក្សា​អភិវឌ្ឍន៍​ កម្ពុជា (CDC) បាន​ថ្លែង​ប្រាប់​ក្រោយ​ពេល​បិទ​កិច្ច​ប្រជុំ​វិស័យ​ឯកជន​សាធារណៈ​ កម្ពុជា​-​ជប៉ុន លើ​ទីក​ ១៥ ​កន្លងទៅ ដែល​មាន​វិនិយោគិន​ជប៉ុន​ចូល​រួម​ដល់​ទៅ​ជាង ​៧០ ​នាក់​។

ការ​វិនិយោគ​ទាំង​អស់​នេះ​រួម​មាន​គម្រោង​ចុះ​បញ្ចី​រួច​រាល់​ចំនួន ១២៥​ គម្រោង និង​ភោជនីយដ្ឋាន​ជប៉ុន​ជាង​ ២០០​ ទីតាំង​ផងដែរ នេះ​បើ​យោង​តាម​សេចក្តី​ប្រកាស​ព័ត៌មាន​។

ថ្ងៃ​ទី​៧ ខែ​កក្កដា​

​រយៈពេល​ត្រឹម​តែ​មួយ​ថ្ងៃ​ក្រោយ​ពេល​គ្រឹះស្ថាន​មីក្រូ​ហិរញ្ញវត្ថុ​នៅ​កម្ពុជា បាន​ធ្វើ​ការ​តវ៉ា និង​ប្រកាស​ថា ពួក​គេ​នឹង​មិន​អនុវត្ត​ច្បាប់​ថ្មី​របស់​រដ្ឋាភិបាល​ដែល​តម្រូវ​ឲ្យ​បង់ពន្ធ VAT បន្ថែម​ ១០​ ភាគរយ លើ​សេវា​ហិរញ្ញវត្ថុ​នោះ នាយកដ្ឋាន​ពន្ធដារ​បាន​ប្រកាស​ថា ខ្លួន​នឹង​ផ្អាក​សេច​ក្តី​ប្រកាស​ដ៏​ស្មុគ​ស្មាញ​នេះ​សិន រហូត​ដល់​ពេល​មួយ​ដែល​នាយកដ្ឋាន​អាច​ធ្វើ​ការ​សិក្សា និង​រក​ឃើញ​បញ្ហា​របស់​វិស័យ​ឯកជន។

GDT បាន​ថ្លែង ក្នុង​សេចក្តី​ប្រកាស​ព័ត៌មាន​មួយ​ថា សេចក្តី​ប្រកាស​ចេញ​ថ្ងៃទី​២៥ ខែ​ឧសភា ដែល​រឹត​បន្តឹង​លើ​ច្បាប់​ពន្ធដារ​របស់​រដ្ឋា​ភិបាល​កម្ពុជា​សម្រាប់​ផលិតផល​ដែល​មិនមាន​ការ​បង់ពន្ធ​ដែល​បាន​ប៉ះពាល់​ដល់​សេវា​ហិរញ្ញវត្ថុ​បឋមៗ​នោះ​នឹង​មិន​ត្រូវ​បាន​អនុវត្ត​នោះ​ទេ «​រហូត​ដល់​ការ​ចេញ​ជូន​ដំណឹង​ជាថ្មី​»​។

«GDT នឹង​សហការ​ជាមួយ​វិស័យ​ឯកជន​ដើម្បី​ធ្វើ​ការ​សាកល្បង និង​សិក្សា​ឲ្យ​បាន​ច្បាស់​ពី​ឃ្លា “​សេវា​ហិរញ្ញវត្ថុ​បឋម​” និង​ការ​អនុវត្ត​ច្បាប់​ពន្ធ VAT នេះ​» នេះ​បើ​យោង​តាម​ការ​ប្រកាស​ខាង​លើ ដោយ​បាន​បន្ថែម​ថា រដ្ឋាភិបាល​បាន​ផ្តួច​ផ្តើម​ច្បាប់​នេះ​ឡើង​ដើម្បី​ផ្តល់នូវ​ភាព​ច្បាស់​លាស់​កាន់​តែ​ខ្លាំង​ថែម​ទៀត​សម្រាប់​​ច្បាប់​កម្ពុជា​។

ថ្ងៃទី ​១០ កក្កដា​

​ទីភ្នាក់ងារ​ធើ្វ​និយតកម្ម​នៃ​វិស័យ​ធានា​រ៉ាប់រង​របស់​កម្ពុជា បាន​ចុះ​ហត្ថលេខា​លើ​អនុស្សរណៈ​យោគយល់ (MoU) ជាមួយ​ប្រទេស​ថៃ ដែល​ជា​ដៃគូ​របស់​ខ្លួន​ដើម្បី​បង្កើន​គុណភាព​ដំណើរការ​ការងារ​រវាង​ប្រទេស​ទាំង​ពីរ ការ​ផ្លាស់​ប្តូរ​បទពិសោធ​នៃ​ជំនួយ​ផ្នែក​បច្ចេកទេស និង​អនុញ្ញាត​ឲ្យ​មានការ​ចែក​រំលែក​ព័ត៌មាន​រវាង​ប្រទេស​ទាំង​ពីរ កាន់​តែ​ទូលំ​ទូលាយ ក្នុង​គោល​បំណង​បង្កើន​គុណភាព​ផ្នែក​ច្បាប់ នេះ​បើ​យោង​តាម​សេចក្តី​ប្រការ​ព័ត៌​មាន​មួយ​ចេញ​ដោយ​ក្រសួង​សេដ្ឋកិច្ច និង​ហិរញ្ញវត្ថុ (MEF)។

ប្រធាន​ផ្នែក​នាយកដ្ឋាន​វិស័យ​ហិរញ្ញវត្ថុ​នៅ MEF បាន​ចុះ​អនុស្សរណៈ​យោគយល់​ជាមួយ​តំណាង​ការិយាល័យ​គណៈកម្មការ​សម្រាប់​ការ​ធានា​រ៉ាប់រង (Office of Insurance Commission) មក​ពី​ប្រទេស​ថៃ ដែល​នេះ​គឺជា​លើក​ដំបូង​បង្អស់​ដែល​កម្ពុជា បាន​ចុះ​ហត្ថលេខា​លើ​កិច្ច​ព្រម​ព្រៀង​​វិស័យ​ធានា​រ៉ាប់រង​ជាមួយ​ភ្នាក់ងារ​ធ្វើ​និយតកម្ម​របស់​បរទេស ហើយ​បាន​ជួយ​ជំរុញ​ឲ្យ​កម្ពុជា​​កាន់តែ​មាន​ស្តង់ដា​អាស៊ាន​មួយ​កម្រិត​ថែម​ទៀត​សម្រាប់​ការ​លើកកម្ពស់​ក្របខ័ណ្ឌ​ការងារ​របស់​វិស័យធា​នារ៉ាប់រង​ប្រចាំ​តំបន់​ផងដែរ​។

ថ្ងៃទី​១៩ ខែ​កក្កដា​

​កង្វះ​ខាត​នៃ​ជម្រើស​វិនិយោគ​ក្នុង​ទីផ្សារ​វិនិយោគ​នៅ​កម្ពុជា បាន​បង្ខំ​ឲ្យ​ក្រុមហ៊ុន​ធានា​រ៉ាប់រង​នៅ​កម្ពុជា​ពឹង​ផ្អែកលើ​ការសង​ប្រាក់​ត្រឡប់​វិញ​ក្នុង​ករណី​ក្រុមហ៊ុន​ជួប​ការខាតបង់ ជា​ជាង​ការ​វិនិយោគ​ត្រឡប់​វិញ ប៉ុន្តែ​ថ្នាក់​ដឹក​នាំ​វិស័យ​នេះ​បាន​ថ្លែង​ថា ប្រសិន​បើ​រដ្ឋាភិបាល​អាច​ផ្តល់នូវ​ទីផ្សារ​ភាគ​ហ៊ុន​ដែល​អាច​វិនិយោគ​បាន​ច្រើន​ជាង​នេះ កម្ពុជា​នឹង​អាច​ទាក់ទាញ​ការ​វិនិយោគ​លើ​សេវា​ធានា​រ៉ាប់រង​ថ្មីៗ​បន្ថែម​ទៀត​។

«​រដ្ឋាភិបាល​ត្រូវ​ការ​ផ្តល់​ជំនួយ​ដល់​ការ​បង្កើត​ទីផ្សារ​ភាគ​ហ៊ុន​ធំ​មួយ និង​មាន​ភាព​សម្បូរ​បែប​នៅ​កម្ពុជា​ដើម្បី​ផ្តល់នូវ​ជម្រើស​វិនិយោគ​ជាច្រើន​បន្ថែម​ទៀត ដែល​អាច​ទាក់ទាញ​ឲ្យ​ក្រុម​ហ៊ុន​ធានា​រ៉ាប់រង​អាចធ្វើ​ការ​វិនិយោគ​ដើមទុន​របស់​ខ្លួន និង​ដើម្បី​តម្កល់​ប្រាក់​ផងដែរ​» នេះ​បើ​យោង​តាម​សម្តី​របស់​លោក ហ៊ុយ វត្ថារ៉ូ ប្រធាន​សមាគម​ធានា​រ៉ាប់រង​កម្ពុជា (Insurance Association of Cambodia - IAC)​។

Content image - Phnom Penh Post
លោក Huy Vatharo ប្រធាន ប្រធាន​សមាគម​ធានារ៉ាប់រង​កម្ពុជា (IAC)។ រូបថត KALI KOTOSKI

វិស័យ​ធានា​រ៉ាប់រង​នៅ​ កម្ពុជា​ មាន​ការ​កើន​ឡើង​យ៉ាង​ឆាប់​រហ័ស​ចាប់​តាំង​ពី​វត្តមាន​ក្រុមហ៊ុន​ធានា​រ៉ាប់រង​របស់​រដ្ឋ​កាល​ពី​ឆ្នាំ​ ១៩៩០។

បច្ចុប្បន្ន​នេះ ក្រុមហ៊ុន​ធានា​រ៉ាប់រង​ ក្នុង​ស្រុក និង​អន្តរជាតិ កំពុង​ផ្តល់​នូវ​សេវា​ធានា​រ៉ាប់រង​ទូទៅ​យ៉ាង​ទូលំទូលាយ ខណៈ​ដែល​ក្រុមហ៊ុន​ធានា​រ៉ាប់រង​អាយុ​ជីវិត​ចំនួន​ ៤ បាន​មក​ដល់​កម្ពុជា​ជា​លើក​ដំបូង​ក្នុង​ឆ្នាំ​ ២០១២​។

នៅ​តាម​បណ្តា​ប្រទេស​ជឿន​លឿន ក្រុមហ៊ុន​ធានា​រ៉ាប់រង​គឺជា​ផ្នែក​មួយ​ដ៏​សំខាន់​ក្នុង​ទីផ្សារ​ហិរញ្ញវត្ថុ ដែល​ធ្វើ​ការ​វិនិយោគ​ដើម​ទុន​ដ៏​ធំ​ទៅ​ក្នុង​ទីផ្សារ​ភាគហ៊ុន​។

បើ​ទោះ​ជា​យ៉ាង​នេះ​ក្តី នៅ​ប្រទេស​កម្ពុជា ក្រុមហ៊ុន​ទាំង​នេះ​មិន​ទាន់​មាន​ជម្រើស​វិនិយោគ​ច្រើន​នៅ​ឡើយ​​ទេ​ដោយ​សារ​តែ​ទីផ្សារ​ភាគហ៊ុន​នៅ​ប្រទេស​នេះ​នៅ​មាន​កម្រិត​ហើយ​មាន​ក្រុម​ហ៊ុន ​បាន​ចុះ​ក្នុង​បញ្ជី​ភាគ​ហ៊ុន​មាន​តែ ៥​ ប៉ុណ្ណោះ ហើយ​ថែមទាំង​ពុំ​មាន​ទំនាក់​ទំនង​ជាមួយ​គ្នា​ទៀត​ផង​។

ថ្ងៃ​ទី​២ សីហា​

លំហូរ​ចូល​នៃ​ការ​វិនិយោគ​បរទេស​មក​កាន់​វិស័យ​ធនាគារ​នៅ​កម្ពុជា កើន​ឡើង​ស្ទើរ​តែ​ទ្វេ​ដង​ក្នុង​រយៈពេល ៦​ ខែ​ដំបូង​ក្នុង​ឆ្នាំ ​២០១៧ ​នេះ ខណៈ​ក្រុមហ៊ុន​ដ៏​ធំ​ចំនួន​ ២ បាន​មក​ដល់ទី​ផ្សារ​ប្រទេស​នេះ ហើយ​គ្រឹះស្ថាន​ធនាគារ​បាន​ឆ្លើយតប​ទៅ​នឹង​សំណើ​កែ​តម្រូវ​ដើម​ទុន​វិនិយោគ​អតិបរមា នេះ​បើ​យោង​តាម​ប្រភព​មន្ត្រី​មួយ​រូប​នៃ​ធនាគារ​ជាតិ​។

លោក​ស្រី ជា សេរី អគ្គនាយិកា​នៃ​ធនាគារ​ជាតិ​នៃ​កម្ពុជា (National Bank of Cambodia- NBC) បាន​ថ្លែងថា ការ​វិនិយោគ​ផ្ទាល់​ពី​បរទេស (FDI) មក​កាន់​វិស័យ​ធនាគារ​កម្ពុជា បាន​កើន​ដល់​ ៤៣៩​ លាន​ដុល្លារ​អាមេរិក ក្នុង​រយៈពេល​៦​ខែ​ដំបូង ដែល​នេះ​ជា​កំណើន​ដល់​ទៅ ៨៩​ភាគរយ បើ​ប្រៀបធៀប​ទៅនឹង​រយៈពេល​ដូច​គ្នា​កាលពី​ឆ្នាំ​កន្លង​ទៅ​។

លោក​ស្រី​ថ្លែង​ថា​ ៖ «​កំណើន​នេះ​គឺ​ដោយ​សារ​តែ​ធនាគារ​ធំៗ​ចំនួន​​២​បាន​មក​ដល់​ប្រទេស​កម្ពុជា​»​ ដោយ​សំដៅ​ដល់​ការ​បើក​សម្ពោធ​ធនាគារ​នៅ​កម្ពុជា​ចំនួន​២​នោះ គឺ​ធនាគារ BRED មក​ពី​បារាំង និង​ធនាគារ Mizuho មក​ពី​ប្រទេស​ជប៉ុន​។

បន្ថែម​លើស​នេះ​ទៅ​ទៀត លោក​ស្រី​ថ្លែង​ថា​ ធនាគារ​អន្តរជាតិ និង​វិនិយោគិន​បាន​បោះទុន​បន្ថែម​ទៀត​ទៅលើ​គ្រឹះស្ថាន​ធនាគារ​នៅ​កម្ពុជា ដើម្បី​ឆ្លើយតប​ទៅ​នឹង​ការ​កែ​តម្រូវ​ប្រាក់​ដើមទុន​វិនិយោគ​អតិបរមា​។

Content image - Phnom Penh Post
សកម្មភាព​ចរាចរណ៍​យ៉ាង​មមាញឹក​នៅ​ខាង​មុខ​អគារ​អគ្គនាយក​ដ្ឋាន​ពន្ធដារ ។ រូបថត សហការី

ថ្ងៃទី ៨ សីហា​

វិស័យ​ធនាគារ​នៅ​កម្ពុជា មាន​ភាព​ល្អ​ប្រសើរ​ខ្លាំង​កាលពី​ឆ្នាំ​កន្លង ទៅ​ខណៈ​ដែល​សេដ្ឋកិច្ច​កម្ពុជា​កាន់​តែ​រីក​លូត​លាស់ ជាមួយ​នឹង​កំណើន​ឥណទាន​មធ្យម កំណើន​ការ​ដាក់​ប្រាក់ និង​ស្ថាប័ន​ហិរញ្ញ​វត្ថុ នៅ​តែ​មាន​ដំណើរ​ការ​ល្អ ខណៈ​ដែល​ស្ថាប័ន​ទាំង​នេះ​កាន់​តែ​ឈាន ជើង​ចូល​ដល់​សេដ្ឋ​កិច្ច​ពិភពលោក នេះ​បើ​យោង​តាម​អ្វី​ដែល​ធនាគារ​ជាតិ​នៃ​កម្ពុជា បាន​ថ្លែង​ក្នុង​របាយ​ការណ៍​ប្រចាំឆ្នាំ​របស់​ខ្លួន​។

ទ្រព្យសម្បត្តិ​សរុប​របស់​វិស័យ​ធនាគារ​បាន​កើន​ឡើង​ចំនួន​ ១៧,៨០ ​ភាគរយ ស្មើ​នឹង ២៧,៨០ ​ពាន់​លាន​ដុល្លារ​ក្នុង​ឆ្នាំ ​២០១៦ នេះ​បើ​យោង​តាម​របាយការណ៍​របស់ NBC​។

គ្រឹះស្ថាន​ហិរញ្ញវត្ថុ​ឯកជន​មាន​កំណើន​ផ្តល់​ប្រាក់​កម្ចី ដែល​មិន​ទាន់​បង់​ត្រឡប់​វិញ​ដល់​ទៅ​ ១៧,៦០​ ពាន់​លាន​ដុល្លារ ស្មើ​នឹង ​១៨,៣០​ ភាគរយ បើ​ប្រៀបធៀប​ទៅ​នឹង​ឆ្នាំ​ ២០១៥ ខណៈ​ចំនួន​ប្រាក់​បញ្ញើ​កើន​ដល់ ​២០,៧០​ ភាគរយ ដែល​មាន​ចំនួន​សរុប​រហូត​ដល់ ១៥,១០ ​ពាន់​លាន​ដុល្លារ។

ថ្ងៃទី​១៦ សីហា​

ចំនួន​កម្ចី​ឥណទាន​របស់​អតិថិជន​នៅ​ កម្ពុជា កាន់​តែ​មាន​ការ​កើន​ឡើង​ក្នុង​ត្រីមាស​ទី ២ ​ឆ្នាំ ​២០១៧ ​នេះ បើ​ទោះ​ជា​កំណើន​នេះ​មាន​សភាព​មធ្យម និង​ការ​ដាក់​ឯកសារ​ស្នើ​មាន​ការ​ធ្លាក់​ចុះ​ក៏​ដោយ​ក្តី នេះ​បើ​យោង​តាម​របាយការណ៍​ចុង​ក្រោយពី​ការិយាល័យ​ឥណទាន​កម្ពុជា (Credit Bureau Cambodia-CBC)​។

បើ​យោង​តាម​របាយ​ការណ៍ ចំនួន​សរុប​នៃ​ឯកសារ​ស្នើ​សុំ ដែល​បាន​ដាក់​ក្នុង​ត្រី​មាស​ទី​២ ​ឆ្នាំ​នេះ មាន​ចំនួន​ប្រមាណ ៣​សែន​ច្បាប់ ដែល​ជា​ចំនួន​ធ្លាក់​ចុះ​ ១៥​ ភាគរយ បើ​ប្រៀប​ធៀប​ទៅនឹង​ត្រី​មាស​ដំបូង​។ ខណៈ​ពេល​នេះដែរ ឥណទាន​អតិថិជន ដែល​រួម​មាន​ទាំង​កម្ចី​ផ្ទាល់​ខ្លួន កាត​ក្រេឌីត និង​កម្ចី​បង់​រំលស់​បាន​ការ​កើន​ឡើង ៦,៦០​ភាគរយ បើ​ប្រៀប​ធៀប​នឹង​ត្រី​មាស​ទី​ ១​។

កម្ចី​ដែល​មិន​ទាន់​បង់​ត្រឡប់​មក​វិញ​មាន​ចំនួន​ ៣,៨៧​ ពាន់​លាន​ដុល្លារ បើ​រាប់​ចំនួន​ម្ចាស់​កម្ចី ៧៨៥ ០០០​ នាក់​។

ថ្ងៃទី​២៥ សីហា​

ដើម្បី​ជំរុញ​ឲ្យ​អាជីវកម្ម​ខ្នាត​តូច និង​កណ្តាល​ចូលរួម​ក្នុង​ទីផ្សារ​ភាគ​ហ៊ុន​កម្ពុជា​នោះ ក្រុមហ៊ុន​ច្រើនជាង​ ៧០ បាន​ចូលរួម​ក្នុង​ការ​ផ្តួច​ផ្តើម​ដែល​បាន​ធ្វើ​ឡើង​ដោយ​ភ្នាក់ងារ​ក្នុង​ទីផ្សារ​នេះ ដែល​នឹង​ផ្តល់​នូវ​ការ​ណែនាំ​ជំនាញ​សម្រាប់​ការ​ចូលរួម ឬ​របៀប​ធ្វើ​យ៉ាង​ណា​ឲ្យ​ គ្រប់​ទៅ​នឹង​តម្រូវ​ការ​ទាមទារ​ហើយ​ នេះ​គឺជា​យន្តការ​មួយ​ជំរុញ​ឲ្យ​មាន​អ្នក​ចូលរួម​លើក​ដំបូង​នៅ​ពេល​ណា​មួយ​ក្នុង​ឆ្នាំ​ក្រោយ​នេះ​។

គណៈកម្មការ​មូល​បត្រ​កម្ពុជា (SECC) បាន​សម្ពោធ​នូវ «កម្មវិធី​ឧត្តមភាព​» របស់​ខ្លួន​ក្នុង​គោល​បំណង​ជួយ​ដល់​ក្រុមហ៊ុន​នានា​ឲ្យ​កាន់​តែ​មាន​សមត្ថ​ភាព​ខ្លាំង​ជាង​មុន​ក្នុង​ការ​រៀបចំ​របាយការណ៍​ហិរញ្ញវត្ថុ បង្កើត​នូវ​គោលការណ៍​ផ្នែក​ហិរញ្ញវត្ថុ​ដែល​សមស្រប និង​រៀន​អំពី​មូល​ហេតុ​ដែល​ការ​ចូល​ក្នុង​ទីផ្សារ​ភាគហ៊ុន​នេះ​អាច​ផ្តល់​ឲ្យ​ពួក​គេ​នូវ​ប្រភព​ចំណូល​បន្ថែម​។

ផ្សារ​មូល​បត្រ​កម្ពុជា (Cambodia Securities Exchange- CSX) បាន​ជួប​ការ​លំបាក​ក្នុង​ការ​ទាក់ទាញ​សហគ្រាស​ខ្នាត​តូច និង​កណ្តាល​ឲ្យ​ចូលរួម​ក្នុង​ទីផ្សារ​នេះ ចាប់​តាំង​ពី​ខ្លួន​បាន​សម្ពោធ​នូវ​បញ្ជី​កំណើន (Growth Board) របស់​ខ្លួន​ចាប់​តាំង​ពី​ឆ្នាំ​ ២០១៥​។

បើ​យោង​តាម​គោលការណ៍​របស់ SECC ក្រុមហ៊ុន​នានា​តម្រូវ​ឲ្យ​មាន​ដើម​ទុន​យ៉ាង​តិច ៥​សែន​ដុល្លារ ដើម្បី​ចូលរួម​ក្នុង​ទីផ្សារ​នះ បើ​ប្រៀប​ធៀប​ទៅ​នឹង​បញ្ជី​គោល (main board) ដែល​មាន​តម្រូវ​ការ​ដល់​ទៅ ៧,៥០​ លាន​ដុល្លារ​។

Content image - Phnom Penh Post
មន្ត្រី​ក្រុម​ហ៊ុន CSX កំពុង​ពន្យល់​អំពី​អត្រា​ឡើង​ចុះ​នៃ​តម្លៃ​ហ៊ុន​នៃ​ទីផ្សារ​ភាគ​ហ៊ុន​កម្ពុជា។ រូបថត សហការី

ថ្ងៃ​ទី​៣១ សីហា​

វិស័យ​ធានា​រ៉ាប់រង​នៅ​កម្ពុជា នៅ​តែ​បន្ត​ការ​លូត​លាស់​ខ្លាំង​ក្នុង​ឆមាស​ដំបូង​នៃ​ឆ្នាំ​នេះ ដែល​មាន​កំណើន​ទឹក​ប្រាក់​ដល់​ទៅ ៦៨​ លាន​ដុល្លារ​ស្មើ​នឹង​កំណើន​ ២១​ ភាគរយ បើ​ប្រៀបធៀប​ទៅ​នឹង​ឆមាស​ទី ១ កាលពី​ឆ្នាំ​ ២០១៦ នេះ​បើ​យោង​តាម​របាយការណ៍​ដែល​ត្រូវ​បាន​បញ្ចេញ​ពី​សមាគម​ធានា​រ៉ាប់រង​កម្ពុជា (IAC)​។

ខណៈ​ដែល​របាយការណ៍​មិន​បាន​លម្អិត​លើ​តួលេខ​កំណើន​ទៅ​តាម​ប្រភេទ​នៃ​សេវា​ធានា​រ៉ាប់រង​ក្តី លោក ហ៊ុយ វត្ថារ៉ូ ប្រធាន IAC បាន​ថ្លែងថា សេវា​ធានា​រ៉ាប់រង​អាយុ​ជីវិត គឺជា​ផ្នែក​មួយ​នៃ​កំណើន​ដ៏​ធំ​នោះ​ខណៈ​សេវា​ធានា​រ៉ាប់រង​ទូទៅ រួមទាំង​ការ​ធានា​រ៉ាប់រង​លើ​អគ្គីភ័យ សុខភាព និង​រថយន្ត​មាន​កំណើន​បង្គួរ​។

លោក​ថ្លែងថា​ ៖ «​ខ្ញុំ​ពិតជា​រំភើប​ណាស់​ដែល​បាន​ឃើញ​វិស័យ​ធានា​រ៉ាប់រង​នេះ​មាន​ការ​កើន​ឡើង​នៅ​កម្ពុជា ស្រប​ពេល​ដែល​សេដ្ឋកិច្ច​ប្រទេស​នេះ​កំពុង​តែ​កើន​ឡើង​ផង​ដែរ​។ វា​ឆ្លុះ​បញ្ចាំង​ឲ្យ​ឃើញ​ពី​កំណើន​នៃ​ការ​យល់​ដឹង​របស់​ប្រជាជន​កម្ពុជា និង​ស្ថាប័ន​អាជីវកម្ម​ចំពោះ​សេវា​ធានា​រ៉ាប់រង​»​។

ថ្ងៃទី​៧ កញ្ញា​

​អ្នក​ផ្គត់​ផ្គង់​ផ្នែក​ហេដ្ឋា​រចនា​សម្ព័ន្ធ​អគ្គីសនី​ម៉ាឡេស៊ី Pestech International គ្រោង​នឹង​នាំ​ក្រុមហ៊ុន​បុត្រ​សម្ព័ន្ធ​នៅ​កម្ពុជា របស់​ខ្លួន ឲ្យ​ចូលរួម​ក្នុង​ការ​ដេញ​ថ្លៃ​ដើម្បី​បង្កើន​ប្រាក់​ចំណួល​ឲ្យ​បាន ១៨​ លាន​ដុល្លារ ដើម្បី​ពង្រីក​សក្តានុពលភាព​របស់​ខ្លួន​នៅ​តំបន់​ឥណ្ឌូចិន នេះ​បើ​យោង​តាម​របាយ​ការណ៍​ព័ត៌មាន​មួយ​របស់​ជប៉ុន​។

អគ្គនាយក​ក្រុមហ៊ុន Pestech លោក Paul Lim Pay Chuan បាន​ប្រកាស​ក្នុង​ពិធី​សន្និសីទ​កាសែត​ថា គោល​បំណង​របស់​ក្រុមហ៊ុន​នេះ គឺ​ដើម្បី​ដាក់​បញ្ចូល​ក្រុមហ៊ុន Pestech (Cambodia) Ltd (PCL) ទៅ​ក្នុង​ប្រទេស​កម្ពុជា​ឲ្យ​បាន​ក្នុង​ត្រីមាស​ទី​ ២ នៃ​ឆ្នាំ​ ២០១៨ នេះ​យោង​តាម Nikkei Asian Review របស់​ជប៉ុន​។

លោក​ថ្លែងថា ក្រុមហ៊ុន​បាន​រៀបចំ​ជួប​ជាមួយ​នឹង​សាខា​ធនាគារ RHB របស់​ប្រទេស​ម៉ាឡេស៊ី ប្រចាំ​នៅ​ប្រទេស​កម្ពុជា រួច​មក​ហើយ ដើម្បី​ពិភាក្សា​លើ​សំណើ​ផ្តួច​ផ្តើម​ជា​សាធារណៈ (Initial Public Offering - IPO) ជាមួយ​នឹង​ឯកសារ​ដែល​នឹង​ធ្លាក់​មក​នៅ​ដំណាច់​ឆ្នាំ​នេះ​។

ថ្ងៃទី​៨ កញ្ញា​

ប្រទេស​ថៃ និង​កម្ពុជា​បាន​ចុះ​អនុស្សរណៈ​យោគ​យល់​ផ្លូវ​ការ​លើ​កិច្ច​ព្រម​ព្រៀង​ពន្ធដារ​២​ក្នុង​ពេល​តែ​មួយ (Double Taxation Agreement - DTA) ដែល​ការពារ​ប្រទេស​នីមួយៗ​ពី​ការ​បង់​ពន្ធ​២​ដង និង​មាន​គោលបំណង​ក្នុង​ការ​បង្កើន​ការ​វិនិយោគ​ទ្វេ​ភាគី និង​រឹត​ចំណង​សេដ្ឋកិច្ច​រវាង​ប្រទេស​ទាំងពីរ​។

រដ្ឋ​មន្ត្រី​ក្រសួង​សេដ្ឋកិច្ច និង​ហិរញ្ញវត្ថុ អូន ពន្ធ​មុនី​រ័ត្ន និង​រដ្ឋ​មន្ត្រី​ការ​បរទេស​ថៃ លោក Don Pramudwinai បាន​ចុះ​ហត្ថ​លេខា​លើ​កិច្ច​ព្រម​ព្រៀង​នៅ​រាជធានី​ភ្នំពេញ ក្រោម​អធិបតីភាព​ចូលរួម​ពី​សម្តេច ហ៊ុន សែន និង​នាយក​រដ្ឋ​មន្ត្រី​ប្រទេស​ថៃ លោក Prayut Chan-o-cha ដែល​អំឡុង​ពេល​ធ្វើ​ដំណើរ​ទស្សន​កិច្ច​នៅ​កម្ពុជា​។

ខណៈ​ដែល​ព័ត៌មាន​លម្អិត​របស់​អគ្គ​នាយកដ្ឋាន​ពន្ធដារ​រវាង​ប្រទេស​ទាំង​ពី​មិន​ទាន់​បាន​បញ្ចេញ​នៅ​ឡើយ កិច្ច​ព្រម​ព្រៀង​របស់​កម្ពុជា​នេះ គឺជា​ការ​ខិតខំ​ប្រឹងប្រែង​ក្នុង​ការ​បង្ការ​មិន​ឲ្យ​វិនិយោគិន​ចម្រុះ​ជាតិ​សាសន៍​ធ្វើ​ការ​បង់ពន្ធ​ ២ ដង និង​ដើម្បី​បំពេញ​ស្តង់ដា​របស់​អាស៊ាន​ផង​ដែរ​៕

0

Comments

Please, login or register to post a comment