ទន្ទឹមពេលប្រទេសកម្ពុជា ទទួលបានភ្ញៀវទេសចរអន្តជាតិជាង ៥ លាននាក់ ចូលមកទស្សនារាជាណាចក្រនេះ ហេដ្ឋារចនាសម្ព័ន្ធនានារួមទាំងផ្លូវថ្នល់ សេវាដឹកជញ្ជូន សេវាស្នាក់នៅ និងជាពិសេសសេវាម្ហូបអាហារ (ភោជនីយដ្ឋាន) គឺជារឿងមួយដ៏សំខាន់បំផុត ហើយអ្នកជំនាញថា វាក៏ត្រូវការការវិនិយោគផ្នែកនេះបន្ថែម ដោយសាររបាយភោជនីយដ្ឋានមានច្រើនតែនៅទីក្រុង រីឯ ទីប្រជុំជនខ្លះទៀតនៅខ្វះខាតនៅឡើយ។
លោក គីម សិរីរ័ត្ន (Kim Sereyroth) ប្រធាននាយកដ្ឋានសេវាកម្មស្នាក់នៅ និងម្ហូបអាហារ នៃក្រសួងទេសចរណ៍ បានថ្លែងថា រហូតមកទល់ពេលនេះក្រសួងទេសចរណ៍បានផ្តល់អាជ្ញាប័ណ្ណសម្រាប់ប្រតិបត្តិករភោជនីយដ្ឋាន «នៅទូទាំងប្រទេសបានចំនួន ២ ២៣៩ ទីតាំង ដោយភោជនីយដ្ឋានទាំងអស់នោះមានចំនួនកៅអីអង្គុយសរុបមានចំនួន ១៣០ ៨៨៥ កៅអី»។
លោកពន្យល់ថា ការផ្តល់អាជ្ញាប័ណ្ណពីក្រសួងទេសចរណ៍ នេះគឺផ្អែកទៅតាមឯកសារ និងលិខិតបទដ្ឋាននានាដែលអាជីវករទទួលបានពីអាជ្ញាធរពាក់ព័ន្ធ ដូចជា ច្បាប់សាងសង់ លិខិតអាជីវកម្ម ដោយឡែកផ្នែកនេះត្រូវមានលិខិតបញ្ជាក់ពីក្រសួងសុខាភិបាល និងលិខិតបញ្ជាក់អំពីប្រព័ន្ធការពារអគ្គិសភ័យ»។
លោក សិរីរ័ត្ន បន្តថា ជាមួយឯកសារ ឬលិខិតបញ្ជាក់ទាំងឡាយនោះ រួមទាំងអាជ្ញាប័ណ្ណពីក្រសួងទេសចរណ៍គឺបានបញ្ជាក់ថា «ភោជនីយដ្ឋាននេះមានច្បាប់អនុញ្ញាតត្រឹមត្រូវ និងអាចទុកចិត្តបានសម្រាប់អតិថិជន»។
លោក គួច សុខលី (Kuoch Sokly) ទីប្រឹក្សាសមាគមភោជនីយដ្ឋានកម្ពុជា បានឲ្យដឹងថា នៅមានអាជីវករ និងភោជនីយដ្ឋានជាច្រើនទៀត ដែលពុំមានច្បាប់អនុញ្ញាតឲ្យធ្វើអាជីវកម្មនៅឡើយ។
លោកបន្តថា ៖ «ភោជនីយដ្ឋានដែលពុំទាន់មានច្បាប់អាជីវកម្មនោះហើយ ដែលអ្នកបរិភោគត្រូវមានការប្រុងប្រយ័ត្នចំពោះអាហារដែលខ្លួនហូបចុក»។
ពាក់ព័ន្ធអំពីម្ហូបអាហារ វាគឺជាបញ្ហាសំខាន់ណាស់សម្រាប់សុខភាពមនុស្ស និងសង្គម «ដូច្នេះអាហារដែលយើងហូប ចូលទៅក្នុងរាងកាយត្រូវតែប្រាកដថា វាមានគុណភាព អនាម័យ និងសុវត្ថិភាព» នេះបើតាមសម្តីរបស់លោក សុខលី។
ដោយមានបទពិសោធធ្វើអាជីកម្មភោជនីយដ្ឋានជិត ២០ ឆ្នាំមកហើយ លោក សុខលី បានបង្ហាញទស្សនៈផ្ទាល់ខ្លួនថា បើនិយាយដល់រឿង «អនាម័យម្ហូបអាហារ ប្រជាជនកម្ពុជានៅពីក្រោយគេ»ក្នុងចំណោមប្រទេសនៅក្នុងតំបន់មួយចំនួនធំ «យើងត្រូវការការអប់រំអំពីអនាម័យម្ហូបអាហារឲ្យបានច្រើនបន្ថែមទៀត និងស្វែងយល់ដឹងអំពីសុវត្ថិភាពម្ហូបអាហារ»។
បើពិនិត្យអំពីរបាយភោជនីយដ្ឋាននៅក្នុងប្រទេសកម្ពុជា គឺមានច្រើនតែនៅភ្នំពេញ និងទីក្រុងសំខាន់ៗទេ ចំណែកនៅតាមបណ្តាទីប្រជុំជនជាច្រើនទៀតនៅខ្វះខាតនៅឡើយ។ «បើនិយាយពីភោជនីយដ្ឋានល្អៗ គឺយើងនៅមានតម្រូវការច្រើន ត្រូវការការវិនិយោគបន្ថែមទាំងផ្នែករឹង និងផ្នែកទន់» នេះបើតាមប្រសាសន៍របស់លោក សុខលី។ ក្រឡេកមកមើលយុវជនកម្ពុជានាបច្ចុប្បន្ននេះ «ពួកគាត់ជាមនុស្សសម័យថ្មីនេះចូលចិត្តអ្វីថ្មី ប្លែក និងឆ្ងាញ់»។
លោក ហូ វណ្ឌី (Ho Vandy) ប្រធានក្រុមហ៊ុន World Express Tours ដែលបានប្រឡូកនៅក្នុងវិស័យសេវាកម្មទេសចរណ៍ ២ ទសវត្សរ៍មកហើយបានថ្លែងថា នៅទីក្រុងភ្នំពេញ និងទីក្រុងសំខាន់ៗ គឺយើងនៅខ្វះខាតភោជនីយដ្ឋានដែលមានស្តង់ដារខ្ពស់ «យើងមានអាហារដ្ឋានច្រើន ប៉ុន្តែខ្វះខាតភោជនីយដ្ឋាន»។
លោកបន្តថា ដូច្នេះអាជីវករភោជនីយដ្ឋានគួរតែចាប់ផ្តើម «កែប្រែទម្លាប់ សេវាកម្ម និងអនាម័យ» តាមស្តង់ដារកម្រិតខ្ពស់មួយដែលក្រសួងពាក់ព័ន្ធបានតម្រូវឲ្យអនុវត្តតាមនាពេលកន្លងមក។
លោក វណ្ឌី បានរំឭកថា កន្លងមកក្រសួងសុខាភិបាលលោកក៏បានណែនាំដល់គុណភាពម្ហូបអាហារ និងអនាម័យ។ ចំណែកក្រសួងវប្បធម៌ និងវិចិត្រសិល្បៈ ក៏ធ្លាប់បានណែនាំឲ្យភោជនីយដ្ឋានទាំងអស់ត្រូវរៀបចំឲ្យមាន«មុខម្ហូបខែ្មរឲ្យបានកាន់តែច្រើនមុខ និងប្រើប្រាស់គ្រឿងផ្សំក្នុងស្រុកឲ្យបានកាន់តែច្រើនកាន់តែល្អ»។
លោកបន្ថែមថា ៖ «ថ្មីៗនេះ ក្រសួងបរិស្ថាន ក៏បានចូលរួមការងារមួយចំនួនពាក់ព័ន្ធទៅនឹងបញ្ហាភោជនីយដ្ឋាននេះដែរ ព្រោះបរិយាកាសល្អនៅទីកន្លែងបរិភោគអាហារ(ភោជនីយដ្ឋាន)វាក៏ជាកត្តាសំខាន់មួយដែរ»៕