មន្ទីរពេទ្យជប៉ុនសាន់រ៉ាយស៍ (Sunrise Japan Hospital Phnom Penh) បានបើកផ្នែកថ្មីមួយទៀតសម្រាប់ពិនិត្យព្យាបាលជំងឺកុមារ ដោយបំពាក់បន្ថែមសម្ភារឧបករណ៍ទំនើបថ្មីៗមួយចំនួន និងពង្រីកបន្ថែមមជ្ឈមណ្ឌលសេវាសង្គ្រោះបន្ទាន់ដើម្បីធ្វើឲ្យសេវាកម្មសុខាភិបាលរបស់ខ្លួនកាន់តែមានប្រសិទ្ធភាពល្អប្រសើរថែមទៀត។
មន្ទីរពេទ្យជប៉ុនសាន់រ៉ាយស៍ បានបើកសម្ពោធកាលពីឆ្នាំ ២០១៦ គឺជាមន្ទីរពេទ្យលំដាប់កំពូលមួយនៅប្រទេសកម្ពុជាដែលមានបំពាក់នូវសម្ភារបរិក្ខារពេទ្យទំនើបៗចុងក្រោយបង្អស់មានមជ្ឈមណ្ឌលព្យាបាលដោយចលនា(សម្រាប់អ្នកជំងឺធ្លាប់ប៉ះទង្គិចក្បាល) និងរថយន្តសង្គ្រោះបន្ទាន់ចំនួន ២ គ្រឿង សម្រាប់ដឹកអ្នកជំងឺគ្រប់ ២៤ ម៉ោង។
ផ្នែកពិនិត្យព្យាបាលជំងឺកុមារដែលទើបនឹងបើកថ្មីនេះមានទីតាំងយ៉ាងល្អប្រសើរអមដោយគំនូររូបសត្វផ្សេងៗ នៅលើជញ្ជាំង និងសម្ភារក្មេងលេងជាច្រើន ហើយមជ្ឈមណ្ឌលថ្មីនេះអាចទទួលកុមារដែលមានជំងឺឲ្យសម្រាកព្យាបាលបាន ២០ នាក់។ ដោយទើបតែបើកបានរយៈពេល ២ ខែ អគារនេះបានពិនិត្យ និងព្យាបាលកុមារប្រមាណពី ៥ ទៅ ១០ នាក់ជារៀងរាល់ថ្ងៃ ដោយរួមមានចាប់ពីទារកដល់ជំទង់អាយុ ១៦ ឆ្នាំ។
លោកវេជ្ជបណ្ឌិត Manabu Okawada ឯកទេសផ្នែកវះកាត់ជំងឺកុមារដែលមានបទពិសោធ ១៥ ឆ្នាំ (រួមទាំងបទពិសោធ ៨ ឆ្នាំ ព្យាបាលជំងឺកុមារ) នៅប្រទេសជប៉ុន បានថ្លែងថាលោកចង់បង្កើនការយល់ដឹងអំពីសារៈសំខាន់នៃការបង្ការការពារជំងឺមុនពេលកុមារចាប់ផ្តើមឈឺ។
«នៅប្រទេសជប៉ុន យើងជួបនឹងបញ្ហាកុមារលើសទម្ងន់ និងបញ្ហាវិវឌ្ឍន៍រាងកាយផ្សេងទៀត ប៉ុន្តែការត្រួតពិនិត្យឲ្យបានឆាប់រហ័សអាចជួយបង្ការពីការកើតមានបញ្ហាទាំងនេះបាន» នេះបើយោងតាមប្រសាសន៍របស់លោកវេជ្ជបណ្ឌិត Okawada។ «ខ្ញុំចង់ជួបដោយផ្ទាល់ជាមួយមាតាបិតាអាណាព្យាបាលជាជនជាតិខ្មែរ ដើម្បីពិភាក្សាអំពីការពិនិត្យ និងការថែទាំសុខភាពសម្រាប់កូនៗរបស់ពួកគាត់»។
លោកបានបញ្ជាក់ថា មន្ទីរពេទ្យនេះមានវិធីសាស្ត្រព្យាបាលមានប្រសិទ្ធភាពខ្ពស់មកពីជប៉ុន ដោយរួមបញ្ចូលការប្រើឱសថផ្សំពីរុក្ខជាតិ និងការថែទាំដោយការយកចិត្តទុកដាក់ខ្ពស់ និងការបន្តការពិភាក្សាជាមួយគ្រួសារ ដើម្បីបញ្ជាក់លម្អិតអំពីចំណុចទាំងអស់នៃការពិនិត្យសុខភាព និងការវះកាត់ជាដើម។
លោកវេជ្ជបណ្ឌិតបន្តថា៖ «មន្ទីរពេទ្យផ្សេងទៀតចេញវេជ្ជបញ្ជាឲ្យប្រើប្រាស់ថ្នាំជាច្រើនបានយ៉ាងឆាប់រហ័សដោយឲ្យអ្នកជំងឺនូវថ្នាំអង់ទីប៊ីយ៉ូទិក និងថ្នាំបំបាត់ការឈឺចាប់ បើទោះជាក្នុងករណីមិនចាំបាច់ក្តី។ ប៉ុន្តែនៅមន្ទីរពេទ្យជប៉ុនសាន់រ៉ាយស៍ យើងខ្ញុំមិនចេញវេជ្ជបញ្ជាឲ្យប្រើប្រាស់ឱសថដែលមិនចាំបាច់នោះទេ»។
លោក Okawada បន្ថែមទៀតថា មន្ទីរពេទ្យជប៉ុនសាន់រ៉ាយស៍ នាបច្ចុប្បន្ននេះកំពុងសហការជាមួយគ្លីនិកជប៉ុនផ្សេងទៀតនៅក្នុងព្រះរាជាណាចក្រកម្ពុជា ហើយគ្រោងនឹងចាប់ដៃគូជាមួយមន្ទីរពេទ្យ ខ្មែរ ដើម្បីលើកកម្ពស់អំពីបញ្ហាសុខភាពក្នុងពេលអនាគតឆាប់ៗខាងមុខនេះ។
លោកបញ្ជាក់ថា៖ «កុមារច្រើនជាង ៥០ ភាគរយដែលមកមន្ទីរពេទ្យរបស់យើងសុទ្ធតែធ្លាប់ធ្វើដំណើរទៅក្រៅប្រទេសដើម្បីទទួលសេវាថែទាំសុខភាព»។ លោកបន្តថា វាជារឿងវិជ្ជមានមួយដែលកុមារទាំងនោះអាចស្វែងរកមន្ទីរពេទ្យដែលនៅក្បែរពួកគេនាពេលនេះដើម្បីទទួលបានសេវាថែទាំសុខភាពរបស់ពួកគេយ៉ាងមានប្រសិទ្ធភាព។
ជារៀងរាល់ខែ មន្ទីរពេទ្យជប៉ុនសាន់រ៉ាយស៍ មានគម្រោងរៀបចំនូវកម្មវិធីថ្មីមួយដោយអាណាព្យាបាលចំនួន ២៥ គ្រួសារដែលបានចុះឈ្មោះជាមុនអាចធ្វើដំណើរទស្សនកិច្ចនៅមន្ទីរពេទ្យសម្រាប់កុមារ ហើយអាចឲ្យកូនៗរបស់ពួកគាត់រៀនអំពីសារៈសំខាន់នៃការលាងដៃ និងអាហារូបត្ថម្ភ និងមើលកូនៗរបស់ពួកគាត់ដើរតួសម្តែងជាគ្រូពេទ្យដោយកាន់ឧបករណ៍ស្តេតូសម្រាប់ត្រួតពិនិត្យចង្វាក់សួត ឬបេះដូង។ ដំណើរទស្សនកិច្ចដំបូង គឺកាលពីខែមុន ហើយបន្ទាប់ទៅទៀតនោះគឺនៅថ្ងៃទី ២៥ ខែកុម្ភៈខាងមុខនេះ។
យោងតាមលោក Takehiro Kozuma នាយករងផ្នែកគ្លីនិកប្រចាំមន្ទីរពេទ្យជប៉ុនសាន់រ៉ាយស៍ បានពន្យល់ថាការព្យាបាលនៅមន្ទីរពេទ្យយើងខ្ញុំ ត្រូវបានគេទទួលស្គាល់យ៉ាងច្រើនគួរឲ្យចាប់អារម្មណ៍ ខណៈពេលដែលមន្ទីរពេទ្យនេះបានទទួលអ្នកជំងឺ ៣០ នាក់កាលពីថ្ងៃបើកដំបូងហើយបច្ចុប្បន្នមន្ទីរពេទ្យនេះមានអ្នកជំងឺមកពិនិត្យព្យាបាលចំនួន ១៥០ នាក់ជារៀងរាល់ថ្ងៃ។
លោកថ្លែងថា ការពង្រីកបន្ថែមសេវាផ្នែកសង្គ្រោះបន្ទាន់ គឺជាការពង្រីកបន្ថែមសម្រាប់មន្ទីរពេទ្យ ដែលស្ថិតក្នុងទីក្រុងដែលមានអត្រាគ្រោះថ្នាក់ចរាចរណ៍ខ្ពស់ និងការប៉ះទង្គិចដល់ក្បាល។ មន្ទីរពេទ្យនេះក៏មានមជ្ឈមណ្ឌលព្យាបាលដោយចលនាសម្រាប់អ្នកជំងឺដែលបានរងគ្រោះថ្នាក់ផ្នែកក្បាលផងដែរ។
«សរុបមកមន្ទីរពេទ្យរបស់យើងភាគច្រើនផ្តោតលើប្រព័ន្ធប្រសាទ និងព្យាបាលការប៉ះទង្គិចក្បាល» នេះបើតាមប្រសាសន៍របស់លោកវេជ្ជបណ្ឌិត Kozuma។ «ច្រើនជាងនេះទៅទៀត យើងចង់ផ្តោតលើវប្បធម៌នៃការថែទាំយ៉ាងយកចិត្តទុកដាក់នៅទីនេះ ដោយយើងមានការប្រជុំដើម្បីពិភាក្សាគ្នាអំពីសុខុមាលភាពរបស់អ្នកជំងឺមួយថ្ងៃពីរដងហើយយើងជួបនិយាយគ្នាដោយ ផ្ទាល់ជាមួយអ្នកជំងឺតែម្តង និងពន្យល់អ្វីៗទាំងអស់ប្រាប់ពួកគាត់ម្តងមួយជំហានៗ»។
លោកបានបន្ថែមទៀតថាគ្រូពេទ្យក៏តែងតែពិគ្រោះអំពីតម្លៃជាមួយអ្នកជំងឺមុនពេលព្យាបាលផងដែរ ដើម្បីធានាថាមិនមានតម្លៃណាមួយដែលអ្នកជំងឺមិនដឹង។ តម្លៃសម្រាប់សេវាថែទាំសុខភាពទូទៅនៅមន្ទីរពេទ្យនេះ គឺសមរម្យ ដោយរួមមាននូវសេវាពិនិត្យសុខភាពផ្នែកខួរក្បាល ផ្នែកបេះដូង និងផ្នែកពោះវៀនធំ មានតម្លៃចាប់ពី ១២០ ទៅ ៤៨០ ដុល្លារប៉ុណ្ណោះ។
លោកបន្ថែមទៀតថា បើទោះជាមន្ទីរពេទ្យនេះបើកទ្វារដំបូងដោយទទួលតែអ្នកជំងឺជនជាតិខ្មែរក្តី ក៏ពួកយើងមានទទួលអ្នកជំងឺជាជនបរទេសផងដែរ និងមន្ទីរពេទ្យមានបុគ្គលិកនិយាយភាសាអង់គ្លេស ជប៉ុន និងចិនផងដែរ។
លោក Kozuma បន្តថា៖ «នៅថ្ងៃអនាគត យើងនៅតែចង់ពង្រីកខ្លួនយើងបន្តទៀត ហើយពង្រីកសេវាកម្មរបស់យើងលើផ្នែករោគស្ត្រី ដែលយើងគិតថា ប្រទេសកម្ពុជាត្រូវការ ហើយខ្ញុំគិតថា យើងនឹងអាចធ្វើឲ្យមានការផ្លាស់ប្តូរបាន»៕