នៅឆ្នាំ ២០១៨ នេះ គឺជាខួបទី ៦៥ នៃចំណងមិត្តភាពកម្ពុជា និងជប៉ុន ដែលសម្ព័ន្ធភាពនេះគឺមានភាពរឹងមាំទាំងផ្នែកនយោបាយ សេដ្ឋកិច្ច និងវប្បធម៌។
កាលពីឆ្នាំ ២០១៦ ការវិនិយោគដោយផ្ទាល់របស់ជប៉ុន (FDI) ចូលមកប្រទេសកម្ពុជាមានទឹកប្រាក់ជាង ៨២២ លានដុល្លារ ដែលធ្វើឲ្យជប៉ុនក្លាយជាប្រទេសវិនិយោគធំជាងគេលំដាប់ថ្នាក់ទី ៣ នៅកម្ពុជា ខណៈបច្ចុប្បន្ននេះមានវិនិយោគិនជប៉ុន ប្រហែល ៣៥០០ នាក់ កំពុងវិនិយោគនៅកម្ពុជា។ យោងតាមតួលេខរបស់ក្រុមប្រឹក្សាអភិវឌ្ឍន៍កម្ពុជា (CDC) បានឲ្យដឹងថា ក្នុងរយៈពេល ២៥ ឆ្នាំចុងក្រោយនេះការវិនិយោគរបស់ជប៉ុននៅកម្ពុជា មានតម្លៃជា ១,៥០ ពាន់លានដុល្លារ។
ភ្ញៀវទេសចរជប៉ុនច្រើនជាង ២០ ម៉ឺននាក់បានមកទស្សនាប្រទេសកម្ពុជាកាលពីឆ្នាំមុន ហើយចំនួននេះត្រូវគេរំពឹងថានឹងអាចកើនឡើងថែមទៀតក្នុងពេលអនាគត ក្រោយពេលដែលក្រុមហ៊ុនអាកាសចរណ៍ធំបំផុតរបស់ជប៉ុន All Nippon Airways (ANA) បានធ្វើការហោះដោយត្រង់ពីទីក្រុងតូក្យូ មកកម្ពុជាចាប់តាំងពីឆ្នាំ ២០១៦ មក។
ក្រៅពីការវិនិយោគ ជប៉ុនក៏បានផ្តល់ជំនួយហិរញ្ញវត្ថុយ៉ាងច្រើនដល់កម្ពុជាផងដែរ។ ប្រទេសជប៉ុន គឺជាម្ចាស់ជំនួយធំបំផុតសម្រាប់កម្ពុជា ចាប់តាំងពីឆ្នាំ ១៩៩២ ដោយបានផ្តល់នូវប្រាក់ជំនួយច្រើនជាង ២ ពាន់លានដុល្លារ លើជំនួយសម្រាប់អភិវឌ្ឍន៍ផ្សេងៗ។
ទោះជាយ៉ាងណាមុនរយៈពេល ៦៥ ឆ្នាំនៃសម្ព័ន្ធភាពនេះ ទំនាក់ទំនងរវាងប្រទេសទាំង ២ ក៏មិនសូវមានភាពល្អប្រសើរប៉ុន្មាននោះទេ។ ជាក់ស្តែងនៅទសវត្សរ៍មុនពេលដែលកិច្ចព្រមព្រៀងការទូតដំបូងត្រូវបានចុះហត្ថលេខា កងទ័ពរបស់ជប៉ុនក៏ធ្លាប់បានចូលមកកាន់កាប់ប្រទេសកម្ពុជាចន្លោះពីឆ្នាំ ១៩៤១ រហូតដល់ ១៩៤៥ ផងដែរ។
នៅក្នុងសកលលោកទំនើបសម្ព័ន្ធភាពការទូតរវាងប្រទេសជប៉ុន និងកម្ពុជា មានភាពពេញលេញនៅពេលដែលប្រទេសកម្ពុជាបានទទួលឯករាជ្យបរិបូរណ៍ពីអាណានិគមបារាំងក្នុងឆ្នាំ ១៩៥៣ ក្រោមព្រះរាជកិច្ចខិតខំប្រឹងប្រែងដ៏ខ្ពង់ខ្ពស់របស់សម្តេចព្រះ នរោត្តម សីហនុ។ ប៉ុន្តែសម្ព័ន្ធភាពដ៏ល្អនាពេលនោះត្រូវបានជួបប្រទះបញ្ហារកាំរកូសនៅក្នុងទសវត្សរ៍ឆ្នាំ ១៩៧០ ក្នុងរបបដឹកនាំដោយលោកសេនាប្រមុខ លន់ នល់ និងរបបខ្មែរក្រហម។
នៅក្នុងឆ្នាំ ១៩៩២ ពេលដែលប្រទេសកម្ពុជាស្ថិតក្រោមការជួយជ្រោមជ្រែងពីសំណាក់អង្គការសហប្រជាជាតិ UNTAC - United Nations Transitional Authority in Cambodia) រដ្ឋាភិបាលជប៉ុនក៏បានចាប់ដៃគូសម្ព័ន្ធមិត្តជាមួយប្រទេសកម្ពុជាសាជាថ្មីឡើងវិញ។
ជំនួយរបស់ប្រទេសជប៉ុនក្នុងកិច្ចគាំទ្រសម្រាប់សន្តិភាពនាពេលនោះមិនមែនជារឿងចៃដន្យទេ។ ក្នុងចំណោមប្រាក់ជំនួយ ២ ពាន់លានដុល្លារនោះ គឺភាគច្រើនបានមកពីប្រទេសជប៉ុន ដែលនោះគឺជាការចូលរួមក្នុងបេសកកម្មរបស់អង្គការសហប្រជាជាតិជាលើកដំបូងរបស់ជប៉ុនក្រោយពីសម័យសង្គ្រាមលោកលើកទី ២ ខណៈពេលនោះកងទ័ពជាច្រើនរបស់ជប៉ុនត្រូវបានដាក់ពង្រាយនៅតាមបណ្តាប្រទេសមួយចំនួនមុននឹងធ្វើការដកកងទ័ពចូលទៅប្រទេសខ្លួនវិញ។
លោក Yasushi Akashi ដែលជាអ្នកជំនាញការទូតរបស់អង្គការសហប្រជាជាតិ គឺជាប្រមុខ UNTAC នានានៅពេលនោះក្រោយមកលោកបានសរសេរថា៖ «មធ្យោបាយមូលដ្ឋានរបស់ខ្ញុំនាពេលនោះ គឺការរួមបញ្ចូលគ្នានូវការបញ្ចុះបញ្ចូលឲ្យមានភាពស្ងប់ស្ងៀមជាមួយនឹងសម្ពាធដែលកំពុងកើតមាន»។
ខុសពីម្ចាស់ជំនួយធំៗផ្សេងទៀតរបស់កម្ពុជា ដែលមានដូចជា សហរដ្ឋអាមេរិក និងសហភាពអឺរ៉ុប ប្រទេសជប៉ុនបាននៅជាមួយកម្ពុជា ដោយឆ្លងកាត់នូវព្រឹត្តិការណ៍នយោបាយជាច្រើនក្នុងរយៈពេលប៉ុន្មានឆ្នាំចុងក្រោយនេះ។
ប្រទេសជប៉ុនថែមទាំងបានបញ្ជាក់ថា ខ្លួននឹងនៅតែបន្តផ្តល់ហិរញ្ញប្បទានដល់គណៈកម្មាធិការជាតិរៀបចំការបោះឆ្នោតកម្ពុជា (NEC) ហើយនៅតែមានគម្រោងក្នុងការបញ្ជូនបេសកជនឃ្លាំមើលការបោះឆ្នោតដើម្បីតាមដានឃ្លាំមើលការបោះឆ្នោតជាតិនៅខែកក្កដាខាងមុខនេះផងដែរ។
លោក អៀ សុផល សាស្ត្រាចារ្យ ផ្នែកទំនាក់ទំនងការទូត និងកិច្ចការពិភពលោកនៅសាកលវិទ្យាល័យ Occidental College នៅរដ្ឋ Los Angeles មានប្រសាសន៍ថា៖ «វិស័យពាណិជ្ជកម្មនៅតែកើនឡើង ហើយបញ្ហាកង្វះប្រជាធិបតេយ្យមិនបានក្លាយជាឧបសគ្គសម្រាប់ចំណងមិត្តភាពកម្ពុជា-ជប៉ុននោះទេ»។
លោកបានបន្ថែមថា៖ «ជាការពិតណាស់ អ្វីៗវាអាចនឹងផ្លាស់ប្តូរ ពិសេសប្រសិនបើសហរដ្ឋអាមេរិក និងសហភាពអឺរ៉ុបដាក់សម្ពាធដល់រដ្ឋាភិបាលទីក្រុងតូក្យូឲ្យធ្វើការរឹតបន្តឹងដល់កម្ពុជា»៕
David Hutt