Search form

Login - Register | FOLLOW US ON

Logo of Phnom Penh Post newspaper Phnom Penh Post - សង្ខេប​ព័ត៌មាន​លើ​វិស័យ​ហិរញ្ញវត្ថុ និង​ធនាគារ ត្រីមាស​ទី​១ ឆ្នាំ​២០១៧

Content image - Phnom Penh Post
អគារ​ធនាគារ​ជាតិ​នៃ​កម្ពុជា ស្ថិត​នៅ​លើ​មហា​វិធី​ព្រះ​នរោត្តម។ ផា លីណា

សង្ខេប​ព័ត៌មាន​លើ​វិស័យ​ហិរញ្ញវត្ថុ និង​ធនាគារ ត្រីមាស​ទី​១ ឆ្នាំ​២០១៧

ឆ្នាំនេះ​គឺជា​ការចាប់ផ្តើម​សន្សឹមៗ​មួយ​សម្រាប់​វិស័យ​ហិរញ្ញវត្ថុ​នៅ​កម្ពុជា​ដែល​ផ្នែក​ឥណទាន​មានការ​លូតលាស់​យឺត​ជាង​មុន ប៉ុន្តែ​យ៉ាង​ណា​មិញ​វិស័យ​ធនាគារ​របស់​ប្រទេស​នេះ​នៅតែ​បង្ហាញ​នូវ​ភាព​រីកចម្រើន​ខ្លាំង​គួរ​ឲ្យ​កត់សម្គាល់​។

ត្រីមាស​ទី​១ ដើមឆ្នាំ​២០១៧​នេះ ធនាគារជាតិ​ចេញ​ច្បាប់​ថ្មី​ដោយ​តម្រូវ​ឲ្យ​គ្រឹះស្ថាន​ហិរញ្ញវត្ថុ​ទាំងអស់​បញ្ជាក់ថា ខ្លួន​ជា​គ្រឹះស្ថាន​ឯកជន​មិន​មែន​ជា​របស់​រដ្ឋ ដែល​ធ្វើ​ឲ្យ​គ្រឹះស្ថាន​ធំៗ​ត្រូវធ្វើ​ការចំណាយ​យ៉ាងច្រើន​លើ​ការ​ធ្វើ​កំណែ​ទម្រង់​ថ្មី​នេះ​។

​ថ្ងៃទី​១៩ ធ្នូ​

​គេ​បាន​បង្ហាញថា វិនិយោគិន​ជប៉ុន បានផ្តល់​ទឹក​ប្រាក់​សម្រាប់​ជំរុញ​សេដ្ឋកិច្ចកម្ពុជា​សរុប​ច្រើនជាង​ ៨០០​ លាន​ដុល្លារ​ក្នុង​រយៈពេល​ ២០ ​ឆ្នាំ​ចុង​ក្រោយ​នេះ ដែល​ភាគច្រើន​នៃ​ទឹកប្រាក់​វិនិយោគ​ត្រូវបាន​ប្រើប្រាស់​ជា​ជំនួយ​ដល់​ការអភិវឌ្ឍ និង​ពង្រឹង និង​ពង្រីក​វិស័យ​ពាណិជ្ជកម្ម នេះ​បើ​យោងតាម​ទិន្នន័យ​ផ្តល់​ដោយ​ស្ថានទូត​ជប៉ុន​។​

ទិន្នន័យ​នេះ​បាន​បង្ហាញ​ថា លំហូរ​សាច់ប្រាក់​សរុប​ពី​ជំនួយ​ការ​ផ្នែក​អភិវឌ្ឍន៍​ផ្លូវការ (Official Development Assistance ODA) របស់​ជប៉ុន មាន​ចំនួន​សរុប​លើសពី ​២,៤០​ កោដិ​ដុល្លារ គិត​ចាប់ពី​ឆ្នាំ​ ១៩៩៣ រហូត​ដល់​ឆ្នាំ​ ២០១៤ បូក​រួមទាំង​ប្រាក់​កម្ចី​ចំនួន​ ១៩០ ​លាន​ដុល្លារ ប្រាក់​ជំនួយ ​១,៤​ កោដិ​ដុល្លារ និង​ជំនួយ​ទៅលើ​វិស័យ​បច្ចេកទេស​ចំនួន ៧៩៨​ លាន​ដុល្លារ​អាមេរិក​។

ថ្ងៃទី​ ២៧ ខែធ្នូ​

ទម្រង់​ពាណិជ្ជកម្ម​ថ្មី​មួយ​ត្រូវបាន​បង្កើត​ឡើង​ដើម្បី​ជួយ​ដល់​វិស័យ​ទីផ្សារ​ភាគហ៊ុន​នៅ​កម្ពុជា ដែលមាន​ភាពស្ពឹក​ស្រពន់ ដោយ​ទម្រង់​ថ្មី​នេះ​អនុញ្ញាត​ឲ្យ​វិនិយោគិន​ជា​បុគ្គល ឬ​ស្ថាប័ន​អាច​ទិញ​លក់​ភាគហ៊ុន​ធំៗ ខាងក្រៅ​ទីផ្សារ​កំពុង​ដំណើរ​ការ​ជាប្រចាំ​ថ្ងៃ នេះ​បើ​យោងតាម​អ្នក​នាំ​ពាក្យ​ម្នាក់​។​

​លោក Lamun Soleil នាយក​គ្រប់គ្រង​ដំណើរការ​ទីផ្សារ​នៅ CSX បាន​ថ្លែងថា ក្រុមហ៊ុន​នេះ​បាន​បង្កើត​នូវ​ទម្រង់​មួយ​សម្រាប់​ប្រើប្រាស់​ក្នុងប្រទេស​នេះ ហើយនឹង​ផ្ញើ​ជូនទៅ​គណៈកម្មការ​មូល​ប​ត្រ​កម្ពុជា (SECC) ដែលជា​អ្នកជំនាញ​លើ​ទីផ្សារ​នេះ​ដើម្បី​ទទួលបាន​ការអនុញ្ញាត​សម្រាប់​ប្រើប្រាស់​។

លោក​ថ្លែងថា ទម្រង់​ថ្មី​របស់ CSX នឹង​ជួយផ្តល់​គុណប្រយោជន៍​ដល់​ទាំង​វិនិយោគិន​ជា​បុគ្គល និង​ក្រុមហ៊ុន​។

​ថ្ងៃទី​៩ ខែមករា​

​មូលនិធិ​អន្តរជាតិ​ដែលជា​ធម្មតា​ត្រូវបាន​ផ្ទេរ​មក​កម្ពុជា តាមរយៈ​ធនាគារ​អេស៊ីលីដា ដែលជា​មូលនិធិ​មាន​ទំហំ​ ១​ ភាគ ​៤ ​នៃ​មូលនិធិ​ផ្ទេរ​ចូល​កម្ពុជា​សរុប​នោះបាន​ធ្លាក់ចុះ​បន្តិច​ក្នុង​ឆ្នាំ​ ២០១៦ ដែលជា​ផលប៉ះពាល់​ដោយសារ​តម្លៃ​ស្រូវ​ធ្លាក់ចុះ នេះ​បើ​យោងតាម​ប្រធាន​ធនាគារ​ម្នាក់​។​

​លោក In Channy ប្រធាន និង​ជានា​យក​គ្រប់គ្រង​ធនាគារ​អេស៊ីលីដា បាន​ថ្លែងថា ទំហំ​ផ្ទេរប្រាក់​ក្នុងស្រុក បូករួម​ទាំង​ទំហំ​ផ្ទេរ​សរុប​បាន​ធ្លាក់ចុះ​ចំនួន ១,៥២​ កោដិ​ដុល្លារ​ធៀប​កាលពី​ឆ្នាំមុន​ដែល​ កាលពី​ឆ្នាំ​ ២០១៥​ បាន​ធ្លាក់ចុះ​ចំនួន ១,៥៤​ កោដិ​ដុល្លារ​។

លោក​ថ្លែងថា ការធ្លាក់ចុះ ដែល​បាន​ប៉ះពាល់​ដល់​ស្ថិរភាព​កំណើន​ទិន្នផល​ក្នុងស្រុក​សរុប (GDP Growth) ចំនួន​៧​ភាគរយ​នោះ​គឺ​មួយ​ភាគ​ធំ​ដោយសារតែ​ការធ្លាក់​តម្លៃ​ជា​អន្តរជាតិ​លើ​ផលិតផល​កសិកម្ម ពិសេស​គឺ​ស្រូវ​អង្ករ​។

Content image - Phnom Penh Post
អគារ​ធនាគារ Acleda ដែល​កំពុង​ស្ថិត​ក្នុង​ដំណាក់​កាល​ផ្លាស់​ប្តូរ​ឡូហ្គោ​ថ្មី​របស់​ខ្លួន។ មឿន ញាណ

ថ្ងៃទី​១៣ ខែមករា​

​ធនាគារជាតិ​កម្ពុជា (NBC) បាន​បញ្ចេញ​នូវ​របាយការណ៍​វាយតម្លៃ​ប្រចាំឆ្នាំ​២០១៦ និង​ចក្ខុវិស័យ​សម្រាប់​ឆ្នាំ​២០១៧ ដោយ​លើកឡើង​នូវ​ការបន្ត​រីកលូតលាស់​របស់​វិស័យ​ធនាគារ ទន្ទឹមនឹង​ការជូនដំណឹង​ថា ប្រទេស​កម្ពុជា នៅតែ​អាច​ទទួលផល​ប៉ះពាល់​ពី​កត្តាសេដ្ឋកិច្ច​អន្តរជាតិ​នៅឡើយ​។

​ការលូតលាស់ GDP របស់​កម្ពុជា បាន​កើនឡើង​ចំនួន​៧​ភាគរយ​ដោយសារតែ​ភាព​រីកចម្រើន​ផ្នែក​វិស័យ​កាត់ដេរ ទេសចរណ៍ និង​សំណង់ និង​អចលនទ្រព្យ​ផងដែរ នេះ​បើ​យោងតាម​របាយការណ៍រ​បស់ NBC​។ ការវិនិយោគ​ផ្ទា​ល់ពី​បរទេស (Foreign direct investment - FDI) បាន​បន្ត​ហូរ​ចូលមកក្នុង​ប្រទេស​នេះ​ដែល​ធ្វើ​ឲ្យ​មាន​កំណើន GDP រហូតដល់​ ១០,៧០​ ភាគរយ​។

​វិស័យ​ធនាគារ​បាន​រីកចម្រើន​ខ្លាំង​ក្នុង​ឆ្នាំ​២០១៦ ហើយ​មាន​ភាពល្អប្រសើរ​ជាង​ឆ្នាំមុនៗ​។ ទ្រ​ព្ប​សម្បត្តិ​សរុប​របស់​ធនាគារ​បា​ន​កើន​ដល់ ១៧,៤០​ ភាគរយ គិត​ជា​ទឹកប្រាក់​ស្មើនឹង ២៧,៨០​ កោដិ​ដុល្លារ ខណៈដែល​ចំនួន​ប្រាក់​បញ្ញើ​បាន​កើន​ដល់ ២០,៧០​ ភាគរយ ស្មើនឹង ១៥,៤០​លាន​ដុល្លារ​។​

ថ្ងៃទី​២៣ ខែមករា​

​ការលូតលាស់​ផ្នែក​ឥណទាន​នៅ​កម្ពុជា បានបង្ហាញ​នូវ​ភាព​ធ្លាក់ចុះ​កាលពី​ឆ្នាំមុន ខណៈដែល​ប្រាក់​បញ្ញើ​បាន​បន្ត​កើនឡើង ខណៈដែល​គ្រឹះស្ថាន​ហិរញ្ញវត្ថុ​ខ្លះ​ជឿជាក់ថា បង្ហាញ​នូវ​ឧបសគ្គ​ដល់​ការផ្តល់​ប្រាក់កម្ចី ហើយ​ខណៈដែល​គោលការណ៍​អន្តរាគមន៍​ថ្មី​របស់​ធនាគារជាតិ​បានធ្វើការ​រឹតបន្តឹង​។

​ធនាគារជាតិ​នៃ​កម្ពុជា បានបង្ហាញ​នូវ​របាយការណ៍​ប្រចាំឆ្នាំ​របស់ខ្លួន ដោយ​ការលូតលាស់​ផ្នែក​ឥណទាន​មានការ​ធ្លាក់ចុះ​កាលពី​រយៈពេល​ប៉ុន្មាន​ឆ្នាំ​ចុង​ក្រោយនេះ ចាប់ពី​ ៣១ ​ភាគរយ ក្នុង​ឆ្នាំ​ ២០១៤ មក​នៅត្រឹមតែ ២៣​ ភាគរយ​ប៉ុណ្ណោះ​ក្នុង​ឆ្នាំ​២០១៦​។

ឥណទាន​សរុប​ដែល​ចេញ​ដោយ​ធនាគារ និង​គ្រឹះស្ថាន​មីក្រូហិរញ្ញវត្ថុ​មាន​ចំនួន​សរុប ​១៦,៩០​ លាន​ដុល្លារ កាលពី​ឆ្នាំមុន ខណៈដែល​ទំហំ​ប្រាក់​បញ្ញើ​បាន​កើន​ប្រមាណ ២១ ​ភាគរយ ស្មើនឹង​ ១៥,១០​ កោដិ​ដុល្លារ​។​

​ថ្ងៃទី​២៥ ខែមករា​

​ការសម្រេចចិត្ត​របស់​ធនាគារជាតិ កាលពី​ខែមីនា​ឆ្នាំមុន​ក្នុងការ​បង្កើន​នូវ​ប្រាក់​ដើម​អតិបរមា​របស់​គ្រឹះស្ថាន​ហិរញ្ញវត្ថុ​ក្នុងការ​ពង្រឹង និង​ធ្វើ​ឲ្យ​វិស័យ​ហិរញ្ញវត្ថុ​មាន​ស្ថិរភាព​នោះបាន​ធ្វើ​ឲ្យ​មាន​កំណើន​លំហូរ​ចូល​សាច់ប្រាក់​ពី​បរទេស​មកកាន់​ធនាគារ​ក្នុងស្រុក នេះ​បើ​យោងតាម​អ្នកជំនាញ​លើ​វិស័យនេះ​។​

​ក្នុង​របាយការណ៍​ប្រចាំឆ្នាំ ដែល​ទើបនឹង​ត្រូវបាន​បញ្ចេញ​កាលពី​ចុងឆ្នាំ​មុននេះ ធនាគារជាតិ​នៃ​កម្ពុជា បានកត់សម្គាល់​ឃើញថា ចំនួន​វិនិយោគ​សរុប​ផ្ទាល់​ពី​បរទេស (FDI) ទៅក្នុង​គ្រឹះស្ថាន​ផ្តល់ប្រាក់​កម្ចី ដែលមាន​ចំនួន​ស្មើនឹង​ ១ ​ភាគ​ ៤​ នៃ​ទឹកប្រាក់​សរុប​ ២,១៥​ កោដិ​ដុល្លារ ដែល​បាន​ហូរ​ចូលក្នុង​សេដ្ឋកិច្ចកម្ពុជា​កាលពី​ឆ្នាំមុន​។

សរុបមក ទឹកប្រាក់​ច្រើនជាង ៥៣៩​លាន​ដុល្លារ​ក្នុង FDI ត្រូវបាន​ផ្ទេរ​ចូលទៅក្នុង​គ្រឹះស្ថាន​ហិរញ្ញវត្ថុ ដែល​នេះ​ជា​ចំនួន​កើនឡើង ៥​ភាគរយ​ក្នុង​ឆ្នាំ​២០១៥​។

Content image - Phnom Penh Post
គ្រឹះ​ស្ថាន​មីក្រូ​ហិរញ្ញវត្ថុ ដែល​ត្រូវ​ផ្លាស់​ប្តូរ​ឡូហ្គោ​នេះ​ចេញ​ចំនួ​សោយ​ឡូហ្គោ​ថ្មី​វិញ។ ហេង ជីវ័ន

ថ្ងៃទី ៣ ខែកុម្ភៈ​

​សម្រាប់​ឆ្នាំ​ទី​២ ដូចគ្នា​ទៅនឹង​ឆ្នាំ​ទី​១​ដែរ វិស័យ​ធនាគារ​បាន​រីកចម្រើន​ខ្លាំង​នៅ​កម្ពុជា ជាពិសេស​ផ្នែក​ជ្រើសរើស​បុគ្គលិក ដោយសារ​តែមាន​កំណើន​នៃ​តម្រូវការ​បុគ្គលិក​សម្រាប់​ធនាគារ និង​គ្រឹះស្ថាន​មីក្រូហិរញ្ញវត្ថុ​ថ្មីៗ នេះ​បើ​យោងតាម​របាយការណ៍​ចេញផ្សាយ​ដោយ​គេហទំព័រ​ការងារ Everjobs Cambodia​។

​ទិន្នន័យ​ដែល​ត្រូវបាន​ប្រមូល​ដោយ​បទ​វិភាគ​ផ្ទៃក្នុង​ផ្ទាល់ខ្លួន​របស់​ក្រុមហ៊ុន​នេះ​តាមរយៈ​ចំនួន​ការងារ ដែល​បាន​បង្ហោះ​លើ​គេហទំព័រ និង​ចំនួន​អ្នកស្វែងរក​ការងារ​នោះ បាន​បង្ហាញថា ចំនួន​ការងារ​ក្នុង​វិស័យ​ធនាគារ​មាន​ចំនួន​១១​ភាគរយ នៃ​ចំនួន​ការងារ​ស្វែងរក​សរុប​។

​របាយការណ៍​នេះ​បង្ហាញថា «​បើ​យោងតាម​ធនាគារជាតិ​នៃ​កម្ពុជា នៅត្រឹម​ខែ កក្កដា ឆ្នាំ​ ២០១៦ ធនាគារ​ឯកទេស​ចំនួន​៤ និង​គ្រឹះស្ថាន​មីក្រូហិរញ្ញវត្ថុ​ថ្មីៗ​ចំនួន​១២​ថ្មីៗ​ទៀត បាន​បើកទ្វារ ដែល​បញ្ជាក់ថា ចំនួន​តម្រូវការ​ការងារ​បាន​កើនឡើង​ក្នុង​រយៈពេល​១២​ខែ​ចុង​ក្រោយនេះ​»​។

ថ្ងៃទី​៨ ខែកុម្ភៈ​

​រាជរដ្ឋាភិបាល​កម្ពុជា បានធ្វើ​សេចក្តីសម្រេច​ផ្នែក​ច្បាប់​ដែល​នឹង​គ្រប់គ្រង​លើ​ការបង្កើត​ក្រុមហ៊ុន​ទីផ្សារ​រួមមួយ ហើយ​គ្រោង​នឹង​ស្វែងរក​ក្រុមហ៊ុន​ឯកជន​មួយ​ដើម្បី​សាកល្បង​អនុវត្ត​សេចក្តីប្រកាស​ដំបូង​នេះ នេះ​បើ​យោងតាម​សម្តី​របស់​មន្ត្រី​រដ្ឋាភិបាល​។

​ថ្លែង​ក្នុងអំឡុង​វេទិកា​ប្រឹក្សា​សាធារណៈ​លើ​ប្រកាស​ស្តីអំពី​ដំណោះស្រាយ​សាធារណៈ​សម្រាប់​ក្រុមហ៊ុន​មូល​ប​ត្រ លោក ស៊ូ សុជាតិ ដែលជា​នាយក​គ្រប់គ្រង​ទូទៅ​នៃ​គណៈកម្មការ​មូល​ប​ត្រ​កម្ពុជា (SECC) បាន​ថ្លែងថា សម្ព័ន្ធមិត្ត​ក្រុមហ៊ុន​អាច​នឹង​ផ្តល់នូវ​កិច្ចសហការ​មួយ​សម្រាប់​ក្រុមហ៊ុន​នានា​ក្នុងការ​ស្វែងរក​មូលនិធិ​បន្ថែម ដើម្បី​បង្កើន​ប្រាក់​ដើម ការពង្រីក​ខ្លួន ការដោះស្រាយ​បំណុល និង​ទទួលបាន​មូលនិធិ​បន្ថែម​។

​ថ្ងៃទី ៩ ខែកុម្ភៈ​

​ធនាគារ​កសិករ ដែលជា​ធនាគារ​រីកចម្រើន​ខ្លាំង​បំផុត​លំដាប់​ទី​៤ នៅ​ប្រទេស​ថៃ បាន​បើក​សម្ភោ​ធ​ជា​ផ្លូវការ​នៅ​ទីក្រុង​ភ្នំពេញ ដែល​ផ្តោតលើ​វិនិយោគិន​ថៃ ដែល​ស្វែងរក​ខ្ចីប្រាក់​នៅ​កម្ពុជា និង​ផ្ទេរប្រាក់​ឆ្លង​ប្រទេស​។​

​ប្រធាន​ធនាគារ លោក Predee Daochai បាន​ថ្លែងថា សក្តានុភាព​របស់​ធនា​គារ​នេះ​ពឹង​ផ្អែកលើ​ការផ្តល់​ប្រាក់កម្ចី​សម្រាប់​ការអភិវឌ្ឍ​ហេដ្ឋារចនាសម្ព័ន្ធ ដែល​រួមមាន​ទាំង​ផ្លូវថ្នល់ រោងចក្រ​អគ្គីសនី និង​វិស័យ​អចលនទ្រព្យ​។

​ថ្ងៃទី​១៤ ខែកុម្ភៈ​

​ធនាគារ​អេស៊ីលីដា ដែលជា​ស្ថាប័នហិរញ្ញវត្ថុ​ធំជាងគេ​នៅ​កម្ពុជា​បាន​ឆ្លងកាត់​ឆ្នាំ​ដ៏​អំណោយផល​មួយទៀត ដោយ​ប្រាក់ចំណេញ​សរុប​បាន​កើន​ចំនួន​១៧​ភាគរយ ស្មើនឹង ១២៧​លាន​ដុល្លារ នេះ​បើ​យោងតាម​របាយការណ៍​ស​រុ​ប​ផល​ចំណូល​ប្រចាំឆ្នាំ​២០១៦​។ ​ចំនួន​ទ្រព្យសម្បតិ្ត​សរុប​បាន​កើន​លើសពី​៤,៦​កោដិ​ដុល្លារ ស្មើនឹង​កំណើន​១៧​ភាគរយ បើ​ប្រៀបធៀប​ទៅនឹង​ឆ្នាំមុនៗ​។

Content image - Phnom Penh Post
អគារ​ធនាគារ​ស្ថាបនា​ដែល​កំពុង​ស្ថិត​ក្នុង​ដំណាក់​កាល​ផ្លាស់​ប្តូរ​ឡូហ្គោ​ថ្មី​ដែរ។ ផា លីណា

​ថ្ងៃទី​១៥ ខែកុម្ភៈ​

​ធនាគារជាតិ​បានប្រកាសថា គ្រប់​គ្រឹះស្ថាន​ហិរញ្ញវត្ថុ​ទាំងអស់​ត្រូវតែ​ប្រកាសថា​ខ្លួន​ជា «​គ្រឹះស្ថាន​ឯកជន​» លើ​ស្លាក​យីហោ​របស់ខ្លួន ហើយ​ត្រូវ​បង្ហាញ​ឲ្យ​បាន​ច្បាស់​ទៅដល់​សាធារណជន​ទូទៅ ដើម្បី​បញ្ជាក់ថា ខ្លួន​មិនមែនជា​ស្ថាប័ន​របស់​រដ្ឋ​ទេ​។

​ធនាគារជាតិ​បាន​ថ្លែង​ក្នុង​សេចក្តី​ប្រកាសថា ខ្លួន​បាន​មើលឃើញថា គ្រឹះស្ថាន​ហិរញ្ញវត្ថុ​ឯកជន​មួយចំនួន​បានធ្វើការ «​ឃោសនា​» ដោយ​បោក​បញ្ឆោត​អតិថិជន​ឲ្យ​ជឿថា ខ្លួន​ជា​គ្រឹះស្ថាន​រដ្ឋ ដើម្បី​ដាក់​គំនាប​ឲ្យ​អ្នក​ខ្ចី​ធ្វើ​ការសង​ប្រាក់​បំណុល​មក​ខ្លួន​វិញ​។

​ថ្ងៃទី​២០ ខែកុម្ភៈ​

​ធនាគារ​អេស៊ីលីដា ដែលជា​ធនាគារ​ធំជាងគេ​បំផុត​ផ្នែក​ទ្រព្យសម្បត្តិ​សរុប​នឹងត្រូវ​ចំណាយ​ប្រាក់​រាប់លាន​ដុល្លារ​សម្រាប់​ការ​អនុវត្តតាម​ការសម្រេច​ចិត្ត​របស់​គណរដ្ឋមន្ត្រី ដែល​គ្រឹះស្ថាន​ហិរញ្ញវត្ថុ​ឯកជន​ត្រូវ​ធ្វើការ​រចនា និង​ប្តូរ​ឡូហ្គោ​របស់ខ្លួន​លើ​រាល់​ឯកសារ និង​ផលិតផល​ទាំងអស់​ដើម្បី​កុំ​ឲ្យ​មានការ​យល់ច្រឡំ​ជាមួយ​ក្រសួង​សេដ្ឋកិច្ច និង​ហិរញ្ញវត្ថុ នេះ​បើ​យោងតាម​មន្ត្រី​ធនាគារ​ជាន់ខ្ពស់​ម្នាក់​។

​លោក អ៊ិន ចាន់នី អគ្គនាយក​ធនាគារ​អេស៊ីលីដា បាន​ថ្លែងថា ធនាគារ​នេះ​នឹង​ប្តូរ​រូប​ហង្ស​របស់ខ្លួន​ចេញ ដែល​ត្រូវបាន​ប្រើប្រាស់​តាំងពី​ឆ្នាំ​២០០៣ នៅពេល​ខ្លួន​បាន​ក្លាយជា​ធនាគារពាណិជ្ជ​កម្ម​មក​នោះ ទៅជា​ឡូហ្គោ ដែលមាន​រូប​ដំណក់ទឹក​វិញ​ដែលមាន​ទាំង​អក្សរ​ខ្មែរ និង​អក្សរ​អង់គ្លេស​។

​លោក​ថ្លែងថា ធនាគារ​នេះ​នឹង​អនុវត្តតាម​តម្រូវការ​របស់​រដ្ឋាភិបាល ដែល​រួមមាន​ទាំង​ការទម្លាក់​ឡូហ្គោ​ទាំង​២៥៩​ទីតាំង​របស់ខ្លួន​នៅ​កម្ពុជា សាខា​ទាំង​ ៤១ នៅ​ប្រទេស​ឡាវ និង​មី​យ៉ាន់​ម៉ា​ផងដែរ​។ ខ្លួន​ក៏​នឹងធ្វើ​ការប្តូរ​ស្លាក​ផ្ទាំង​ប្រកា​សទាំង ៣៥៣​ផ្ទាំង និង​កាត​ចំនួន ១,៧០​លាន​សន្លឹក ដែល​គ្រឹះស្ថាន​នេះ​បានចេញ​ជូន​អតិថិជន​នាពេល​កន្លងមក​។

​ថ្ងៃទី​២៣ ខែកុម្ភៈ​

​ក្នុង​រយៈពេល​តិចជាង​១​សប្តាហ៍ ចាប់តាំងពី​រដ្ឋាភិបាល​បានទាមទារ​ឲ្យ​ធនាគារ​អេស៊ីលីដា​ប្តូរ​ឡូហ្គោ​របស់ខ្លួន​ចេញ ដើម្បី​កុំ​ឲ្យ​មានការ​ភ័ន្តច្រឡំ​ជាមួយ​គ្រឹះស្ថាន​រដ្ឋ​នោះ គ្រឹះស្ថាន​មីក្រូហិរញ្ញវត្ថុ​ប្រា​សាក់ ក៏ត្រូវ​បាន​ក្រសួង​បញ្ជា​ឲ្យ​ប្តូរ​ឡូហ្គោ​ផងដែរ​។

​នៅក្នុង​សុន្ទរកថា​ថ្លែង​ក្នុង​ពិធី​ចែក​សញ្ញាបត្រ​នៅ​សាកលវិទ្យាល័យ​អន្តរជាតិ​ភ្នំពេញ កាលពីពេល​ថ្មីៗ​នេះ លោកនាយក​រដ្ឋមន្ត្រី ហ៊ុន សែន បាន​ថ្លែង និង​ព្រមាន​គ្រឹះស្ថាន​មីក្រូហិរញ្ញវត្ថុ​ធំជាងគេ​បង្អស់ ដោយ​សំដៅលើ​ទ្រព្យសម្បត្តិ​សរុប​តែម្តង​។​

​លោក​ថ្លែងថា ៖ «​ខ្ញុំ​តម្រូវ​ឲ្យ​ប្រា​សាក់​ប្តូរ​ឡូហ្គោ​របស់ខ្លួន​ឲ្យ​បាន​ឆាប់រហ័ស​ជាទីបំផុត​។ ធនាគារជាតិ​នឹង​ទាក់ទង​ទៅ​គ្រឹះស្ថាន​ប្រា​សាក់​ដើម្បី​ពិភាក្សា​ពី​រឿងនេះ​ហើយ​យើង​មិនចាំបាច់​ចេញ​លិខិត​ជូនដំណឹង​ដើម្បី​បង្ខំ​ឲ្យ​ពួកគេ​ធ្វើការ​ផ្លាស់ប្តូរ​នោះទេ​»​។

​លោក​បាន​គំរាម​ដក​អាជ្ញាប័ណ្ណ​របស់​គ្រឹះស្ថាន​នេះ​បើ​មិន​អនុវត្តតាម​ទេនោះ​។ ​ប្រា​សាក់​គឺជា​គ្រឹះស្ថាន​ទី​២ ដែល​ត្រូវបាន​ធនាគារជាតិ​តម្រូវ​ឲ្យ​ប្តូរ​ឡូហ្គោ​របស់ខ្លួន​ចេញ ក្រោយពេល​រាជរដ្ឋាភិបាល បានចាប់ផ្តើម​នូវ​យុទ្ធនាការ​មួយ ដើម្បី​ឲ្យ​សាធារណជន​មិនមាន​ការយល់ច្រឡំ​ថា បំណុល​ដែល​ខ្លួន​ជំពាក់​គឺជា​បំណុល​ខ្ចី​ពីរ​ដ្ឋ​។

ថ្ងៃទី​១ ខែមីនា​

​ធនាគារ Mizuho ដែលជា​គ្រឹះស្ថាន​ហិរញ្ញវត្ថុ​ធំជាងគេ​នៅ​ប្រទេស​ជប៉ុន​នោះ នឹង​ចូលប្រឡូក​ក្នុង​វិស័យ​ធនាគារ​របស់​ជប៉ុន ដោយ​ចាប់ផ្តើម​បើក​សាខា​ដំបូង​របស់ខ្លួន​ក្នុងប្រទេស​កម្ពុជា នៅ​ខែ​ក្រោយនេះ​។

​ធនាគារ​ផ្តល់ប្រាក់​កម្ចី​របស់​ជប៉ុន ដែល​បាន​បើក​ការិយាល័យ​តំណាង​មួយ​នៅ​កម្ពុជា កាលពី​ឆ្នាំ​២០១៣ នឹង​ក្លាយជា​ធនាគារ​ពាណិជ្ជក​ម្ម​ពី​ប្រទេស​ជប៉ុន​ដំបូង​គេ​បង្អស់ ដែល​នឹង​បើកទ្វារ​នៅ​ប្រទេស​កម្ពុជា​។

​ខណៈ​ពេល​ធនាគារ Mizuho មិន​មែន​ជា​ធនាគារ​របស់​ជប៉ុន​​ទី​១ នៅ​កម្ពុជា​នោះ ធនាគារ Maruhan Japan Bank គឺជា​ធនាគារ​បុត្រ​សម្ព័ន្ធ​របស់​ក្រុមហ៊ុន Maruhan Corporation របស់​ជប៉ុន​ដែល​បានរួម​បញ្ចូល​គ្នា​ជាមួយ​គ្រឹះស្ថាន​ស្ថាបនា​លីមីត​ធី​ត ដែល​ក្រោយមក​មានឈ្មោះ​ថា ធនាគារ​ស្ថាបនា​។

ថ្ងៃទី​៧ ខែមីនា​

​ភ្នាក់ងារ​វាស់​ស្ទង់​ឥណទាន​អន្តរជាតិ​មួយ​ឈ្មោះថា Moody’s Investors Services បាន​រក្សា​នូវ​កម្រិត​ស្ថិរភាព ឬ B2 របស់​ប្រទេស​កម្ពុជា ដែល​បាន​ថ្លែងថា ឥណទាន​របស់ខ្លួន​ថ្មីៗ​នេះ​លើ​រដ្ឋាភិបាល​កម្ពុជា ដែល​ការ វាស់​ស្ទង់​នេះ​បាន​ធ្វើឡើង​ដោយ​ផ្អែកលើ​សក្តានុភាព​ឥណទាន​របស់​ប្រទេស​នេះ ពិសេស​គឺ​សម្ទុះ​កំណើន​នៃ​វ​ស័​យ​នេះ និង​លំហូរ​សាច់ប្រាក់​ពី​បរទេស​ផង ដែរ​។

​យ៉ាងណាមិញ ភ្នាក់ងារ​នេះ​ក៏បាន​ព្រមាន​ពី​ផល​ប៉ះពាល់ និង​គ្រោះថ្នាក់​ពី​ការរីកលូតលាស់​ឆាប់រហ័ស​របស់​វិស័យ​ឯកជន​ក្នុងប្រទេស​នេះ ក៏​ដូចជា​កំណើន​នៃ​ការប្រើ​រូបិយ​វ​ត្តុ​ដុល្លារ​អាមេរិក និង​គ្រឹះ​សេដ្ឋកិច្ច ដែល​មិនទាន់​រឹងមាំ​ខ្លាំង​ដោយ​សារ​វា​នៅ​អាច រង​ផលប៉ះពាល់​ពី​បម្លាស់​ប្តូរ​សេដ្ឋកិច្ច​ពិភពលោក​នៅឡើយ​។

​បើ​យោងតាម​របាយការណ៍ របស់ Moody សក្តានុភាព​ឥណទាន​នៃ​ការវាស់ស្ទង់​របស់​ប្រទេស​នេះ គឺ​បូក​រួមទាំង​ភាព​រីកចម្រើន​ដ៏​ល្អ​ពី​ការ​នាំចេញ​សម្លៀក​បំពាក់ ទេសចរណ៍ និង​ទឹកប្រាក់​វិនិយោគ​ផ្ទាល់​ពី​បរទេស​ធំៗ (FDI) ហូរ​ចូលមក​ក្នុងប្រទេស​នេះ​។ ចំណុច​វិជ្ជមាន​នេះ​ត្រូវបាន​គេ​វាស់​ស្ទង់​ដោយ​ផ្អែកលើ​ចំនួន​ពិន្ទុ «​ដ៏​ទាប​» របស់​កម្ពុជា លើ​ប្រសិទ្ធភាព​របស់​រដ្ឋាភិបាល ភាព​តឹង​រ៉ឹង​ផ្នែក​ច្បាប់ និង​សមត្ថភាព​ក្នុងការ​ទប់ស្កាត់​ការរីកដុះដាល​នៃ​អំពើ​ពុករលួយ​ផងដែរ​។

​ថ្ងៃទី​១០ មីនា​

​ក្រុមហ៊ុន​ធានា​រ៉ាប់​រ៉ង​ប្រាក់​បញ្ញើ​របស់​រដ្ឋ​មកពី​ប្រទេស​កូរ៉េ​ខាង​ត្បូង បាន​បើក​សម្ភោ​ធ​សាខា​ដំបូង​របស់ខ្លួន​នៅ​ទីក្រុង​ភ្នំពេញ ដើម្បី​ពង្រីក​ទ្រព្យសម្បត្តិ​ធនាគារ និង​អចលនទ្រព្យ​របស់​ធនា​គារ​កូរ៉េ ដែល​បាន​កើន​ឡើង​ខ្លាំង​ក្នុង​ឆ្នាំ​២០១១​។

Korean Deposit Insurance Corporation (KDIC) បាន​បង្ហាញ​នូវ​គម្រោង​ក្នុង​តំបន់​ចំនួន​១០ ដែលមាន​តម្លៃ​ស្មើ ៤២០​លាន​ដុល្លារ ដែល​ជា​ចំនួន​មួយ​ស្ទើរតែ​ស្មើនឹង ៧៨,៥០​ភាគរយ​នៃ​ទ្រព្យសម្បត្តិ​សរុប​ទាំងអស់​ជុំវិញ​ពិភពលោក ដែល​គ្រប់គ្រង​ដោយ​គ្រឹះស្ថាន​នេះ​។

​លោក Gaak Bumgook ប្រធាន និង​ជា​អគ្គនាយក KDIC បាន​ថ្លែងថា ការិយាល័យ​សាខា​នេះ​នឹង​ជួយ​បង្កើន​ទ្រព្យ​របស់​ខ្លួន ដោយ​សារ​តែ​វត្តមាន​របស់​ខ្លួន​នៅ​កម្ពុជា នឹង​ជួយ​ពន្លឿន​ការ​លក់​តាម​រយៈ​ការ​សហការ​ជាមួយ​វិនិយោគិន​ធំៗ​ដោយផ្ទាល់​។

ថ្ងៃទី​១៣ ខែមីនា​

​ធនាគារ​ស្ថាបនា ទើបតែ​បាន​បុ្តរ​ឡូ​ហ្គោ​រូប​តោ​មាស​របស់ខ្លួន​ពីសា​ខា​ទាំង​១៦២​កន្លែង​នៅ​ទូទាំងប្រទេស ខណៈពេលដែល​ធនាគារ​ឯកជន​នេះ​មានបំណង​អនុវត្តតាម​រដ្ឋាភិបាល និង​ចៀសវាង​ការភ័ន្តច្រឡំ​ថា ខ្លួន​ជា​គ្រឹះស្ថាន​របស់​រដ្ឋ នេះ​បើ​យោងតាម​ប្រសាសន៍​របស់​នាយក​ប្រតិបត្តិ​។

​ខណៈពេលដែល​ឡូហ្គោ​ថ្មី​ពុំទាន់​បាន​រចនា​រួច​នោះ លោក លឹម អូន ដែលជា​អគ្គនាយក​រួម​រប​ស់ធ​នាគារ​ស្ថាបនា បាន​ថ្លែងថា ការសម្រេចចិត្ត​នេះ​មិនមាន​ការបង្ខិតបង្ខំ​ពី​ធនាគារជាតិ ដែល​បានចេញ​សេចក្តីប្រកាស​កាលពី​ខែកុម្ភៈ​តម្រូវ​ឲ្យ​គ្រឹះស្ថាន​ហិរញ្ញវត្ថុ​ទាំងអស់​ចៀសវាង​ពី​ការប្រើ​រូប​តោ ឬ​រូប​រូបិយវត្ថុ​រៀល​ក្នុង​ឡូហ្គោ​របស់ខ្លួន ដោយ​វា​ជា​និមិត្តសញ្ញា​ក្នុង​ឡូហ្គោ​របស់​ក្រសួង និង​ស្ថាប័ន​របស់​រដ្ឋ​។

​លោក អូន បន្តថា ពុំទាន់​មាន​កាលបរិច្ឆេទ​ជា​កំហិត​ណាមួយ​ដែល​តម្រូវ​ឲ្យ​ធនាគារ​លោក​ត្រូវ​ប្តូរ​ឡូហ្គោ​នោះទេ​។

ថ្ងៃទី​១៤ ខែ មីនា​

​រដ្ឋាភិបាល​កម្ពុជា បាន​បោះជំហាន​មួយទៀត​ដោយ​នាំយក​នូវ​សហគ្រាស​ខ្នាតតូច និង​មធ្យម​(SMEs) ទៅក្នុង​សំណាញ់​ច្បាប់​នេះដែរ ដោយ​របាយការណ៍​បង្ហា​ញ​ថា កំណើន​តិចជាង​ ០.៥​ ភាគរយ នៃ​ចំនួន​ក្រុមហ៊ុន​សរុប​ទាំងអស់​ដែល​បាន​ចុះបញ្ជី​ក្នុងអំឡុងពេល​៥​ឆ្នាំ​ចុង​ក្រោយនេះ ដែល​នេះ​ជា​សញ្ញា​មួយ​ដែល​អ្នកជំនាញ​ផ្នែក​អាជីវកម្ម​បង្ហាញថា ការផ្តល់​ដំណោះស្រាយ​លើ​ការបង់ពន្ធ គឺ​សំដៅលើ​ការធ្វើ​ឲ្យ​សហគ្រាស​ខ្នាតតូច និង​កណ្តាល​អនុវត្តតាម និង​ពង្រីក​ចំនួន​បុគ្គលិក​ដែល​ត្រូវ​បង់ពន្ធ​លើ​ប្រាក់ចំណូល​ទាបៗ​នោះ​។​

​បើ​យោងតាម​របាយការណ៍​ប្រចាំឆ្នាំ​មួយ ដែល​មិនទាន់​ចេញផ្សាយ​ដោយ​ក្រសួង​ឧស្សាហកម្ម និង​សិប្បកម្ម​នៅឡើយ​នោះ ប្រទេស​កម្ពុ​ជាមាន​សហ​គ្រាស​ខ្នាតតូច និង​មធ្យម សរុប​ចំនួន ៣៩១៤១ គិត​ត្រឹម​ចុងឆ្នាំ​២០១៦ ដែលមាន​កំណើន​ត្រឹមតែ​១៨៤​សហគ្រាស​ប៉ុណ្ណោះ​ក្នុង​រយៈពេល ៥​ឆ្នាំ​ចុង​ក្រោយនេះ​។

​នេះ​គ្រាន់តែ​ជា​តួលេខ​តំណាង​មួយ​ភាគ​តូច​ប៉ុណ្ណោះ នៃ​ចំនួន​សហគ្រាស​ខ្នាតតូច និង​មធ្យម​នៅ​ទូទាំង​ផ្ទៃ​ប្រទេស ដែលមាន​ចំនួន​ប្រមាណ​៥៣០០០០​ទីតាំង នេះ​បើ​យោងតាម​លោក តែ តាំង​ព័រ ប្រធាន​សម្ព័ន្ធ​សមាគម​សហគ្រាស​ធុន​តូច និង​មធ្យម​កម្ពុជា (FASMEC) ដែល​បាន​លើក​ឡើង​ពី​កង្វះ​ខាត​នៃ​ការផ្តល់​ការ​លើក​ទឹក​ចិត្ត និង​ជំនួយ​សម្រាប់​ការអនុវត្ត​ថ្នាក់​ទាប​៕

0

Comments

Please, login or register to post a comment