.jpg)
ទិវាបុណ្យជាតិ (Australia Day) គឺជាទិវាអបអរសាទរនូវភាពរុងរឿងរបស់ប្រទេសអូស្ត្រាលី និងភាពវិសេសវិសាលក្នុងនាមប្រជាជាតិអូស្ត្រាលី។ យើងអបអរសាទរដល់ប្រវត្តិសាស្ត្រ បេតិកភណ្ឌ តម្លៃ និងស្ថាប័នរបស់យើង ដែលបានធ្វើឲ្យ ប្រទេសអូស្ត្រាលីមានភាពជឿនលឿនដូចសព្វថ្ងៃ។
នេះជាទិវាមួយក្នុងការចងចាំ និងសម្តែងនូវការគោរពដល់ជនជាតិអូស្ត្រាលីដំបូង គឺទាំងជនជាតិភាគតិច និងជនជាតិដើមមកពីកោះ Torres Strait។
ឱកាសទិវា Australia Day ដ៏វិសេសវិសាលនេះ យើងអបអរសាទរដល់សហគមន៍ចម្រុះជាតិសាសន៍របស់យើង ព្រមទាំងឱកាសក្នុងការសប្បាយរីករាយជាមួយនឹងក្តីមោទនៈក្នុងនាមជា «ប្រទេសដែលមានសំណាង»មួយ។ យើងប្រារព្ធទិវានេះជាមួយក្រុមគ្រួសារទាំងនៅស្រុកកំណើត និងក្រៅប្រទេស រួមទាំងជាមួយមិត្តថ្មី និងមិត្តចាស់ព្រមទាំងក្នុងសហគមន៍ដែនកោះជាច្រើនរួមគ្នាមួយ។
ដូច្នេះហើយ ខ្ញុំមានក្តីសោមនស្សយ៉ាងក្រៃលែងក្នុងឱកាសដែលយើងអាចប្រារព្ធទិវា Australia Day នេះជាមួយមិត្តរួមការងារ និងមិត្តភក្តិរបស់យើងទាំងអស់គ្នានៅព្រះរាជាណាចក្រកម្ពុជា។
ឆ្នាំ២០១៧ គឺជាឆ្នាំមួយដ៏សំខាន់ចំពោះការងារដែលយើងធ្វើនៅកម្ពុជា និងបណ្តាប្រទេសនៅក្នុងតំបន់ឥណ្ឌូ-ប៉ាស៊ីហ្វិក ជាមួយនឹងការបញ្ចេញនូវក្របខ័ណ្ឌ Australian Foreign Policy White Paper កាលពីខែវិច្ឆិកាកន្លងទៅនេះ។
White Paper ជាការដាក់បញ្ចេញនូវក្របខ័ណ្ឌសម្រាប់តួនាទីរបស់ប្រទេសអូស្ត្រាលី នៅក្នុងពិភពលោកដែលមានការប្រកួតប្រជែង។
វាត្រូវបានបង្កើតឡើងដោយផ្អែកលើគុណតម្លៃជាតិរបស់យើង គឺសេរីភាព សមភាព ប្រជាធិបតេយ្យ និងការគោរពគ្នាទៅវិញទៅមក។
សម្រាប់ប្រទេសអូស្ត្រាលី White Paper ជាការឆ្លើយតបទៅនឹងសំណួរ ៖ «តើយើងចង់រស់នៅក្នុងប្រទេស និងពិភពលោកប្រភេទណា?»
យើងចង់ឲ្យបណ្តាប្រទេសនៅតំបន់ឥណ្ឌូ-ប៉ាស៊ីហ្វិក មានការបើកទូលាយ មានសុខសន្តិភាព និងមានការគោរពស្រឡាញ់គ្នាទៅវិញទៅមក ហើយដែលសិទិ្ធរបស់ប្រទេសទាំងអស់ត្រូវបានគោរពទៅវិញទៅមកដូចគ្នាដែរ។
យើងចង់ផ្តល់ឱកាសដល់មុខជំនួញរបស់ប្រជាជន និងប្រទេសអូស្ត្រាលីនៅជុំវិញពិភពលោក និងបង្កើនវិសាលភាពនៃសម្ព័ន្ធភាពពាណិជ្ជកម្មរបស់ប្រទេសអូស្ត្រាលី ជាមួយប្រទេសដទៃទៀត។
យើងចង់ឲ្យប្រជាជនអូស្ត្រាលីមានសុវត្ថិភាព មានការការពារបានល្អ និងចៀសឆ្ងាយពីការគំរាមកំហែងដូចជាអំពើភេរវកម្មជាដើម។
យើងចង់លើកកម្ពស់ និងការពារបទប្បញ្ញតិ្តអន្តរជាតិទាំងឡាយដែលគាំទ្រដល់ស្ថេរភាព និងភាពសុខដុមរមនា និងបើកទូលាយដល់ការសហប្រតិបត្តិការដើម្បីដោះស្រាយបញ្ហានៅជុំវិញពិភពលោក។
យើងចង់បន្តផ្តល់នូវជំនួយអភិវឌ្ឍន៍ដែលមានប្រសិទ្ធភាព និងមានគោលដៅច្បាស់លាស់ទាំងក្នុងតំបន់របស់យើង និងក្រៅតំបន់ផងដែរ។
ការងារដែលយើងធ្វើនៅប្រទេសកម្ពុជា មានសារៈសំខាន់ និងចាំបាច់ក្នុងការសម្រេចបាននូវគោលដៅរបស់ប្រទេសអូស្ត្រាលី ក្នុងការរក្សាសុខសន្តិភាព ការបើកទូលាយ ការគោរពស្រឡាញ់គ្នា និងសម្ព័ន្ធភាពរវាងប្រទេសទាំង២ផងដែរ។
ជាមួយនឹងសម្ព័ន្ធភាពនេះ យើងបានជួយប្រទេសកម្ពុជាក្នុងការសម្រេចគោលដៅ និងកាត់បន្ថយភាពក្រីក្រក្នុងតំបន់ឥណ្ឌូ-ប៉ាស៊ីហ្វិកផងដែរ។
ជំនួយរបស់ប្រទេសអូស្រា្តលីគឺប្រកបដោយគុណភាពខ្ពស់ ប្រសិទ្ធភាព និងលេចចេញជាផ្លែផ្កាល្អផងដែរ។ យើងកំពុងតែបង្កើននូវប្រព័ន្ធហេដ្ឋារចនាសម្ព័ន្ធដែលចាំបាច់ ព្រមទាំងបង្កើនទិន្នផលកសិកម្ម និងប្រាក់ចំណូលរបស់កសិករ និងការផ្តល់ជំនួយក្នុងការបង្កើនគុណភាពនៃសុខភាពប្រជាជនផងដែរ។
យើងកំពុងផ្តល់ជំនួយដល់ក្រុមហ៊ុនអគ្គិសនីចំនួន១១ និងក្រុមហ៊ុនទឹកស្អាតចំនួន២៦ ដើម្បីចែកចាយទឹក និងអគ្គិសនីទៅកាន់ទីជនបទសម្រាប់ប្រជាជនខ្មែរច្រើនជាងកន្លះលាននាក់។
យើងកំពុងតែជួយដល់ការធ្វើគម្រោងប្រព័ន្ធធារាសាស្ត្រ សម្រាប់កសិកម្ម ដែលនឹងផ្តល់ការផ្គត់ផ្គង់ទឹកដែលមានទំនុកចិត្ត ព្រមទាំងតម្លៃសមរម្យដល់កសិករ និងសហគមន៍ជាច្រើនពាន់នាក់ផងដែរ។
យើងកំពុងតែសហការជាមួយប្រទេសកម្ពុជា ដើម្បីផ្តល់ជំនួយផ្នែកសុខាភិបាលដល់ប្រជាជនខ្មែរក្រីក្របំផុតចំនួន៣លាននាក់ និងបង្កើតនូវសេវាសុខភាព ដែលមានគុណភាពនៅទូទាំងប្រទេសផងដែរ។
យើងកំពុងតែជំរុញឲ្យមានការលើកកម្ពស់ដល់ជនពិការ និងផ្តល់ជំនួយដល់កម្មវិធីបញ្ឈប់អំពើហិង្សាលើស្ត្រីផងដែរ។
កាលពីឆ្នាំទៅ យើងបានបញ្ជូនអ្នកស្ម័គ្រចិត្តមកពីប្រទេសអូស្ត្រាលី ឲ្យសហការជាមួយអង្គការក្នុងប្រទេសកម្ពុជា។ ហើយតាមរយៈកម្មវិធីសហប្រតិបត្តិការអង្គការអូស្ត្រាលី (Australian NGO Cooperation Program) យើងបានផ្តល់ជំនួយថវិកាដល់គម្រោងចំនួន៦៦ ដែលអង្គការចំនួន ២៦ បានអនុវត្តនៅទូទាំងប្រទេសកម្ពុជា។
ការប្តេជ្ញាយ៉ាងមោះមុតរបស់យើងចំពោះការចូលរួមអភិវឌ្ឍប្រទេសកម្ពុជា គឺមានជំនួយពីលោកស្រី Hon Concetta Fierravanti-Wells មន្ត្រីរបស់ប្រទេសអូស្ត្រាលី ផ្នែកអភិវឌ្ឍន៍អន្តរជាតិ និងតំបន់ប៉ាស៊ីហ្វិក នៅពេលដែលលោកស្រីបានធ្វើដំណើរទស្សនកិច្ចកាលពីខែមីនា ឆ្នាំ២០១៧ កន្លងទៅ។
យើងបានផ្សារភ្ជាប់សម្ព័ន្ធភាពរវាងប្រទេសទាំង២ឲ្យកាន់តែស្និទ្ធស្នាលជាងមុនតាមរយៈទំនាក់ទំនងរវាងប្រជាជនអូស្ត្រាលី និងប្រទេសកម្ពុជា។
កាលពីឆ្នាំមុន យើងបានផ្តល់អាហារូបករណ៍ដល់សិស្សកម្ពុជាចំនួន៤៨រូប ឲ្យទៅសិក្សានៅប្រទេសអូស្ត្រាលីក្រោមកម្មវិធីអាហារូបករណ៍ Australia Awards Scholarships។
ប្រទេសកម្ពុជា ក៏ជាទិសដៅដ៏ពេញនិយមបំផុតទី៥ ក្នុងផែនការ Colombo Plan ដែលមានសិស្សអូស្ត្រាលីចំនួន៤៤០នាក់ មកទស្សនកិច្ចនៅប្រទេសកម្ពុជា ហើយឆ្នាំនេះ យើងរំពឹងថា នឹងកើនឡើងដល់៥៣០នាក់។
យើងកំពុងតែខិតខំក្នុងការធ្វើយ៉ាងណាឲ្យតំបន់របស់យើងមានការបើកទូលាយ និងមានសុខសន្តិភាពជាមួយនឹងលំហូរនៃការវិនិយោគមុខជំនួញរបស់អូស្ត្រាលីមកកាន់ប្រទេសកម្ពុជា។
យើងកំពុងតែព្យាយាមធ្វើឲ្យតំបន់របស់យើងកាន់តែមានសុវត្ថិភាពតាមរយៈការសហការប្រយុទ្ធប្រឆាំងនឹងឧក្រិដ្ឋកម្មឆ្លងដែន រួមទាំងការជួញដូរគ្រឿងញៀន ការជួញដូរផ្លូវភេទលើកុមារ ការជួញដូរមនុស្ស ការបោកប្រាស់ និងចោរកម្មឆ្លងដែនខុសច្បាប់ផងដែរ។
អន្តោប្រវេសន៍ ការដោះស្រាយជនភៀសខ្លួន និងការការពារព្រំដែននៅតែជាចំណុចសំខាន់ៗក្នុងសម្ព័ន្ធភាពរវាងកម្ពុជា និងអូស្រា្តលី។
យើងក៏បានចាប់ដៃគូសហការក្នុងការពង្រឹងសន្តិសុខប្រឆាំងទៅនឹងអំពើភេរវកម្ម និងការឈ្លានពានផ្លូវទឹកតាមរយៈកម្មវិធីសហប្រតិបត្តិការការពារជាតិ (Defence Cooerparation Program) របស់យើង។
សេនាប្រមុខរង Ray Griggs ប្រចាំផ្នែកកងទ័ពការពារជាតិរបស់អូស្ត្រាលីបានជួបពិភាក្សាអំពីរឿងនេះនៅអំឡុងដំណើរទស្សនកិច្ចរបស់លោកមកកាន់ប្រទេសកម្ពុជាក្នុងខែសីហា ឆ្នាំ២០១៧។
ប្រទេសអូស្ត្រាលីកំពុងតែខិតខំយ៉ាងស្វិតស្វាញក្នុងការធ្វើឲ្យតំបន់របស់យើងកាន់តែមានសុវត្ថិភាព កាន់តែមានសក្តានុពលភាព និងកាន់តែសុខដុមរមនា។
យើងបានផ្តោត និងបន្តផ្តោតលើការលូតលាស់ផ្នែកសេដ្ឋកិច្ចរបស់ប្រទេសយើងជាមួយនឹងអត្រាកំណើនសេដ្ឋកិច្ចរយៈពេល ២៦ឆ្នាំ ជាប់ៗគ្នា។
ក្នុងខែមីនា ឆ្នាំ២០១៨ យើងនឹងទទួលស្វាគមន៍ប្រមុខថ្នាក់ដឹកនាំពីបណ្តាប្រទេសក្នុងសហគមន៍អាស៊ាន នៅក្នុងមហាសន្និបាតពិសេសរវាងអាស៊ាន និងប្រទេសអូស្ត្រាលី។ មហាសន្និបាតនេះនឹងលើកយកអំពីសកម្មភាពមួយចំនួនក្នុងការដោះស្រាយបញ្ហា និងស្វែងរកឱកាសសហប្រតិបត្តិការថ្មីៗផងដែរ។
កាលពីដើមឆ្នាំ២០១៨នេះ ប្រទេសអូស្ត្រាលីបានឡើងតំណែងថ្មីក្នុងក្រុមប្រឹក្សាសិទ្ធិមនុស្ស។ យើងនឹងផ្តល់ដំណោះស្រាយពិសេសមួយសម្រាប់តំបន់ឥណ្ឌូ-ប៉ាស៊ីហ្វិក ដើម្បីបង្កើនសមភាពយេនឌ័រ សេរីភាពក្នុងការបញ្ចេញមតិ ការគ្រប់គ្រងល្អៗសម្រាប់រដ្ឋាភិបាល និងស្ថាប័នប្រជាធិបតេយ្យល្អៗ សិទ្ធិមនុស្សសម្រាប់ជនជាតិភាគតិច និងស្ថាប័នសិទ្ធិមនុស្សជាតិដែលមានសក្តាភាពបំផុត។
ទន្ទឹមនឹងការបណ្តុះបណ្តាលវិជ្ជាជីវៈ និងភាពជាអ្នកដឹកនាំក្នុងផ្នែកទាំងនេះ យើងនឹងជំរុញលើកទឹកចិត្តឲ្យបណ្តាប្រទេសទាំងអស់ រួមទាំងប្រទេសកម្ពុជា ប្រកាន់ខ្ជាប់នូវលទិ្ធប្រជាធិបតេយ្យ និងការគោរពសិទ្ធិមនុស្ស។
នៅក្នុងប្រទេសកម្ពុជា ដូចគ្នានឹងក្នុងប្រទេសអូស្ត្រាលីដែរ វាជារឿងសំខាន់ និងចាំបាច់ដែលប្រជាជនទាំងអស់មានសិទ្ធិ និងសិទ្ធិសេរីភាពមូលដ្ឋានពេលលេញ រួមទាំងសេរីភាពក្នុងការបញ្ចេញមតិ និងសេរីភាពក្នុងការចូលរួមផងដែរ។
ការងាររបស់យើងនៅប្រទេសកម្ពុជា មិនអាចដំណើរការទៅបាននោះទេប្រសិនបើគ្មានការចូលរួម និងការគាំទ្រពីសំណាក់អ្នករួមការងារ និងសម្ព័ន្ធមិត្តអន្តរជាតិរបស់យើង។ យើងសូមថ្លែងអំណរគុណយ៉ាងជ្រាលជ្រៅ និងសូមឆ្លៀតឱកាសនេះអញ្ជើញអ្នកទាំងអស់គ្នា ឲ្យចូលរួមក្នុងការអបអរសាទរទិវា Australia Day របស់យើង!
