.jpg)
ឯកឧត្តម Hidehisa Hironouchi ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា។
ជម្រាបសួរ!
ខ្ញុំបាទមានក្តីសោមនស្សរីករាយយ៉ាងក្រៃលែងដែលបានចែករំលែកសារមួយនេះ ទៅកាន់ប្រជាជនកម្ពុជាក្នុងឱកាសដ៏វិសេសវិសាលខួបគម្រប់ទី ៦៥ នៃកំណើតចំណងសម្ព័ន្ធភាពការទូតរវាងប្រទេសជប៉ុន និងកម្ពុជា។
កាលពីថ្ងៃទី ៨ ខែមករា ឆ្នាំ ១៩៥៣ ដែលរដ្ឋាភិបាលរបស់ប្រទេសទាំង ២ បានបញ្ជាក់នូវការប្តេជ្ញាយ៉ាងមោះមុតរបស់ខ្លួន ក្នុងការចងសម្ព័ន្ធភាពរវាងប្រទេសទាំង ២។
ចាប់តាំងពីពេលនោះមក ប្រជាជនរបស់យើងទាំង ២ ប្រទេសបានចម្រុងចម្រើន រាប់អាន ទុកចិត្ត និងមានមិត្តភាពដ៏រឹងមាំតាមរយៈកម្មវិធី ផ្លាស់ប្តូរបទពិសោធ និងកិច្ចសហប្រតិបត្តិការក្នុងវិស័យជាច្រើន។
កាលពីពេលថ្មីៗកន្លងទៅនេះ យើងបានសង្កេតឃើញនូវភាពល្អប្រសើរ និងកាន់តែស្អិតល្មួតនៃចំណងមិត្តភាពរបស់ប្រទេសទាំង ២ យ៉ាងឆាប់រហ័ស។ នេះក៏ដោយសារតែកំណើននៃការវិនិយោគរបស់ជប៉ុនមកកាន់ប្រទេសកម្ពុជា និងកំណើនប្រជាជនកម្ពុជាយ៉ាងគួរឲ្យកត់សម្គាល់រហូតដល់ ៥០ ភាគរយ ដែលបានធ្វើដំណើរទៅកាន់ប្រទេសជប៉ុន ចាប់តាំងពីក្រុមហ៊ុនអាកាសចរណ៍ ANA បានសម្ភោធជើងហោះហើរត្រង់ពីទីក្រុងតូក្យូ និងណារីតា និងទីក្រុងភ្នំពេញចាប់តាំងពីឆ្នាំ ២០១៦ កន្លងមក។
ក្នុងអំឡុងខួបទី ៦៥ ដ៏គួរឲ្យចងចាំទុកមួយនេះ ស្ថានទូតជប៉ុនក្រោមកិច្ចសហប្រតិបត្តិការជាមួយរាជរដ្ឋាភិបាលកម្ពុជា និងស្ថាប័នពាក់ព័ន្ធរបស់កម្ពុជា និងជប៉ុនជាច្រើនបាននិងកំពុងរៀបចំឡើងនូវកម្មវិធីផ្លាស់ប្តូរបទពិសោធជាច្រើននៅកម្ពុជា។ ក្នុងចំណោមកម្មវិធីទាំងនេះ ទិវាបុណ្យគីហ្ស៊ូណា ជាពិធីបុណ្យធំជាងគេបង្អស់ជាប្រចាំឆ្នាំរបស់ពួកយើងនៅទីនេះ។ ទិវាបុណ្យនេះនឹងប្រព្រឹត្តទៅចាប់ពីថ្ងៃទី ២២ ដល់ ២៥ ខែកុម្ភៈ នៅមជ្ឈមណ្ឌលកិច្ចសហប្រតិបត្តិការកម្ពុជា និងជប៉ុន (CJCC) ហើយការរៀបចំនៅឆ្នាំនេះមានជាពិសេសគឺ «Beat of Japan»។
ទិវាបុណ្យនេះរួមមានការប្រគំតន្ត្រីយ៉ាងច្រើនប្រភេទ តន្ត្រីប្រពៃណី «Gagaku» របស់ជប៉ុន ចម្រៀងរ៉ុកដែលមានប្រើប្រាស់ឧបករណ៍តន្ត្រីបុរាណៗ ចម្រៀង រឿងគំនូរអេនីម៉េ (anime) និងចម្រៀងប៉ុប ក៏ដូចជាព្រឹត្តិការណ៍វប្បធម៌ និងអប់រំជាច្រើនទៀតផងដែរ។
ខ្ញុំបាទក៏សូមឆ្លៀតឱកាសនេះ ដើម្បីថ្លែងអំណរគុណយ៉ាងជ្រាលជ្រៅដល់អ្នកគ្រប់គ្នាដែលបានបញ្ចេញមតិខាងក្រោមវីដេអូសុន្ទរកថា ជាភាសាខ្មែររបស់ខ្ញុំ ដែលមានឈ្មោះថា «60 seconds from the Japanese Ambassador» នៅលើទំព័រហ្វេសប៊ុកផេករបស់ស្ថានទូតជប៉ុន កាលពីពេលកន្លងទៅនេះ។
យើងខ្ញុំនឹងបន្តផលិតនូវវីដេអូស្រដៀងៗគ្នានេះ ដើម្បីឲ្យអ្នកទាំងអស់គ្នាបានដឹងអំពីសកម្មភាពរបស់យើង និងណែនាំអ្នកទាំងអស់គ្នាឲ្យស្គាល់កាន់តែច្រើនអំពីវប្បធម៌របស់យើង។
ខ្ញុំបាទមានការជឿជាក់អស់ពីដួងចិត្តថា ប្រជាជនខ្មែរជាច្រើននឹងរីករាយជាមួយកម្មវិធីរបស់ជនជាតិជប៉ុនយើងខ្ញុំ និងកម្មវិធីថ្មីៗផ្សេងទៀតក្នុងថ្ងៃអនាគត ហើយនឹងបន្តរឹតចំណងមិត្តភាពរវាងប្រទេសជប៉ុន និងកម្ពុជាឲ្យនៅតែមានភាពរឹងមាំជានិរន្តរ៍។
យើងខ្ញុំរង់ចាំជួបអ្នកទាំងអស់គ្នានៅទិវាបុណ្យគីហ្ស៊ូណា និងកម្មវិធីផ្សេងៗជាច្រើនទៀតក្នុងខួបឆ្នាំថ្មីរបស់យើងនេះ!
ឯកឧត្តម Hidehisa Hironouchi
ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា
