Search form

Login - Register | FOLLOW US ON

Logo of Phnom Penh Post newspaper Phnom Penh Post - សេវា​ធានា​រ៉ាប់រង​អាយុ​ជីវិត ​កំពុង​នាំ​មុខ​យ៉ាង​រហ័ស​ក្នុង​វិស័យ​នេះ​ នៅ​កម្ពុជា

Content image - Phnom Penh Post

សេវា​ធានា​រ៉ាប់រង​អាយុ​ជីវិត ​កំពុង​នាំ​មុខ​យ៉ាង​រហ័ស​ក្នុង​វិស័យ​នេះ​ នៅ​កម្ពុជា

ឧស្សាហកម្ម​ធានា​រ៉ាប់រង​កំពុង​រីកចម្រើន​យ៉ាង​ឆាប់​រហ័ស​នៅ​កម្ពុជា ហើយ​គ្មាន​កន្លែង​ណា​ដែល​អាច​មើល​ឃើញ​ទីផ្សារ​ល្អ​ជាង​ទីផ្សារ​សេវា​ធានា​រ៉ាប់រង​អាយុ​ជីវិត​នោះ​ទេ​។

បើ​យោង​តាម​របាយការណ៍​របស់​សមាគម​ធានា​រ៉ាប់រង​កម្ពុជា (IAC) សេវា​ធានា​រ៉ាប់រង​អាយុជីវិត ដែល​បាន​ចូល​កាន់​ទីផ្សារ​ចាប់​តាំង​ពី​ ៥ ​ឆ្នាំ​មុន បាន​និង​កំពុង​កើនឡើង​គួរ​ឱ្យ​កត់សម្គាល់​ពី​អ្នក​ប្រើប្រាស់​សេវា​ធានា​រ៉ាប់រង​ដោយ​បាន​បង្កើន​ទំហំ​ហិរញ្ញវត្ថុ​រហូត​ដល់​ជាង​ ១ ​ពាន់​លាន​ដុល្លារ​នៅ​ក្នុង​ឆមាស​ទី​ ១ ក្នុង​ឆ្នាំ​ ២០១៧ ​នេះ​។

ឧស្សាហកម្ម​ធានា​រ៉ាប់រង​នៅ​កម្ពុជា​បច្ចុប្បន្ន​នេះ​មាន​ក្រុមហ៊ុន​ធានា​រ៉ាប់រង​អាយុ​ជីវិត​ចំនួន​ ៦ ហើយ​នៅពេល​ដែល​ទីផ្សារ​កំពុង​បន្ត​កើនឡើង ក្រុមហ៊ុន​ថ្មីៗ​កំពុង​ចូល​មក​កាន់​ប្រទេស​កម្ពុជា​ដែរ​ដូចជា ក្រុមហ៊ុន​ធានា​រ៉ាប់រង​បាងកក (Bangkok Life Assurance Plc.) និង​ក្រុមហ៊ុន​ធានា​រ៉ាប់រង (AIA) ដែល​មាន​មូលដ្ឋាន​នៅ​ហុងកុង​បាន​រៀបចំ​ប្រតិបត្តិការ​កាលពី​ខែ​ឧសភា​ឆ្នាំ​នេះ​។

​លោក Robert Elliott នាយក​ប្រតិបត្តិ និង​នាយក​ចាត់ការ​ទូទៅ​របស់​ក្រុមហ៊ុន មេនូឡាយហ្វ៍ ខេមបូឌា (Manulife Cambodia) បាន​មាន​ប្រសាសន៍​ថា​សេវា​ធានារ៉ាប់រង​អាយុជីវិត​គឺជា​អាជីវកម្ម​រយៈពេល​វែង​ដែល​ដើរតួនាទី​យ៉ាង​សំខាន់​ក្នុង​នាម​ជា​អ្នក​សម្របសម្រួល​ដ៏អស្ចារ្យ​ក្នុង​ការ​អភិវឌ្ឍ​ទីផ្សារ​មូលធន​ដូចជា​សាច់ប្រាក់ ឧបករណ៍​បំណុល អចលនទ្រព្យ និង​សមធម៌​។

លោក Elliott បន្ត​ថា៖ «​ការ​រីកចម្រើន​ឥត​ឈប់ឈរ​នៃ​វិស័យ​ធានា​រ៉ាប់រង​អាយុ​ជីវិត​បាន​ឆ្លុះបញ្ចាំង​ពី​ភាព​វិជ្ជមាន​នៃ​សុខុមាលភាព​ហិរញ្ញវត្ថុ​របស់​គ្រួសារ​កម្ពុជា​ក៏​ដូចជា​សេដ្ឋកិច្ច​របស់​ប្រទេស​កម្ពុជា​ក្នុង​រយៈពេល​វែង​»​។

«​ធានា​រ៉ាប់រង​អាយុជីវិត​ធ្វើឲ្យ​គុណភាព​ជីវិត​ប្រសើរ​ឡើង​សម្រាប់​ម្ចាស់​ប័ណ្ណធានា​រ៉ាប់រង និង​អ្នក​នៅ​ក្នុង​បន្ទុក​របស់​ពួកគេ​ដោយ​កាត់​បន្ថយ​ផលវិបាក​ខាង​សេដ្ឋកិច្ច​នៃ​ព្រឹត្តិការណ៍​ផ្លាស់ប្តូរ​ជីវិត និង​ហានិភ័យ​ហិរញ្ញវត្ថុ​ដែល​ទាក់ទង​នឹង​ការ​ស្លាប់​មុន​អាយុ និង​ពិការភាព​»​។

លោក Elliott បាន​លើក​ឡើង​ថា​ការ​កើន​ឡើង​នៃ​ការ​យល់​ដឹង​ជា​សាធារណៈ និង​ការ​ជឿ​ទុក​ចិត្ត​ទៅ​លើ​ទីផ្សារ ធានា​រ៉ាប់រង​ជីវិត​របស់​ប្រជាជន​កម្ពុជា​។ លោក​បន្ថែម​ថា​ធានា​រ៉ាប់រង​អាយុ​ជីវិត​គឺជា​គំនិត​ថ្មី​ដែល​ប្រជាជន​កម្ពុជា​ជាច្រើន​មិន​បាន​សូវ​ស្គាល់​នៅ​ពេល​ក្រុមហ៊ុន​មេនូឡាយហ្វ៍​បាន​ចាប់ផ្តើម​ប្រតិបត្តិការ​ដំបូង​ក្នុង​ឆ្នាំ ​២០១២​។

លោក Elliott បន្ត​ថា៖ «​យើង​បាន​ចាប់ផ្តើម​ដំបូង​ដោយ​បង្ហាញ​គំនិត​នៃ​ការ​ធ្វើ​ផែនការ​ហិរញ្ញវត្ថុ​រយៈពេល​វែង​ដល់​គ្រួសារ​កម្ពុជា​តាមរយៈ​សិក្ខាសាលា​អប់រំ​សាធារណៈ​របស់​យើង ដែល​មាន​ប្រជាជន​កម្ពុជា​ជាង​ ១០​ ០០០០ ​នាក់​បាន​ចូលរួម​»​។

លោក​បន្ត៖ «​យើង​ក៏​បាន​ពង្រីក​សាខា​របស់​យើង​ទៅ​តាម​បណ្តា​ខេត្ត​សំខាន់ៗ​ចំនួន​ ៣ ដូចជា​ខេត្ត​សៀមរាប បាត់ដំបង និង​កំពង់ចាម​ដើម្បី​ឈាន​ទៅ​រក​ទីផ្សារ​អតិថិជន​កាន់តែ​ច្រើន​»​។

Content image - Phnom Penh Post
បុគ្គលិក​ក្រុមហ៊ុន​ធានា​រ៉ាប់រង​មេនូឡាយហ្វ៍​កំពុង​បំពេញ​ការងារ​ជាមួយ​អតិថិជន​របស់​ខ្លួន​នាពេល​កន្លង​មក​។ រូបថត សហការី

សារ​ស្តីអំពី​សារៈសំខាន់​នៃ​សេវា​ធានា​រ៉ាប់រង​អាយុជីវិត​នៅ​កម្ពុជា​កំពុង​តែ​រីករាលដាល​យ៉ាង​ឆាប់​រហ័ស​។

កញ្ញា នូវ ពៅលក្ខិណា ជា​អ្នក​សារព័ត៌មាន​នៅ​រាជធានី​ភ្នំពេញ​ប្រាប់​ថា​គាត់​បាន​ទិញ​ធានា​រ៉ាប់រង​អាយុ​ជីវិត​កាលពី​ឆ្នាំ​ ២០១៦ ​កន្លង​មក​នេះ​ បន្ទាប់ពី​មិត្តភក្តិ និង​សាច់ញាតិ​របស់​គាត់​បាន​ប្រាប់​ពី​អត្ថប្រយោជន៍​នៃ​ធានា​រ៉ាប់រង​អាយុ​ជីវិត​នេះ​។

កញ្ញា​បាន​និយាយ​ថា៖ «​ខ្ញុំ​បាន​សម្រេច​ចិត្ត​ទិញ​កញ្ចប់​ធានា​រ៉ាប់រង​អាយុ​ជីវិត​ក្នុង​ទឹកប្រាក់​ ១០,០០០ ​ដូល្លារ​សម្រាប់​រយៈពេល​ ១៥ ​ឆ្នាំ​នៃ​ការ​បង់​សន្សំ​ដោយសារ​តែ​ការងារ​របស់​ខ្ញុំ​មាន​ការ​ប្រថុយប្រថាន​គ្រោះថ្នាក់​បំផុត​»​។

ទោះ​ជា​យ៉ាង​ណា​ក៏ដោយ​មិនមែន​គ្រប់​គ្នា​សុទ្ធតែ​យល់​ច្បាស់​ពី​គំនិត​នៃ​ការ​ធានា​រ៉ាប់រង​អាយុ​ជីវិត​នោះ​ទេ​។

កញ្ញា សរ ពិសី ​ជា​បុគ្គលិក​នៅ​សាកលវិទ្យាល័យ​ភូមិន្ទ​ភ្នំពេញ​បាន​ថ្លែង​​ថា៖ «​ខ្ញុំ​មិន​មាន​ផែនការ​ទិញ​ធានា​រ៉ាប់រង​អាយុ​ជីវិត​ឡើយ​ដោយសារ​ខ្ញុំ​មិន​ទាន់​យល់​ច្បាស់​ពី​អត្ថប្រយោជន៍​របស់​វា​នៅ​ឡើយ​»​។ ប៉ុន្តែ​កញ្ញា​នឹង​ធ្វើការ​ស្រាវជ្រាវ​បន្ថែម​ពី​ធានា​រ៉ាប់រង​អាយុ​ជីវិត​នៅ​ពេល​ដែល​កញ្ញា​មាន​គ្រួសារ​។

កញ្ញា ពិសី បាន​បន្ត​ថា៖ «​ខ្ញុំ​កម្រ​ទទួល​បាន​ព័ត៌មាន​ទាក់ទង​នឹង​អត្ថប្រយោជន៍​នៃ​សេវា​ធានា​រ៉ាប់រង​អាយុ​ជីវិត​ហើយ​ពេល​ខ្លះ​មាន​ការ​រិះគន់​ជាច្រើន​ពី​សំណាក់​ប្រជាជន​ដែល​ធ្វើ​ឱ្យ​ខ្ញុំ​មិន​មាន​ទំនុក​ចិត្ត​ចំពោះ​ការ​ប្រើប្រាស់​សេវា​នេះ​»​។

លោក Elliott បាន​និយាយ​ថា​ខណៈ​ពេល​ដែល​ការ​ធានា​រ៉ាប់រង​អាយុ​ជីវិត​កំពុង​កើនឡើង​នោះ​អត្រា​នៃ​ការ​ជ្រៀត​ចូល​នៅ​តែ​ទាប​។

អត្រា​កំណើន​នៃ​ធានា​រ៉ាប់រង​អាយុ​ជីវិត​របស់​ប្រទេស​កម្ពុជា​នៅ​ក្នុង​ឆ្នាំ​ ២០១៦ គឺ​ ០,២២ ​ភាគរយ​នៃ​ផលិតផល​ក្នុង​ស្រុក​សរុប ខណៈ​ដែល​វា​មាន​ចន្លោះ​ពី​ ៣ ទៅ​ ៤ ​ភាគរយ​នៅ​ក្នុង​បណ្តា​ប្រទេស​អាស៊ាន​ដទៃ​ទៀត​។

លើស​ពី​នេះ​ទៀត​លោក Elliott បាន​បន្ថែម​ថា​ដោយសារ​តែ​ឧស្សាហកម្ម​នេះ​នៅ​តែ​ថ្មី​បែប​បទ​ផែនការ​សម្រាប់​សេវា​ធានា​រ៉ាប់រង​អាយុ​ជីវិត​កំពុង​វិវឌ្ឍ និង​អភិវឌ្ឍ​ជា​បន្តបន្ទាប់​។

លោក​បាន​មាន​ប្រសាសន៍​ថា៖ «​អ្នក​រៀបចំ​ផែនការ​យល់​ថា​នៅ​ពេល​អនាគត វិស័យ​ធានា​រ៉ាប់រង​អាយុ​ជីវិត​នឹង​ក្លាយ​ជា​សសរស្តម្ភ​ដ៏សំខាន់​ក្នុង​វិស័យ​ហិរញ្ញវត្ថុ​»​។

«​រួម​គ្នា​ជាមួយ​ក្រុមហ៊ុន​ធានា​រ៉ាប់រង​ផ្សេង​ទៀត​យើង​កំពុង​ធ្វើការ​យ៉ាង​ជិតស្និទ្ធ​ជាមួយ​អ្នក​រៀបចំ​បែបបទ​ផែនការ​ដើម្បី​លើក​កម្ពស់​ឧស្សាហកម្ម​នេះ និង​អនុញ្ញាត​ឱ្យ​ក្រុមហ៊ុន​ធានា​រ៉ាប់រង​អាយុជីវិត​ឈាន​ទៅ​ទាក់ទាញ​អតិថិជន​ឲ្យ​កាន់តែ​ច្រើន​ជាមួយ​ផលិតផល និង​សេវាកម្ម​ដែល​ត្រឹមត្រូវ​»​។

អ្នកស្រី អ៊ុម សុវត្ថធីតា អាយុ​ជាង ៣០ ​ឆ្នាំ​ជា​បុគ្គលិក​ក្រុមហ៊ុន​ឯកជន​មួយ និង​ជា​មាតា​មាន​កូន​ ២ ​នាក់​ក្រោម​អាយុ ៥ ​ឆ្នាំ​នៅ​ក្នុង​បន្ទុក​នៃ​ក្រុម​គ្រួសារ​រស់នៅ​ក្នុង​រាជធានី​ភ្នំពេញ​បាន​ឲ្យ​ដឹង​ថា​អ្នកស្រី​បាន​ដឹង និង​ស្គាល់​ក្រុមហ៊ុន​ធានា​រ៉ាប់រង​អាយុ​ជីវិត​នេះ​តាមរយៈ​មិត្តភក្តិ ហើយ​បន្ទាប់​មក​ក៏​បាន​ជួប​ជាមួយ​បុគ្គលិក​របស់​មេនូឡាយហ្វ៍​ដោយ​គាត់​បាន​ជួយ​ពន្យល់​ផ្តល់​ការ​ប្រឹក្សា​យោបល់ និង​ណែនាំ​អំពី​គុណសម្បត្តិ​នៃ​សេវា​ធានារ៉ាប់រង​អាយុ​ជីវិត​ជាពិសេស​សម្រាប់​ទ្រទ្រង់​អនាគត​កូនៗ​តែ​ម្តង​។

កន្លងមក​មាន​ការ​និយាយ​ត​គ្នា​ខ្លះៗ​ថា​ការ​ទិញ​ធានា​រ៉ាប់រង​អាយុ​ជីវិត​ដូច​ទៅ​នឹង​ការ​ប្រមាថ​ជីវិត​ផ្ទាល់​ខ្លួន ប៉ុន្តែ​អ្នកស្រី សុវត្ថធីតា បាន​បញ្ជាក់​អំពី​ទស្សនៈ​ផ្ទាល់​ខ្លួន​ថា៖ «​តាមពិត​ក្រុមហ៊ុន​គេ​មាន​គោលការណ៍​ធានា​រ៉ាប់រង​អាយុ​ជីវិត​នេះ​ច្បាស់លាស់​ណាស់ និង​សំណង​ត្រឹមត្រូវ​គួរ​ឲ្យ​ចាប់​អារម្មណ៍​អាច​ទទួល​យក​បាន​»​។

អ្នកស្រី​ពន្យល់​ថា​សេវា​ធានា​រ៉ាប់រង​គឺ​តម្រូវ​ឲ្យ​មាន​ការ​យល់ដឹង​កាន់​តែ​ទូលំ​ទូលាយ​ពី​បុគ្គល​ម្នាក់ៗ​ដើម្បី​ធ្វើការ​សម្រេច​ចិត្ត​ត្រឹមត្រូវ​ទិញ​កញ្ចប់​ធានា​រ៉ាប់រង​អាយុជីវិត ដូចជា​យល់​ដឹង​អំពី​គោលការណ៍​របស់​ក្រុមហ៊ុន អត្ថប្រយោជន៍​ផ្សេងៗ​ពី​សេវា​នេះ ស្ថានភាព​អំពី​ប្រាក់​ចំណូល​ប្រចាំ​ក្នុង​គ្រួសារ​ (​ឬ​បុគ្គល​សំខាន់​ក្នុង​គ្រួសារ​) និង​គម្រោង​សន្សំ​ប្រាក់​ទុក​សម្រាប់​អនាគត​កូនៗ​របស់​ខ្លួន​ជាដើម​។

ជា​ការពិត «​ការ​ទិញ​សេវា​ធានា​រ៉ាប់រង​អាយុ​ជីវិត​នេះ​គឺជា​គម្រោង​ច្បាស់លាស់​ក្នុង​ការ​សន្សំ​ប្រាក់​យូរអង្វែង​យ៉ាង​ហោចណាស់​ក៏​រយៈពេល​ពី​ ១០-១៥ ​ឆ្នាំ​ទៅ​មុខ​សម្រាប់​អនាគត​កូនៗ​របស់​យើង​ដែរ​»​។ នេះ​បើ​តាម​ការ​បញ្ជាក់​របស់​អ្នកស្រី សុវណ្ណធីតា​។ គ្មាន​នរណា​ម្នាក់​អាច​ដឹង​ថា​នា​រយៈពេល​ដប់​ឆ្នាំ​ទៅ​មុខ​នឹង​មាន​អ្វី​កើតឡើង​ទេ​សម្រាប់​មនុស្ស​ម្នាក់ៗ «​ប៉ុន្តែ​សម្រាប់​ខ្ញុំ ទោះ​ជា​មាន​ឧបសគ្គ​អ្វី​កើតឡើង​ក៏ដោយ ក៏​អនាគត​កូនៗ​របស់​ខ្ញុំ​ត្រូវ​បាន​ធានា​ការពារ​រួច​ជាស្រេច​ដោយ​ក្រុមហ៊ុន​ធានា​រ៉ាប់រង​»៕

0

Comments

Please, login or register to post a comment

ព័ត៌មានពាក់ព័ន្ធ