Search form

Login - Register | FOLLOW US ON

Logo of Phnom Penh Post newspaper Phnom Penh Post - KDIC នឹង​ធ្វើ​ការ​ស្តារ​កិច្ច​សន្យា​បរាជ័យ

Content image - Phnom Penh Post
លោក Gwak Bumgook, ប្រធាន KDIC។ ហេង ជីវ័ន

KDIC នឹង​ធ្វើ​ការ​ស្តារ​កិច្ច​សន្យា​បរាជ័យ

KDIC (Korean Deposit Insurance Corporation) ក្រុមហ៊ុន​របស់​រដ្ឋាភិបាល​កូរ៉េ ដែល​មាន​តួនាទី​ប្រមូល​ទ្រព្យ សម្បត្តិ​ពី​អចលនទ្រព្យ ដែល​ពុំ​បានទទួល​ភាព​ជោគជ័យ​ក្នុងការ​ធ្វើ​កិច្ចសន្យា និង​ការ​វិនិយោគ​លើ​សេវា​ហិរញ្ញវត្ថុ បាន​បើក​សាខា​ដំបូង​របស់​ខ្លួន​ក្នុង​ទីក្រុង​ភ្នំពេញ កាលពី​ដើមខែ​នេះ​។

ភ្នាក់ងារ​នេះ​មាន​តួនាទី​ស្តារ​ទ្រព្យ​សម្បត្តិ​ប្រមាណ ៧៨,៥០​ ភាគរយ នៃ​ទ្រព្យ​សរុប ដែល​បាន​បាត់បង់​ដោយ​សារ​តែ​ការ​ក្ស័យធន​កាលពី​ឆ្នាំ​ ២០១១​។

លោក Kali Kotoski នៃ​កាសែត​ប៉ុស្តិ៍ បាន​ជួប​ជាមួយ​លោក Gwak Bumgook ប្រធាន និង​ជា​អគ្គនាយក​ក្រុមហ៊ុន ដើម្បី​ពិភាក្សា ថា​តើ​ដំណោះស្រាយ​នេះ​នឹង​ដំណើរការ​ដោយ​របៀប​ណា​។

តើ​ក្រុមហ៊ុន​ហិរញ្ញវត្ថុ​ក្ស័យ ធន​ណា​ខ្លះ​ដែល KDIC ចង់​ស្តារ​ត្រឡប់​មក​វិញ​?

​ទាំង​អស់​មាន​ធនាគារ​សន្សំ​ប្រាក់​រួម​ចំនួន​៩ (MSB) បូករួម​ទាំង​ធនាគារ​សហការ​ជាមួយ​ប៊ូសាន ចំនួន​៥ ធនាគារ​សហការ​ជាមួយ​ធនាគារ Tomato ចំនួន​២ និង​ធនាគារ​សន្សំ​ប្រាក់​រួម Prime ដែល​យើង​កំពុង​ចង់​ស្តារ។

ធនាគារ​ទាំងនេះ​បាន​វិនិយោគ​លើ​អចលនទ្រព្យ​នៅ​កម្ពុជា​មុនពេល​ក្ស័យធន​ក្នុង​ឆ្នាំ​២០១១​។ KDIC ក្នុងនាម​ជា​អ្នក​ទទួល​បន្ទុក កំពុង​តែ​គ្រប់គ្រង​លើ​ទ្រព្យសម្បត្តិ និង​ស្តារ​ទឹក​ប្រាក់​ពី​បណ្តា​អចលនទ្រព្យ​ទាំងនោះ​មកវិញ​។ មាន​គម្រោង និង​ជំនួញ​សរុប​ចំនួន​១០​របស់ KDIC នៅ​កម្ពុជា ដែល​មាន​តម្លៃ​សរុប​ប្រមាណ ៤២០​លាន​ដុល្លារ​។

កាល​ពី​ឆ្នាំ​មុន KDIC បាន​ព្យាយាម​លក់​ធនាគារ Camko Specialized Bank ទាំង​មូល​តែ​ម្តង​។ តើ​បាន​លក់​ដាច់​ហើយ​ឬ​នៅ​?

បើ​យោង​តាម​សិក្ខាសាលា​វិនិយោគិន កាលពី​ខែ​កុម្ភៈ​លើ​ធនាគារ Camko នេះ យើង​បាន​ចុះ​កុងត្រា​លក់​ភាគ​ហ៊ុន​ជាមួយ​អ្នក​ទិញ​ម្នាក់​មក​ពី​ប្រទេស​ជប៉ុន ហើយ​បាន​ទទួល​ការឯកភាព​បឋម​ពី​ធនាគារជាតិ​នៃ​កម្ពុជា​រួចហើយ សម្រាប់​កុងត្រា​ក្នុង​ខែ​តុលា​កាលពី​ឆ្នាំមុន​នោះ​។ ម្យ៉ាង​ទៀត ក្រោយ​ពេល​ចុះ​ហត្ថលេខា​រួច អ្នក​ទិញ​ពុំបាន​អនុវត្តតាម​កុងត្រា​នោះទេ ដោយ​សារ​តែ​បណ្តឹង​ពី​ភាគី​ទី​ ៣​។ បើ​ទោះ​ជា​យ៉ាង​នេះ​ក្តី ពាក្យ​បណ្តឹង​នេះ​ពុំបាន​ប៉ះពាល់​ដល់​មាត្រា​ណា​មួយ​ក្នុង​កុងត្រា​នោះទេ​។

ដូច្នេះ​យើង​បាន​ព្យាយាម​ជំរុញ​ឲ្យ​អ្នក​ទិញ​អនុវត្តតាម​កុងត្រា​នេះ ហើយ Apro Financial Group មិនទាន់​បានផ្តល់​សញ្ញា​ណាមួយ​ថា ពួកគេ​ចង់​ទិញ​នោះទេ​។

តើ​ការ​ប្រឹង​ប្រែង​ស្តា​របស់ KDIC បាន​ជួប​ឧបសគ្គ​ដោយ​សារ​តែ​រដ្ឋាភិបាល​កម្ពុជា​ដែរ​ឬ​ទេ?

អត់​ទេ មិន​មាន​ទេ​។ យើង​ពុំ​បាន​ជួប​បញ្ហា​កង្វះខាត​ជំនួយ ឬ​ការ​សហការ​ពី​រដ្ឋាភិបាល​កម្ពុជា​នោះ​ទេ​។ ​ឧបសគ្គ​ធំ​របស់​យើង​គឺ​ដោយ​សារ​តែ​ដៃគូ​ជំនួញ​រួម​របស់​យើង​ពុំបាន​សហការ​ដោះស្រាយ​បញ្ហា​ប្រាក់កម្ចី ហើយ​ដែល​ពាក្យ​បណ្តឹង​បាន​ជួប​ឧបសគ្គ​ដោយសារតែ​បញ្ហា​បរិយាកាស​ផ្លូវច្បាប់​ខុសគ្នា ក៏ដូចជា​ផល​លំបាក​ក្នុងការ​ស្វែង-​រក​​វិនិយោគិន​ដែល​ត្រឹមត្រូវ​។

ឥឡូវ​នេះ​ដោយ​សារ​តែ​ការិយាល័យ​នៅ​ភ្នំពេញ​បាន​បើក​ទ្វារ យើង​នឹង​ពង្រឹង​ការ​សហការ​ជាមួយ​រដ្ឋាភិបាល​កម្ពុជា តំណាង​ក្រុមហ៊ុន​ច្បាប់​ក្នុង​ប្រទេស​កម្ពុជា និង​ម្ចាស់​ភាគហ៊ុន​ដទៃ​ទៀត ដើម្បី​សម្រេច​កិច្ចសន្យា​ឲ្យ​បាន​ជោគជ័យ​។

ហេតុ​អ្វី​បាន​ជា KDIC សម្រេច​ចិត្ត​បើក​សាខា​នៅ​ទីក្រុង​ភ្នំពេញ?

អស់​រយៈពេល ៥​ឆ្នាំ​មក​ហើយ ដែល​ធនាគារ​ទាំង​នេះ​បាន​ក្ស័យ​ធន ហើយ​វា​ដល់​ពេល​ហើយ​ដែល​យើង​ត្រូវ​ប្រមូល​ប្រាក់​របស់​យើង​ត្រឡប់​មក​វិញ​។ យ៉ាង​ណា​ក្តី​ដោយ​សារ​តែ​ឧបសគ្គ​ដែល​យើង​បាន​ជួប​ប្រទះ និង​ដំណើរ​ការ​ការងារ​នៅ​ឆ្ងាយ​ពីគ្នា​ពេក ព្រម​ទាំង​​ប្រព័ន្ធ​ហេដ្ឋា​រចនា​សម្ព័ន្ធ​មិន​គ្រប់គ្រាន់​សម្រាប់​ការ​ស្តារ​ឡើង​វិញ​នោះ យើង​ត្រូវ​ការ​សាខា​មួយ​ទៀត​សម្រាប់​ប្រទេស​នេះ​តែ​ម្តង។ ការិយាល័យ​នេះ​នឹង​ផ្តល់​ដំណោះ​ស្រាយ​យ៉ាង​សកម្ម​ទៅ​លើ​បញ្ហា​លម្អិត​របស់​គម្រោង​នីមួយៗ​។

ចាប់​តាំង​ពី​ឆ្នាំ​២០១១​មក យើង​បាន​លក់​អចលនទ្រព្យ​បាន​ចំនួន​៤​ដែល​មាន​តម្លៃ​ទឹក​ប្រាក់​ស្មើ​នឹង​១៥,៧៥​លាន​ដុល្លារ​។

ដើម្បី​ជួយ​ឲ្យ​ដំណើរ​ការ​ស្តារ​នេះ​​បាន​រលូន តើ​សកម្មភាព​អ្វីខ្លះ ដែល​យើង​អ្នក​គិតថា ប្រទេស​កម្ពុជា​គួរ​ធ្វើ​បន្ទាប់​តទៅ​ទៀត​ដើម្បី​ឲ្យ​កាន់​តែ​មាន​តម្លាភាព​?

ខ្ញុំ​បាន​កត់​សម្គាល់​ឃើញ​ថា ប្រទេស​កម្ពុជា​នាពេល​ថ្មីៗ​បាន​ពង្រឹង​នូវ​ក្រប​ខ័ណ្ឌ​ការងារ​ច្បាប់​បាន​ល្អ​ប្រសើរ​ជាង​មុន​។ ប៉ុន្តែ​ប្រព័ន្ធ​ចុះ​បញ្ជី​អចលនទ្រព្យ​នៅ​កម្ពុជា នៅតែ​ជា​ឧបសគ្គ​សម្រាប់​អ្នក​ផ្តល់​ឥណទាន និង​សាធារណជន​ទូទៅ​នៅ​ឡើយ​។

ដូច្នេះ វា​មាន​ភាព​លំបាក​ក្នុង​ការ​ស្វែងរក និង​ពិនិត្យ​មើល​ព័ត៌មាន​របស់​ម្ចាស់​អចលនទ្រព្យ និង​ប្រព័ន្ធ​ចុះ​បញ្ជី​ពាក់ព័ន្ធ​ផង​ដែរ​។ ប្រទេស​កម្ពុជា​គួរតែ​ផ្តល់នូវ​ភាព​ងាយ​ស្រួល​ជាង​នេះ​សម្រាប់​ការបញ្ជាក់​អំពី​ម្ចាស់​អចលនទ្រព្យ ដែល​បាន​វិនិយោគ​ដោយ​វិនិយោគិន​បរទេស​។

ប្រសិន​បើ KDIC លក់​បាន​នូវ​អចលនទ្រព្យ​ទាំង​នោះ តើ​ប្រាក់​ចំណូល​ទាំង​នោះ​នឹង​ត្រូវ​បាន​ប្រើប្រាស់​សម្រាប់​ការ​វិនិយោគ​សារជាថ្មី​ម្តងទៀត​នៅ​ក្នុង​ប្រទេស​កម្ពុជា​ដែរ​ឬ​ទេ​?

យើង​គ្រោង​នឹង​លក់​អចលនទ្រព្យ​ភាគ​ច្រើន​នៅ​កម្ពុជា ទៅ​ឲ្យ​វិនិយោគិន​ខ្មែរ ឬ​អន្តរជាតិ​។

KDIC ក៏​ធ្វើ​ការ​ស៊ើប​អង្កេត​ពី​អចលនទ្រព្យ​ដែល​ត្រូវ​បាន​លាក់​កំបាំង​នៅ​កម្ពុជា​ផងដែរ​។ នៅ​ពេល​ដែល​អចលនទ្រព្យ​ត្រូវ​រក​ឃើញ​អស់​ហើយ KDIC នឹង​ចាប់​ផ្តើម​អនុវត្ត​តាម​ផ្លូវ​ច្បាប់​ដើម្បី​ស្តារ​មូលនិធិ​ពី​អចលនទ្រព្យ​នោះ​មក​វិញ ដូចជា​ការ​ប្រមូល​ប្រាក់​ដោយ​ផ្ទាល់ ការ​អភិរក្ស និង​ការប្តឹង​តាម​ផ្លូវ​ច្បាប់​ផង​ដែរ​។

អ្នក​ដែល​កាន់​កាប់​អចលនទ្រព្យ​លាក់​កំបាំង​​ទាំង​នេះ​អាច​នឹង​ជាម​ន្ត្រី​ពីមុន ឬ​បច្ចុប្បន្ន ឬ​ជា​បុគ្គលិក​របស់​គ្រឹះស្ថាន​ដែល​ក្ស័យធន​ដែល​ត្រូវ​មាន​​ទំនួល​ខុស​ត្រូវ​ពី​ការ​ដួល​រលំ​របស់​ធនាគារ​។

តើ KDIC បាន​ស្តា ឬ​រក​ឃើញ​អចលនទ្រព្យ​លាក់​កំបាំង​នោះ​បាន​ប៉ុន្មាន​ហើយ​?

KDIC បាន​ចុះ​បញ្ជី​នូវ​ករណី​លាក់​កំបាំង​អចលនទ្រព្យ​ចំនួន​៦​ដែល​មាន​តម្លៃ​២៨​លាន​ដុល្លារ នៅ​ប្រទេស​កម្ពុជា តាំងពី​ឆ្នាំ​ ២០១១​។

រហូត​មក​ដល់​បច្ចុប្បន្ន​នេះ KDIC បាន​ស្តារ​ប្រាក់​ពី​អចលន​ទ្រព្យ​ចំនួន​៣​មក​ហើយ ដែល​មាន​តម្លៃ​១១​លាន​ដុល្លារ។ សម្រាប់​អចលនទ្រព្យ​ ៣ ទៀត ដែល​មាន​តម្លៃ​ ១៤​ លាន​ដុល្លារ​នោះ គឺ​កំពុង​ស្ថិត​ក្នុង​ដំណើរ​ការ​ផ្លូវ​ច្បាប់​ដែល​យើង​បាន​ដាក់​ពាក្យ​បណ្តឹង​រួច​ហើយ​៕

0

Comments

Please, login or register to post a comment