Search form

Login - Register | FOLLOW US ON

Logo of Phnom Penh Post newspaper Phnom Penh Post - កង្វះ​ការ​លើក​កម្ពស់​ SME ​ធ្វើឲ្យ​កើន​ផលិតផល​ក្លែងក្លាយ

Content image - Phnom Penh Post
ផលិតផល​ក្លែងក្លាយ​ដែល​សមត្ថកិច្ច​បង្ក្រាប​បាន​កាលពី​ខែ​មេសា​កន្លង​មក​។ ហុង មិនា

កង្វះ​ការ​លើក​កម្ពស់​ SME ​ធ្វើឲ្យ​កើន​ផលិតផល​ក្លែងក្លាយ

បើ​ទោះបី​ជា​ទ្រឹស្តី និង​របៀប​ធ្វើ​អាជីវកម្ម​សហគ្រាស​ខ្នាត​តូច​ និង​មធ្យម​ (SME) ​កំពុង​ជ្រាប​ចូល​ក្នុង​សង្គម​ខ្មែរ​យ៉ាង​គគ្រឹក​គគ្រេង​ក៏​មាន​ពលរដ្ឋ​ភាគច្រើន​នៅ​មាន​ទម្លាប់​រកស៊ី​ជា​លក្ខណៈ​គ្រួសារ ហើយ​បែប​បុរាណ​មាន​ន័យ​ថា​ចង់​បង្កើត​ភ្លាម​ហើយ​រកស៊ី​ឲ្យ​ចំណេញ​ឆាប់ៗ​រត់​ឲ្យ​ទាន់​គេ​ភ្លាម​មិន​បាន​​គិត​ ឬ​ក៏​គណនា​រយៈពេល​ដល់​ចំណុច​រួច​ខ្លួន និង​ចាប់ផ្តើម​ចំណេញ​ (Break-even point) ​នោះ​ទេ​។

រីឯ​អ្នក​រកស៊ី​ចង់​ចំណេញ​លើសលប់​ដោយ​មិន​បាន​គិត​ពី​គុណភាព​ផលិតផល​របស់​ខ្លូន​​ និង​សុខភាព​របស់​អ្នក​ប្រើប្រាស់​ផលិតផល​នោះ​ទេ​។ ឧទាហរណ៍ អ្នក​លក់​យក​អង្ករ​ក្រអូប​មួយ​បាវ​ ១០០ ​គីឡូ​យក​ចេញ​ ៥ ​គីឡូ រួច​ចាក់​ចូល​អង្ករ​អន់​ ៥ ​គីឡូ​ចូល​លាយ​ក្នុង​បាវ​នោះ​វិញ​។ ​

ករណី​គ្រឿង​សម្អាង​វិញ​គឺ​យក​ដប​ថ្នាំ​លាប​សក់​ដែល​មាន​គុណភាព​ល្អ​ចាក់​ចេញ​ពាក់​កណ្តាល​រួច​ហើយ​ចាក់​ទឹក​ចូល​ជំនួស​វិញ រីឯ​ថ្នាំ​ដុសធ្មេញ​ក៏​ច្របាច់​ចេញ​ ១ ​ភាគ​ ៤ ​នៃ​ដប​ថ្នាំ​ចេញ ហើយ​សប់​ខ្យល់​ឲ្យ​ប៉ោង​ដូច​ដើម​វិញ ឡេ​លាប​ខ្លួន​ឲ្យ​ស​ក៏​លាយ​បន្លំ​គុណភាព​ដែរ​។

អ្នក​លក់​សាំង​ដប​ ឬ​ប៊ីដុង​ក៏​ដូច​គ្នា​ដែរ​គឺ​លាយ​ប្រេង​ផ្សេងៗ​ដែល​ថោកៗ​យក​មក​លក់​។ នេះ​គឺ​គ្រាន់​តែ​ជា​ប្រភេទ​ទំនិញ​លាយ​ធ្វើឲ្យ​ថយ​គុណភាព រីឯ​អ្នក​រកស៊ី​ខ្លះ​ទៀត​គឺ​ចង់​មាន​ចង់​បាន​លឿន​ជាង​ហ្នឹង​ទៀត​ហើយ​ក៏​បង្ហាញ​ពី​ការ​ប្រកួតប្រជែង​មិន​ស្មោះត្រង់​គឺ​ផលិត​ខុស​ច្បាប់​តែ​ម្តង​គឺ​ធើ្វ​លួចលាក់​មាន​សម្បក​ក្រៅ​ឈ្មោះ​ដូច​គេ រូបភាព​ក៏​ដូច​របស់​គេ​ដែរ តែ​គ្រឿង​ខាង​ក្នុង​រសជាតិ​ខុស​គ្នា​។

ដូចជា ចាហួយ ផលិតផល​មកពី​ប្រទេស​ថៃ​ដាក់​ធ្វើឲ្យ​ដូច​របស់​គេ​ដែរ ទឹក​ប៉េងប៉ោះ ទឹកម្ទេស​ក៏​ដូច​គ្នា​ដែរ​គឺ​ចម្លង​គេ​ធ្វើ​ក្លែងក្លាយ​រួច​ហើយ​ដាក់​ក្នុង​ទីផ្សារ​ដូច​គេ​ជាដើម​។ ជាពិសេស​ ​​អ្នក​ជំនាញ​ខាង​ហូប​ស្រា​ល្អៗ​អាច​ដឹង​ថា​ស្រា​ដប​ឈ្មោះ​ល្បីៗ តែ​ក្លែងក្លាយ​ទេ ព្រោះ​ចំណុច​ខុស​គ្នា​នៃ​ស្លាក​សញ្ញា​សម្បក​ដប និង​រសជាតិ​ខុស​គ្នា ភាគច្រើន​គេ​លួច​មក​ដាក់​នៅ​តាម​កន្លែង​រោងការ​ដដែល​។

ជា​ផលវិបាក​គឺ​ផលិតផល​ក្លែងក្លាយ​គ្មាន​គុណភាព​បែប​នេះ​គឺ​ប៉ះពាល់​ទៅ​នឹង​សុខាភាព​របស់​ពលរដ្ឋ​ដែល​ប្រើប្រាស់​ខ្លះ​ទៅ​មាន​ជំងឺ​លើស​ឈាម ទឹកនោមផ្អែម លើស​ជាតិ​អាស៊ីត លើស​ជាតិ​ស្ករ ខ្លះ​ទៀត​ឈឺថ្លើម ក្រពះ និង​ពោះវៀន​ជាដើម​។

តែ​កាលពី​ដើម​ខែ​នេះ​សមត្ថកិច្ច​បាន​ចាប់​រឹបអូស​យក​ទឹកម្ទេស ទឹកសៀង ទឹកត្រី​កោះកុង និង​ទឹក​ប្រេងខ្យង​សរុប​ ៩ ​តោន​នៅ​សង្កាត់​ទឹកថា្ល​ និង​ថ្មីៗ​នេះ​សមត្ថកិច្ច​បាន​បង្ក្រាប​កន្លែង​ផលិត​ឡេ​លាប​ឲ្យ​ស​ និង​គ្រឿងសម្អាង​ដ៏ធំ​មួយ​នៅ​សង្កាត់​ទួលស្វាយព្រៃ​។

រណី​ដែល​បង្ក្រាប​បាន​​រួច​ហើយ ដូច្នេះ​សមត្ថកិច្ច​គួរតែ​ស្រាវជ្រាវ​មើល​ថា តើ​ហេតុអ្វី​បាន​ជា​ចូលចិត្ត​ធ្វើ​ផលិតផល​ក្លែងក្លាយ​យ៉ាង​ដូច្នេះ បើ​ដឹង​​ថា​វា​ខុស​ច្បាប់​ហើយ​នោះ​? ប្រសិន​បើ​ស្រាវជ្រាវ​ចុះ​ចាប់​ឲ្យ​តែ​មាន​ផលិតផល​ក្លែងក្លាយ​នោះ​គឺ​រក​គុក​ដាក់​គ្មាន​ទេ​។

ប្រសិន​បើ​ពួកគាត់​ចេះ​របៀប​ផលិត​ហើយ​សំណួរ​សួរ​ថា​តើ​ត្រូវ​រក​មធ្យោបាយ​យ៉ាង​ដូចម្តេច​ដើម្បី​ដោះស្រាយ​ឲ្យ​ពួក​គាត់​ផលិត​ឲ្យ​ទៅ​ជា​ស្រប​ច្បាប់​វិញ ចុះ​បញ្ជិកា​ត្រឹមត្រូវ​ទៅ​?

កន្លង​មក​មាន​ហេតុផល និង​មាន​ការ​ត្អូញត្អែរ​ពី​អ្នក​ដែល​បើក​សិប្បកម្ម​ខ្នាតតូច និង​មធ្យម ភាគច្រើន​ដែល​បរាជ័យ​នោះ​គឺ៖

ទី​ ១) គុណភាព​ផលិតផល​នៅ​ទាប ខ្វះ​អ្នក​ជំនាញ​បច្ចេកទេស​ត្រឹមត្រូវ និង​ភាព​អនាម័យ នៅពេល​ប្រកួត​ក្នុង​ទីផ្សារ​ជាមួយ​ផលិតផល​នាំ​ចូល​មក​គុណភាព​ល្អ​ជាង​តម្លៃ​ដូច​គ្នា​ ឬ​ក៏​ទាប​ជាង​ធ្វើឲ្យ​ផលិតផល​គាត់​លក់​មិន​ដាច់​។

ទី​ ២) ផលិតផល​គេច​ពន្ធ​ ឬ​ក៏​ពុករលួយ​នៅ​ច្រក​ព្រំដែន ហើយ​លក់​តម្លៃ​ទាប​ធ្វើឲ្យ​ប៉ះពាល់​ទៅ​លើ​ការ​លក់​របស់​ពួកគាត់​។

ទី​ ៣) ការ​លួច​ចម្លង​ទាំង​ស្រុង​ពី​ផលិតផល​របស់​គាត់​ហើយ​ដាក់​លក់​ក្នុង​ទីផ្សារ​ប្រកួត​ប្រជែង​ទៀត​។

ទី​ ៤) ការ​យាយី​ពី​​អាជ្ញាធរ​ដែល​មាន​សមត្ថកិច្ច​ចុះ​ទៅ​ពិនិត្យ​គុណភាព​ក្តី បរិស្ថាន​ក្តី សុវត្ថិភាព​ក្តី គឺ​សុទ្ធ​តែ​មាន​បង់​លុយ​ថែម​ក្រៅ​រហូត ហើយ​ខ្លះ​ទៀត​ទៅ​សរសេរ​សំបុត្រ​សុំ​ត្រង់ៗ​តែ​ម្តង​ស្រា​បៀរ​ប៉ុន្មាន​កេស​ទឹកក្រូច​ប៉ុន្មាន​កេស​នៅ​ពេល​បុណ្យទាន​ ឬ​ក៏​មាន​កម្មវិធី​នៅ​កន្លែង​ការិយាល័យ​របស់​អាជ្ញាធរ​ទាំងនោះ​។

តាមរយៈ​​របាយការណ៍​អង្គការ​តម្លាភាព​កម្ពុជា​មាន​សហគ្រាស​ ៤៧ ​ក្នុង​ចំណោម​ ១០០ ​សហគ្រាស​ខ្នាត​តូច​ និង​មធ្យម​បាន​រាយការណ៍​ធា្លប់​បាន​ដឹង​ ឬ​ក៏​ធ្លាប់​ពុករលួយ​ (TIC, 2017)​។ បើ​មិន​ដូច្នេះ​ទេ​គឺ​សិប្បកម្ម​ ឬ​ក៏​ក្រុមហ៊ុន​គាត់​ដួល​មិន​បាច់​ច្រាន​ទេ បើ​កាល​ណា​ធ្វើ​ដោយ​ស្រប​ច្បាប់​នោះ​។

តាម​ពិត​ទៅ​ផលិតផល​ដែល​នាំ​ចូល​មក​ទីផ្សារ​ក្នុង​ស្រុក​ខ្មែរ​គឺ​ខ្លះ​ធ្វើ​សិប្បកម្ម​ខ្នាត​តូច​នៅ​ប្រទេស​ជិត​ខាង​សោះ​ក៏​អាច​មក​លក់​នៅ​ស្រុក​ខ្មែរ​បាន​ដែរ​។ ចំណុច​នេះ​រាជរដ្ឋាភិបាល​គួរ​បង្កើត​យន្តការ​ថ្មី​លុប​បំបាត់​ផលិតផល​ក្លែងក្លាយ​តាមរយៈ​ការ​លើក​កម្ពស់​សហគ្រាស​ខ្នាត​តូច និង​មធ្យម​ដែល​មាន​សម្ព័ន្ធ​សមាគម​សហគ្រាស​ធុន​តូច​ និង​​មធ្យម​កម្ពុជា​រង់ចាំ​ជួយ​អាជីវករ​ណា​ដែល​ចង់​វិនិយោគទុន​បែប​នេះ​។

តែ​អ្វី​ដែល​សំខាន់​គឺ​រាជរដ្ឋាភិបាល​ដោះស្រាយ​បញ្ហា​ដែល​ពាក់ព័ន្ធ​ដូចជា​លើក​ទឹក​ចិត្ត​អ្នក​បច្ចេកទេស​ជំនាញ​បរទេស​ក៏​បាន ខ្មែរ​ក៏​បាន​ឲ្យ​ហក់​ចូល​មក​ជួយ​បង្រៀន​ឲ្យ​រឹង​ដៃ​រឹង​ជើង​សិន​ធ្វើ​យ៉ាង​ណា​កែប្រែ​ទម្លាប់​ក្លែងក្លាយ​ផលិតផល​ឲ្យ​ទៅ​ជា​ផលិតផល​ស្រប​ច្បាប់​បាន​។

តាម​បច្ចេកទេស​ការ​ធ្វើ​អាជីវកម្ម​គឺ​បង្កើត​ជា​ក្រុមហ៊ុន​មួយ​ចុះ​បញ្ជិកា​ត្រឹមត្រូវ បើ​មិន​ទាន់​រឹង​ដៃ​រឹង​ជើង​ទេ​គឺ​អាច​ទិញ​រៀប​ធ្វើ​​ ឬ​ក៏​ផលិត​ពី​ក្រុមហ៊ុន​មេ​ជា​លក្ខណៈ franchise ដូច​កាហ្វេ​ Amazone សិន​ក៏​បាន​ ឬ​ក៏​ជួល​អ្នក​បច្ចេកទេស​មក​បង្កើត​របៀប​ធ្វើ​ជា​របស់​ខ្លួនឯង​ក៏​បាន​។ ​គឺ​ធ្វើ​យ៉ាង​ណា​ឲ្យ​តែ​បច្ចុប្បន្ន​ស្រប​ទៅ​នឹង​ទីផ្សារ​នៅ​លើ​ពិភពលោក​ដោយ​ផ្អែក​ទៅ​លើ​ទ្រឹស្តី​ និង​ការ​អនុវត្ត​ដើម្បី​ឲ្យ​ក្រុមហ៊ុន​មាន​ភាព​រឹងមាំ​។

ជាមួយ​គ្នា​នេះ​ដែរ​រាជរដ្ឋាភិបាល​គួរ​តែ​សាង​ទំនុក​ចិត្ត​លើ​អាជីវករ​ក្នុង​ស្រុក​ផង​ដែរ គឺ​ការ​ទប់ស្កាត់​ទំនិញ​នាំ​ចូល​ខុស​ច្បាប់ និង​ដំឡើង​ពន្ធ​នាំ​ចូល​ទំនិញ​ដូច​គ្នា និង​ប្រសិន​បើ​ទំនិញ​នោះ​មិន​ជាប់​លក្ខខណ្ឌ​រួច​ពន្ធ​នោះ​ទេ​ និង​បញ្ឈប់​ការ​យាយី​ពី​សំណាក់​អាជ្ញាធរ​មក​សហគ្រាស​ផង​។ ប្រសិន​បើ​អាច​ដំណើរការ​ទៅ​បាន​ល្អ​គឺ​អាច​ជួយ​ទិញ​វត្ថុ​ធាតុដើម​ពី​កសិករ​ដូច​ផលិតផល​ពី​កសិកម្ម និង​កសិឧស្សាហកម្ម​កែច្នៃ​ហើយ​លក់​ក្នុង​ស្រុក​បាន​ទៀត​។ ​

ជាង​នេះ​ទៀត​នោះ​ គឺ​កាត់​បន្ថយ​ពលករ​ចំណាក​ស្រុក​បាន​ទៀត​មិន​ចាំបាច់​ទៅ​ធ្វើការ​នៅ​ក្រៅ​ប្រទេស​នាំ​តែ​វេទនា​នោះ​ទេ​៕

ចូលរួម​ផ្តល់យោបល់​តាមរយៈ soprach.tong@phnompenhpost.com

0

Comments

Please, login or register to post a comment