Search form

Login - Register | FOLLOW US ON

Logo of Phnom Penh Post newspaper Phnom Penh Post - កម្ពុជា-ថៃ គួរ​ចាប់​ផ្តើម​ជជែក​ឡើង​វិញ​រឿង OCA

លោក​នាយក​រដ្ឋ​មន្ត្រី ហ៊ុន សែន ចាប់​ដៃ​ជា​មួយ​រដ្ឋ​មន្ត្រី​ការ​បរទេស​ថៃ លោក Tanasak Patimapragom នៅ​វិមាន​សន្តិភាព កាល​ពី​ខែ​មុន។
លោក​នាយក​រដ្ឋ​មន្ត្រី ហ៊ុន សែន ចាប់​ដៃ​ជា​មួយ​រដ្ឋ​មន្ត្រី​ការ​បរទេស​ថៃ លោក Tanasak Patimapragom នៅ​វិមាន​សន្តិភាព កាល​ពី​ខែ​មុន។ ហុង មិនា

កម្ពុជា-ថៃ គួរ​ចាប់​ផ្តើម​ជជែក​ឡើង​វិញ​រឿង OCA

នៅ​ថ្ងៃ ទី៣០-៣១ ខែ​តុលា ក្នុង​សប្តាហ៍​នេះ រាជ​រដ្ឋាភិបាល​កម្ពុជា នឹង​ទទួល​គណៈ​ប្រតិភូ​នៃ​ប្រទេស​ថៃ ដែល​ដឹក​នាំ​ដោយ​លោក​នាយក​រដ្ឋ​មន្ត្រី ប្រាយុធ ចាន-អូចា នៅ​រាជធានី​ភ្នំពេញ ដែល​នឹង​ចុះ​អនុស្សរណៈ​យោគ​យល់​គ្នា (MOU) ចំនួន​បី គឺ ទី១ បញ្ហា​សហ​ប្រតិបត្ត​ការ​ទេសចរណ៍ ទី២ បញ្ហា​លុប​បំបាត់​ការ​ជួញ​ដូរ​មនុស្ស និង​ការ​ជួយ​ជន​រង​គ្រោះ​និង ទី៣ ការ​តភ្ជាប់​ផ្លូវ​ដែក​តែ​មិន​បាន​លើក​យក​បញ្ហា​តំបន់​អះអាង​ត្រួត​ស៊ី​គ្នា OCA (Overlapping Claims Area) ប្លុក​ប្រេង​ដែល​ស្ថិត​នៅ​លើ​ព្រំដែន​សមុទ្រ កម្ពុជា-ថៃ នោះ​ទេ។

នេះ​ជា​ឱកាស​ជួប​គ្នា​ល្អ​ដែល​រាជ​រដ្ឋាភិបាល​ទាំង​ពីរ​គួរ​តែ​ចាប់​ផ្តើម​ជជែក​គ្នា​រឿង OCA ឡើង​វិញ ជា​ពិសេស​គឺ​សភា និង​ព្រឹទ្ធសភា​កម្ពុជា ក៏​គួរ​ណាស់​តែ​បើក​ការ​ជជែក​វែក​ញែក ដេញ​ដោល​គ្នា​ចំពោះ​បញ្ហា​ធនធាន​ប្រទេស​ជាតិ​បែប​នេះ ដើម្បី​រក​ផល​ចំណេញ​រៀងៗ​ខ្លួន​បាន​ដែរ​ឬ​ទេ? ជា​ជាង​ឲ្យ​សមាជិក​សភា និង​ព្រឹទ្ធសភា​ខ្មែរ​ខ្លះ​ដេក​តែ​ស៊ី​ពេក ខ្លះ​ទៀត​មិន​ត្រឹម​តែ​ខ្លួន​ឯង​ប៉ុណ្នឹង​ទេ តែ​ថែម​ទំាង​ស្ពាយ​កូន​ចៅ សែ​ស្រឡាយ មក​ធ្វើ​ជា​ទីប្រឹក្សា ឬ​ក៏​ជំនួយការ​ដ៏​ច្រើន​សន្ធឹក​សន្ធាប់​បំផ្លាញ​ថវិកា​ជាតិ ជា​ពិសេស​ឋានៈ​ត្រឹម​អគ្គ​លេខាធិការ​សភា និង​ព្រឹទ្ធសភា​ទេ តែ​គ្រាន់​តែ​តែង​តាំង​ទីប្រឹក្សា​របស់​គាត់​រាប់​សិប​នាក់​សល់​គរ​ជើង​គ្នា សុទ្ធ​តែ​ឋានៈ​ស្មើ​អនុ​រដ្ឋលេខាធិការ តែ​អ្នក​ខ្លះ​មិន​ដែល​ឃើញ​មក​អើត​កន្លែង​ធ្វើ​ការ​ផង​ដល់​ខែ​បើក​លុយៗ។

រាជ​រដ្ឋាភិបាល​កម្ពុជា និង ថៃ ធ្លាប់​បាន​ចុះ MOU ជាមួយ​គ្នា​តាំង​ពី ឆ្នាំ​២០០១ ដើម្បី​ចូល​រួម​គ្រប់​គ្រង​នៅ​លើ​តំបន់ OCA ជាមួយ​គ្នា​នៅ​លើ​ក្រឡា​ផ្ទៃ ២៧ ០០០ គីឡូម៉ែត្រ​ការ៉េ នៅ​ឈូង​សមុទ្រ​ថៃ តែ​ក្រោយ​មក​ត្រូវ​បាន​ភាគី​ថៃ​បាន​ដក​ព្យួរ​ទុក​កិច្ច​ព្រម​ព្រៀង​ទៅ​វិញ​កាល​ពី ឆ្នាំ​២០០៩ បន្ទាប់​ពី​កម្ពុជា បាន​តែង​តាំង​អតីត​នាយក​រដ្ឋ​មន្ត្រី​ថៃ លោក ថាក់ស៊ីន ស៊ីណាវ៉ាត្រា ធ្វើ​ជា​ទីប្រឹក្សា​រាជ​រដ្ឋាភិបាល​កម្ពុជា​មក ហើយ​កាល​ពី ខែ​កញ្ញា កន្លង​ទៅ​នេះ មាន​គណៈ​ប្រតិភូ​ថៃ​មក​ទស្សនកិច្ច​នៅ​ប្រទេស​កម្ពុជា ពេល​ពួក​គេ​ត្រឡប់​ទៅ ប្រទេស​ថៃ វិញ​មន្ត្រី​ជាន់​ខ្ពស់​នៃ​ក្រសួង​រ៉ែ និង​ថាមពល​បាន​ប្រាប់​ទៅ​កាសែត​ក្នុង​ស្រុក​របស់​ថៃ ឌឹណេសិន (The Nation) ថា បាន​លើក​ពី​បញ្ហា​តំបន់​អះអាង​ថា ត្រួត​ស៊ី​គ្នា​រវាង កម្ពុជា និង​ថៃ តែ​សម្រាប់​មន្ត្រី​ជាន់​ខ្ពស់​កម្ពុជា​ថា ពុំ​បាន​ដឹង​ឮ​ពី​រឿង​នេះ​ទេ តែ​ជា​ការ​មួយ​ល្អ​បើ​បាន​ជួប​ពិភាក្សា​លើ​បញ្ហា OCA នេះ។

បញ្ហា​ប្រេង​និង​ឧស្ម័ន កាល​ពី​នៅ​ជា​អាជ្ញាធរ​ប្រេង​កាត ដែល​ស្ថិត​នៅ​ក្រោម​ការ​គ្រប់​គ្រង ដោយ​ទីស្តី​ការ​គណៈ​រដ្ឋ​មន្ត្រី ព័ត៌មាន​ហាក់​បី​ដូច​ជា​មាន​ការ​លាក់​លៀម ចំណុច​ខ្លះ​បិទ​ជិត​ឈឹង​សួរ​ថា តើ​ប្រជា​ពលរដ្ឋ​ខ្មែរ​ប៉ុន្មាន​នាក់​ដែល​បាន​ដឹង​ឮ វឌ្ឍនភាព​របស់​ប្រេង និង​ឧស្ម័ន​នោះ? ចង់​គេ​ចរចា​គ្នា​ស្ងាត់ៗ​ម្តង​បាន​លុយ​រាប់​លាន​ដុល្លារ ដែល​បាន​មក​ពី​ប្រេង និង​ឧស្ម័ន​ក៏​យើង​មិន​ដឹង? ឬ​ក៏​ការ​ជួប​ចរចា និង​ចេញ​អាជ្ញាប័ណ្ណ​ឲ្យ​ក្រុម​ហ៊ុន​រុក​រក​ប្រេង​និង​ឧស្ម័ន​បាន​ប្រាក់​រាប់​លាន​ដុល្លារ​ក៏​ប្រជា​ពលរដ្ឋ​មិន​ដឹង? ចំណាយ​ទៅ​លើ​អ្វី​ក៏​យើង​មិន​ដឹង? ចំណែក​ឯ​អង្គភាព​ប្រឆាំង​នឹង​អំពើ​ពុក​រលួយ​វិញ​អួន​គាត់​អូស​បាន​តែ​ត្រី​កំភ្លាញ ត្រី​ក្អុក និង​កំពឹស​យក​មក​ធ្វើ​ម៉ាំ​ល្ហុង​ទេ តែ​ត្រី​រ៉ស់ ត្រី​អណ្តែង ត្រី​ប្រា​ធំៗ អូស​មិន​ដែល​បាន​ទេ​រត់​រួច​ទាំង​អស់​ហ្នឹង។ ម្យ៉ាង​វិញ​ទៀត កាល​ពី​អាជ្ញាធរ​ប្រេង​កាត​នៅ​ក្រោម​ទីស្តីការ​គណៈ​រដ្ឋ​មន្ត្រី មិន​ត្រឹម​តែ​គ្មាន​តម្លាភាព​ប៉ុណ្ណោះ​ទេ គឺ​ថែម​ទាំង​រៀបចំ​សេចក្តី​ថ្លែង​ការណ៍​ជូន​លោក​នាយក​រដ្ឋ​មន្ត្រី ហ៊ុន សែន ថ្លែង​ខុស​ទទេ ធ្វើ​ឲ្យ​ថ្នាក់​ដឹក​នាំ​ខ្មាស​គេ​នោះ​គឺថា តំណក់​ប្រេង​នៅ​ស្រុក​ខ្មែរ នឹង​ស្រក់​ជា​លើក​ដំបូង​នៅ​ថ្ងៃ ទី១២ ខែ​១២ ឆ្នាំ​២០១២ នៅ​ម៉ោង ១២។

ហ្នឹង​ហើយ​ជា​ផល​វិបាក​បង្ហាញ​ពី​អំណាច​ប្រមូល​ផ្តុំ ចង់​ស្អី​ក៏​ត្រូវ​ឆ្លង​ទីស្តីការ​គណៈ​រដ្ឋ​មន្ត្រី​ដែរ រាល់​ការ​ដេញ​ថ្លៃ​ធំៗ ដូច​ជា សង់​ស្ពាន ថ្នល់ ជាដើម សូម្បី​ក្រុម​ហ៊ុន​ប្រមូល​សំរាម​ស៊ីនទ្រី ក៏​ទៅ​ដេញ​ថ្លៃ​នៅ​ទីនោះ​ដែរ មិន​មែន​នៅ​សាលា​រាជធានី​ភ្នំពេញ​ទេ ស្រួល​ស៊ី​មូល​សរុប​កុំ​ឲ្យ​បែក​ទ្រព្យ​តែ​ម្តង​នៅ​ទីនោះ។

ប៉ុន្តែ​ឥឡូវ​ស្ថាប័ន​ប្រេង​កាត​មក​នៅ​ក្រោម​ចំណុះ​ឲ្យ​ក្រសួង​រ៉ែ និង​ថាមពល វិញ ហាក់​ដូចជា​បង្ហាញ​ពី​ការ​អភិវឌ្ឍ​បណ្តើរៗ​ហើយ ដូច​ជា ការ​បង្ហាញ​ពី​ការ​ទាញ​យក​ផល​ចំណេញ​ពី​ប្រេង និង​ឧស្ម័ន​នៅ​ប្លុក​ក្នុង​ដែន​សមុទ្រ​ខ្មែរ ដូច​នៅ​ប្លុក A ក្រុម​ហ៊ុន Chevron បាន​ចំណាយ​ពេល​ជាង ១ ទសវត្សរ៍​ក្នុង​ការ​សិក្សា​ពី​លទ្ធភាព​រុក​រក​ប្រេង និង​ឧស្ម័ន ចំណាយ​ទឹក​ប្រាក់​អស់​ជាង ១៦០ លាន​ដុល្លារ ហើយ​បាន​លក់​ភាគ​ហ៊ុន​ទៅ​ឲ្យ​ក្រុម​ហ៊ុន KrisEngergy Ltd របស់ ប្រទេស​សិង្ហបុរី ក្នុង​តម្លៃ ៦៥ លាន​ដុល្លារ​កាល​ពី ខែ​សីហា កន្លង​ទៅ​នេះ។

រីឯ​ប្លុក B-F សុទ្ធ​តែ​មាន​ម្ចាស់​ក្រុម​ហ៊ុន​ចិន ក្រុម​ហ៊ុន​ជប៉ុន អស់​ហើយ​តែ​មិន​ដឹង​ថា ប្រាក់​ចំណូល​បាន​ពី​ការ​ចរចា ការ​អនុញ្ញាត​ចុះ​ស្រាវជ្រាវ​ប្រេង និង​ឧស្ម័ន ដំណើរ​ការ​ដេញ​ថ្លៃ​របស់​ក្រុម​ហ៊ុន​ធំៗ​មិន​ដឹង​បាន​ប៉ុន្មាន​លាន​ដុល្លារ​នៅ​ឡើយ​ទេ? ចំណុច​នេះ ក្រសួង​គួរ​តែ​បង្ហាញ​ថវិកា​ឲ្យ​កាន់​តែ​មាន​តម្លាភាព​ផង ហើយ​អង្គភាព​ប្រឆំាង​នឹង​អំពើ​ពុក​រលួយ​ក៏​ត្រូវ​តែ​តាម​ដាន​ត្រី​ធំៗ​ដូច​នេះ​ផង កុំ​ចាំ​តែ​គេ​ប្តឹង​បាន​ធ្វើ​នោះ។ រីឯ​ដំណាក់​កាល​តាក់​តែង​ច្បាប់​គ្រប់​គ្រង​ប្រេង​ក៏​នៅ​អូស​បន្លាយ​រាប់​ឆ្នាំ​ឮ​ថា ជិត​ចប់​តាំង​ពី ឆ្នាំ​២០១០ មក​ម៉្លេះ។

ពេល​ណា​ទើប​បាន​កំណត់​អនុម័ត​ច្បាប់​នោះ​ឲ្យ​ច្បាស់​លាស់? ហើយ​ត្រូវ​កំណត់​ឲ្យ​ច្បាស់​លាស់​អំពី​ផល​ចំណេញ​ប៉ុន្មាន​ភាគ​រយ​ដែល​ត្រូវ​ចូល​ថវិកា​ជាតិ​នោះ? ហើយ​ចំណាយ​ទៅ​លើ​អ្វី​ខ្លះ? តើ​នរណា​ដឹង​ថា ប្រាក់​ចំណូល​ពី​ប្រេង និង​ឧស្ម័ន​តាំង​ពី​កកើត​អាជ្ញាធរ​មក​សរុប​បាន​ប៉ុន្មាន​លាន​ដុល្លារ​ហើយ? សូម​កុំ​បន្លែ​បន្លំ​រឿង​ថវិកា​ដែល​បាន​មក​ពី​ប្រេង និង​ឧស្ម័ន​នេះ ប្រយ័ត្ន​ត្រូវ​បណ្តាសា​ប្រេង ដូច​នៅ​ប្រទេស​នីហ្សេរីយ៉ា ដែល​ជា​ម្ចាស់​ប្រេង​នៅ​សល់​តែ​គូទ​ខោ ហើយ​កាប់​ចាក់​គ្នា​ក្នុង​ស្រុក​ទៀត។ កម្ពុជា ក៏​ត្រូវ​តែ​សិក្សា​ដក​ស្រង់​បទ​ពិសោធ​ប្រទេស​ជិត​ខាង​នៅ​តំបន់​អាស៊ាន ថា តើ​គេ​ដោះ​ស្រាយ​យ៉ាង​ដូច​ម្តេច​ដើម្បី​ឲ្យ​ទទួល​យក​បាន​ទាំង​អស់​គ្នា ពី​តំបន់ OCA នេះ។

ឧទាហរណ៍​តាម​រយៈ​ការ​ចង​ក្រង​ឯកសារ​របស់​វេបសាយ​របស់ វីគីផេឌៀរ (Wikipedia) បាន​រៀប​រាប់​អំពី​ដំណោះ​ស្រាយ​បញ្ហា​ប្រេង និង​ឧស្ម័ន​នៅ​តំបន់ OCA រវាង ប្រទេស​ម៉ាឡេស៊ី និង ប្រទេស​ថៃ តាំង​ពី​មាន​បញ្ហា​ទំនាស់​គ្នា​លើ​តំបន់​អះ​អាង​ត្រួត​ស៊ី​គ្នា​នេះ​ដែរ តែ​ក្រោយ​មក​បាន​ចរចា​គ្នា​ត្រូវ​រ៉ូវ​គ្នា បន្តិច​ម្តងៗ​តាំង​ពី ឆ្នាំ​១៩៧៩ មក​ម៉្លេះ ហើយ​ក្រោយ​មក​ទទួល​យក​បាន​ទាំង​អស់​គ្នា​ហើយ​បាន​ទាំង​ក្រុម​ហ៊ុន​ប្រទេស​ទាំង​ពីរ​ធ្វើ​ការ​ដូច​គ្នា​ទៀត គឺ​ចែក​គ្នា​ស្មើ ៥០ ភាគរយ​ម្នាក់។ រហូត​មក​ទល់​ពេល​នេះ​គឺ​ប្រទេស​ទាំង​ពីរ​នៅ​តែ​ដាក់​វិនិយោគ​ជាមួយ​គ្នា​ដដែល។

បទ​ពិសោធ​ចែក​គ្នា ៥០ ភាគរយ​ម្នាក់​នេះ គឺជា​ជម្រើស​ល្អ​បំផុត​ហើយ​សម្រាប់​កម្ពុជា និង​ថៃ ចំពោះ​តំបន់ OCA នេះ ព្រោះ​បើ​ភាគី​ម្ខាងៗ​នៅ​តែ​ថា ប្លុក​នៅ​តំបន់​ខាង​ខ្លួន​ធំ​ជាង​តែ​សួរ​ថា ប៉ុន្មាន? ជម្រៅ​នៅ​ខាង​ក្រោម​ទៀត​នោះ​ប៉ុន្មាន? ហើយ​បើ​នៅ​តែ​អះអាង​ថា ខ្លួន​នៅ​តែ​ធំ​ជាង​រហូត​អ៊ីចឹង គឺ​មិន​មាន​ដំណោះ​ស្រាយ​ទេ ព្រោះ​ប្រសិន​បើ​ភាគី​ម្ខាងៗ​លួច​បូម​តែ​ប្រណាំង​គ្នា​រៀងៗ​ខ្លួន​ទៅ ហើយ​បើ​អាច​ខួង​កោង​ចូល​មក​ខាង​ដី​ភាគី​ម្ខាង​ទៀត​ក៏​គ្មាន​នរណា​ទៅ​ដឹង​ដែរ។ នេះ​គឺ​សុទ្ធ​តែ​ជា​របស់​មើល​មិន​ឃើញ​ទាំងអស់​គ្នា​ហើយ​បើ​នៅ​តែ​ទុក​យូរៗ​ធ្វើ​ហី​តែ​រៀងៗ​ខ្លួន នោះ​អនាគត​ដ៏​ខ្លី​ខាង​មុខ​នេះ ប្រេង​ឆៅ និង​ឧស្ម័ន​ទាំង​នោះ អាច​ហួត​អស់​ក៏​ថា​បាន នរណា​ទៅ​ដឹង? បើ​ស្រុក​ខ្មែរ​មិន​មាន​អ្នក​បចេ្ចកទេស និង​បទ​ពិសោធ​ច្បាស់​លាស់​ខាង​ហ្នឹង​ផង​ពេល​ខ្លះ​ចេះ​តែ​ជឿ​ទីប្រឹក្សា​រយៈ​ពេល​ខ្លី​ដែល​បរទេស​ចេះ​តែ​ថា ឯង​ឯ​ណេះ​ក៏​ចេះ​តែ​ថា តាម​គេ​តទៅ​ទៀត​ទៅ ហើយ​បើ​ចុះ​អនុស្សរណៈ​យោគ​យល់​លើក​ក្រោយ​ស្តី​ពី​ការ​វិនិយោគ​នៅ​លើ​តំបន់ OCA នេះ គឺ​ទាំង​ភាគី​កម្ពុជា និង​ភាគី​ថៃ ត្រូវ​បែង​ចែង​ឲ្យ​ដាច់​រវាង​នយោបាយ និង​ការ​រក​ស៊ី​ជាមួយ​គ្នា៕

ចូល​រួម​ផ្តល់​យោបល់​តាម​រយៈ soprach.tong@phnompenhpost.com

0

Comments

Please, login or register to post a comment