Search form

Login - Register | FOLLOW US ON

Logo of Phnom Penh Post newspaper Phnom Penh Post - ការ​ធ្វើ​អន្តរាគមន៍​ការ​លើក​កម្ពស់​តម្លៃ​ស្ត្រី​នៅ​តែ​មាន​ការ​រើសអើង

សមត្ថកិច្ច​ចាប់​សែង​ស្ត្រី​បឹងកក់​ដូច​ជ្រូក​ពេល​តវ៉ា​ការពារ​ផ្ទះ​ខ្លួនឯង​កន្លង​មក​។
សមត្ថកិច្ច​ចាប់​សែង​ស្ត្រី​បឹងកក់​ដូច​ជ្រូក​ពេល​តវ៉ា​ការពារ​ផ្ទះ​ខ្លួនឯង​កន្លង​មក​។ រូបថត អង្គការ​សិទ្ធិ​លំនៅឋាន

ការ​ធ្វើ​អន្តរាគមន៍​ការ​លើក​កម្ពស់​តម្លៃ​ស្ត្រី​នៅ​តែ​មាន​ការ​រើសអើង

ស្រុក​ខ្មែរ​សម្បូរ​ទៅ​ដោយ​រឿង​ប្លែកៗ​ផ្អើល​តាម​គ្នា​នូវ​អ្វី​​ដែល​​មើល​ឃើញ​​ ផ្អើល​ចេញ​ពី​មាត់​មួយ​ទៅ​មាត់​មួយ​ ខ្លះ​ទៀត​ផ្អើល​ទៅ​តាម​លក្ខណៈ​នយោបាយ​អ្នក​ល្បីៗ​ តារាៗ​និង​អ្នក​មានៗ តែ​សម្រាប់​ប្រជាពលរដ្ឋ​សាមញ្ញ និង​អ្នក​ក្រ​វិញ​ បើ​ទោះបី​ជា​ មាន​ទុក្ខ​លំបាក​វេទនា​តោកយ៉ាក​យ៉ាង​ណា​ ក៏​គេ​មើល​មិន​ឃើញ​ដែរ​។ រីឯ​ករណី ឬ​ក៏​បញ្ហា​ដែល​កើត​មាន​​ឡើង​ហើយ​តែ​មើល​មិន​ឃើញ​វិញ​ គឺ​នៅ​ស្ងាត់ស្ងៀម​ហើយ​នៅ​តែ​មិន​ដឹង​មិនឮ​ដដែល​។

នេះ​ជា​បញ្ហា​គម្លាត​នៃ​ការ​រស់នៅ​ និង​ការ​បែងចែក​វណ្ណៈ​នៅក្នុង​សង្គម​ខ្មែរ​សម័យ​បច្ចុប្បន្ន​កាន់តែ​ធំ​ទៅៗ​។

ដូចជា​ករណី​អំពើ​ហិង្សា​មក​លើ​កញ្ញា​ សាសា ពិធីការិនី​ទូរស្សន៍​ CTN ​គ្រាន់តែ​រូបភាព​ផ្ទុះ​អំពើ​ហិង្សា​មក​លើ​កញ្ញា​ សាសា ត្រូវ​បាន​បង្ហោះ​វីដេអូ​គ្លីប​នៅលើ​ហ្វេសប៊ុក និង​សារព័ត៌មាន​ភ្លាម​ទៅ​ដល់​ទី​ណា​ក៏​គេ​និយាយ​អំពី​ករណី​ សាសា ​​ដែរ​គឺ​មើល​ទៅ​អាក្រក់​មើល​ណាស់​ស្នាម​ឡើង​ជាំ​មុខ​ដៃ​ជើង​ទៀត​។ ហេតុ​តែ​គាត់​ជា​តារា​ គឺ​មាន​គេ​ជួយ​ឈឺឆ្អាល​ច្រើន ​និង​​គាំទ្រ​សព្វ​គ្រប់​ហាក់បី​ដូចជា​ដណ្តើម​​គ្នា​យក​មុខ​យក​មាត់​អ៊ីចឹង​មាន​តាំងពី​អង្គការ​ខ្លះ​ចេញ​មក​ជួយ​តាម​ផ្លូវ​ច្បាប់​រៀបចំ​ដាក់​ពាក្យ​បណ្តឹង​ប្រឆាំង​នឹង​ឧកញ៉ា សុខ ប៊ុន បើ​ទោះបី​ជា សុខ ប៊ុន ហ៊ាន​សង​ជំងឺ​ចិត្ត​ដល់​ទៅ ១០ ម៉ឺន​ដុល្លារ​ដើម្បី​​បញ្ចប់​រឿង​ក៏ដោយ​។ តែ​មិន​បាន​តាម​សំណើ​ទទួល​ប្រាក់​​នោះ​ទេ ​មាន​តែ​ដាក់​បន្ទុក​បន្ថែម​មាន​តាំងពី​​ថ្នាក់ដឹកនាំ​លោក​ឧបនាយក​រដ្ឋមន្ត្រី ស ខេង និង​លោក​នាយករដ្ឋមន្ត្រី ហ៊ុន សែន ​ទៀត​ផង​ទីបំផុត​ឧកញ៉ា សុខ ប៊ុន ត្រូវ​បាន​ចាប់​ខ្លួន​។​ ករណី​ហិង្សា​លើ​ សាសា ​ធ្វើឲ្យ​ឡើង​កម្តៅ​មួយ​ល្អ​ដែរ​ដែល​ធ្វើឲ្យ​មហាជន​រិះគន់​តាម​បណ្តាញ​​សង្គម​ក៏​បាន​ធ្ពក់​យក​ទណ្ឌិត ឈូក បណ្ឌិត ដែល​ខំ​លាក់​ខ្លួន​មក​ឃុំ​កាលពី​ចុង​សប្តាហ៍​កន្លង​ទៅ​នេះ។

តែ​ការ​ប្រើ​ហិង្សា​លើ​រូបរាង​កាយ​កញ្ញា​ សាសា ​បាន​តែ​ជាង​មួយ​សប្តាហ៍​ឃើញ​ថា​ ជា​សះស្បើយ​តែ​នៅ​របួស​ផ្លូវចិត្ត​មើល​ទៅ​ហាក់បី​ដូចជា​រាង​ស្រាល​ ជាង​ស្រ្តី​រងគ្រោះ​ជា​ទម្ងន់​ផ្សេងៗ​ទៀត​បើ​ធ្វើការ​ប្រៀបធៀប​ជាមួយ​នឹង​ករណី​ហិង្សា​មក​លើ​ស្ត្រី​ធ្ងន់ធ្ងរ​។

ដូចជា​ការ​ឈឺចាប់​ផ្លូវចិត្ត​ឥត​ឧបមា​នៅពេល​ដែល​ដី​ស្រែ ឬ​ក៏​ផ្ទះ​សម្បែង​របស់​ខ្លួន​ត្រូវ​បាន​គេ​រឹបអូស​យក​ទៅ​កាន់កាប់​បាត់​ហើយ​មក​​ធ្វើការ​តវ៉ា​នៅ​មុខ​ផ្ទះ​នាយករដ្ឋមន្ត្រី ហ៊ុន សែន នៅ​មុខ​រដ្ឋសភា នៅ​មុខ​ទីស្តីការ​គណៈរដ្ឋមន្ត្រី​ឲ្យ​រាល់​តែ​ថ្ងៃ​លួស​ថ្ងៃ​តិច​ណាស់​ដែល​មិន​មាន​វត្តមាន​ពួកគាត់​ទៀត​គឺ​ប្រៀប​ដូច​សត្វ​ឆ្មា​មក​ចាំ​នៅ​ជើង​ក្រាន​បាយ ​ចាំ​ទារ​យក​អាវ​ដែល​ផ្ញើ​ក្នុង​ជើង​ក្រាន​មក​ពាក់​វិញ​អ៊ីចឹង​។​ ជាពិសេស​ស្ត្រីៗ​អ្នក​ភូមិ​បឹងកក់​មក​តវ៉ា​ការពារ​ដី​របស់​ពួកគាត់​គឺ​ត្រូវ​អាជ្ញាធរ​រាជធានី​ភ្នំពេញ​ធ្វើ​ទុក្ខ​បុកម្នេញ​មាន​ទាំង​វ៉ៃដំ​ច្រំធាក់​ រលូត​កូន​ បែក​ក្បាល​ហូរ​ឈាម ជាប់​គុក​អស់​រយៈពេល​ជិត​ ១០ ឆ្នាំ​ទៅ​ហើយ​ទម្រាំ​តែ​បាន​ប្លង់ដី​បណ្តើរៗ​។

​ដូច​គ្នា​នេះ​ស្រ្តី​ដែល​ធ្វើ​ដំណើរ​ពី​ខេត្ត​ឆ្ងាយៗ​ក៏​មក​វេទនា​តវ៉ា​រឿង​បាត់បង់​ដីធ្លី​ព្រម​ទាំង​ផ្ទះ​សម្បែង​របស់​គាត់​ដែល​ត្រូវ​បាន​គេ​រំលោភ​យក​ទៅ​បាត់​។​ នេះ​គឺជា​រឿង​សោកសៅ​មួយ​ដែល​​របួស​ឈឺចាប់​ក្នុង​មួយ​ជីវិត​​មិនអាច​បំភ្លេច​បាន​ទេ​អាជ្ញាធរ​​ពេល​ខ្លះ​មិន​ត្រឹម​តែ​មិន​ជួយ​រក​ដំណោះស្រាយ​ទេ​គឺ​មាន​តែ​​វាយដំ​ថែម​លើ​ស្ត្រី​ដែល​​ធ្វើ​បាតុកម្ម​នោះ​ទៀត​ឈឺចាប់​ទាំង​ផ្លូវកាយ និង​ផ្លូវចិត្ត​ជាង​កញ្ញា​ សាសា ​ទៅ​ទៀត​តែ​បែរ​ជា​គ្មាន​ដំណោះស្រាយ​គេ​មើល​មិន​ឃើញ​​។

ម្យ៉ាងវិញ​ទៀត​ស្ត្រី​ដែល​ត្រូវ​បាន​គេ​រំលោភ​សេពសន្ថវៈ​ និង​រំលោភ​បូក​ដែល​កើត​មាន​ឡើង​ជា​រៀង​រាល់​ថ្ងៃ​ដូច​កាលពី​ខែ​មុន​នេះ​មាន​ការ​រំលោភ​បូក​គ្នា ៦ នាក់​មកលើ​ស្រ្តី​បម្រើ​សេវា​កម្សាន្ត​ហើយ​សម្លាប់​ចោល​ទៀត​នៅ​ខណ្ឌ​សែនសុខ រាជធានី​ភ្នំពេញ។ រីឯ ​ករណី​បាញ់​សម្លាប់​ឆៅ​លើ​ស្ត្រី​បម្រើ​កម្សាន្ត​សង​ជា​សំណង​បន្តិចបន្តួច​ពេល​ខ្លះ​ឃាតករ​រត់​រួច​បាត់​ទៀត​ដែល​នេះ​​ជា​ករណី​ដែល​សាហាវៗ​ជាង​ករណី​ សាសា ​​​ទៅ​ទៀត​ដែល​រដ្ឋាភិបាល​គួរតែ​មាន​ចំណាត់​ការ​ឲ្យ​បាន​ខ្លាំងក្លា​។

បញ្ហា​ផ្ទុះ​កំហឹង​ហិង្សា​មក​លើ​ស្ត្រី​ក៏​ចេះ​តែ​បន្ត​រាលដាល​ដល់​ការ​ប្រើ​ភាសា​ជា​សាធារណៈ​របស់​លោក​នាយក​រដ្ឋមន្រ្តី​ ហ៊ុន សែន ​កាលពី​សប្តាហ៍​មុន​នេះ​គឺ​ការ​ប្រើ​ពាក្យ​​អសុរោះ​មក​លើ​ស្រ្តី​ដែល​ជា​បាតុករ​ទាមទារ​រក​យុត្តិធម៌​នៃ​លទ្ធផល​ការ​បោះឆ្នោត​ជាតិ​កាលពី​ខែ​កក្កដា​ឆ្នាំ​ ២០១៣ ដោយ​ប្រើ​ពាក្យ​ថា​៖ ​«មីស្រី»​។ ពាក្យ​នេះ​ត្រូវ​បាន​អង្គការ​លើក​កម្ពស់​ស្ត្រី​ចំនួន​ ១២ ​អង្គការ​ចេញ​សេចក្តី​ថ្លែងការ​ប្រឆាំង​នឹង​ភាសា​របស់​លោក​នាយក​រដ្ឋមន្ត្រី​ថា​ជា​ការ​ប្រមាថ​​លើ​ស្ត្រី។ ​

ដោយ​ផ្អែក​ទៅលើ​និយមន័យ និង​ទ្រឹស្តី​ទូទៅ​នៃ​ទម្រង់​នៃ​អំពើ​ហិង្សា​ផ្នែក​យេនឌ័រ​ (បុរស ឬ​ក៏​ស្ត្រី) ​គឺ​រួម​ទាំង​ហិង្សា​លើ​រូបរាង​កាយ​លើ​ផ្លូវភេទ លើ​ផ្លូវ​ចិត្ត​ (ជេ​ប្រមាថ) ​ព្រម​ទាំង​​ហិង្សា​ផ្នែក​សេដ្ឋកិច្ច​ក៏​ស្រាប់តែ​ភ្លាម​នោះ​ក្រសួង​កិច្ចការ​នារី​ក៏​បាន​ចេញ​សេចក្តី​ថ្លែងការណ៍​មួយ​ដើម្បី​គាំទ្រ​ទៅ​នឹង​ពាក្យ​សម្តី​របស់​លោក​នាយក​រដ្ឋមន្រ្តី​ថា​លោកប្រើ​ពាក្យ​ «មីស្រី» ​​នោះ​គឺ​សំដៅ​ទៅលើ​ស្ត្រី​តែ​ម្នាក់​ដែល​បាន​ធ្វើ​បាតុកម្ម​នោះ​ទេ​មិន​ធ្វើឲ្យ​ប៉ះពាល់​ទៅ​នឹង​ស្ត្រី​ខ្មែរ​ទូទៅ​នោះ​ទេ​។

ការ​ដែល​លើក​ចំណុច​នេះ​មក​បកស្រាយ​របស់​ក្រសួង​កិច្ចការ​នារី​នោះ​ហាក់បី​ដូចជា​ផ្ទុយ​ទៅ​នឹង​ទ្រឹស្តី និង​ច្បាប់​ដែល​មិន​បាន​បញ្ជាក់​លើ​ស្ត្រី​រូប​ណា​នោះ​ទេ​គឺ​សំដៅ​គ្រប់​ស្ត្រី​ទូទៅ​មិន​មាន​ចែង​ថា​ស្ត្រី​ណា​ម្នាក់​នោះ​ទេ។​ អ៊ីចឹង​សេចក្តី​ថ្លែងការណ៍​ធ្វើ​ប្រាស​ចាក​ទៅ​នឹង​កិច្ចការ​ដែល​ខ្លួន​កំពុងតែ​ធ្វើ​ដើម្បី​លើក​កម្ពស់​ស្ត្រី​តែ​ដោយ​តែ​ហេតុផល​គំនាប​នយោបាយ​ធ្វើឲ្យ​ស្ត្រី​ខ្លួនឯង​អាប់ឱន​កិត្តិយស​ទៅវិញ​ទាំង​នៅក្នុង​ស្រុក និង​នៅ​លើ​ឆាក​អន្តរជាតិ​ដូច​ដែល​ក្រសួង​កិច្ចការ​នារី​តែងតែ​ប្តេជ្ញា​ចិត្ត​ក្នុង​ការ​លុប​បំបាត់​រាល់​ការ​រើសអើង​ប្រឆាំង​នឹង​ស្ត្រី (CEDAW) នៅ​ក្រុង​ប៉េកាំង​ (Beijing +20) ហើយ​ជាង​នេះ​ទៅ​ទៀត​លោក​ ហ៊ុន សែន ​ផ្ទាល់​បាន​ផ្ញើ​សារ​លិខិត​គាំទ្រ​ផែនការ​សកម្មភាព​ស្តី​ពី​ការ​ទប់ស្កាត់​អំពើ​ហិង្សា​លើ​ស្រ្តី​ឆ្នាំ ២០១៤-២០១៨។

សរុប​មក​វិញ​បើ​រដ្ឋាភិបាល​ក៏​ដូចជា​ក្រសួង​កិច្ចការ​នារី​បើ​នៅ​តែ​គាំទ្រ​ពាក្យ​សម្តី​ជេរ​ប្រមាថ​ស្ត្រី​ និង​រើសអើង​ស្ត្រី​​ផ្នែក​នយោបាយ​​បែប​នេះ​ទៀត​គឺ​រាល់​របាយការណ៍​​ស្ដីពី​ការ​រីកចម្រើន​នៃ​ការ​លុបបំបាត់​ការ​រើសអើង​ប្រឆាំង​នឹង​ស្ត្រី​នៅ​កម្ពុជា​គឺជា​របាយការណ៍​ភូតកុហក​។ ព្រោះ​ស្ថាប័ន​ខ្លួន​ក៏​កំពុង​​តែ​គាំទ្រ​ការ​ប្រើ​ពាក្យ​ជេរ​ប្រមាថ​បែប​ហិង្សា​លើ​ស្រ្តី​ខ្លួន​ដែរ​ភាសា​សាមញ្ញ​ថា​លាង​គូទ​ខ្លួនឯង​មិន​​ទាំង​ជ្រះ​ផង​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ