Search form

Login - Register | FOLLOW US ON

Logo of Phnom Penh Post newspaper Phnom Penh Post - ខំ​ពង្រឹង​តែ​សេវា​សុខាភិបាល​មូលដ្ឋាន​ឲ្យ​ល្អ ​តែ​សេវា​មន្ទីរពេទ្យ​ជាតិ​ បែរ​ជា​ព្រងើយ​កន្តើយ

Content image - Phnom Penh Post
អ្នក​ជំងឺ​កំពុង​សម្រាក​ព្យាបាល​នៅ​មន្ទីរពេទ្យ​រដ្ឋ​កន្លង​មក​។ ហុង មិនា

ខំ​ពង្រឹង​តែ​សេវា​សុខាភិបាល​មូលដ្ឋាន​ឲ្យ​ល្អ ​តែ​សេវា​មន្ទីរពេទ្យ​ជាតិ​ បែរ​ជា​ព្រងើយ​កន្តើយ

ខណៈ​ដែល​ថ្នាក់ដឹកនាំ​តាម​ក្រសួង​ស្ថាប័ន ស្ថាប័ន មន្ទីរ នីមួយៗ​រវល់​តែ​ចុះ​មូលដ្ឋាន​ដើម្បី​ឃោសនា​ឲ្យ​គណបក្ស​សម្រាប់​ការ​បោះឆ្នោត​ឃុំ សង្កាត់​កាលពី​សប្តាហ៍​មុន​នេះ រីឯ​មន្ត្រីៗ​សាមញ្ញ​ធម្មតា​កំពុង​តែ​ធ្វើការ​ក៏​ឆ្លៀត​គេចវេះ​ម៉ោង​ធ្វើការ​ដែរ​ហើយ​ស្ថាប័ន​ខ្លះ​ការ​ឈប់​នៅ​ម៉ោង​រដ្ឋបាល​ប៉ះពាល់​តែ​ប្រព័ន្ធ​ការងារ​អាច​មាន​ការ​យឺតយ៉ាវ​។

តែ​ដោយ​ឡែក​ប្រព័ន្ធ​សុខាភិបាល​មាន​លក្ខណៈ​ខុស​ប្លែក​ពី​គេ​បើ​ទោះបី​ជា​រាជរដ្ឋាភិបាល​ខំ​ដំឡើង​ប្រាក់​ខែ​ជូន​គ្រូពេទ្យ​ក៏ដោយ ប្រសិន​បើ​គ្រូពេទ្យ​អវត្តមាន​មិន​មក​ប្រចាំការ​វិញ​ធ្វើឲ្យ​ប៉ះពាល់​ទៅ​នឹង​អាយុជីវិត​របស់​អ្នក​ជំងឺ​ ឬ​ក៏​អតិថិជន​។

ដូច​ករណី​​ទី​ ១ ស្ត្រី និង​ទារក​បាន​មក​ឆ្លងទន្លេ​ស្លាប់​ទាំង​ម្តាយ​ស្លាប់​ទាំង​កូន​នៅ​មន្ទីរពេទ្យ​ជាតិ​គាំពារ​មាតា​ និង​ទារក​ហៅ​កាត់​ថា​ «​ពេទ្យ​ជប៉ុន​» និង​ករណី​ទី ២ ​គឺ​ឆ្លង​ទន្លេ​ដូច​គ្នា​ស្លាប់​តែ​ម្តាយ​ទេ​តែ​កូន​កើត​រស់នៅ​មន្ទីរពេទ្យ​ជាតិ​កាល់ម៉ែត​។

មក​ទល់​ពេល​នេះ​ករណី​ទាំង​ពីរ​នេះ​មិន​ទាន់​មាន​សេចក្តី​ថ្លែងការណ៍​ណា​មួយ​ចេញ​ពី​សាមី​ក្រសួង ឬ​ក៏​មន្ទីរពេទ្យ​ជាតិ​ទាំង​ ២ ​នេះ​បកស្រាយ​តាម​លក្ខណៈ​បច្ចេកទេស​វិទ្យាសាស្ត្រ​សុខាភិបាល​ជា​ផ្លូវការ​នៅ​ឡើយ​ទេ បើ​ទោះ​បី​ជា​មាន​ការ​ទទូច​ពី​ក្រុម​គ្រួសារ​ជនរងគ្រោះ​ដែល​ជា​ស្វាមី​ក៏ដោយ​ដែល​ជា​ហេតុ​ធ្វើ​ឲ្យ​មាន​ការ​ចោទប្រកាន់​ពី​ស្វាមី​របស់​ជនរងគ្រោះ​តាម​សារព័ត៌មាន​ថា​មាន​ការ​លាក់បាំង និង​ការ​មិន​យក​ចិត្ត​ទុកដាក់​របស់​សេវា​មន្ទីរពេទ្យ​ជាតិ​ទាំង​ ២ ​នេះ​ដូច​ដែល​បាន​រៀបរាប់​ថា​អត់​គ្រូពេទ្យ​ជំនាញ​ប្រចាំការ​នៅ​សល់​តែ​គ្រូពេទ្យ​ហាត់​ការ​ក្មេងៗ​នាំ​គ្នា​រត់​ចែក​ជើង​គ្នា​ព្រាត​ដោយ​មិន​មាន​អ្នក​ទទួល​ខុស​ត្រូវ​ទេ​។

ប្រសិន​បើ​ដូច​ករណី​ដែល​ស្វាមី​របស់​ជនរងគ្រោះ​បាន​រៀបរាប់​ប្រាប់​សារព័ត៌មាន​មែន​វា​ជា​រឿង​គួរ​ឲ្យ​ខ្មាសអៀន​ណាស់​គឺ​ ទី​ ១) គ្រូពេទ្យ​ដែល​កំពុង​តែ​អនុវត្ត​ជាក់ស្តែង​សម្រាល​កូន​នោះ​បាន​រត់​ចែក​ជើង​គ្នា ផ្ទុយ​ទៅ​នឹង​អនុក្រឹត្យ​ស្តីពី​ក្រម​សីលធម៌​គ្រូពេទ្យ​មាត្រា​ ៥ «​គ្រូពេទ្យ​មិន​ត្រូវ​បោះបង់​ឥស្សរភាព​វិជ្ជាជីវៈ​របស់​ខ្លួន​ដាច់ខាត​ទោះ​ស្ថិត​នៅ​ក្រោម​រូបភាព​ណា​ក៏ដោយ​»​។

មាន​ន័យ​ថា​គ្រូពេទ្យ​ត្រូវ​ទទួល​ខុស​ត្រូវ​រហូត​ដល់​ដង្ហើម​ចុង​ក្រោយ​សែង​សាកសព​ចេញ​ពី​មន្ទីរពេទ្យ​។ មិនមែន​អ្នក​ជំងឺ​មិន​ទាន់​ស្លាប់​ផង​នាំ​គ្នា​ឈូឆរ​ពេញ​ពី​មន្ទីរពេទ្យ ហើយ​ពេល​ស្លាប់​នាំ​គ្នា​រត់​ចែក​ជើង​គ្នា​ដាក់​មេប្រូច​រៀងៗ​ខ្លួន​គ្មាន​នរណា​ទទួល​ខុសត្រូវ​ហើយ​ក៏​គ្មាន​មេ​កើយ​ទទួល​បន្ទុក​វេន​យាម​នោះ​ដែរ ហើយ​ក៏​មិនមែន​មាន​ន័យ​ថា​ឈ្មោះ​ខ្លួន​ជា​មន្ត្រី​នៅ​មន្ទីរពេទ្យ​មិន​មក​ធ្វើការ​ហើយ​រួច​ខ្លួន​នោះ​ទេ​វា​ក៏​អយុត្តិធម៌​សម្រាប់​អ្នក​មក​ធ្វើការ​ផង​ដែរ​។

ទី​ ២) គឺ​របៀប​ធ្វើ​ប្រព័ន្ធ​បញ្ជូន​អ្នក​ជំងឺ​គ្រប់​គ្រូពេទ្យ​នៅ​មន្ទីរពេទ្យ​ជាតិ​សុទ្ធ​តែ​ជា​គ្រូ​បង្គោល​រឿង​ការ​ធ្វើ​ប្រព័ន្ធ​បញ្ជូន​នៅ​ពេល​អ្នក​ជំងឺ​ឈឺ​ធ្ងន់​ហួស​សមត្ថភាព​នៅ​សេវា​សុខាភិបាល​មូលដ្ឋាន​របស់​ខ្លួន​ត្រូវ​តែ​បញ្ជូន​ទៅ​កន្លែង​ដែល​មាន​សុវត្ថិភាព​ជាង​។ ដូច​ករណី​នៅ​មន្ទីរពេទ្យ​ជប៉ុន​គឺ​ត្រូវ​បញ្ជូន​អ្នក​ជំងឺ​ចូល​សង្គ្រោះ​បន្ទាន់​ភ្លាម​ទៅ​ខាង​មុខ​មន្ទីរពេទ្យ​ធំ​ខាង​ក្រោយ​មន្ទីរពេទ្យ​កាល់ម៉ែត​ដែល​មាន​ឧបករណ៍​សង្គ្រោះ​បន្ទាន់​គ្រប់គ្រាន់​អាច​ជួយ​សង្គ្រោះ​បាន​ទាំង​ម្តាយ និង​ទារក​។

តែ​រឿង​ដែល​ហួស​ចិត្ត​នោះ​គឺ​ ករណី​ទី​ ២ អ្នក​ជំងឺ​នៅ​ក្នុង​មន្ទីរពេទ្យ​កាល់ម៉ែត​ហើយ​គ្រាន់តែ​ដាក់​ប្រង់​ការ​សែង​ចេញ​មក​អគារ​សង្គ្រោះ​បន្ទាន់​ក៏​ជួយ​បាន​ដែរ ឬ​ក៏​គ្រូពេទ្យ​ធំៗ​មិន​នៅ​ប្រចាំការ​ដោយ​សារ​អ្នកជំងឺ​ទាំង​ ២ ​គ្រួសារ​ដែល​បាន​ស្លាប់​ហ្នឹង​ក្រីក្រ​ពេក​? តើ​ឲ្យ​មាន​ជំនឿ​ទៅ​លើ​មន្ទីរពេទ្យ​រដ្ឋ​យ៉ាង​ម៉េច​បើ​មក​ដល់​ពេទ្យ​កាល់ម៉ែត​គ្រាន់​តែ​រឿង​សម្រាល​កូន​សោះ​មក​ដល់​កន្លែង​សុវត្ថិភាព​ហើយ​ឲ្យ​ស្លាប់​ម្តាយ​បាន​ទៀត​? ឬ​មួយ​ក៏​គ្រូពេទ្យ​គិត​ថា ការ​ស្លាប់​របស់​ម្តាយ និង​ទារក​ហ្នឹង​យូរៗ​ម្តង​មាន​តែ​បញ្ហា​អ្វី បើ​ពី​មុន​ស្លាប់​ច្រើន​ជាង​ហ្នឹង​ទៅ​ទៀត​ឯណោះ​?

តាម​ពិត​ទៅ​ក្រសួង​សុខាភិបាល​បាន​ធ្វើ​កំណែ​ទម្រង់​ប្រព័ន្ធ​សុខាភិបាល​បាន​ល្អ​ច្រើន​គួរសម​ដែរ តាំង​ពី​ប្រព័ន្ធ​បញ្ជូន​អ្នក​ជំងឺ តាំង​ពី​ប្រព័ន្ធ​តាមដាន​អ្នក​ជំងឺ​សម្ភារ​បរិក្ខារ​ពេទ្យ ព័ត៌មាន​សុខាភិបាល​ជាពិសេស​ពង្រឹង​នូវ​ប្រព័ន្ធ​សេវា​សុខាភិបាល​មូលដ្ឋាន និង​ការ​លុប​បំបាត់​ឆ្មប​បុរាណ​ផង​ដែរ​បាន​ធ្វើឲ្យ​ទិន្នន័យ​អត្រា​មរណៈ​មាតា (MMR) ​មាន​ការ​ធ្លាក់​ចុះ​គួរ​ឲ្យ​កត់សម្គាល់​ពី ៤៧២ ​នាក់​ក្នុង​ចំណោម​កុមារ​កើត​រស់​ ១០ ​ម៉ឺន​នាក់​នៅ​ឆ្នាំ ២០០៥ មក​ត្រឹម ១៧០ នាក់​ក្នុង​ចំណោម​កុមារ​កើត​រស់​ ១០ ​ម៉ឺន​នាក់​នៅ​ឆ្នាំ​ ២០១៤​។

តែ​អ្វី​ដែល​ជា​ឆ្អឹង​ទទឹង​ក​គឺ​គ្រូពេទ្យ​យក​ម៉ោង​រដ្ឋ​ទៅ​បម្រើ​សេវា​ឯកជន​ហ្នឹង​ហើយ​ដែល​ជា​ចំណុច​ធ្វើឲ្យ​ប៉ះពាល់​ប្រព័ន្ធ​សុខាភិបាល​ទាំង​មូល​តែ​ម្តង​ដែល​ជា​រឿយៗ​ថ្នាក់​ដឹកនាំ និង​មន្ត្រី​ជាន់​ខ្ពស់​នៃ​ក្រសួង​សុខាភិបាល​តែងតែ​លើក​ឡើង​ពី​គ្រូពេទ្យ​មិន​មក​ធ្វើការ​នៅ​មន្ទីរពេទ្យ ឬ​សេវា​សុខាភិបាល​មូលដ្ឋាន ឬ​ក៏​មិន​នៅ​ប្រចាំការ​នៅ​កន្លែង​រដ្ឋ​តែ​បែរ​ជា​ទៅធ្វើ​​ប្រចាំការ​នៅ​គ្លីនិក​របស់​ខ្លួនឯង ឬ​ក៏​នៅ​គ្លីនិក​ឯកជន​ផ្សេង​តែ​ស៊ី​ប្រាក់​ខែ​រដ្ឋ​នៅ​ដដែល​ថា​គ្រូពេទ្យ​ទាំង​នោះ​ត្រូវ​តែ​ចែក​ឲ្យ​ដាច់​ទៅ​រវាង​ថា តើ​បម្រើការ​សេវា​រដ្ឋ ឬ​ក៏​សេវា​ឯកជន​។

បើ​គ្រូពេទ្យ​យក​ម៉ោង​រដ្ឋ​ទៅ​បម្រើ​សេវា​ឯកជន​សូម​លាលែង​ពី​មន្ត្រី​រាជការ​ទៅ​ធ្វើ​ការងារ​ឯកជន​ទាំង​ស្រុង​ទៅ​ទុក​ឲ្យ​មន្ត្រី​ជំនាន់​ក្រោយ​ទៀត​គេ​មក​ធ្វើការ​ជំនួស​វិញ​។ កុំ​យក​ឈ្មោះ​ខ្លួនឯង​សុទ្ធ​តែ​ធ្វើការ​នៅ​មន្ទីរពេទ្យ​នេះ​មន្ទីរពេទ្យ​នោះ​តែ​ទៅ​បើក​សេវា​ឯកជន​ខ្លួន​ឯង​សោះ​ ១ ​ខែ​ ១ ​ខួប​ពេល​ធ្វើ​ជំរឿន​មន្ត្រី​បាន​នាំ​គ្នា​ផ្អើល​មក​ចូល​កន្លែង​រដ្ឋ​ទាន់​ពេល​ធ្វើការ​។ ខ្លះ​ទៀត​បាន​ឈរ​ថតរូប​ជាមួយ​រដ្ឋមន្ត្រី​​ ឬ​ក៏​ថ្នាក់​ដឹកនាំ​សុខាភិបាល​យក​មក​តាំង​នៅ​ក្នុង​គ្លីនិក​របស់​ខ្លួន​ដើម្បី​ឲ្យ​អតិថិជន​ជឿជាក់​។

នៅ​ប្រទេស​ជិត​យើង​នៅ​តំបន់​អាស៊ាន គេ​នាំ​គ្នា​បែងចែក​ដាច់​ចង់​អស់​ហើយ​រវាង​មន្ត្រី​បម្រើ​សេវា​រដ្ឋ និង​បម្រើ​សេវា​ឯកជន​នោះ​។ អ៊ីចឹង​ហើយ​បាន​ជា​គ្រូពេទ្យ​ដែល​ចូលចិត្ត​លួច​ម៉ោង​រដ្ឋ​ទៅ​ធ្វើការ​ឯកជន​នោះ​មិន​សប្បាយ​ចិត្ត​ទេ​នៅ​ពេល​ក្រសួង​សុខាភិបាល​ធ្វើ​កំណែទម្រង់​វិមជ្ឈការ និង​វិសហមជ្ឈការ (D&D) មក​រដ្ឋបាល​ថ្នាក់​ក្រោម​ជាតិ​នោះ​។

ដើម្បី​ឲ្យ​មាន​តម្លាភាព​សាមី​ក្រសួង ឬ​ក៏​មន្ទីរពេទ្យ​គួរ​តែ​ចេញ​សេចក្តី​ថ្លែងការណ៍​តាម​លក្ខណៈ​បច្ចេកទេស​ពេទ្យ និង​ការ​ទទួល​ខុស​ត្រូវ​ចំពោះ​ជនរងគ្រោះ និង​មហាជន​ណា​មួយ​កុំ​ឲ្យ​ខូច​ឈ្មោះ​ប្រទេស​ជប៉ុន​ដែល​ផ្តល់​ជំនួយ​ដល់​មន្ទីរពេទ្យ​ជប៉ុន​ទៀត មិន​គួរ​បន្ត​ឲ្យ​កើត​មាន​ទៀត​ទេ​ការ​ស្លាប់​ម្តាយ​ និង​ទារក​ពេល​សម្រាល​នេះ​ក៏​មិនមែន​ជា​លើក​ទី​ ១ ​ទេ​នៅ​មន្ទីរពេទ្យ​ជប៉ុន​ និង​កាល់ម៉ែត​នេះ​។

ក្រសួង​គួរ​តែ​ចុះ​វាយតម្លៃ​នូវ​ការ​បម្រើ​សេវា​សុខាភិបាល​នៅ​មន្ទីរពេទ្យ​ជាតិ​ទាំង​ ២ ​នេះ​ថា​តើ​ការ​ស្លាប់​ម្តាយ និង​ទារក​នេះ​មកពី​ជំងឺ ឬ​ក៏​មកពី​គ្រូពេទ្យ​រើសអើង​អ្នក​ជំងឺ​ក្រីក្រ​? វេន​គ្រូពេទ្យ​ណា​ជា​អ្នក​ទទួល​ខុសត្រូវ​វេន​យាម​នៅ​ថ្ងៃ​កើត​ហេតុ សូម​សើរើ​ឡើង​វិញ​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ