Search form

Login - Register | FOLLOW US ON

Logo of Phnom Penh Post newspaper Phnom Penh Post - គុណ​ភាព​ការ​ប្រឡង​បាក់​ឌុប​ពិត​ជា​បាន​ពង្រឹង

ការ​ត្រួតពិនិត្យ​បេក្ខជន​ប្រឡង​បាក់ឌុប​នៅ​មណ្ឌល​ស៊ីសុវត្ថិ​។
ការ​ត្រួតពិនិត្យ​បេក្ខជន​ប្រឡង​បាក់ឌុប​នៅ​មណ្ឌល​ស៊ីសុវត្ថិ​។ ផា លីណា

គុណ​ភាព​ការ​ប្រឡង​បាក់​ឌុប​ពិត​ជា​បាន​ពង្រឹង

ខ្ញុំ​បាន​តាម​ដាន​ព័ត៌មាន​ស្តីពី​ការ​ប្រឡង​មធ្យម​សិក្សាទុតិយ ភូមិ​ជា​រៀង​រាល់​ឆ្នាំ​យ៉ាង​យក​ចិត្ត​ទុក​ដាក់។ កាល​ពី​ខែ​កក្កដា ឆ្នាំ​២០១១ ខ្ញុំ​សរសេរ​អត្ថបទ​ជា​មតិ​ផ្ទាល់​ខ្លួន​មួយ​ដែល​ចេញ​ផ្សាយ​ដោយ​កាសែត​បរទេស​ក្នុង​ស្រុក​ ដែល​កាល​នោះ​ខ្ញុំ​លើក​ពី​ការ​ខក​បំណង​និង​អស់​សង្ឃឹម​យ៉ាង​ខ្លាំង​ចំពោះ​គុណភាព​នៃ​ការ​ប្រឡង​មធ្យម​សិក្សាទុតិយភូមិ​ ដែល​មាន​ភាព​មិន​ប្រក្រតី​រីករាល​ដាល​ពេញ​ប្រទេស ពាក់ព័ន្ធ​ទៅ​នឹង​ការ​ស៊ី​សំណូក និង​ការ​បើក​ចម្លង​របស់​សិស្ស។

ប៉ុនែ្ត​នៅ​ឆ្នាំ​នេះ​មាន​ការ​ភ្ញាក់​ផ្អើល​មួយ​ដែល​ខ្ញុំ​ពេញ​ចិត្ត នោះ​គឺ​ខ្ញុំ​បាន​ឃើញ​ផ្ទាល់​ភែ្នក​ថា ការ​ប្រឡង​មធ្យម​សិក្សាទុតិយ​ភូមិ​ឆ្នាំ ២០១៤ នេះ គឺ​ពិត​ជា​មាន​ការ​ពង្រឹង​គុណភាព​មួយ​ដែល​គួរឲ្យ​កត់​សម្គាល់។ ការណ៍នេះ​ធ្វើ​ឲ្យ​ខ្ញុំ​មាន​អារម្មណ៍​ថា ក្តី​សង្ឃឹម​របស់​ខ្ញុំ​កាល​ពីបី​ឆ្នាំ​មុន ដែល​ចង់​ឃើញ​ការ​ពង្រឹង​គុណ​ភាព​ប្រឡង​មាន​ភាព​ប្រសើរ​ឡើង ឥឡូវ​វា​ក្លាយ​ជា​ការ​ពិត​ហើយ។

ខ្ញុំបាន​ស្ម័គ្រចិត្ត​ចូលរួម​ក្នុង ការ​សងេ្កត​ការណ៍​ប្រឡង​មធ្យម​សិក្សាទុតិយ​ភូមិ កាលពី​ថ្ងៃទី៤ ៥ ខែ​សីហា ​ឆ្នាំ​២០១៤​ នៅ​មណ្ឌល​ប្រឡង​សាលា​បឋម​សិក្សា​ចតុមុខ ដោយ​ក្នុង​នាមជា​បុគ្គល​ឯកជន។ ការ​សងេ្កត​ការ​ណ៍​នេះ​គឺ​ជា​កិច្ច​ប្រឹង​ប្រែង​របស់​អង្គភាព​ប្រឆាំង​អំពើ​ពុក​រលួយ​ ដោយ​មាន​ការសហ​ការ​យ៉ាង​ជិត​ស្និទ្ធ​ជាមួយ​ក្រសួង​អប់រំ ​យុវជន ​និង​កីឡា។

ខ្ញុំទទួលបាន​ឱកាស​ដ៏កម្រមួយ ដោយ​បាន​ឃើញ​ផ្ទាល់​ភ្នែក​នូវ​គុណ​ភាព​នៃ​ការ​ប្រឡង​មធ្យម​សិក្សាទុតិយ​ភូមិ​ឆ្នាំ​នេះ ដែល​ពី​មុន​មក​ការ​ប្រឡង​នេះ​មាន​ការ​ស៊ី​សំណូក និង​ការ​លួច​បើក​ចម្លង​របស់​សិស្ស អស់​រយៈពេល​មួយ​ទសវត្សរ៍​កន្លង​មក។

ប៉ុន្តែពេលនេះ​សិស្ស​ទាំងអស់​ត្រូវ​បាន​អនុញ្ញាត​ឲ្យ​មាន​តែ​ស្លាប​ប៉ាកកាមួយ ខ្មៅដៃ​មួយ និង​បន្ទាត់​មួយ​តែ​ប៉ុណ្ណោះ នៅ​ក្នុង​បន្ទប់​ប្រឡង។ ទោះជា​យ៉ាងណា ក៏​នៅ​មាន​ភាព​មិន​ប្រក្រតី​មួយ​ចំនួន ដូចជា ការ​ស៊ី​សំណូក​របស់​គ្រូ​ជា​អនុររក្ស​និង​ការ​លួច​ចម្លង​គ្នាទៅ​វិញ​ទៅ​មក​ដែរ។ ម្យ៉ាង​ក៏​មាន ការ​រាយការណ៍​ថា អ្នក​ស្ម័គ្រ​ចិត្ត​សងេ្កត​ការណ៍​បាន​រង​ការ​ចំអក គំរាម​កំហែង​និង​វាយ​ប្រហារ​លើ​រាងកាយ​ពី​យុវសិស្ស​ជា​បេក្ខជន​ខ្លះ​ទៀត​ផង។

តែទោះ​យ៉ាង​ណា​ភាព​មិន​ប្រក្រតី​ទាំង​នេះ​ពុំ​មាន​លក្ខណៈ​ធ្ងន់ធ្ងរ​ទេ។ ដំណើរ​ការ​​នៃការ​ប្រឡង​ឆ្នាំនេះ ​បាន​រៀប​ចំឡើង ​ដោយ​មាន​លក្ខណៈ​ពេញចិត្ត​ នេះបើ​តាម​ប្រសាសន៍​របស់​លោក ហង់ ជួនណារ៉ុន រដ្ឋមន្រ្តី​ក្រសួង​អប់រំ​ យុវជន​ និង​កីឡា ដែល​ថ្លែង​ប្រាប់​ក្រុម​អ្នកសារព៌ត័មាន និង​នៅ​ក្នុង​សេចក្តី​ថ្លែង​ការណ៍ របស់​ក្រសួង​អប់រំ​នៅ​​លើ​គេហទំព័រ​របស់​ខ្លួន ស្តីពី​ដំណើរ​ការ​សំណេរ​ថា បាន​ប្រព្រឹត្ត​ទៅ​ប្រកប​ដោយ​ភាព​រលូន​ល្អ។

បើទោះជា​លទ្ធផលនៃការ​ប្រឡង​ពុំទាន់​បាន​ប្រកាស​ក៏ដោយ ​ក៏​ខ្ញុំមាន​ជំនឿ​ថា ដំណើរការ​នៃ​ការ​ប្រឡង​ឆ្នាំនេះ​ពិតជា​មាន​ភាព​ល្អ​ប្រសើរ ដូច​សេចក្តី​ថ្លែងការណ៍​របស់​ក្រសួង​អប់រំ ​ដូច​ការ​រាយ​ការណ៍​របស់​សារព័ត៌មាន និង​ដូច​អ្វី​ដែល​ខ្ញុំ​បាន​ឃើញ​នៅ​មណ្ឌល​ប្រឡង​ដែល​ខ្ញុំ​បាន​ទៅ សង្កេត​មើល​ដោយ​ផ្ទាល់​ដែរ។

អំពើស៊ី​សំណូក​និង​ការ​លួច​បើក​ចម្លង​នៅក្នុង​ការ​ប្រឡង​មធ្យម​សិក្សាទុតិយ​ភូមិ បាន​ធ្វើ​ឲ្យ​ប្រទេស​កម្ពុជា​បាត់​បង់​ថវិកា​ផ្នែក​សេដ្ឋកិច្ច និង​ប៉ះពាល់​ដល់​សង្គម​ខែ្មរ​អស់​រយៈពេល​មួយ ទសវត្សរ៍​មក​ហើយ។

ខ្ញុំសូមអបអរសាទរ និង​កោត​សរសើរ​យ៉ាង​ខ្លាំង​ដល់​ការ​ដឹក​នាំ​ថ្មី​របស់​ក្រសួង​អប់រំ យុវជន​និង​កីឡា ដែល​បាន​ប្រឹង​ប្រែង​បង្ហាញ​នូវ​ឆន្ទៈ​ ក្នុង​ការ​ដោះ​ស្រាយ​បញ្ហា​ដែល​រីក​រាល​ដាល​នេះ។

កំណែ​ទម្រង់អប់រំ​ថ្មីនេះ មិន​ត្រឹមតែ​បាន​ដោះ​ស្រាយ​បញ្ហា​នូវ​ដំណើរ​ការ​ពិត​ប្រាកដ​នៅ​ក្នុង​ការ​ប្រឡង​មធ្យម​សិក្សាទុតិយ​ភូមិ​នោះ​ទេ ប៉ុ​ន្តែ ថែមជា​សាររំឭក និង​ព្រមាន​ដល់​សិស្ស ​ប្អូន​ប្រុស​ប្អូន​ស្រី​ជំនាន់​ក្រោយៗ​ទៀត ព្រម​ទាំង​មាតាបិតា​ថា ការ​ស៊ី​សំណូក​និង​ការ​បើក​ចម្លង​ក្នុង​ពេល​ប្រឡង គឺ​មិន​ត្រូវ​បាន​អត់ឱន​ទៀត​ឡើយ។ ពួកគេ​ត្រូវ​តែ​ផ្លាស់​ប្តូរ​ផ្នត់​គំនិត​ចាស់​ចោល​ ហើយ​ត្រូវ​ព្យាយាម​សិក្សា​រៀន​សូត្រ​ដោយ​សមត្ថភាព​ខ្លួន។

កំណែ​ទម្រង់​ក្នុង​វិស័យ​អប់រំ​នេះ ​គឺជា​គំរូ​ដ៏ល្អ​មួយ​ក្នុង​ការ​ធានា​ឲ្យ​បាន «យុវជន​ប្រាស​ចាក ​ពី​អំពើ​ពុក​រលួយ» ដែល​ជា​សារៈសំខាន់​បំផុត​ដល់​អនាគត​របស់​ពួកគេ​និង​របស់​ប្រទេសជាតិ៕

វង្ស សុជាតា,នៅ​រាជធានី​ភ្នំពេញ
អ៊ីមែល​: vong.socheata@gmail.com

0

Comments

Please, login or register to post a comment

ព័ត៌មានពាក់ព័ន្ធ