Search form

Login - Register | FOLLOW US ON

Logo of Phnom Penh Post newspaper Phnom Penh Post - គួរ​បញ្ឈប់​ការ​កេង​ប្រវ័ញ្ច​ផ្លូវភេទ និង​នយោបាយ​ពី​ស្ដ្រី​ទៅ!

សៀវភៅ​និពន្ធ​ដោយ​កវី គង្គ ប៊ុនឈឿន ដែល​រៀបរាប់​ពី​ស្ដ្រី​រងគ្រោះ​នៅ​កម្ពុជា។
សៀវភៅ​និពន្ធ​ដោយ​កវី គង្គ ប៊ុនឈឿន ដែល​រៀបរាប់​ពី​ស្ដ្រី​រងគ្រោះ​នៅ​កម្ពុជា។ រូបថត តុង សុប្រាជ្ញ

គួរ​បញ្ឈប់​ការ​កេង​ប្រវ័ញ្ច​ផ្លូវភេទ និង​នយោបាយ​ពី​ស្ដ្រី​ទៅ!

ចាប់​តាំង​ពី​ការ​បញ្ជ្រាប​ទ្រឹស្តី​យេនឌ័រ​ចូល​មក​ប្រទេស​កម្ពុជា​បាន​ជាង​ ២០ ​ឆ្នាំ​ទៅ​ហើយ​នេះ​គឺ​ចង់​ឲ្យ​មាន​សមភាព​រវាង​បុរស​ និង​ស្ត្រី​ក្នុង​គោលដៅ​លុបបំបាត់​ការ​រើសអើង​ប្រឆាំង​ស្ត្រី និង​ការ​កេង​ប្រវ័ញ្ច​ពី​ស្ត្រី​រហូត​ដល់​មាន​ការ​ចេញ​ជា​រូបភាព​នារី​រតនជាតិ និង​ផែនការ​សកម្មភាព​ជាតិ​ស្តីពី​ការ​ទប់ស្កាត់​អំពើ​ហិង្សា​លើ​ស្ត្រី​ជាដើម​។

ចុះ​ហេតុ​អ្វី​បាន​អ្នក​នយោបាយ​មួយ​ចំនួន​នៅ​តែ​ចូលចិត្ត​លេង​ល្បែង​យក​ស្ត្រី​ធ្វើ​ជា​កូន​អុក​នយោបាយ ឬ​ក៏​កេងប្រវ័ញ្ច​ទាំង​ផ្លូវ​កាយ ​ផ្លូវ​ចិត្ត និង​ផ្លូវ​ភេទ​ពី​ស្ត្រី​ដែល​ផ្ទុយ​ទៅ​នឹង​ផែនការ​ជាតិ​ទៅ​វិញ​?

កន្លង​មក​ក៏​ដូចជា​បច្ចុប្បន្ន​នេះ​ដែរ​អស់​លោក​មន្ត្រី​ជាន់​ខ្ពស់​នៃ​រាជរដ្ឋាភិបាល និង​អ្នក​នយោបាយ​មួយ​ចំនួន​ដែល​ងប់​នឹង​ស្រី​ដើម្បី​បម្រើ​តណ្ហា​របស់​ខ្លួន​មិន​ចេះ​ស្កប់ស្កល់​នោះ​គឺ​តែង​ដាក់​សម្ពាធ​លើ​នារី​ភេទ​គ្រប់​ទិសទី​មាន​តាំងពី​ការ​ទិញ​សេវា​ផ្លូវ​ភេទ និង​ការ​ចាប់​បង្ខំ​គ្រប់​រូបភាព​ពោល​គឺ​ឲ្យ​តែ​ខ្លួន​ចង់​បាន​។

ប្រសិន​បើ​ស្ត្រី​ស្អាតៗ ឬ​ក៏​តារាៗ​ណា​ដែល​ខ្លួន​ពេញ​ចិត្ត​ហើយ​គឺ​ត្រូវ​ជា​របស់​ខ្លួន​ហើយ​គេច​មិន​រួច​ទេ​ដែល​ភាសា​សាមញ្ញ​ថា​ស្រី​តាតា (PSI, 2002) តែ​បើ​លោក​ជំទាវៗ​របស់​តាតា​ដឹង​ក៏​មិន​ដឹង​ថា​គេច​ខ្លួន​បែប​ណា​ដែរ​ជួន​កាល​ទៅ​អ្នក​ធំៗ​ស្រឡាញ់​ស្រី​ជាន់​លេខ​រៀង​គ្នា​ជាមួយ​ឧកញ៉ា​ជើង​ខ្លាំង​ហើយ​ក៏​ឈាន​ដល់​យក​កាំភ្លើង​ភ្ជង់​គ្នា​ក៏​មាន​ដែរ​។

រឿង​តាតា​ប្រើ​វិធី​យក​ស្រី​កំណាន់​ទៅ​រួម​ភេទ​នៅ​ក្រៅ​ប្រទេស​ដើម្បី​គេច​ពី​ជំទាវ​គាត់​នោះ​ក៏​មិន​មែន​ជា​វិធីសាស្ត្រ​ថ្មី​នោះ​ទេ​ដែល​តារាៗ​មួយ​ចំនួន​តូច​តែងតែ​យក​លេស​ពេល​ចេញ​ទៅ​ក្រៅ​ម្តងៗ​ថា​ទៅ​មើល​ការ​បើក​ហាង​នៅ​ស្រុក​គេ ឬ​ក៏​ទៅ​យក​ទំនិញ​ពី​ក្រៅ​មក​។ បើ​សិន​ជា​សំណាង​ស្រី​តាៗ​ទាំង​នោះ​បាន​ទទួល​ផល​លាភ​មាន​តាំង​ពី​ឡាន​ទំនើប ​វីឡា និង​បើក​ហាង​ផ្សេង​ក៏​មាន​ដែរ​។

ប៉ុន្តែ​នៅ​ពេល​ដែល​ស៊យ​វិញ​ក៏​មាន​ករណី​ជំទាវ​របស់​តាតា​ដឹង​ខ្លះ​គេច​រួច​ក៏​រួច​ទៅ​ ឯ​អ្នក​មិន​រួច​ក៏​ត្រូវ​បាន​គេ​បាញ់​សម្លាប់ ឬ​ក៏​ឲ្យ​របួស ឬ​ក៏​ជះ​ទឹក​អាស៊ីត​ផង​ដែរ​។ ដូច​ករណី​អ្នកស្រី ពិសិដ្ឋ ពាលិកា កញ្ញា តាត ម៉ារីណា កញ្ញា ពៅ បញ្ញាពេជ្រ និង​កញ្ញា​ ទូច ស្រីនិច​ ជាដើម​សុទ្ធ​តែ​ជា​ជនរងគ្រោះ​ទាំង​ផ្លូវភេទ ទាំង​ពិការភាព​មួយ​ជីវិត និង​មរណភាព​ដោយសារ​ការ​ធ្វើ​ឃាតកម្ម​លើ​ពួក​គាត់​។

ស្ត្រី​ទាំង​នេះ​ត្រូវ​បាន​សពកវី​ដ៏ល្បី​ឈ្មោះ គង្គ ប៊ុនឈឿន បាន​តែង​ជា​សាច់​រឿង​ចងក្រង​ទុក​ទាំងអស់​នៅក្នុង​រឿង​វាសនា​នាង​ម៉ារីណា និង​រឿង​ព្រលឹង​នាយ​រោង​ដែល​រំឭក​ពី​វិញ្ញាណក្ខន្ធ​នាង​ពិសិដ្ឋ ពាលិកា ក្រោយ​ពេល​ស្លាប់​សុទ្ធតែ​បង្ហាញ​ទំនាក់​ទំនង​ស្នេហា​ក្រៅ​រវាង​អ្នក​ធំៗ និង​តារាៗ​។

ដោយសារ​តែ​ការ​និពន្ធ​រឿង​ទាំង​នេះ​ហើយ​ដែល​ធ្វើឲ្យ​លោក គង្គ ប៊ុនឈឿន ត្រូវ​បាន​និរទេស​ខ្លួន​ទៅ​ក្រៅ​ស្រុក​រហូត​ដល់​មរណភាព​នៅ​បរទេស (​ប្រទេស​ន័រវែស​) ព្រោះ​មិន​ហ៊ាន​ចូល​ស្រុក​ដោយសារ​ការ​យាយី​ពី​អាជ្ញាធរ​។

អ្វី​ដែល​លោក​ឈឺ​ចាប់​បំផុត​គឺ​រឿងរ៉ាវ​ដែល​កើត​ឡើង​ចំពោះ​ក្មួយស្រី​របស់​គាត់​គឺ​នាង​ តាត ម៉ារីណា ដែល​ត្រូវ​ឃាតករ​ជះ​ទឹកអាស៊ីត​ធ្វើ​ឲ្យ​ពិការ​មួយ​ជីវិត​ហើយ​ជនល្មើស​រស់​នៅ​ធ្វើ​ព្រងើយ​គ្មាន​ចំណាត់ការ​តាម​ផ្លូវ​ច្បាប់​ដែល​បង្ហាញ​ភាព​យុត្តិធម៌​នៅ​ក្នុង​សង្គម​សោះ​បើ​ទោះ​បី​ជា​វិទ្យុ​អាស៊ី​សេរី​តែងតែ​រំឭក​នៅ​ព្រឹត្តិការណ៍​នោះ​បាន​បង្ហាញ​តាំង​ពី​ឈ្មោះ​អ្នក​ពាក់ព័ន្ធ​ក៏ដោយ​។

ក្រៅពី​យក​ស្ត្រី​ធ្វើ​ជា​អ្នក​បម្រើ​ផ្លូវភេទ និង​ឃាតកម្ម​នោះ​អ្នក​ធំៗ និង​អ្នក​នយោបាយ​ខ្លះ​បែរ​ជា​ធ្វើ​អាជីវកម្ម​នយោបាយ​លើ​សាកសព​ស្ត្រី​អតីត​តារាៗ​ទៀត​ដូច​គណបក្ស​ សម ​រង្ស៊ី តែងតែ​យក​សព​អ្នកស្រី ពិសិដ្ឋ ពិលិកា ភ្ជាប់​ជាមួយ​ថា្នក់​ដឹកនាំ​ជាន់​ខ្ពស់​យក​ចាក់​ផ្សាយ​ជា​រឿង​ផង និង ចែក​ខិត្ត​ប័ណ្ណ​ផង​នៅ​ក្នុង​ពេល​ឃោសនា​បោះឆ្នោត​ម្តងៗ​ដែល​ភាសា​សាមញ្ញ​ថា​ប្រើ​អស់​សាច់​ចំហៀវ​ឲ្យ​អស់​ខ្លាញ់​តែ​ម្តង​។

ជា​លទ្ធផល​គណបក្ស​ សម រង្ស៊ី ​គ្មាន​បាន​ទៅ​ចំណេញ​សន្លឹក​ឆ្នោត​អី​ពី​សព​គាត់​ផង​តែ​ផ្ទុយ​ទៅ​វិញ​មាន​តែ​គណបក្ស​ប្រជាជន​កើន​អាសនៈ​បន្ថែម​ដល់​ ៩០ ​នៅ​ក្នុង​សភា​ជាតិ​អាណត្តិ​ទី​ ៤ ទៅ​វិញ​ព្រោះ​ប្រជាពលរដ្ឋ​ដែល​ជា​ម្ចាស់​ឆ្នោត​មិន​បាន​គិតគូរ​រឿង​អាស្រូវ​ផ្លូវភេទ​នោះ​ទេ​គឺ​ពួកគាត់​ខ្វល់ខ្វាយ​តែ​រឿង​ក្រពះ​ពួកគាត់​ប្រចាំ​ថ្ងៃ​ថា​ថ្ងៃ​ស្អែក​មាន​អី​ហូប​ទេ​? តែ​ផ្ទុយ​ទៅ​វិញ​នៅ​អាណត្តិ​ទី​ ៥ ​នេះ​បក្ស​កាន់​អំណាច​បែរ​ទៅ​ជា​យក​ស្ទីល​តាម​បក្ស​ប្រឆាំង​រឿង​យក​ស្រី​កំណាន់​ពី​ខេត្ត​ព្រៃវែង​មក​លាយឡំ​ក្នុង​រឿង​នយោបាយ​ដោយ​​ដាក់​បន្ទុក​លើ​លោក កឹម សុខា តែ​បែរ​ជា​​បាត់​អស់​ ២២ ​កៅអី​ទៅ​វិញ​។

ឥឡូវ​នេះ​មិន​ទាន់​ដល់​ពេល​បោះឆ្នោត​អាណត្តិ​ទី​ ៦ ស្រួល​បួល​ផង​អ្នក​នយោបាយ​ក៏​យក​រឿង​ស្ត្រី​កំណាន់​មក​ដាក់​ប្រយុទ្ធ​គ្នា​ដណ្តើម​គ្នា​ទៀត​ហើយ​ដូចជា​មិន​ចង​ចាំ​ពី​ខាត​អាសនៈ​នៅ​សភា​សោះ​ធ្វើ​ដូចជា​ស្ត្រី​ហ្នឹង​ជា​នុយ​សន្ទូច​របស់​អ្នក​នយោបាយ ឬ​ក៏​កូន​អុក​នយោបាយ​របស់​ពួក​គាត់​អីចឹង បើ​ទោះបី​ជា​មិន​សម​ទំនង​ ឬ​ខុស​ច្បាប់​ក៏​ចេះ​តែ​ទៅ​ដែរ​។

ដូច​ករណី​រឿង​បញ្ចេញ​ការ​សន្ទនា​គ្នា​តាម​ទូរស័ព្ទ​រវាង​លោក កឹម សុខា និង​កញ្ញា ខុម ចាន់តារាទី ហៅ​ ស្រីមុំ គឺ​ខុស​ទៅ​នឹង​ក្រម​ព្រហ្មទណ្ឌ​មាត្រា​ ៣១៨ ហើយ​ព្រះរាជអាជ្ញា​ទម្លាយ​ព័ត៌មាន​ពី​ចម្លើយ​របស់​ ស្រីមុំ ក៏​ខុស​ក្រម​សីលធម៌​ដែរ​ហើយ​មាន​លក្ខណៈ​លម្អៀង និង​មាន​ចេតនា​កាច់កុង​គ្នា​រវាង​បក្ស​នយោបាយ​។

ឥឡូវ​នេះ​ស្ត្រី​​ ២ ​នាក់​អាច​ទំនង​ជា​ទាក់ទង​ធ្វើ​ជា​នុយ​សន្ទូច​គឺ​ ស្រីមុំ និង​កញ្ញា​ ធី សុវណ្ណថា ហើយ​គ្រាន់​តែ​ ស្រីមុំ ចង្អុល​អ្នក​ណា​ចាប់​អ្នក​ហ្នឹង​តែ​ម្តង ដូច លោក ស៊ាង ចែត មេឃុំ​ស្រក​មកពី​គណបក្ស​ សមរង្ស៊ី ​ក៏​ត្រូវ​បាន​អង្គភាព​ប្រឆាំង​អំពើ​ពុករលួយ (ACU) ចាប់​ដែរ​។

បន្ទាប់​មក​ទៀត​អង្គភាព ​ACU បាន​ធ្វើការ​ទាំង​យប់​ទាំង​ថ្ងៃ​លើ​សំណុំ​រឿង​ចោទ​ប្រកាន់​មន្ត្រី​អង្គការ​អាដហុក​ ៤ ​នាក់ និង​អគ្គលេខាធិការរង គ.ជ.ប ​១​​ រូប​ផង​ថា​ បាន​ពាក់ព័ន្ធ​រឿង​ពុករលួយ​ជា​មួយ​នឹង​ករណី​ ស្រីមុំ ហើយ​តុលាការ​ក៏​ចាត់ការ​តាម​ ACU ដែល​ទី​បំផុត​អ្នក​ទាំង​ ៥ ​នាក់​នោះ​ក៏​ត្រូវ​បាន​ឃុំ​ខ្លួន​បាន​ដូច​បំណង​។

ចំណាត់ការ​របស់​អង្គភាព ACU និង​តុលាការ​លើ​ករណី​នេះ​ត្រូវ​បាន​គេ​មើល​ទៅ​ហាក់​បី​ដូចជា​មាន​ភាព​លម្អៀង​ផ្នែក​នយោបាយ​ទៅ​គណបក្ស​កាន់​អំណាច​មើល​ទៅ​ខិតខំ​ប្រឹងប្រែង​ណាស់​ធ្វើការ​ខ្លាំង​ណាស់​គ្រាន់តែ​និស្សិត​អត់​សាលា​ប្តឹង​ក៏​ខំប្រឹង​បើក​កកាយ​មក​មើល​ដូច​មាន់​អ៊ីចឹង​។

តែ​ផ្ទុយ​ទៅ​វិញ​បើ​ទោះបី​ជា​មាន​ឯកសារ អត្ថបទ​កាសែត​ភ្នំពេញ​ប៉ុស្តិ៍​ដែល​បាន​ផ្តល់​បទសម្ភាស​ជាមួយ​សាក្សី​សុំ​មិន​បញ្ចេញ​ឈ្មោះ​ដែល​ជា​មន្ត្រី​សុខាភិបាល​​ក្នុង​ពេល​ថ្មីៗ​នេះ​បាន​ផ្តល់​ព័ត៌មាន​អំពី​អំពើ​ពុករលួយ​នៅ​មជ្ឈមណ្ឌល​ជាតិ​​ប្រយុទ្ធ​ជំងឺ​គ្រុនចាញ់ ប៉ារ៉ាស៊ីតសាស្រ្ត​ និង​បាណកសាស្រ្ត​ថា​ប្រធាន​ស្ថាប័ន​នេះ​បាន​ប្រើប្រាស់​តំណែង​របស់​ខ្លួន​ប្រព្រឹត្ត​អំពើ​ពុករលួយ​គ្រួសារ​និយម និង​លួច​ថវិកា​ជំនួយ​ដែល​សូម្បី​តែ​ស្ថាប័ន​នោះ​មាន​ទីតាំង​នៅ​ផ្លូវ​ព្រះមុនីវង្ស​ក៏​ត្រូវ​បាន​គេ​លក់ដូរ​ទៅ​នៅ​ជាយ​រាជធានី​ភ្នំពេញ​ហួស​ផ្សារ​ដីហុយ​ជិត​ចម្ការ​ព្រីង​ទៀត​ផង។

ជាង​នេះ​ទៅ​ទៀត​សាក្សី​ទាំង​នេះ​​ក៏​ធ្លាប់​ដាក់​ពាក្យ​បណ្តឹង​ទៅ​អង្គភាព​​ ACU​ តាំងពី​ខែ​​មេសា ឆ្នាំ ២០១៥ ក្នុង​រឿង​អាស្រូវ​ពុករលួយ​នៅ​តែ​បន្ត​ដល់​សព្វ​ថ្ងៃ​នេះ​ក៏​នៅ​តែ​មិន​ចាត់ការ​ឲ្យ​មាន​តម្លាភាព​ដែរ។

ចុះ​ហេតុអ្វី​បាន​ជា​រដ្ឋសភា​មិន​អញ្ជើញ​អង្គភាព ​ACU​ មក​សាកសួរ​ម្តង​អំពី​ដំណើរការ​នៃ​ការ​ចោទ​ប្រកាន់​ករណី​ពុករលួយ​មាន​ការ​រើសអើង​បែប​នេះ?

ឥឡូវ​ចូល​ដល់​ត្រី​ធំ​ស៊ី​នុយ​សន្ទូច​តូច​ហើយ​អ្នក​ស្ទូច​កំពុង​តែ​ខំប្រឹង​ទាញ​ត្រី​ធំ​មិន​ចេញ​ផុត​ពី​ទឹក​សោះ ហើយ​ខ្សែ​សន្ទូច​ក៏​ចង់​ដាច់​ដែរ​។ តើ​ខ្សែ​សន្ទូច​អាច​ដាច់​ដែរ​ឬ​ទេ​? បើ​ទាញ​ត្រី​ធំ​ចេញ​ពី​ទឹក​មិន​រួច ឬ​ក៏​ត្រី​ធំ​នោះ​អាច​ទាញ​អ្នក​ស្ទូច​ហ្នឹង​ធ្លាក់​ទឹក​វិញ​ដែរ​ឬ​ទេ​? តែ​បញ្ហា​ធំ​គឺ​ ស្រីមុំ ​ដែល​ជា​​នុយ​សន្ទូច​នោះ​ហេតុ​អ្វី​បាន​ជា​បុរសៗ​ដើម​ទ្រូង​ប្រាំហត្ថ​ជា​អ្នក​នយោបាយ​បាន​ដាក់​សម្ពាធ​លើ​ស្ត្រី​ទន់​ខ្សោយ​គ្រាន់​តែ​ជា​ជាង​កាត់​សក់​សោះ​ក៏​មិន​លើក​លែង​ដែរ?

ក្នុង​ករណី​នេះ​ខ្សែ​សន្ទូច​អាច​ដាច់​ច្រើន​ជាង​ព្រោះ​អ្នក​ស្ទូច​ប៉ុនប៉ង​ប្រើប្រាស់​តុលាការ​ដើម្បី​ចាប់​ខ្លួន​លោក កឹម សុខា ដែល​ជា​ត្រី​ស៊ី​សន្ទូច​នោះ​រីឯ​បក្ស​ប្រឆាំង​ថា​បើ​ចាប់​មេបក្ស​គេ គេ​ហ្នឹង​ប្រើ​កម្លាំង​អ្នក​គាំទ្រ​ដើម្បី​ទប់ទល់​ឥឡូវ​ដូចជា​នៅ​ទ្រឹង​រៀងៗ​ខ្លួន​ហើយ​ដូចជា​មាន​សញ្ញា​ចង់​បន្ត​វប្បធម៌​សន្ទនា​ឡើង​វិញ​។

យ៉ាង​ណា​ក៏ដោយ ​កាលពី​សប្តាហ៍​មុន​នេះ​ សភា​អឺរ៉ុប និង​អង្គការ​សហប្រជាជាតិ​ដែល​មួយ​ចំនួន​ជា​ភ្នែក​ច្រមុះ និង​ជា​ប្រទេស​ហត្ថលេខី​កិច្ចព្រមព្រៀង​សន្តិភាព​នៅ​ទីក្រុង​ប៉ារីស​ឆ្នាំ​ ១៩៩១ ក៏​បាន​អំពាវនាវ​ឲ្យ​រដ្ឋាភិបាល​បញ្ឈប់​ជា​បន្ទាន់​នូវ​ការ «​យាយី​តាម​ផ្លូវ​តុលាការ​» ទៅ​លើ​សមាជិក​គណបក្ស​ប្រឆាំង សង្គម​ស៊ីវិល និង​មន្ត្រី​នៃ​គណៈកម្មាធិការ​ជាតិ​រៀបចំ​ការ​បោះឆ្នោត​ខណៈ​ដែល​អគ្គលេខាធិការ​អង្គការ​សហប្រជាជាតិ​បាន​សម្តែង​ការ​ព្រួយបារម្ភ​ចំពោះ​ការ​បំភិត​បំភ័យ និង​ការ​យាយី​ទៅ​លើ​តួអង្គ​សំខាន់ៗ​ដែល​កាន់តែ​មាន​ការ​រីក​រាលដាល​នេះ​។

ប៉ុន្តែ​បើ​បុរសៗ​ដែល​ជា​អ្នក​នយោបាយ​ចេះ​តែ​យក​ស្ត្រី​ធ្វើ​ជា​ចំណាប់​ខ្មាំង​ដោយ​ដើរ​ចោទ​អ្នក​នេះ​ចាប់​អ្នក​នោះ​អ៊ីចឹងៗ​តើ​ឲ្យ​បង្ហាញ​ថា​ជា​ប្រទេស​នីតិរដ្ឋ​អនុវត្ត​ច្បាប់​តាម​បែប​លទ្ធិប្រជាធិបតេយ្យ​ដូច​ម្តេច​ទៅ​?អ្នក​នយោបាយ​នៅ​ស្រុក​ខ្មែរ​ចូលចិត្ត​កេងប្រវ័ញ្ច​លើ​ផ្លូវភេទ​ស្ត្រី និង​នយោបាយ​របស់​បក្ស​រៀងៗ​ខ្លួន​ដើម្បី​ប្រយុទ្ធ​គ្នា​ឯង​គឺ​ខុស​ពី​ប្រទេស​ជិត​ខាង​ដែល​អ្នក​ដឹកនាំ​គេ​យក​ស្ត្រី​ធ្វើ​ជា​ចារកម្ម​ដើម្បី​ឈ្នះ​សង្គ្រាម​លើ​ប្រទេស​បារាំង និង​សហរដ្ឋ អាមេរិក​កន្លង​មក​គួរ​ឲ្យ​ខ្មាស​អៀន​។

ចំណុច​ដែល​អ្នក​នយោបាយ​ចូលចិត្ត​យក​ល្បែង​ស្ត្រី​ជា​ត្រី​មុខ​នោះ​មាន​កត្តា​ចម្បង​ ២ ​គឺ ទី​ ១- អ្នក​នៅ​ក្បែរ​អ្នក​ធំ​ហ្នឹង​ចង់​បាន​តំណែង​ធំ​ណា​មួយ​គឺ​តែងតែ​គិត​រក​ស្ត្រី​ស្អាតៗ តារាៗ តាម​បែប​ដឹក​ញី​បន្ស៊ី​ឈ្មោល​។ ពេល​ខ្លះ​កូនស្រី​ខ្លួនឯង​ក៏​មិន​លើក​លែង​ដែរ​គឺ​ខ្លួន​ឯង​ចង់​បាន​អំណាច​បង្ខំ​កូនស្រី​ខ្លួនឯង​ឲ្យ​ទៅ​ដេក​ជាមួយ​មេ​ខ្លួនឯង​ក៏​មាន។ ជាង​នេះ​ទៅ​ទៀត​ឲ្យ​តែ​មេ​ពេញ​ចិត្ត​ស្រី​ស្នេហ៍​របស់​ខ្លួន​ឯង​ក៏​ជូន​មេ​ដែរ​។

ទី​ ២- យក​ស្ត្រី​ធ្វើ​ជា​នុយ ឬ កូន​អុក​ធ្វើ​យ៉ាង​ណា​ឲ្យ​ទៅ​កៀក​នឹង​គូ​បដិបក្ខ​ដើម្បី​រៀបចំ​បំបែក ឬ​ក៏​ផ្តួល​តែ​ម្តង​។ ល្បែង​នេះ​គឺ​ល្បែង​ចាស់​គំរឹល​មែន​តែ​មាន​អ្នក​ដឹកនាំ​ និង​អ្នក​នយោបាយ​ខ្លះ​ក៏​ភ្លាត់​ស្នៀត​ ខ្លះ​ធ្វើ​ឲ្យ​ប៉ះពាល់​កិតិ្តយស និង​សេចក្តី​ថ្លៃថ្នូរ​ដែរ​ដោយសារ​យក​ស្ត្រី​សម្រាប់​បម្រើ​ផ្លូវភេទ​ផង និង​នយោបាយ​ផង​។

ប៉ុន្តែ​ល្បែង​នេះ​គួរ​តែ​អ្នក​នយោបាយ​បុរសៗ​បញ្ឈប់​ប្រើ​វា​ទៅ​ព្រោះ​មិន​បាន​លើក​ស្ទួយ​ស្ត្រី​ដូច​ទៅ​នឹង​នារី​រតនៈ​ជាតិ និង​សមភាព​យេនឌ័រ​នោះ​ទេ​ផ្ទុយ​ទៅ​វិញ​មើល​ទៅ​ស្ត្រី​រងគ្រោះ​ទាំង​នោះ​ហាក់បី​ដូចជា​ទាសករ​ផ្លូវភេទ​សម័យ​ទំនើប​អ៊ីចឹង​។

ជាង​នេះ​ទៅ​ទៀត​វា​ក៏​មិន​ធ្វើ​ឲ្យ​ចំណេញ​ដល់​ប្រជាពលរដ្ឋ​ដែល​កំពុង​ជួប​វិបតិ្ត​គ្រោះ​មហន្តរាយ​ដូចជា បញ្ហា​លិច​ទឹក​ពេល​រដូវវស្សា និង​ទឹក​លិច​រាជធានី​ក្រោយ​ពេល​ភ្លៀង​ហើយ​ និង​បញ្ហា​ក្តៅ​ហួតហែង​រាំង​ស្ងួត​ខ្វះ​ទឹក​ខ្យល់​ព្យុះ​កន្លង​មក​ធ្វើ​ស្រែ​ចម្ការ​មិន​បាន​ហើយ​សុខ​ចិត្ត​នាំ​គ្នា​ធ្វើ​ចំណាក​ស្រុក​ទៅ​ស៊ី​ឈ្នួល​គេ​នៅ​បរទេស​រាប់​ម៉ឺន​នាក់​។

ជាក់ស្តែង​តាម​បទពិសោធ​បោះឆ្នោត​ជាតិ​កន្លង​មក​បក្ស​ណា​ដែល​យក​ស្ត្រី​មក​ធ្វើ​ជា​នុយ​សន្ទូច​ក្នុង​ឆាក​នយោបាយ​កន្លង​មក​គឺ​មាន​តែ​បាត់​អាសនៈ​ខ្លួន​ឯង​នៅ​ក្នុង​សភាជាតិ​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ