Search form

Login - Register | FOLLOW US ON

Logo of Phnom Penh Post newspaper Phnom Penh Post - គ្រឿង​ឥស្សរិយយស​ថ្នាក់​ជាតិ ​អាច​លែង​មាន​តម្លៃ

Content image - Phnom Penh Post
លោក អ៊ូ ប៊ុនណារ៉ាត់​ហៅ​នាយ​ ក្រឹម ពេល​ទទួល​គ្រឿង​ឥស្សរិយយស​កន្លង​មក។ រូបថត សហការី

គ្រឿង​ឥស្សរិយយស​ថ្នាក់​ជាតិ ​អាច​លែង​មាន​តម្លៃ

ការ​ឲ្យ​តម្លៃ​បរមងារ ឬ​ក៏​សញ្ញាបត្រ និយម​តាម​គ្នា​ទៅ​តាម​សម័យ​កាល​នៅ​ក្នុង​សង្គម​ច្រើន​ពេក​ធ្វើឲ្យ​សាបរលាប​គ្មាន​ខ្លឹមសារ​ដោយសារ​តែ​របស់​ទាំង​នោះ​បាន​មក​ដោយ​ស្រួលៗ​ពេក​ដូចជា បរមងារ​ ឯកឧត្តម​ លោក​ជំទាវៗ​មាន​ក្រឹត្យ ​និង​អត់​ក្រឹត្យ ឧកញ៉ាៗ ឧត្តមសេនីយ៍ៗ​ និង​បណ្ឌិតៗ​ជាដើម​។

ឥឡូវ​ចូល​ដល់​ការ​បំពាក់​គ្រឿង​ឥស្សរិយយស​មេ​ដាយ​ថ្នាក់​ជាតិ​សម្រាប់​មន្ត្រី​រាជការ​ទាំង​ថ្នាក់​ជាតិ​ និង​ថ្នាក់​ក្រោម​ជាតិ​ និង​កងកម្លាំង​ដែល​ខិតខំ​បំពេញ​កិច្ចការងារ​ហើយ​មាន​ស្នាដៃ​ល្អ​ ឬ​ក៏​អ្នក​ដែល​មាន​ស្នាដៃ​ការងារ​លេចធ្លោ​ចូលរួម​កសាង​ជាតិ​នោះ។

រីឯ​គ្រឿង​ឥស្សរិយយស​មេដាយ​នោះ​ទៀត​សោត​គឺ​មាន​កម្រិត​ជាក់លាក់​ជា​លក្ខណៈ​ប័ណ្ណ​ជា​គ្រឿង​បំពាក់​នឹង​ក បំពាក់​​លើ​ដើម​ទ្រូង​ខាង​ឆ្វេង​ឡើង​រហូត​ដល់​ពាក់​ឆៀង​ដែល​ចាប់ផ្តើម​ពី​មេដាយ​សំរឹទ្ធ មេដាយ​ប្រាក់​ មេដាយ​មាស ...មេដាយ​​មុនីសារាភណ្ឌ​ថ្នាក់​ «អស្សឫទ្ធិ» មេដាយ​​មុនីសារាភ័ណ្ឌ​ថ្នាក់ «ធិបឌិន្ទ»...រហូត​ដល់​មេដាយ​ថ្នាក់​មហាសិរីវឌ្ឍន៍។

ការ​ផ្តល់​មេដាយ​ថ្នាក់​ជាតិ​នេះ​កាន់​ធ្លាក់​ចុះ​នូវ​តម្លៃ​បណ្តើរៗ​តាមរយៈ​ការ​ផ្តល់​មាន​លក្ខណៈ​លោត​ផ្លោះ​មិន​ទៅ​តាម​លំដាប់​លំដោយ​​នៃ​​កម្រិត​មេ​ដាយ​ថ្នាក់​ជាតិ​ និង​ពេល​ខ្លះ​ផ្តល់​ឲ្យ​អ្នក​ដែល​មិន​ទំនង ឬ​ក៏​មិន​ស័ក្តិសម​នឹង​ទទួល​បាន​ចំពោះ​ការ​ធ្វើ​ការងារ​​បន្តិចបន្តួច​សោះ​ហើយ​​ក៏​ត្រូវ​បាន​គេ​រិះគន់​ផង​ដែរ​។

ដូច​ករណី​កញ្ញា ធី សុវណ្ណថា ​ប្រធាន​អង្គការ​យុវជន​កិច្ចការ​សង្គម​បាន​ទទួល​មេដាយ​មេដាយ​មុនីសារាភ័ណ្ឌ​ថ្នាក់ «ធិបឌិន្ទ​» ដោយសារ​ការពារ​ព្រៃឈើ​ហើយ​ថ្មីៗ​នេះ​ការ​ផ្តល់​មេដាយ​ដល់​តារា​ចម្រៀង​ប្រុស-ស្រី ក្រុមហ៊ុន​សាន់ដេ​ ៦ ​រូប​ក្នុង​នោះ​មាន​តារាចម្រៀង សុខ ពិសី ស្អាត និង​ល្បី​គឺ​ទទួល​បាន​ដល់​មេដាយ​មុនីសារាភ័ណ្ឌ​ថ្នាក់ «អស្សឫទ្ធិ» គឺ​បំពាក់​ផ្ទាល់​ដោយ​លោក ឱម យ៉ិនទៀង​ ប្រធាន​អង្គភាព​ប្រឆាំង​នឹង​អំពើ​ពុករលួយ។

ករណី​ទាំង​ ២ ​នេះ​គឺ​ត្រូវ​បាន​សាធារណជន​មួយ​ចំនួន​ឆ្ងល់​ថា​តើ​គ្រាន់​តែ​ចុះ​ទៅ​មើល​ព្រៃ​​ម្តងម្កាល​ ឬ​ក៏​ពីរ​ទៅ​បី​ដង​បាន​មេដាយ​ថ្នាក់​ជាតិ​ដែរ​រីឯ​តារាចម្រៀង​វិញ​គ្រាន់​តែ​ឡើង​ច្រៀង​ម្នាក់ ១ ​ឬ​ក៏​ ២ ​បទ​រួច​ផ្ញើ​សារ​ប្រឆាំង​នឹង​អំពើ​ពុករលួយ​សោះ​បាន​ដល់​មេដាយ​ថ្នាក់​ជាតិ​ដែរ? ការ​ដែល​ធ្វើ​ដូចនេះ​ធ្វើ​ឲ្យ​មន្ត្រី​ថ្នាក់​ក្រោម​ឱវាទ​សាមី​ស្ថាប័ន​ក្តី ឬ​ក៏​មន្ត្រី​រាជការ​ស៊ីវិល​ទូទៅ​ក្តី ឬ​ក៏​កង​កម្លាំង​ក្តី​ដែល​បាន​បម្រើ​ជាតិ​រាប់​ឆ្នាំ​ខ្លះ​ទៀត​ជិត​ចូលនិវត្តន៍​ហើយ​តែ​មិន​ដែល​បាន​ស្គាល់​មេដាយ​ថ្នាក់​ជាតិ​ហ្នឹង​ផង​។

បើ​ធ្វើការ​ប្រៀបធៀប​រវាង​តារាចម្រៀង សុខ ពិសី និង​នាយកុយ ដែល​បាន​ចូលរួម​ផ្សព្វផ្សាយ​ពី​របាយការណ៍​របក​គំហើញ​ថា​កម្ពុជា​បាន​បាត់​​ថវិកា​ប្រមាណ​ជា​ ៥៥០ ​លាន​ដុល្លារ​ដោយសារ​អំពើ​ពុករលួយ​ដែល​រៀបចំ​ដោយ​អង្គការ ​USAID របស់​​សហរដ្ឋ​អាមេរិក​កាលពី​ឆ្នាំ​ ២០០៩​ នៅ​ស្តាត​អូឡាំពិក។

បន្ទាប់​លេង​ឆាក​កំប្លែង​នៅ​លើ​ឆាក​មក​នាយកុយ​ហាក់បី​ដូច​ត្រូវ​បាន​គេ​ស្តីបន្ទោស​អ៊ីចឹង​ហើយ​នាយកុយ​ព្យាយាម​យក​ឱកាស​លេង​តន្ត្រី​តាម​កញ្ចក់​ទូរទស្សន៍​រួច​ហើយ​វាយបក​របក​គំហើញ​នោះ​វិញ និង​ចាប់ផ្តើម​សរសើរ​ពី​ស្នាដៃ​របស់​រាជរដ្ឋាភិបាល​។

អ្នក​ទាំង​ពីរ​ផ្សព្វផ្សាយ​ស្តីពី​ការ​ប្រឆាំង​នឹង​​អំពើ​ពុករលួយ​ដូច​គ្នា​តែ​បាន​រង្វាន់​ខុស​គ្នា​កញ្ញា​ សុខ​ ពិសី ​បាន​មេដាយ​ថ្នាក់​ជាតិ​រីឯ​នាយ​កុយ​វិញ​គឺ​គ្មាន​ស្ថាប័ន​ណា​ឲ្យ​មេដាយ​ ឬ​ក៏​រង្វាន់​លើក​ទឹកចិត្ត​នោះ​ទេ​គឺ​មាន​តែ​បាន​រង្វាន់​ត្រូវ​មាត់​ភ័យ​ញ័រ​ដៃ​ញ័រ​ជើង​ទៅ​វិញ​។

ជាង​នេះ​ទៅ​ទៀត​បើ​ធ្វើការ​ប្រៀបធៀប​ស្នាដៃ​សម្រាប់​ជាតិ​ទទួល​បាន​រវាង​តារា​ចម្រៀង​ស្អាតៗ​ និង​អ្នក​ប្រាជ្ញ ចាប៉ី​ដងវែង ដូចជា លោកតា ប្រាជ្ញ ឈួន​ និង លោកតា​ គង់ ណៃ ដែល​សម្តែង​ច្រើន​តែ​លើក​ស្ទួយ​វិស័យ​សិល្បៈ និង​ចូលរួម​ផ្សព្វផ្សាយ​​ស្នាដៃ​របស់​រាជរដ្ឋាភិបាល​ច្រើន​ជាង​ហើយ​ចាប៉ី​ដងវែង​ហ្នឹង​ត្រូវ​បាន​ចាត់​ចូល​ទៅ​ក្នុង​បេតិកភណ្ឌ​ពិភពលោក​របស់​​យូណេស្កូ​ថ្មីៗ​ទៀត​តើ​លោកតា​ទាំង​ពីរ​នាក់​ហ្នឹង​បាន​ទទួល​មេដាយ​ថ្នាក់​ជាតិ​ពី​រាជរដ្ឋាភិបាល​អ្វី​ខ្លះ? នេះ​បង្ហាញ​​អំពី​ការ​ឲ្យ​តម្លៃ​មនុស្ស​ខុស​គ្នា​នៅ​ក្នុង​សង្គម​ខ្មែរ។

ប៉ុន្តែ​អ្វី​ដែល​សំខាន់​នោះ​គឺ​ថា​ជំងឺ​បំពាក់​មាន​មេដាយ​នេះ​អាច​រីករាលដាល​ទៅ​ស្ថាប័ន​ផ្សេងៗ​ទៀត​មាន​ទម្រង់​ប្រហាក់​ប្រហែល​គ្នា​នេះ តើ​រាជរដ្ឋាភិបាល​នៅ​តែ​អនុញ្ញាត​ឲ្យ​ស្ថាប័ន ឬ​ក្រសួង​ដទៃ​ទៀត​រៀបចំ​បំពាក់​គ្រឿង​ឥស្សរិយយស​ឲ្យ​សម្រាប់​អ្នក​ដែល​មិន​ស័ក្ដិសម និង​តារាៗ​បែប​នេះ​ទៀត​ទេ? ហើយ​គួរ​តែ​បែងចែង​កម្រិត​នៃ​តម្លៃ​មេដាយ​ឲ្យ​បាន​ច្បាស់​ថា​តើ​បើ​​គ្រាន់​តែ​ច្រៀង​ ១ ​បទ​ ឬ​ក៏​ ២ ​បទ​ហើយ​ផ្សព្វផ្សាយ​សារ​ណា​មួយ​នោះ​ត្រូវ​បំពាក់​មេដាយ​ថ្នាក់​ជាតិ​? ឬ​ក៏​ត្រឹម​តែ​រង្វាន់​លើក​ទឹកចិត្ត​ ឬ​សេចក្តី​ថ្លែង​អំណរ​គុណ​អម​ជាមួយ​នឹង​បាច់​ផ្កា​ធំ​មួយ​គ្រប់គ្រាន់​ហើយ? រីឯ​ការ​បំពាក់​មេដាយ​វិញ​បើ​អ្នក​ទទួល​​មេដាយ​នោះ​ជា​ស្ត្រី​គឺ​ជូន​គាត់​ផ្ទាល់​ដៃ​ហើយ​​ឲ្យ​គាត់​ពាក់​នៅ​លើ​ដើម​ទ្រូង​ខ្លួនឯង ឬ​ក៏​អនុញ្ញាត​ឲ្យ​មន្ត្រី​ជាន់​ខ្ពស់​តំណាង​ស្ថាប័ន​ជា​ស្រី្ត​ដូច​គ្នា​ឡើង​បំពាក់​ជូន​គាត់​ទៅ​ជា​ជាង​បំពាក់​ជុំវិញ​ខ្លួន​គាត់​ដោយ​បុរសៗ៕

ចូលរួម​ផ្តល់​យោបល់​តាមរយៈ​ soprach.tong@phnompenhpost.com

0

Comments

Please, login or register to post a comment