Search form

Login - Register | FOLLOW US ON

Logo of Phnom Penh Post newspaper Phnom Penh Post - ចង់​ឲ្យ​អាជីវកម្ម​បាន​រឹងមាំ​ ត្រូវ​ចុះ​បញ្ជី​ស្រប​ច្បាប់

Content image - Phnom Penh Post
ក្រប​សៀវភៅ​ណែនាំ​សម្រាប់​ការ​ចុះ​បញ្ជី​ពាណិជ្ជកម្ម​។ រូបថត សហការី

ចង់​ឲ្យ​អាជីវកម្ម​បាន​រឹងមាំ​ ត្រូវ​ចុះ​បញ្ជី​ស្រប​ច្បាប់

ឥឡូវ​នេះ​អាកាសធាតុ​ក៏​ប្រែប្រួល​របត់​នយោបាយ​ក៏​ប្រែប្រួល ការ​ធ្វើ​ជំនួញ​ក៏​ប្រែប្រួល ឥរិយាបថ​អតិថិជន​ក៏​ប្រែប្រួល​ដែរ​គឺ​លេង​សុទ្ធ​តែ​ប្រ៊ែនៗ (Brands) ដាក់​គ្នា​មាន​ន័យ​ថា​ទំនិញ ឬ​​ឈ្មោះ​ម៉ាក​មាន​អាជ្ញាប័ណ្ណ​ត្រឹមត្រូវ​មាន​និន្នាការ​មិន​ក្លែង​បន្លំ ឬ​ក៏​លួច​ចម្លង​ដែល​ផ្ទុយ​ពី​ដើម​ទសវត្សរ៍​ឆ្នាំ​ ២០០០ ​គឺ​ធ្វើ​ឲ្យ​តែ​បាន​ហូប ឬ​ប្រើ​មួយ​ពេលៗ​ឲ្យ​តែ​មាន​ដូច​គេ​ដូច​ឯង​ប៉ុណ្ណោះ។

សង្គម​ខ្មែរ​កំពុង​ឲ្យ​តម្លៃ​លើ​របស់​របរ​ដែល​មាន​ម៉ាក​ផលិតផល​ល្បីៗ​ទាំង​ក្នុង​ស្រុក ទាំង​អន្តរជាតិ ប្រសិន​បើ​ឃើញ​គេ​យួរ​ការហ្វេ​មួយ​កែវ​ដែល​មាន​ឈ្មោះ​ល្បី​ដូចជា Brown, Amazon ឬ​ក៏​ Starbucks ​ជាដើម​គឺ​គេ​មើល​មុខ​ហើយ​លួច​សរសើរ​ក្នុង​ចិត្ត​ព្រោះ​ផលិតផល​ទាំង​នេះ​​មាន​គុណភាព​ហើយ​ត្រូវ​បាន​ចុះ​បញ្ជី​ត្រឹមត្រូវ​ដោយ​មិន​លួច​ចម្លង​ពី​គេ ទោះបី​ផលិតផល​នោះ​ជា​ផលិតផល​ក្នុង​ស្រុក​ ឬ​ទិញ​អាជ្ញាប័ណ្ណ​ពី​អន្តរជាតិ​ ឬ​មាន​អាជ្ញាប័ណ្ណ​បែប ហ្វ្រ៊ែនឆាយ (Frenchie) ឬ​ក៏​ទិញ​ផលិតផល​ផ្តាច់​មុខ​ក្តី​។

ជាមួយ​គ្នា​នេះ​ដែរ បើ​មាន​មិត្ត​អ្នក​អាន​​កាន់ ឬ​ក៏​កំពុង​អាន​កាសែត​ភ្នំពេញ​ប៉ុស្តិ៍​ដែល​ជា​ប្រភេទ​ស្តង់ដារ​ចេញ​ផ្សាយ​ប្រចាំ​ថ្ងៃ​ក៏​សង្គម​គេ​ឲ្យ​តម្លៃ​ភ្លាម​ថា​គ្រាន់បើ​ដោយសារ​តែ​ការ​​ចុះ​បញ្ជី​ជា​ផលិតផល​កាសែត ​នៅ​ក្រសួង​ព័ត៌មាន​ត្រូវ និង​ចុះ​បញ្ជី​ធ្វើ​អាជីកម្ម​នៅ​កម្ពុជា​ហើយ​បង់​ពន្ធ​ជូន​រដ្ឋ​ត្រឹមត្រូវ។

ជាង​​នេះ​ទៅ​ទៀត​គឺ​បង្កើត​​ការងារ​ដល់​បុគ្គលិក​ខ្មែរ និង​បរទេស​ទៀត​ផង​សូម្បី​តែ​ព័ត៌មាន​អន្តរជាតិ​ក៏​ទិញ​កម្មសិទ្ធិ​បញ្ញា​ត្រឹមត្រូវ​មក​ចុះ​ផ្សាយ​​ដែរ​។ មិន​​ត្រឹម​តែ​ចេញ​ជា​ក្រដាស​កាសែត​ទេ​គឺ​លោក​អ្នក​អាច​ជាវ​តាម​អនឡាញ​​ (online) ​ក៏​បាន​ដែរ។

ទន្ទឹម​នឹង​នេះ​អាជីវកម្ម​​ផ្តល់​សេវា​រៀបចំ​ពិធី​មង្គលការ និង​កម្មវិធី​​នានា​ក៏​កំពុង​រីកសាយ​ផង​ដែរ​ដោយ​បាន​ជួយ​ដោះស្រាយ​បន្ទុក​គ្រួសារ​ដែល​មាន​រៀបចំ​អាពាហ៍ពិពាហ៍​កូនចៅ​កុំ​ឲ្យ​មាន​​ការ​ត្អូញត្អែរ​ពី​ញាតិ ឬ ក៏​មិត្តភក្តិ​ថា​មិន​បាន​សប្បាយ​​សោះ​ព្រោះ​ជួយ​ហត់​ពេក​។

តាមរយៈ​លោក ហ៊ឺ វីរៈ ដែល​​ទទួល​បាន​សញ្ញាបត្រ​អនុបណ្ឌិត​ពាណិជ្ជកម្ម​ (MBA) និង​ជា​ស្ថាបនិក​ក្រុមហ៊ុន​សិរីមង្គល​ដែល​បម្រើ​សេវា​រៀបចំ​មង្គលការ​មុន​គេ​តាំងពី​ឆ្នាំ​ ​២០០៨ មក​មាន​ការ​សប្បាយ​ចិត្ត​ពេល​ដែល​មាន​សេវា​ដូច​លោក​​កាន់​តែ​ច្រើន​ជាង​ ១០០ ក្រុមហ៊ុន​ទៅ​ហើយ​នោះ​។

ចំពោះ​លោក​ចរន្ត​បែប​នេះ​ «​វា​ជា​រឿង​ធម្មតា​ក្នុង​ការ​​រកស៊ី​ដែល​តែង​មាន​ការ​ប្រកួត​ប្រជែង​លក្ខណៈ​ដូចៗ​គ្នា​នៅ​លើ​ទីផ្សារ​តែ​ត្រូវ​ចុះ​បញ្ជី​ឲ្យ​ស្រប​ច្បាប់ ខណៈ​ក្រុមហ៊ុន​​លោក​កំពុង​​ពង្រីក​មុខ​ជំនួញ​ផ្សេងៗ​ទៀត​ដូចជា​កូន​ផ្សារ​បន្លែ​ទំនើប​ហេបភីហ្វាម​គ្មាន​ជាតិ​គីមី​ ក្លិប​ហាត់ប្រាណ​យុវជន​អន្តរជាតិ​ និង​ហាង​កាត់​សក់​ឧត្តម​បុរស​ជាដើម​។

ចំណុច​ខ្លាំង​របស់​ខ្ញុំ​គឺ​គ្រប់​មុខ​ជំនួញ​សុទ្ធ​តែ​ជា​ការ​ផ្តួចផ្តើម​មាន​រចនាប័ទ្ម​​របស់​ខ្លួន​ដោយ​បាន​ចុះ​បញ្ជី និង​បង់​ពន្ធ​ជូន​រដ្ឋ​ត្រឹមត្រូវ​គឺ​ធ្វើ​យ៉ាង​ណា​ឲ្យ​អតិថិជន​មាន​ជំនឿ​លើ​​សេវា​របស់​ខ្ញុំ​។ អ្វី​ដែល​ខ្ញុំ​សប្បាយ​ចិត្ត​ទៀត​នោះ​គឺ​ខ្ញុំ​បាន​ជួយ​និស្សិត​ក្រីក្រ​មួយ​ចំនួន​ដោយ​ផ្តល់​តាំងពី​ស្នាក់​នៅ​បាន​ប្រាក់​ខែ និង​បាន​រៀន​ចប់​ចុង​ចប់​ដើម​»​។

កាលណា​ការ​ប្រកួត​ប្រជែង​មាន​លក្ខណៈ​ស្មោះត្រង់​ដោយ​មាន​ច្បាប់​ត្រឹមត្រូវ​គឺ​ធ្វើ​ឲ្យ​តម្លៃ​ទីផ្សារ​សមរម្យ​ងាយ​​​ស្រួល​ជ្រើសរើស​សម្រាប់​អតិថិជន​ទៅ​តាម​កម្រិត​ជីវភាព​ហើយ​​មាន​​ស្តង់ដារ​រៀងៗ​ខ្លួន​ដែល​​មាន​​តាំងពី​ការ​បើក​សាលា​មត្តេយ្យ​កុមារ​តូច​រហូត​ដល់​មនុស្ស​ពេញ​វ័យ​ដូចជា Western International, NYIS, AIS, Westline, Home of English និង​សុវណ្ណភូមិ​ជាដើម​។

បញ្ហា​ម៉ាក​ឈ្មោះ​ប្រ៊ែនៗ​ជា​រឿង​មួយ រីឯ​​ចម្រៀង​អ្នក​និពន្ធ​ចម្រៀង​ និង​ទំនុក​ភ្លេង​ក៏​ខំប្រឹង​ប្រកួត​​ប្រជែង​ធ្វើ​ឲ្យ​ស្នាដៃ​នោះ​ជា​របស់​ខ្លួន​ជា​ខ្មែរ​ដោយ​មិន​ចម្លង​ពី​គេ​ដូចជា បទ​រាំញី​កែងជើង បទ​បុណ្យភូមិ បទ​នៅ​ទី​នេះ​កំពុង​មាន​មនុស្ស​ខូចចិត្ត និង​បទ​នឹក​បាន​ត្រឹម​ស្រមៃ ជាដើម​។

ការ​ធ្វើ​ដូចនេះ​គឺជា​ការ​លើក​ទឹកចិត្ត​ដល់​អ្នក​និពន្ធ​កុំ​ឲ្យ​លួច​ចម្លង​ ឬ​បកប្រែ​ពី​គេ​ផង​ធ្វើ​ឲ្យ​អ្នក​ច្រៀង​មិន​ខ្មាស​គេ​ផង​ ឯ​ម្ចាស់​ឧបត្ថម្ភ​ក៏​ពេញ​ចិត្ត​​​ផង​ដែរ​ហើយ​បើ​បទ​ទាំង​នោះ​បាន​ចុះ​បញ្ជី​ទៀត​គឺ​លួច​ចម្លង​លែង​បាន​ហើយ​បើ​ហ៊ាន​គឺ​ប្តឹង​យក​​តែ​ម្តង​។

ដោយ​ឡែក​ការ​រកស៊ី​លក់​ទំនិញ​តាម​អនឡាញ​ (online) នៅ​ស្រុក​ខ្មែរ​វិញ​នៅ​មិន​ទាន់​មាន​ស្តង់ដារ និង​​ស្រប​ច្បាប់​នៅ​ឡើយ​ទេ​គឺ​ពេល​ខ្លះ​ឃើញ​តែ​បង្ហោះ​តាម​ហ្វេសប៊ុក និង​តាម​អ៊ីនធឺណិត​ដាក់​តែ​លេខ​ទូរស័ព្ទ និង​អ៊ីមែល​មិន​មាន​អាសយដ្ឋាន​ពិត​នោះ​ទេ​សូម្បី​តែ​ថ្នាំ​ពេទ្យ​ក៏​មាន​លក់​តាម​អនឡាញ​ដែរ ដោយ​អ្នក​ទិញ​ខ្លះ​គ្រាន់តែ​ឮ​ថា​គេ​លក់​ថ្នាំ​សម្រក​ទម្ងន់ ឬ​ក៏​ថ្នាំ​ប៉ូវ​កម្លាំង​គឺ​ទូរស័ព្ទ​ទាក់ទង​ទិញ​ភ្លែត​ដោយ​មិន​ដឹង​ថ្នាំ​លក់​នោះ​ផលិត​នៅ​ទី​ណា ឬ​ក៏​ប៉ះពាល់​សុខភាព​យ៉ាង​ណា​​ទេ​។

ប៉ុន្តែ​បើ​​ក្រុមហ៊ុន​ចុះ​បញ្ជី​ត្រឹមត្រូវ​គេ​អាច​រកស៊ី​ ឬ​ក៏​ផ្ដល់​សេវា​បាន​ពិសេស​គឺ​វិស័យ​ធនាគារ​គេ​អាច​ផ្ទេរ​លុយ​​ឆ្លង​ និង​ទិញ​ទំនិញ​បាន​​ស្រួល​។

ទន្ទឹម​នឹង​នេះ​ការ​ប្រកួត​ប្រជែង​សេវា​អនឡាញ​នេះ​ក៏​តម្រូវ​ឲ្យ​ចុះ​បញ្ជី​​ទំនិញ​ស្រប​ច្បាប់​ និង​មាន​គុណភាព​ផង​ដែរ​ដើម្បី​ការពារ​សុវត្ថិភាព​ដល់​អតិថិជន​ពោល​គឺ​យក​គំរូ​ល្អៗ​ដូច​ក្រុមហ៊ុន​ Alibaba ដ៏​ល្បី​​លើ​ពិភពលោក​របស់​មហាសេដ្ឋី​ចិន Jack Ma គឺ​ដោយសារ​ការ​រកស៊ី​ស្រប​ច្បាប់​ និង​ស្មោះត្រង់​តាម​​អនឡាញ​បាន​ធ្វើ​ឲ្យ​លោក​ក្លាយ​ជា​​មហាសេដ្ឋី​យ៉ាង​លឿន​។

បច្ចុប្បន្ន​នេះ​រាជរដ្ឋាភិបាល​បាន​បន្ថយ​របៀប​ធ្វើការ​បែប​ការិយាធិបតេយ្យ​តាមរយៈ​ការ​ធ្វើ​វិមជ្ឈការ​សេវា​សាធារណៈ «​ច្រក​ចេញ​ចូល​តែ​មួយ​» ដែល​បាន​កាត់​បន្ថយ​​បន្ទុក​ការងារ​របស់​សាមី​ក្រសួង និង​ស្ថាប័ន​មួយ​​ចំនួន​មក​រដ្ឋបាល​​ថ្នាក់​ក្រោម​ជាតិ​ពី​ការ​ចុះ​បញ្ជី​ការ​ធ្វើ​អាជីវកម្ម​ ឬ​សិប្បកម្ម​ខ្នាត​តូច​​ ឬ​សេវាកម្ម​ផង​ដែរ​ដោយ​ធ្វើ​ត្រឹម​ថ្នាក់​ខណ្ឌ ឬ​ក្រុង​គឺ​ស្រប​ច្បាប់​ដូច​គ្នា។

ការ​ជំរុញ​ឲ្យ​ការ​បើក​អាជីវកម្ម​ត្រូវ​ចុះ​បញ្ជី​នេះ​គឺ​បាន​​ប្រយោជន៍​សំខាន់ៗ​ដល់​ម្ចាស់​អាជីវកម្ម និង​ចំណូល​រដ្ឋ​ផង​ដែរ ដែល​កត្តា​ទី​ ១) មាន​សិទ្ធិ​ផ្តាច់​មុខ​នូវ​ឈ្មោះ និង​ការ​ធ្វើ​រចនាប័ទ្ម​ត្រូវ​បាន​ការពារ​ដោយ​ច្បាប់​ស្តីពី​សិទ្ធិ​អ្នក​និពន្ធ​ និង​សិទ្ធិ​ប្រហាក់​ប្រហែល​ និង​ច្បាប់​ស្តីពី​ម៉ាក​ពាណិជ្ជនាម​ និង​អំពើ​នៃ​ការ​ប្រកួត​ប្រជែង​មិន​ស្មោះ​ត្រង់​។ ដូច​លោក ហ៊ឺ វីរៈ ក៏​ធា្លប់​បាន​ព្រមាន​ទៅ​ក្រុមហ៊ុន​សិរីមង្គល​​ពី​ការ​រកស៊ី​រៀបចំ​ពិធីម​ង្គលការ​ខុស​ច្បាប់​នៅ​ខេត្ត​បាត់ដំបង​ឲ្យ​ដូរ​យីហោ​ចេញ​បើ​មិន​ដូច្នេះ​​ទេ​លោក​នឹង​ប្តឹង​​តាម​ផ្លូវ​ច្បាប់​ព្រោះ​ឈ្មោះ​ជាន់​គ្នា​ជាមួយ​ក្រុមហ៊ុន​លោក​ដែល​បាន​ចុះ​បញ្ជី​នៅ​ក្រសួង​ពាណិជ្ជកម្ម​រួច​ហើយ​តែ​ក្រោយ​មក​ក៏​ប្តូរ​ឈ្មោះ​ហ្នឹង​ចេញ​វិញ​។

ឧទាហរណ៍​ដ៏ល្អ​របស់​អាជីវកម្ម​ក្នុង​ស្រុក​ដែល​ផ្តល់​សេវា​បោកអ៊ុត​ទំនើប​មាន​រូប​កីឡាករ​ស៊ូម៉ូ​ធំ ក្រុមហ៊ុន​នេះ​បាន​ចុះ​បញ្ជី​ត្រឹមត្រូវ​ និង​ចេញ​លក់​​ជា​លក្ខណៈ​ Frenchie ដោយ​យក​​រូបមន្ត​ផ្សំ​ទាំង​ស្រុង​ក្នុង​ការ​បោក​គក់​ទៅ​អ្នក​ដែល​ចង់​រកស៊ី​របរ​ដូច​គ្នា​ព្រោះ​បាន​សាង​កេរ្តិ៍​​ឈ្មោះ​ល្បី​រួច​ហើយ​ដែល​មក​ទល់​ពេល​នេះ​ឃើញ​មាន​ស្លាក​យីហោ​ច្រើន​មាន​នៅ​ស្ទើរ​គ្រប់​កន្លែង​។

ទី​ ២) នៅ​ពេល​សាង​ឈ្មោះ​បាន​ល្បី​ហើយ​គឺ​ក្រុមហ៊ុន​អាច​ពង្រីក​នៅ​ក្រៅ​ប្រទេស​បាន​ដោយសារ​មាន​ច្បាប់​ការពារ​រួច​​។ ដូចជា​ធនាគារ​អេស៊ីលីដា​បាន​ពង្រីក​សាខា​ដល់​ប្រទេស​ឡាវ និង​ភូមា​...រីឯ​ក្រុមហ៊ុន​នំស្រួយ​លីលី​ដែល​បាន​សញ្ញាបត្រ ISO ពី​ប្រទេស​សិង្ហបុរី​ក៏​កំពុង​​​តែ​​លក់​នៅ​ក្រៅ​ប្រទេស​ដូចជា​នាំ​ចេញ​ទៅ​ប្រទេស​ភូមា សហរដ្ឋអាមេរិក និង​កូរ៉េ​ជាដើម​។ នេះ​ក៏​ដោយសារ​កម្ពុជា​បាន​ចុះ​បញ្ជី​ពាណិជ្ជកម្ម​ក្នុង​ប្រព័ន្ធ​អន្តរជាតិ​ (WTO) និង​អាស៊ាន ខណៈ​ថ្មីៗ​នេះ​កម្ពុជា​ក៏​បាន​ព្រមព្រៀង​ទទួល​ស្គាល់​ និង​ការពារ​ប៉ាតង់​នៅ​អឺរ៉ុប​ដែរ​នោះ​។

ទី​ ៣) ​ការ​​ចុះ​បញ្ជី​ត្រឹមត្រូវ​នេះ​ក៏​ងាយស្រួល​សម្រាប់​រាជរដ្ឋាភិបាល​ក្នុង​ការ​ប្រមូល​ពន្ធ​ផង​ដែរ បើ​ទោះ​ជា​ក្រុមហ៊ុន​ព្យាយាម​គេចវេះ បើ​ឧបមា​ថា​ក្នុង​ ១០០ ​ភាគរយ​ក៏​អាច​បង់​ជូន​រដ្ឋ​បាន​​ ៥០ ​ភាគរយ​ដែរ​គ្រាន់​បើ​ជាង​អត់​តែ​បើ​រដ្ឋ​ចាប់​បាន​ពី​ការ​គេច​ពន្ធ​នេះ​វិញ​គឺ​សង​លើស​ដើម​ហើយ​ត្រូវ​ថែម​ ២៥ ​ភាគរយ​លើ​ ៥០ ​ភាគរយ​ដែល​បាន​បាត់​នោះ​បូករួម​នឹង​ការ​ប្រាក់​ប្រចាំ​ខែ​ ២ ​ភាគរយ​បន្ថែម​ទៀត​ហើយ​ករណី​អត់​ព្រម​​បង់​គឺ​ឡើង​ថ្លៃ​ថែម​ ៤០ ​ភាគរយ​។ នេះ​បើ​ផ្អែក​តាម​ច្បាប់​សារពើពន្ធ​។

ដោយសារ​សារៈសំខាន់​នៃ​ការ​ប្រមូល​ពន្ធ​ដែល​ជា​ចំណូល​ដ៏ធំ​មួយ​សម្រាប់​ជាតិ​គឺ​ក្រសួង​ទេសចរណ៍​បាន​ប្រកាស​នៅ​សប្តាហ៍​មុន​​ថា​គ្រាន់​តែ​ស្ថាប័ន​មួយ​នេះ​គឺ​បាន​ចំណូល​ស្មើ​នឹង​ ១៣ ​ភាគរយ​នៃ​ផលិតផល​ក្នុង​ស្រុក​សរុប​ (GDP) ដែល​មាន​ទឹកប្រាក់​​ ២២ ​ពាន់​លាន​ដុល្លារ​នៅ​ឆ្នាំ​មុន។ ​អ៊ីចឹង​ហើយ​ទើប​ក្រសួង​នេះ​ធ្វើ​យុទ្ធនាការ​លើ​ឧស្សាហកម្ម​ទេសចរណ៍​ណា​ដែល​គ្មាន​អាជ្ញាប័ណ្ណ​គឺ​ត្រូវ​តែ​ចុះ​បញ្ជី​ទាំងអស់​។

ទី​ ៤) ការ​​លេង​ផ្សារ​ភាគហ៊ុន​នៅ​ទីផ្សារ​មូលបត្រ​កម្ពុជា (CSX) គឺ​តម្រូវ​ឲ្យ​ក្រុមហ៊ុន​នីមួយៗ​បង្ហាញ​ពី​តម្លាភាព និង​ភាព​ស្រប​ច្បាប់​ច្បាស់លាស់​ណាស់​តាំងពី​របាយការណ៍​ហិរញ្ញវត្ថុ​ប្រចាំ​ឆ្នាំ​ទើប​​ចូល​លេង​បាន​។

សរុប​មក​វិញ​ការ​ចុះ​បញ្ជី​គឺ​ពិតជា​មាន​សារៈសំខាន់​មែន​ហើយ​តែ​ស្ថាប័ន​រដ្ឋ​ដែល​ពាក់ព័ន្ធ​ក៏​ត្រូវ​ពង្រឹង​ការ​រៀបចំ​ប្រព័ន្ធ​ប្រមូល​ពន្ធ​ឲ្យ​បាន​រឹងមាំ​ផង​ដែរ​ហើយ​ការ​ប្រមូល​ពន្ធ​ទៀត​សោត​គឺ​ត្រូវ​ការពារ​ក្រុមហ៊ុន​ផង កុំ​ចាំ​តែ​យក​លុយ​ពី​គេ​ស្រួលៗ​ហើយ​អត់​ធ្វើការ​ដោយ​ចាំ​តែ​គេ​ប្តឹង​ទើប​​ស្ទុះស្ទា​​ដោយ​យក​លេស​ថា​សមត្ថភាព​មន្ត្រី​ជំនាញ​នៅ​មាន​កម្រិត​តែ​បែរ​ជា​​ការពារ​ហាង​​អ្នក​ធំៗ​ដូចជា​ហាង​កាហ្វេ​ដែល​ស្រដៀង​គ្នា​រវាង​ AmazoN និង​ AmazinG នោះ​។

ជាង​នេះ​ទៀត​ការ​ប្រមូល​ពន្ធ​ក៏​ត្រូវ​មាន​តម្លាភាព​ដែរ​កុំ​ប្រឹង​គាប​តែ​ក្រុមហ៊ុន​តូច និង​មធ្យម (SME) ឲ្យ​បង់ពន្ធ រីឯ​ក្រុមហ៊ុន​អ្នក​ធំៗ​រួច​ពន្ធ​រហូត​នោះ​ តើ​ឲ្យ​ដំឡើង​ប្រាក់​ខែ​ដល់​មន្ត្រី​រាជការ និង​និវត្តជន​បាន​ច្រើន​ម៉េច​កើត​ទៅ?

ក្រៅពី​នោះ​រាជរដ្ឋាភិបាល​ក៏​ត្រូវ​ជួយ​រក​ទីផ្សារ​ឲ្យ​ក្រុមហ៊ុន​វិញ​ផង​ដែរ​បន្ទាប់​បាន​ចុះ​បញ្ជី​ និង​បង់​ពន្ធ​រួច​នោះ ទោះ​តាមរយៈ​កម្រិត​ជាតិ​ក្តី កម្រិត​អន្តរជាតិ​ក្តី​ បើ​មិន​​ដូច្នេះ​ទេ​ក្រុមហ៊ុន​ដែល​រកស៊ី​មិន​មាន​ភាព​រឹងមាំ​យូរ​អង្វែង​​ឡើយ​​គឺ​មាន​លក្ខណៈ​ឡើង​ចុះ​ដូច​ទឹក​រលក​អ៊ីចឹង ម្តង​គេ​ផ្អើល​ថា​ដាំ​ដំឡូង​មី លុះ​ដល់​គេ​ថា​ខាត​ក៏​នាំ​គ្នា​ផ្អើល​ទៅ​ដាំ​កៅស៊ូ​ដល់​កៅស៊ូ​អត់​ទីផ្សារ​ក៏​នាំ​គ្នា​ផ្អើល​ទៅ​ដាំ​ម្រេច បន្ទាប់មក​ថា​ធ្វើ​ស្រូវ​ក្រអូប​វិញ​ម្តង​គឺ​មើល​ទៅ​ដូចជា​មាន​លក្ខណៈ​ឈូឆរ​តាម​គ្នា​ហើយ​ដល់​អ៊ីចឹង​​ពេក​ទៅ​ដូចជា​មិន​ប្រាកដ​ត្រង់​ណា​សោះ​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment