Search form

Login - Register | FOLLOW US ON

Logo of Phnom Penh Post newspaper Phnom Penh Post - ចាត់​វិធានការ​តឹងរ៉ឹង​ដើម្បី​ទប់​ស្កាត់​ចោរ​លួច​ទារក

ចាត់​វិធានការ​តឹងរ៉ឹង​ដើម្បី​ទប់​ស្កាត់​ចោរ​លួច​ទារក

Woman_Child_stolen
កូនដែលបាត់ក្នុងពេទ្យមានជ័យ ត្រូវបានប្រគល់ឲ្យម្តាយវិញ គឹម សារុំ

រឿង ម្តាយ និង​កូន​ដូច​ក្បូន និង​ទឹក​រាល់​ពេល​ព្រឹក ល្ងាច យប់​តែង​តែ​រាវ​រក​គ្នា ជា​ពិសេស​ទារក​ដែល​ទើប​តែ​នឹង​កើត ដែល​ស្ទើរ​តែ​មិន​ហ៊ាន​ធ្មេច​ភ្នែក​ផង បើ​ទោះ​ជា​ងងុយ​ដេក ឬ​ក៏​អស់​កម្លាំង​យ៉ាង​ណា​ក៏​ដោយ។ អ្នក​ម្តាយ​គ្រប់ៗ​រូប ទម្រាំ​សម្រាល​បាន​កូន​ចេញ​ពី​ផ្ទៃ​ពោះ​មួយៗ មាន​ការ​លំបាក​ខ្លាំង​ណាស់​ដែល​បុរស​មួយ​ចំនួន​ធំ​មិន​បាន​ដឹង គឺ​ចាប់​តាំង​ពី​មាន​គភ៌​ក្នុង​ពោះ​មក​ម្តាយ​ចាប់​ផ្តើម​ចាញ់​កូន «ក្អួត» រាល់​ព្រឹក ម្តាយ​មិន​ហ៊ាន​ហូប​អ្វី​ផ្តេស​ផ្តាស​ទេ សូម្បី​តែ​ការ​ប្រើ​ប្រាស់ ថ្នាំ​ពេទ្យ​ក៏​មាន​ការ​ប្រយ័ត្ន​ប្រយែង​ដែរ ហើយ​ក៏​មិន​ហ៊ាន​ដើរ​ហើរ​ទៅ​ណា​មក​ណា​ស្រួល​ដូច​មនុស្ស​ធម្មតា​ទេ ព្រោះ​ខ្លាច​ប៉ះពាល់​ទារក​ក្នុង​ផ្ទៃ ដែល​អាច​រលូត ឬ​ក៏​អាច​កូន​កើត​មក​មាន​សភាព​ខុស​ពី​ប្រក្រតី។

រហូត​មក​ដល់​ពេល​សម្រាល​ទៀត ក៏​ម្តាយ​រឹត​តែ​មាន​ការ​ប្រុង​ប្រយ័ត្ន គឺ​ស្រ្តី​អាច​ប្រឈម​មុខ​នឹង​គ្រោះថ្នាក់​ខ្ពស់​បំផុត អាច​មាន​ការ​ធ្លាក់​ឈាម​ខ្លាំង​ខុស​ពី​ធម្មតា ដែល​បណ្តាល​ឲ្យ​ស្លាប់​បាន ឬ​ក៏​ងាយ​នឹង​ឆ្លង​ជំងឺ​ផ្សេងៗ ឯ​ទារក​វិញ​ក៏​ប្រឈម​មុខ​នឹង​គ្រោះថ្នាក់​ដូច​គ្នា​ដែរ បើ​ការ​សម្រាល​នោះ​មិន​ត្រឹម​ត្រូវ​តាម​ក្បួន​ខ្នាត។ តែ​នៅ​ពេល​ដែល​ទារក​បាន​កើត​ចេញ​មក​ហើយ​រស់ មាន​សុខភាព​ល្អ​ធម្មតា មាន​អវយវៈ​គ្រប់​គ្រាន់​គួរ​ឲ្យ​ស្រឡាញ់ បែរ​ជា​បាន​ឃើញ​តែ​មួយ​ភ្លេត​រួច​ហើយ​ទារក​នោះ​ត្រូវ​បាន​គេ​លួច​យក​ទៅ​បាត់​ទៅ​វិញ គឺ​ធ្វើ​ឲ្យ​ម្តាយ និង​ក្រុម​គ្រួសារ​មាន​ការ​រន្ធត់​ចិត្ត​ជា​ខ្លាំង ដែល​សោកនាដកម្ម និង​វិប្បដិសារី​មិន​អាច​បំភ្លេច​បាន​ទេ​នៅ​ក្នុង​ជីវិត នៅ​តែ​យំ​សោក​បោក​ខ្លួន​ដូច​សត្វ​អក​អ៊ីចឹង​។ ស្រ្តី​ជា​ម្តាយ​អាច​ប្រឈម​នឹង​ជំងឺ​ម្យ៉ាង​ដែល​ខ្មែរ​ហៅ​ថា «ទាស់​សរសៃ​ខ្ចី» ឬ​ក៏​អាច​មាន​ជំងឺ​វិកល​ចរិត ដូច​កេង​កង​បាត់​កូន ដែល​លោក​ស្រី រស់ សេរីសុទ្ធា ត្អូញ​ត្អែរ​ទុក្ខ​សោក​នៅ​ក្នុង​បទ​ចម្រៀង​របស់​គាត់​នោះ អ៊ីចឹង ពី​ព្រោះ​ករណី​នេះ ខុស​ពី​ការ​ស្លាប់​របស់​ទារក ដែល​ម្តាយ​បាន​អស់​ចិត្ត​បាន​ឃើញ​ស្លាប់​ជាមួយ​នឹង​ហេតុផល​ជាក់ស្តែង។

ដូច​កាល​ពី​សប្តាហ៍​មុន​នេះ មាន​ករណី​ស្រ្តី​លួច​ទារក​ពី​ម្តាយ​ដែល​មាន​អាយុ​ទើប​តែ ១៨ឆ្នាំ ដែល​ទើប​តែ​ឆ្លង​ទន្លេ​បាន​មួយ​ថ្ងៃ បាន​កូន​ដំបូង​ប្រុស​ផង​នោះ នៅ​មន្ទីរពេទ្យ​បង្អែក មានជ័យ រាជធានី ភ្នំពេញ ដែល​ធ្វើ​ឲ្យ​ប្រជា​ពលរដ្ឋ​មាន​ការ​ភ្ញាក់​ផ្អើល​មាតា​បិតា​ពេញ​មួយ​រាជធានី ដែល​បង្ហាញ​ពី​ភាព​ធ្វេស​ប្រហែស និង​អសុវត្ថិភាព​ក្នុង​ការ​ការពារ​ទារក​ដែល​ទើប​នឹង​កើត​នៅ​តាម​មន្ទីរពេទ្យ រដ្ឋ និង​គ្លីនិក​ឯកជន​។ បើ​ទោះ​បី​ជា​ករណី​លួច​ទារក​នៅ​តាម​មន្ទីរពេទ្យ​រដ្ឋ ឬ​ក៏​គ្លីនិក​ឯកជន កើត​មាន​ឡើង​ដោយ​កម្រ​ក៏​ដោយ តែ​ការ​ប្រព្រឹត្ត​បែប​នេះ​មិនមែន​ជា​ការ​បាត់​របស់​របរ សម្ភារ​ប្រើ​ប្រាស់​ទេ គឺជា​ការ​បាត់បង់​មនុស្ស​ជាទី​ស្រឡាញ់​ធ្វើ​ឲ្យ​ប៉ះពាល់​ដល់​អារម្មណ៍​របស់​ម្តាយ​ឪពុក​គ្រប់ៗ​រូប។

ជាង​នេះ​ទៅ​ទៀត​សម័យ​នេះ​ទៅ​ហើយ វា​មិន​មែន​ជា​ការ​បែក​គ្នា​ដោយ​ចៃដន្យ ដូចជា ព្រឹត្តិការណ៍​កាល​ពី​សម័យ លន់ នល់ ក៏​ដូចជា សម័យ ប៉ុល ពត ហើយ​ក៏​បែក​គ្នា​បន្ទាប់​ពី​សម័យ ប៉ុល ពត ដែល​ធ្វើ​ឲ្យ​ប្រជា​ពលរដ្ឋ​ខ្មែរ​ជាច្រើន​គ្រួសារ​ព្រាត់​ប្រាស​កូន​ចៅ ប្តី​ប្រពន្ធ​គ្នា បង្ក​ជា​ការ​យំ​សោក​ពេញ​ផ្ទៃ​ប្រទេស​នោះ​ទេ។

កន្លង​មក ក្រសួង សុខាភិបាល ប្រឹង​ប្រែង​ធ្វើ​កំណែ​ទម្រង់​យ៉ាង​ច្រើន​ដើម្បី​កាត់​បន្ថយ​អត្រា​ស្លាប់​ម្តាយ និង​កុមារ។ នៅ​ឆ្នាំ ២០០៥ អត្រា​ស្លាប់​ម្តាយ ៤៧២ នាក់​ក្នុង​ចំណោម​កុមារ​កើត​រស់ ១០ ម៉ឺន​នាក់ នៅ​ឆ្នាំ ២០១០ អត្រា​នេះ​បាន​ធ្លាក់​មក​ត្រឹម ២០៦ នាក់ ក្នុង​ចំណោម​កុមារ​កើត​មក​រស់ ១០ ម៉ឺន​នាក់ ចំណែក​អត្រា​ស្លាប់​របស់​ទារក​វិញ​ក៏​មាន​ការ​ធ្លាក់​ចុះ​ច្រើន​ដែរ​គឺ អត្រា​ទារក​ស្លាប់ ៦៦ នាក់​ក្នុង​ទារក ១ ពាន់​នាក់​នៅ​ឆ្នាំ ២០០៥ ថយ​ចុះ​មក​ត្រឹម ៤៥ នាក់​នៃ​ទារក ១ ពាន់​នាក់ នៅ​ឆ្នាំ ២០១០ (CDHS, 2005 & 2010)។ នេះ​គឺជា​ជោគជ័យ​មួយ​ដ៏​ធំ​ធេង​របស់​រាជ​រដ្ឋាភិបាល ចំពោះ​សូចនាករ ២ ក្នុង​ចំណោម​សូចនាករ ៩ នៃ​គោលដៅ​សហស្សវត្យរ៍​របស់​កម្ពុជា​ឆ្នាំ ២០១៥ (CMDG 2015)។ តែ​ការ​គ្រប់​គ្រង​នៅ​តាម​បណ្តា​មន្ទីរពេទ្យ​ក្តី មណ្ឌល​សុខភាព​ក្តី មួយ​ចំនួន​ធំ​គឺ​នៅ​មាន​ភាព​រញ៉េ​រញ៉ៃ គ្មាន​សណ្តាប់ធ្នាប់ មាន​តាំង​ពី​របៀប​របប​ធ្វើ​ការ​នៅ​មាន​ការ​យឺតយ៉ាវ គ្រូពេទ្យ​មិន​សូវ​ចេះ​ទទួល​រាក់ទាក់​អ្នក​ជំងឺ ដែល​ជា​ហេតុ​នាំ​ឲ្យ​អ្នក​ជំងឺ​មួយ​ចំនួន​សុខ​ចិត្ត​ឆ្លង​ដែន​យក​លុយ​ឲ្យ ពេទ្យ ថៃ ឬ​វៀតណាម ជាដើម។

ចំពោះ​ភ្ញៀវ​មក​សួរ​សុខ​ទុក្ខ អ្នក​ជំងឺ និង​អ្នក​មក​ថែទាំ​អ្នក​ជំងឺ គឺ​ចេញ​ចូល​ដោយ​សេរី។ ការ​គ្មាន​វិន័យ​បែប​ហ្នឹង​ហើយ បាន​ធ្វើ​ឲ្យ​ជន​ឱកាស​និយម ឆ្លៀត​ឱកាស​ចូល​ក្នុង​មន្ទីរពេទ្យ​ដើម្បី​បន្លំ​ធ្វើ​ជា​អ្នក​មក​សួរសុខ ទុក្ខ​អ្នក​ជំងឺ មក​លួច​សម្ភារ​ពី​អ្នក​ជំងឺ និង​អ្នក​មក​កំដរ​អ្នក​ជំងឺ ដូចជា៖ ទូរស័ព្ទ កាបូប​លុយ និង​គ្រឿង​អលង្ការ​ផ្សេងៗ ហើយ​ឈាន​ដល់​ចូល​លួច​ទារក​ទៀត។ ភាព​អសកម្ម​ទាំង​នេះ​ធ្វើ​ឲ្យ​មិន​ទុក​ចិត្ត​ពី​អតិថិជន​ចំពោះ​សេវា សាធារណៈ។

បន្ទាប់​ពី​បាត់បង់​ទារក​ភ្លាមៗ​កាល​ពី​សប្តាហ៍​មុន​នេះ មាន​មតិ​របស់​ប្រជា​ពលរដ្ឋ​ចំពោះ​ហេតុផល​ខុសៗ​គ្នា ក្នុង​ការ​លួច​ទារក​ដ៏​សែន​អាក្រក់​បែប​នេះ ទោះ​បី​វា​មិន​មែន​ជា​សកម្មភាព​ហិង្សា​សាហាវ​ព្រៃផ្សៃ​ក៏​ដោយ​ខ្លះ​លើក​ឡើង​ថា គេ​យក​ទៅ​ចិញ្ចឹម​ខ្លួន​គេ ខ្លះ​ទៀត​ថា អ្នក​លួច​នោះ​ត្រូវ​គេ​ជួល​យក​មក​ចិញ្ជឹម​ក្នុង​គ្រួសារ​ដែល​រៀបការ ច្រើន​ឆ្នាំ​ហើយ​អត់​មាន​កូន ខ្លះ​ទៀត​មក​លួច​ដើម្បី​ធ្វើ​អាជីវកម្ម​ខ្លួន​ឯង​គឺ​បី​ទារក​ដើរ សុំ​ទាន​ភ្ញៀវ​បរទេស​នៅ​តាម​មាត់​ទន្លេ ខ្លះ​ទៀត​ថា​ចិញ្ចឹម​ទុក​លក់​បន្ត​ទៀត ឬ​ក៏​ចិញ្ចឹម​ទុក​លក់​ក្រលៀន ជាដើម។ល។

ហេតុ​ដូច​នេះ​ហើយ រាជ​រដ្ឋាភិបាល និង​សេវា​គ្លីនិក​ឯកជន​ទាំង​អស់​គួរ​ចាត់​វិធានការ​ជា​បន្ទាន់​ដើម្បី​លុប​បំបាត់​អំពើ​អមនុស្ស​ធម៌​បែប​នេះ​ចេញ​ពី​សង្គម​របស់​យើង​តាម​រយៈ​វិធាន ការ​ខ្លះៗ​ដូច​ខាង​ក្រោម៖

១-តាម​ផ្លូវ​ច្បាប់៖ បើ​ចាប់​បាន​អ្នក​លួច​ទារក​បែប​នេះ គឺ​កាត់​ទោស​ឲ្យ​បាន​ធ្ងន់ធ្ងរ ពីព្រោះ​ការ​លួច​កូន មិន​មែន​ដូច​ការ​លួច​ម៉ូតូ ទូរស័ព្ទ​ទំនើបៗ​នោះ​ទេ គឺ​អាច​ចោទ​ប្រកាន់​ជន​ល្មើស​តាម​ច្បាប់​ប្រឆាំង​នឹង​ការ​ជួញ​ដូរ​មនុស្ស​បាន។ ដូច​ស្ត្រី​ដែល​បាន​លួច​ទារក​នៅ​មន្ទីពេទ្យ​បង្អែក មាន​ជ័យ នេះ ចាប់​បាន​ពីរ​ថ្ងៃ​បន្ទាប់​ហើយ នៅ​ប៉ុស្តិ៍​ប៉ូលិស​សង្កាត់ ទឹកថ្លា សមត្ថកិច្ច​កំពុង​តែ​កសាង​សំណុំ​រឿង​ទៅ​តុលាការ​កាត់​ទោស​តាម​ផ្លូវ​ច្បាប់។

២-មន្ទីរពេទ្យ​រដ្ឋ និង​គ្លីនិក​សម្ភព​ឯកជន៖ គួរ​ពង្រឹង​សុវត្ថិភាព​អង្គភាព​របស់​ខ្លួន​តាម​វិធានការ ដូច​ខាង​ក្រោម​៖

- ត្រូវ​មាន​ការ​ត្រួត​ពិនិត្យ​ឲ្យ​បាន​តឹងរ៊ឹង​រាល់​ភ្ញៀវ​ចេញ​ចូល​មន្ទីរពេទ្យ ឬ​ក៏​គី្លនិក​ឯកជន គឺ​ត្រូវ​កត់ត្រា​ឈ្មោះ និង​លេខ​អត្ត​សញ្ញាណប័ណ្ណ ឬ​ក៏​កាត​មន្ត្រី​រាជការ ហើយ​កក់​ទុក​នៅ​ប៉ុស្តិ៍​យាម​ច្រក​ចេញ​ចូល រួច​ហើយ​ពេល​ចេញ​សឹម​សង​កាត​វិញ។

- ត្រូវ​ពិនិត្យ​ប័ណ្ណ​បញ្ជាក់​ចេញ​ចូល​ត្រឹម​ត្រូវ​ចំពោះ​ស្រ្តី ឬ​បុរស​ណា​មួយ​ដែល​បី​ទារក​ចេញ​ពី​មន្ទីរពេទ្យ​ក្តី មណ្ឌល​សុខភាព​ក្តី​ឬ​ក៏​ពី​គ្លីនិក​ឯកជន​ក្តី បើ​ទោះ​បី​ជា​មក​ទទួល​ថ្នាំ​បង្ការ​ក៏​ត្រូវ​បង្ហាញ​ប័ណ្ណ​លឿង​របស់​កុមារ​នោះ​ដែរ។

- ត្រូវ​បំពាក់​កាមេរ៉ា និង​សញ្ញា​អាសន្ន ដើម្បី​ធ្វើការ​ត្រួត​ពិនិត្យ និង​តាម​ដាន​រាល់​សកម្មភាព ប្រចាំ​ថ្ងៃ​ទាំង​អស់​ដើម្បី​ទុក​ផ្តល់​ទិន្នន័យ​ទៅ​សមត្ថកិច្ច​ធ្វើការ​ស្រាវជ្រាវ និង​ស៊ើប​អង្កេត​ប្រសិន​បើ​មាន​ករណី​បទ​ឧក្រិដ្ឋ​ណា​មួយ​កើត​មាន​ឡើង​នៅ​ទីនោះ។

- ត្រូវ​កំណត់​ចំនួន​ភ្ញៀវ​ដែល​ចូល​មក​សួរសុខ​ទុក្ខ​អ្នក​ជំងឺ​ម្តងៗ និង​អ្នក​មក​សម្រាក​ថែទាំ​អ្នក​ជំងឺ ដើម្បី​កុំ​ឲ្យ​មាន​ភាព​រញ៉េរញ៉ៃ និង​ជា​ការ​បង្ការ​ចំពោះ​ជន​ឱកាស​និយម​មាន​បំណង​លួច។ ការ​ដែល​បន្ថយ​ចំនួន​សាច់​ញាតិ​ដែល​មក​សួរ​សុខ​ទុក្ខ​ក៏​អាច​ជា​វិធានការ​ជួយ​កុំ​ឲ្យ​មាន​រោគ​ឆ្លង​ពី​អ្នក​ជំងឺ​ទៅ​ភ្ញៀវ​ផង​ដែរ។

- ត្រូវ​បង្កើត​សេវា​បង់​ថ្លៃ​សមរម្យ​ចំពោះ​ការ​ងូត​ទឹក​ឲ្យ​ទារក​ជា លក្ខណៈ​ឯកជន។ បច្ចុប្បន្ន​នៅ​គ្លីនិក​ឯកជន​ខ្លះ មាន​គ្រូពេទ្យ​ងូត​ទឹក​ឲ្យ​ទារក​នៅ​ក្នុង​បន្ទប់​របស់​ម្តាយ​សម្រាក​តែ ម្តង​ដើម្បី​ឲ្យ​អ្នក​ម្តាយ និង​ក្រុម​គ្រួសារ​ប្រាកដ​ថា កូន​ជា​ទី​ស្រឡាញ់​របស់​ខ្លួន​គឺ​ស្ថិត​នៅ​ជាមួយ​គាត់​ជានិច្ច។

៣- ម្តាយ​ឪពុក ឬ​ក្រុម​គ្រួសារ​របស់​ទារក៖ ត្រូវ​ប្រយ័ត្ន​ប្រយែង​គ្រប់​ពេល​វេលា​នៅ​មន្ទីរពេទ្យ ឬ​ក៏​នៅ​គ្លីនិក​ឯកជន​ចំពោះ​ការ​ថែទាំ និង​ការ​ការពារ​ទារក មិន​ត្រូវ​ទុក​ចិត្ត​អ្នក​ដទៃ​ដែល​មិន​ស្គាល់​សោះ មក​សុំ​ព ឬ​ក៏​យក​ទៅ​ងូត​ទឹក​ឲ្យ​នោះ​ទេ។ បើ​ទោះ​បី​ជា​នៅ​ពេល​គ្រូពេទ្យ​យក​កូន​ទៅ​ងូត​ឲ្យ ក៏​ដោយ​ក៏​តាម​មើល​ជាប់​ជានិច្ច ដើម្បី​ឲ្យ​ច្បាស់​ថា ការ​ចាក​ចេញ​ពី​មន្ទីរពេទ្យ​រដ្ឋ ឬ​ក៏​គ្លីនិក​ឯកជន​ថា ទារក​នោះ​ជា​កូន​របស់​ម្តាយ​ពិត​ប្រាកដ៕

ចូល​រួម​ផ្តល់​យោបល់​តាម​រយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ