Search form

Login - Register | FOLLOW US ON

Logo of Phnom Penh Post newspaper Phnom Penh Post - ដើម្បី​សុវត្ថិភាព​ម្ចាស់​ផ្ទះ​ និង​ខុនដូ​ជួល​ស្នាក់​នៅ ​​ចាំបាច់​ត្រូវ​រាយការណ៍​ទៅ​អាជ្ញាធរ​ដែនដី

Content image - Phnom Penh Post
បន្ទប់​ជួល​សម្រាប់​កម្មករ-កម្មការិនី​រោងចក្រ​នៅក្នុង​រាជធានី​ភ្នំពេញ។ ផា លីណា

ដើម្បី​សុវត្ថិភាព​ម្ចាស់​ផ្ទះ​ និង​ខុនដូ​ជួល​ស្នាក់​នៅ ​​ចាំបាច់​ត្រូវ​រាយការណ៍​ទៅ​អាជ្ញាធរ​ដែនដី

«បី​មិន​មួយ​រាយការណ៍!» គឺជា​ការ​ប្តេជ្ញា​ចិត្ត​អនុវត្ត​ពាក្យ​ស្លោក​នេះ​ដើម្បី​សុវត្ថិភាព​ជូន​ប្រជាជន និង​ប្រទេស​ជាតិ​កាលពី​របប​កុម្មុយនីស្ត​សាធារណរដ្ឋ​ប្រជាមានិត​កម្ពុជា​នៅ​ទសវត្សរ៍​ឆ្នាំ​ ៨០ ​ដែល​សង្គ្រាម​នៅ​តាម​ព្រំដែន​ជាមួយ​នឹង​ពួក​ឧទ្ទាម​ខ្មែរ​ក្រហម ម៉ូលីណាកា និង​សេរីការ។

ពាក្យ​ស្លោក​នេះ​មាន​ន័យ​ថា៖ «បី​មិន​គឺ ទី ១.មិន​លាក់​ខ្មាំង ទី២.មិន​ផ្តល់​ស្បៀង​ឲ្យ​ខ្មាំង ទី៣.​មិន​ជឿ​ឃោសនា​ខ្មាំង។ រីឯ​មួយ​រាយការណ៍​គឺ​ឃើញ​ខ្មាំង​នៅ​ទីណា ឬ​ក៏​អ្នក​ថ្មី​មក​ស្នាក់​នៅ​បណ្តោះអាសន្ន​ត្រូវ​រាយការណ៍​ជូន​រដ្ឋ»។

កាល​នោះ​ការ​អនុវត្ត​សុវត្ថិភាព​សង្គម​បាន​ល្អ​ដោយសារ​មាន​បម្រាម​គោចរ​ម៉ោង​ ៨:៣០ ​យប់​បិទ​ចរាចរណ៍​ទូទាំង​ប្រទេស បើ​ធ្វើការ​ប្រៀបធៀប​ការ​អនុវត្ត​សុវត្ថិភាព «បី​មិន​មួយ​រាយការណ៍!» ជាមួយ​នឹង​ការ​អនុវត្ត​គោលនយោបាយ​ «ភូមិ-ឃុំ មាន​សុវត្ថិភាព!» បច្ចុប្បន្ន​ដែល​ដេក​ដើរ​ហើរ​ម៉ោង​ប៉ុន្មាន​ក៏​បាន​ដែរ​នោះ ​គឺ​ការ​អនុវត្ត​ភូមិ​ឃុំ​មាន​សុវត្ថិភាព​យ៉ាប់​ជាង​ឆ្ងាយ​ណាស់។

ដោយសារ​តែ​ស្ថានភាព​ខុស​គ្នា ហើយ​​​អាជ្ញាធរ​ដែនដី​ក្តាប់​ស្ថានការណ៍​មិន​បាន​ណែន​ល្អ ជាពិសេស​គឺ​ការ​ខ្វះខាត​ការ​ចូលរួម​ពី​ប្រជាពលរដ្ឋ​ដែល​ធ្វើ​សកម្មភាព​ជួល​ផ្ទះ​ស្នាក់នៅ និង​ជួល​ខុនដូ​ស្នាក់នៅ​មិន​បាន​រាយការណ៍​អ្នក​មក​ជួល​ទីកន្លែង​ស្នាក់នៅ​នោះ​ជូន​អាជ្ញាធរ​ដែនដី​ហើយ​ការ​ចោទ​ប្រកាន់​ទៅ​លើ​ភាព​ទន់ខ្សោយ​របស់​អាជ្ញាធរ​ដែន​ដី​ចំពោះ​បញ្ហា​សុវត្ថិភាព​ដែល​កើត​មាន​ជា​រឿយៗ។

តែ​សំណួរ​សួរ​ថា តើ​ម្ចាស់​ផ្ទះ ជួល​ផ្ទះ និង​ខុនដូ​ជួល​ស្នាក់នៅ​ដែល​មាន​តម្លាភាព​ក្នុង​ការ​រាយការណ៍​ប្រភេទ​មនុស្ស​មក​ស្នាក់នៅ​ជូន​សមត្ថកិច្ច​ហើយ​ឬ​នៅ? នៅពេល​ដែល​ជួល​ផ្ទះ​ក៏​ដូចជា​ខុនដូ​ទៅ​ភ្ញៀវ​នោះ។

សព្វ​ថ្ងៃ​នេះ​ជាទូទៅ​មាន​ភាព​រញ៉េរញ៉ៃ​ពេល​ខ្លះ​ក៏​ឈ្លោះ​គ្នា​រវាង​ភ្ញៀវ​ជួល​ផ្ទះ និង​ម្ចាស់​ផ្ទះ ឬ​ក៏​ភ្ញៀវ​ជួល​ខុនដូ និង​ម្ចាស់​ខុនដូ​តែ​មិន​ហ៊ាន​ទៅ​ប្តឹង​នឹង​អាជ្ញាធរ​ដែនដី​ព្រោះ​ដៃគូ​​ទំនាស់​នឹង​គ្នា​ចុះ​កិច្ចសន្យា​ជា​លាយ​លក្ខណ៍​អក្សរ ឬ​កិច្ចសន្យា​ផ្ទាល់​មាត់​តែ​មិន​ហ៊ាន​ឲ្យ​អាជ្ញាធរ​ដឹង​ឮ​ទេ​ព្រោះ​ខ្លាច​បែក​ទ្រព្យ​កំពុង​តែ​កាក់កប​ប្រមូល​លុយ​បាន​រៀងរាល់​ខែ​ផង​នោះ។

តែ​នៅ​ពេល​ដែល​មាន​បញ្ហា​កើតឡើង​ដូច​ជា​អ្នក​ជួល​ផ្ទះ ឬ​ក៏​ខុនដូ​នោះ​ជា​ជនល្មើស​ប្រើប្រាស់​គ្រឿងញៀន ជួញដូរ​គ្រឿងញៀន ចោរ​លួច ចោរ​ប្លន់ ឬ​ក៏​ឃាតករ​ហើយ​ត្រូវ​សមត្ថកិច្ច​ស៊ើបអង្កេត​ឈាន​ដល់​ការ​ចាប់​ខ្លួន​ជនល្មើស​ទាំង​នៅ​ក្នុង​ផ្ទះ ឬ​ក៏​មាន​ការ​ប្រមូល​ភ័ស្តុតាង​នៅ​ក្នុង​ផ្ទះ ឬ​ក៏​បន្ទប់​ជួល​ខុនដូ​នោះ​គឺ​សមត្ថកិច្ច​ចាប់​ផ្តើម​ធ្វើក ម្ចាស់​ផ្ទះ​វិញ​ម្តង​ហើយ​ព្រោះ​កិច្ចសន្យា​ជួល​ផ្ទះ ឬ​ក៏​បន្ទប់​ខុនដូ​នោះ​គឺ​តែ​ពីរ​ភាគី​នោះ​ទេ អាជ្ញាធរ​ដែនដី​មិន​បាន​ដឹង​ឮ​ទេ។ អ៊ីចឹង​ជនល្មើស​ធ្វើ​សកម្មភាព​នៅ​ក្នុង​ផ្ទះ​ហ្នឹង ឬ​ក៏​ខុនដូ​ហ្នឹង អាជ្ញាធរ​មាន​សិទ្ធិ​បិទ​មួយ​រយៈ​មិន​ឲ្យ​ចូល​រស់នៅ ឬ​ក៏​លក់​នោះ​ទេ​ចាំ​រហូត​ដល់​ពេល​កំណត់​ណា​មួយ​ពាក់ព័ន្ធ​សាលក្រម​តុលាការ​ដែល​អាច​តដល់​តុលាការ​កំពូល​ទៀត​ក៏​ថា​បាន​ដល់​ចប់​សព្វ​គ្រប់​ដោយ​យក​លេស​ថា​ផ្ទះ​នេះ ឬ​ក៏​ខុន​ដូ​នេះ​ជាប់​ពាក់ព័ន្ធ​ទៅ​នឹង​បទល្មើស​ជាក់ស្តែង។ អ៊ីចឹង​ករណី​នេះ​ម្ចាស់​ផ្ទះ​ជួល ឬ​ក៏​ម្ចាស់​ខុនដូ ខាត​ទាំង​ចុង ខាត​ទាំង​ដើម។

ឧទាហរណ៍​ដូច​ករណី​ថ្មីៗ​នេះ​នៅ​ខណ្ឌ​ឫស្សីកែវ ស្ត្រី​ដែល​ជា​ម្ចាស់​ផ្ទះ​បាន​ជួល​ទៅ​ឲ្យ ២ នាក់​ប្តី-ប្រពន្ធ​រស់នៅ តែ​មាន​កិច្ចសន្យា​ត្រឹម​ពីរ​ភាគី​អ្នក​ជួល និង​ម្ចាស់​ផ្ទះ​ទេ​មិន​បាន​ដាក់​ពាក្យ​សុំ​ទៅ​អាជ្ញាធរ​ដែនដី​ដឹងឮ​នោះ​ឡើយ​ដោយសារ​ខ្លាច​អស់​លុយ​បែក​ទ្រព្យ​ទៅ​អាជ្ញាធរ​ចាំ​តែ​យក​លុយ​ប្រចាំ​ខែ​ស្រាប់​​នោះ។

នៅ​ពេល​ដែល​សមត្ថកិច្ច​សហការ​ជាមួយ​នឹង​អាជ្ញាធរ​ដែនដី​ចាប់​ ២ ​នាក់​ប្តី-ប្រពន្ធ​ដែល​ជា​អ្នក​ជួល​ផ្ទះ​នោះ​ជា​ជនល្មើស​ដែល​បាន​ជួញដូរ​គ្រឿងញៀន​គឺ​សមត្ថកិច្ច​ប្រមូល​ទ្រព្យ​របស់របរ​ម្ចាស់​ផ្ទះ​ស្ត្រី​ធ្វើ​ជា​ភ័ស្តុតាង តាំងពី​ទូទឹកកក តុ កៅអី និង​ឯកសារ​ពាក់ព័ន្ធ​ពោល​គឺ​ប្រមូល​ទាំងអស់​ហើយ​ព្រះរាជអាជ្ញា​យក​ដីកា​មក​បិទ​មុខ​ផ្ទះ​ស្ត្រី​នោះ​គឺ​មិន​អនុញ្ញាត​ឲ្យ​ចូល​នៅ ជួល និង​លក់​ផ្ទះ​ទៅ​ឲ្យ​អ្នក​ដទៃ។

ករណី​មួយ​ទៀត​នោះ​ដែល​ខ្ញុំ​ធ្លាប់​ជួយ​រត់​ឯកសារ​ឲ្យ​មិត្តភក្តិ​ដែល​ជា​ជនបរទេស​ធ្លាប់​ធ្វើការ​នៅ​ស្រុក​ខ្មែរ និង​រស់នៅ​ខណ្ឌ​ដូនពេញ ម្ចាស់​ផ្ទះ​ជួល​ផ្ទះ​ទៅ​ឲ្យ​ជនបរទេស​ ២ នាក់​គូសង្សារ​នឹង​គ្នា​នៅ​ក្នុង​កិច្ចសន្យា​ជួល​ផ្ទះ​តែ​ពីរ​ភាគី​ទេ​គឺ​អ្នក​ជួល និង​ម្ចាស់​ផ្ទះ​មិន​បាន​បំពេញ​សំណុំ​ឯកសារ​បែបបទ​របស់​អាជ្ញាធរ​សង្កាត់​ទេ។ តែ​ដល់​ពេល ២ នាក់​សង្សារ​នោះ​ចង់​ធ្វើការ​រៀបការ​នៅ​ប្រទេស​គាត់​តែ​អាជ្ញាធរ​នៅ​ស្រុក​គេ​នោះ​តម្រូវ​ឲ្យ ២ នាក់​នោះ​បង្ហាញ​​​លិខិត​ថ្កោលទោស​ពី​ក្រសួង​យុត្តិធម៌​ដែល​ខ្លួន​ស្នាក់នៅ​ក្នុង​ប្រទេស​កម្ពុជា។

នៅក្នុង​ទម្រង់​សំណុំ​បែបបទ​ក្នុង​លិខិត​ថ្កោលទោស​នោះ​តម្រូវ​ឲ្យ​មាន​ការ​ចុះ​ហត្ថលេខា​ទទួល​ស្គាល់​ពី​អាជ្ញាធរ​ដែនដី​ដែល​ខ្លួន​បាន​ស្នាក់​នៅក្នុង​ព្រះរាជាណាចក្រ​កម្ពុជា នៅ​ពេល​មក​ដល់​ចៅសង្កាត់​ផ្សារចាស់ គាត់​ថា​មិន​ទទួល​ស្គាល់​ទេ​ព្រោះ​នៅ​ក្នុង​កិច្ចសន្យា​ជួល​ផ្ទះ​នោះ​ពុំ​មាន​ឈ្មោះ​គាត់​ទទួល​ស្គាល់​ផង។

បន្ទាប់មក​ដំណោះស្រាយ​ចៅសង្កាត់​ជួយ​សម្រួល​បាន​តែ​ម្ចាស់​ផ្ទះ​ត្រូវ​បំពេញ​កិច្ចសន្យា​ទទួល​ខុសត្រូវ​មួយ​សន្លឹក និង​ពិន័យ​បន្ថែម​លើ​តម្លៃ​ដែល​ត្រូវ​បង់​ឲ្យ​សេវា​សាធារណៈ​ហើយ​លោក​ចៅសង្កាត់​​ធ្វើការ​ព្រមាន​ជា​លាយលក្ខណ៍​អក្សរ​មិន​អនុញ្ញាត​ឲ្យ​កើត​មាន​ជា​លើក​ទី ២ ​ទៀត​ទេ និង​មាន​ការ​ស្តីបន្ទោស​ទៅ​ម្ចាស់​ផ្ទះ ហេតុ​អ្វី​បាន​ជា​ដឹង​ពី​ច្បាប់​ជួល​ផ្ទះ​ឲ្យ​ជនបរទេស​ហើយ​មិន​រាយការណ៍​មក​អាជ្ញាធរ និង​ធ្វើការ​បំពេញ​សំណុំ​បែបបទ​ទៅ​តាម​លក្ខខណ្ឌ​នៃ​ការ​អនុញ្ញាត​ឲ្យ​ជួល​នោះ? ហើយ​ធ្វើ​ឲ្យ​ស្ទះ​ដំណើរ​ការ​សុំ​លិខិត​ថ្កោលទោស​របស់​ជនបរទេស​ទៀត​ផង។

លោក​បន្ត​ព្រមាន​ទៅ​ម្ចាស់​ផ្ទះ​ទៀត​ថា បើ​ជនបរទេស ២ នាក់​ហ្នឹង​ប្រព្រឹត្ត​បទល្មើស​ពាក់ព័ន្ធ​ទៅ​នឹង​ផ្ទះ​នេះ​គឺ​ផ្ទះ​នេះ​ក៏​ជាប់​ពាក់ព័ន្ធ​ដែរ​។

កាលពី​មុន​ប៉ូលិស និង​ប៉េអឹម​មាន​ការ​ត្អូញត្អែរ​មាន​ការ​លំបាក​ពាក់ព័ន្ធ​ទៅ​នឹង​ការ​ស៊ើបអង្កេត​ជនល្មើស​ទាំង​ខ្មែរ​ទាំង​បរទេស​ទៅ​លើ​ការ​ប្រើប្រាស់​ប្រព័ន្ធ​ទូរស័ព្ទ​ដែល​ចែក​ស៊ីមកាត​ឲ្យ​ដោយ​មិន​បាន​បំពេញ​សំណុំ​បែបបទ​អត្តសញ្ញាណ​របស់​អ្នក​ប្រើប្រាស់​នោះ។

ឥឡូវ​ចូល​ដល់​បញ្ហា​ស្មុគស្មាញ​ទៅ​លើ​ការ​ជួល​ផ្ទះ ឬ​ខុនដូ​ដែល​ម្ចាស់​មិន​បាន​រាយការណ៍ និង​បំពេញ​សំណុំ​បែបបទ​នៃ​ការ​ជួល​ស្នាក់​នៅ​ទៅ​អាជ្ញាធរ​នៅ​ពេល​ដែល​បទ​ឧក្រិដ្ឋ​កើតឡើង​មាន​ការ​លំបាក​ស្រាវជ្រាវ​អំពី​អត្តសញ្ញាណ​​របស់​ជនល្មើស​ទាំង​ខ្មែរ ទាំង​បរទេស​ដែល​អាច​ស៊ី​ពេល​យូរ​ក្នុង​ស៊ើបអង្កេត ឬ​ក៏​ជា​ការ​ផ្តល់​ឱកាស​ឲ្យ​ជនល្មើស​ទាំង​នោះ​ធ្វើ​សកម្មភាព​បទល្មើស​ផ្សេង​ទៀត។

បើ​នៅ​ប្រទេស​ថៃ​វិញ​គឺ​គេ​ស្រង់​ទិន្នន័យ​ពី​ប៉ាស្ព័រ​ពី​ភ្ញៀវ​ជនបរទេស​ទាំងអស់ និង​នៅ​ប្រទេស​វៀតណាម​វិញ យប់​ឡើង​គឺ​ប៉ូលិស​ដើរ​ប្រមូល​ប៉ាស្ព័រ​យក​ទុក​បាត់ ព្រលឹម​ឡើង​បាន​ឲ្យ​វិញ។

ហេតុ​ដូច្នេះ​ការ​បំពេញ​សំណុំ​​ឯកសារ​ទៅ​តាម​ច្បាប់​នៅ​សង្កាត់ ឬ​នៅ​ខណ្ឌ​ទៅ​តាម​ទំហំ​ដែល​បាន​កំណត់​គឺ​មាន​សារៈសំខាន់​ណាស់​ទាំង​ម្ចាស់​ផ្ទះ​ជួល និង​ខុនដូ​ជួល​គឺ​មិន​ត្រឹម​តែ​ចុះកិច្ចសន្យា​ភាគី​ទាំង​ ២ ​រវាង​ម្ចាស់​ផ្ទះ និង​អ្នក​ជួល​នោះ​ទេ​ក៏​មាន​ការ​ដឹងឮ​ពី​អាជ្ញាធរ​ផង​ដែរ តម្រូវ​កំណត់​លក្ខខណ្ឌ​ឲ្យ​បាន​ច្បាស់​នៅ​ក្នុង​កិច្ចសន្យា​ជួល​នោះ​ដែល​មិន​ពាក់ព័ន្ធ​បទល្មើស​ណា​មួយ​ជាមួយ​នឹង​ផ្ទះ ឬ​ក៏​ខុនដូ និង​អ្នក​ជួល​ដែល​ជា​អ្នក​ប្រព្រឹត្ត​បទល្មើស​នោះ។

បើ​មាន​បញ្ហា​កើតឡើង​អាជ្ញាធរ​អាច​ចូលរួម​ដោះស្រាយ​បាន និង​ជា​ការ​បង្ហាញ​ការ​ចូលរួម​អន្តរាគមន៍​ដើម្បី​សុវត្ថិភាព​សង្គម​ទាំងអស់​គ្នា​ហើយ​ក៏​បង្ក​​ភាព​ងាយស្រួល​ដល់​ជនបរទេស​ផង​ដែរ​ក្នុង​ការ​តម្រូវការ​ឯកសារ​យោង​ជួយ​សម្រួល​ក្នុង​ការ​រត់​ឯកសារ​ផ្សេង​ផង​ដែរ។ ជា​ជាង​ចាំ​តែ​បន្ទោស​គ្នា​ទៅវិញ​ទៅមក​រវាង​អ្នក​អនុវត្ត​ច្បាប់ និង​អ្នក​គោរព​ច្បាប់​យក​ត្រូវ​រៀងៗ​ខ្លួន​នោះ​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment