Search form

Login - Register | FOLLOW US ON

Logo of Phnom Penh Post newspaper Phnom Penh Post - តើ​គោលនយោបាយ​ប្រាក់​ចូលនិវត្តន៍​ និយោជិត​​នៅ​វិស័យ​ឯកជន និង​ NGOs ដល់​ណា​ហើយ?

Content image - Phnom Penh Post
មន្ត្រី​រាជការ​ដែល​នឹង​ទទួល​ប្រាក់​ចូលនិវត្តន៍​ចូលរួម​នៅ​ក្នុង​ពិធី​មួយ​នាពេល​កន្លង​មក​។ ហេង ជីវ័ន

តើ​គោលនយោបាយ​ប្រាក់​ចូលនិវត្តន៍​ និយោជិត​​នៅ​វិស័យ​ឯកជន និង​ NGOs ដល់​ណា​ហើយ?

ពី​មួយ​ថ្ងៃ​ទៅ​មួយ​ថ្ងៃ ឮ​តែ​បុគ្គលិក​អង្គការ​មិនមែន​រដ្ឋាភិបាល និង​បុគ្គលិក​បម្រើ​សេវា​ឯកជន​ត្អូញត្អែរ​ថា​គាត់​ខំបង់​ពន្ធ​លើ​ប្រាក់​ខែ​គាត់​ជូន​រដ្ឋ​រាល់​ខែ​នៅ​ពេល​បច្ចុប្បន្ន​នេះ​។

តែ​រដ្ឋ​វិញ​មិន​បាន​គិតគូរ​ពី​គាត់​ទេ ពេល​ណា​គាត់​ចាស់​ចូលនិវត្តន៍​ទៅ​បាន​ទទួល​ដូច​មន្ត្រី​រាជការ​ស៊ីវិល​ដែរ​ទេ?

បើ​តាម​ច្បាប់​ស្តីពី​របប​សន្តិសុខ​សង្គម​សម្រាប់​ជន​ទាំងឡាយ​ណា​ដែល​ស្ថិត​នៅ​ក្រោម​បទប្បញ្ញត្តិ​នៃ​ច្បាប់​ស្តីពី​ការងារ​ដែល​រដ្ឋសភា​អនុម័ត​តាំងពី​ឆ្នាំ​ ២០០២​ នៅ​ជំពូក​ទី​ ២ ផ្នែក​ប្រាក់​សោធន​មាន​ចែង​មាត្រា​មួយ​ចំនួន​តែ​មាត្រា ៨ បាន​ចែង​ពី​នីតិវិធី​ក្នុង​ការ​ចូល​ជា​សមាជិក​បេឡា​ជាតិ​របប​សន្តិសុខ​សង្គម​ (ប.ស.ស) ៖

ចំណុច​ទី ១-សមាជិក ប.ស.ស ដែល​មាន​អាយុ ៥៥ ឆ្នាំ​មាន​សិទ្ធិ​ទទួល​នូវ​ប្រាក់​សោធន ជរាភាព ប្រសិន​បើ​ជន​នោះ​បាន​បំពេញ​លក្ខខណ្ឌ​ដូច​តទៅ​៖ ចំណុច ក.) ចុះ​ឈ្មោះ​ក្នុង​បញ្ជី​នៃ ប.ស.ស ក្នុង​ថិរវេលា​យ៉ាង​តិច​ (២០) ឆ្នាំ​។ ចំណុច ខ.) បាន​បង់​វិភាគទាន​តិច​បំផុត​ហុកសិប​​ (៦០) ​ខែ​សម្រាប់​របប​សន្តិសុខ​សង្គម​ក្នុង​អំឡុង​ពេល​ដប់​ (១០) ​ឆ្នាំ​ចុងក្រោយ​គិត​រហូត​មក​ដល់​កាលបរិច្ឆេទ​ដែល​មាន​សិទ្ធិ​ត្រូវ​ទទួល​បាន​ប្រាក់​សោធន...»។

របប​ប្រាក់​សោធន​សម្រាប់​ជន​ទាំងឡាយ​​ដែល​ស្ថិត​​​នៅ​ក្រោម​បទប្បញ្ញតិ្ត​នៃ​ច្បាប់ស្តី​ពី​ការងារ​នេះ​រាជរដ្ឋាភិបាល​បាន​រៀបចំ​នូវ​ផែនការ​យុទ្ធសាស្រ្ត​​អភិវឌ្ឍន៍​វិស័យ​ហិរញ្ញវត្ថុ ២០១១-២០២០ ហើយ​គោលនយោបាយ​នេះ​រួម​ចំណែក​លើក​ស្ទួយ​ចំពោះ​ការ​​លើក​ទឹកចិត្ត​​ដល់​កម្លាំង​ពលកម្ម​​ទាំង​​ក្នុង​ផ្នែក​​ឯកជន និង​សាធារណៈ ​ពោល​គឺ​ការ​លុប​បំបាត់​នូវ​ផ្នត់​​គំនិត​ដែល​យល់​ថា​ធ្វើការ​ជា​កម្មករ​​និយោជិត​ផ្នែក​ឯកជន​មិន​មាន​ប្រាក់​​សោធន​ហើយ​មាន​តែ​មន្ត្រី​រាជការ​ក្នុង​​មុខងារ​សាធារណៈ​ទេ​​ដែល​មាន​​របប​ប្រាក់​សោធន។

ដូច្នេះ​របប​ប្រាក់​សោធន​នេះ​គ្រោង​នឹង​រៀបចំ​ដំណើរការ​នា​ចុង​ឆ្នាំ​ ២០១៥ កម្មករ​និយោជិត​ដែល​ធ្វើការ​នៅ​ក្នុង​វិស័យ​ឯកជន​នឹង​ត្រូវ​ទទួល​​បាន​របប​​ប្រាក់​​សោធន​ដូច​​មន្រ្តី​រាជការ​​ផង។ (www.nssf.gov.kh) បើ​តាម​ការ​បកស្រាយ​ការ​លើក​ទឹកចិត្ត​របស់​ស្ថាប័ន​បេឡា​ជាតិ​របប​សន្តិសុខ​សង្គម​នេះ​គឺ​មាន​លក្ខណៈ​ខុស​ប្លែក​ពី​អ្វី​ដែល​ជា​ការ​រំពឹង​ទុក​របស់​បុគ្គលិក​ក្នុង​វិស័យ​ឯកជន និង​អង្គការ​មិន​មែន​រដ្ឋាភិបាល​ថា​លុយ​ដែល​បាន​បង់​ពន្ធ​លើ​ប្រាក់ខែ​របស់​ពួកគាត់​ហ្នឹង​ចាស់​ចូលនិវត្តន៍​គាត់​គួរ​តែ​ទទួល​បាន​វិញ​ខ្លះ។

ឧទាហរណ៍​ថា​បើ​គាត់​មាន​ប្រាក់​ខែ​ ៣០០០ ​ដុល្លារ​គាត់​ត្រូវ​រដ្ឋ​កាត់​ពន្ធ​អស់​​ ១៥ ​ភាគរយ​នៃ​ទឹកប្រាក់​សរុប​នេះ​តែ​អ្វី​ដែល​គាត់​ថា​ បើ​មិន​បាន​ ១៥ ​ភាគរយ​នោះ​វិញ​ទេ​បាន​ត្រឹម​តែ​ ៥ ​ភាគរយ​ក៏​អស់​ចិត្ត​ដែរ​នៅ​ពេល​គាត់​ចាស់​ទៅ​មាន​ន័យ​ថា​កុំ​ឲ្យ​បង់​ទៅ​បាត់ៗ​។

តែ​ការ​បង់​ពន្ធ​លើ​ប្រាក់​បៀវត្សរ៍​វា​ជា​កាតព្វកិច្ច តែ​បង់​ចូល​រដ្ឋ​ទៅ​បាត់​ហើយ​ចេញ​ជា​សេវាសាធារណៈ​ដូចជា សាលារៀន និង​មន្ទីរពេទ្យ​ជាដើម តែ​មិន​រំពឹង​ថា​បាន​ប្រាក់​ចូល​សោធនិវត្តន៍​នៅ​ពេល​ចាស់​នោះ​ទេ។ គឺ​មាន​លក្ខណៈ​ខុស​ប្លែក​ពី​ការ​បង់​ប្រាក់​សោធន​ (Pension Fund) ប្រសិន​បើ​យើង​គោរព​ទៅ​តាម​នីតិវិធី​របស់​ ប.ស.ស គឺ​យើង​នឹង​ទទួល​បាន​មក​វិញ​។

តើ​គោលនយោបាយ​ប្រាក់​សោធន​នេះ​បាន​ដើរ​ដល់​ណា​ហើយ​ដែរ​? ប៉ុន្មាន​អ្នក​ទទួល​បាន​ប្រាក់​សោធន​នេះ​ពេល​ចាស់​ទៅ?​ ឬ​ក៏​ចាប់​តាំងពី​ច្បាប់​អនុម័ត​តាំងពី​ឆ្នាំ ២០០២ ឬ​មួយ​ក៏​មិន​ទាន់​គ្រប់​ ២០ ​ឆ្នាំ​ចូល​ជា​សមាជិក ប.ស.ស ដូច​ច្បាប់​ចែង​នៅ​ឡើយ​មិន​ទាន់​មាន​អ្នក​ណា​បាន​ទទួល​ប្រាក់​សោធន​​ហ្នឹង? ឥឡូវ​បញ្ហា​ការ​បង់​ពន្ធ​លើ​ប្រាក់​ខែ និង​ប្រាក់​សោធន​មាន​លក្ខណៈ​ខុស​គ្នា​អ៊ីចឹង​ហើយ​បាន​អ្នក​បង់​ពន្ធ​លើ​ប្រាក់​ខែ​ខ្លះ​ឲ្យ​តែ​គេ​គេច​បាន​គឺ​គេ​គេច​ហើយ​ព្រោះ​គេ​ស្តាយ​លុយ​បង់​ជូន​រដ្ឋ​ពេល​ចាស់​ទៅ​អត់​មាន​បាន​អី​មក​វិញ​នោះ។

ចំណុច​ហ្នឹង​គឺ​មាន​លក្ខណៈ​ដូច​មេមាន់ និង​កូនមាន់​មួយ​ណា​កើត​មុន​អ៊ីចឹង​រដ្ឋាភិបាល​លើក​ទឹក​ចិត្ត​ឲ្យ​ពលរដ្ឋ​បង់​ពន្ធ​លើ​ប្រាក់​ខែ​គាត់​ជា​កាតព្វកិច្ច​ឯ​ខាង​ពលរដ្ឋ​​​វិញ​ថា​រដ្ឋ​មិន​មាន​យន្តការ​ណា​មួយ​សម្រាប់​ពួកគាត់​ពេល​ចាស់​ទៅ​ តើ​គាត់​បាន​អី​មក​វិញ​នៅ​ពេល​គេ​បង់​ពន្ធ​ហើយ​នោះ​?

ចំពោះ​ករណី​នេះ​មាន​អង្គការ​​មិនមែន​រដ្ឋាភិបាល​ខ្លះ និង​ក្រុមហ៊ុន​ធំៗ​បាន​គិតគូរ​ទៅ​លើ​បុគ្គលិក​របស់​គេ​ដែរ​ចំពោះ​ប្រាក់​សោធន​នោះ​គឺ​គេ​បង់​ពន្ធ​ជូន​រដ្ឋ​ហើយ គេ​ទុក​ប្រាក់​សោធន​ជូន​ទៀត​ទៅ​តាមរយៈ​ពេល​ធ្វើ​ការងារ​គឺ​មាន​ន័យ​ថា​អង្គការ និង​ក្រុមហ៊ុន​ទាំង​នោះ​គេ​ដក​ទុក​ឲ្យ​បុគ្គលិក​គេ​រួច​ហើយ​នៅ​ពេល​ចប់​ការងារ​ពី​ស្ថាប័ន​គេ​មិនមែន​មាន​ន័យ​ថា​យក​ពី​រដ្ឋ​នោះ​ទេ។

បើ​ប្រៀបធៀប​ទៅ​នឹង​សហរដ្ឋអាមេរិក​ដែល​មាន​លក្ខណៈ​ស្មុគស្មាញ​ចំពោះ​ការ​បង់​ពន្ធ​ហើញ​កាត់​បញ្ចូល​រដ្ឋ​ពី​ប្រជាពលរដ្ឋ​ជា​កញ្ចប់​តែ​នៅ​ពេល​ដែល​ចាស់​ចូល​និវត្តន៍​ទៅ​គឺ​រដ្ឋ​គិតគូរ​លើ​ពលរដ្ឋ​គេ​ទៅ​តាម​ហ្នឹង​ដែរ​ទៅ​តាម​តម្លៃ​នៃ​ការ​បង់​ពន្ធ​សរុប​ហើយ​និង​រយៈពេល​ធ្វើ​ការងារ​របស់​គេ។

ហេតុ​ដូច្នេះ​ហើយ​រដ្ឋាភិបាល​កម្ពុជា​គួរ​តែ​ចាប់ផ្តើម​យ៉ាង​ណា​ឲ្យ​មាន​តម្លាភាព​រវាង​ការ​ប្រមូល​ពន្ធ និង​អ្នក​ត្រូវ​បង់​ពន្ធ​លើ​ប្រាក់ខែ និង​ការ​បង់​ប្រាក់​សោធន​នោះ​​ចំពោះ​វិស័យ​ឯកជន និង​អង្គការ​នានា​ដើម្បី​លើក​ទឹកចិត្ត​ពលរដ្ឋ​ឲ្យ​ទៅ​បង់​ពន្ធ​លើ​ប្រាក់​ខែ​នោះ និង​ប្រាក់​សោធន​នោះ​គឺ​រដ្ឋ​គួរ​តែ​បង្កើត​ថវិកា​កញ្ចប់​សម្រាប់​ចំណាយ​មុន​ឲ្យ​ពលរដ្ឋ​បណ្តើរ​មុន​សិន​កុំ​ចាំ​ដល់​ពេល ២០ ​ឆ្នាំ​ឡើង​​ទើប​ទទួល​បាន​ប្រាក់​សោធន​ពេល​ចាស់​ទៅ​នោះ​ហើយ​ចាំ​ប្រមូល​ជា​ក្រោយ​​វិញ។

សូម​បញ្ជាក់​ឡើង​វិញ​ថា​ ការ​បង់​ពន្ធ​លើ​ប្រាក់​ខែ​នេះ​គឺ​មិនមែន​តែ​វិស័យ​ឯកជន និង​អង្គការ​នោះ​ទេ​គឺ​មន្ត្រី​រាជការ​ក៏​តម្រូវ​ឲ្យ​បង់​ពន្ធ​លើ​ប្រាក់​ចំណូល​របស់​គាត់​ផង​ដែរ​ដូច​គ្នា​បើ​ប្រាក់​ខែ​ចាប់​ពី​ ៨០​ ម៉ឺន​រៀល​បូក​នឹង​មួយ​រៀល​ឡើង​ទៅ​តែ​គ្រាន់​តែ​ខុស​គ្នា​ត្រង់​ថា​មន្ត្រី​រាជការ​ចូល​និវត្តន៍​គឺ​ដឹង​តែ​បាន​ប្រាក់​ចូលនិវត្តន៍​ហើយ​ ហើយ​ដំឡើង​ប្រាក់​សោធន​នេះ​ទៅ​តាម​អតិផរណា​ផង​ដែរ៕

ចូលរួម​ផ្តល់​យោបល់​តាមរយៈ​ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ