Search form

Login - Register | FOLLOW US ON

Logo of Phnom Penh Post newspaper Phnom Penh Post - បោះឆ្នោត​ឲ្យ​មេឃុំ ចៅ​សង្កាត់​ណា​ផ្តល់​សេវា​លឿន​ មិន​ពុក​រលួយ

Content image - Phnom Penh Post
កញ្ញា ស៊ិន ចាន់​ពៅរ៉ូហ្ស៊េត បេក្ខ​​នារី​មេឃុំ​គណ​បក្ស​សង្គ្រោះ​ជាតិ​​​។ រូបថត ហ្វេស​ប៊ុក​

បោះឆ្នោត​ឲ្យ​មេឃុំ ចៅ​សង្កាត់​ណា​ផ្តល់​សេវា​លឿន​ មិន​ពុក​រលួយ

នៅ​​ថ្ងៃ​អាទិត្យ​ក្នុង​​សប្តាហ៍​នេះ គឺជា​ថ្ងៃ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ-សង្កាត់​អាណត្តិ​ទី៤ ខណៈ​ដែល​មាន​ប្រជាពលរដ្ឋ​មួយ​ចំនួន​ មិន​ទាន់​ស្គាល់​បេក្ខជន​មេ ឃុំ-ចៅ​សង្កាត់​ណា​មួយ​នៅ​ឡើយ​ទេ ព្រោះ​ពួក​គាត់​មិន​បាន​ចុះ​មូល​ដ្ឋាន​សួរ​សុខ​ទុក្ខ​ប្រជា​ពលរដ្ឋ​ គឺ​គាត់​ចាំ​តែ​ពលរដ្ឋ​ទៅ​ជួប​គាត់​ទៅ​វិញ សូម្បី​តែ​ហែ​ឃោសនា​ចុះ​ចែក​ខិត្ត​ប័ណ្ណ​គោល​នយោបាយ​របស់​គណបក្ស​តាម​ផ្លូវ​មុខ​ផ្ទះ​ក៏​មិន​ដែល​ឃើញ​មុខ​ពួក​គាត់​ផង។

យុទ្ធ​សាស្ត្រ​របស់​គណបក្ស​ខ្លះ​

ម្យ៉ាង​ទៀត នៅ​ពេល​ដែល​ឈរ​ឈ្មោះ​ យក​មនុស្ស​មាន​ចំណេះ​ដឹង​ល្អ និង​ប្រជាប្រិយ​ភាព តែ​ដល់​ពេល​ជាប់​ឆ្នោត​ហើយ មិន​ទាន់​បាន​ ១ ឆ្នាំ​ស្រួល​បួល​​ផង​ ក៏​ស្រាប់​តែមាន​ការ​ដោះ​ដូរ​មេ​ឃុំ ឬ​ក៏ចៅ​សង្កាត់​ល្អ​ហ្នឹង​ចេញ ដាក់​មេ​ឃុំ ឬក៏​ចៅ​សង្កាត់​ពូកែ​អែប​អប​និង​រក​លុយ​ទុក​ជូន​​មេៗ ដើម្បី​កាន់​តំណែង ខ្លះ​ច្រងេង​ច្រងាង​កាង​ក៏មាន។

ឧទាហរណ៍​ កា​រ​បោះ​ឆ្នោត​ក្រុម​ប្រឹក្សា​ឃុំ​ សង្កាត់​លើក​ដំបូង​ឆ្នាំ ២០០២ នៅ​ភ្នំពេញ​លោក​ស្រី​ចៅ​សង្កាត់​ទឹក​ល្អក់​ទី ២ អតីត​អ្នក​គ្រូភាសា​បារាំង​ មក​ពី​គណបក្ស​ សម រង្ស៊ី ត្រូវ​បាន​ដូរ​បេក្ខជន​បន្ទាប់។

រីឯ​នៅ​សង្កាត់​ ព្រែកប្រា អាណត្តិ​ទី​៣ កន្លង​មក​ក៏​ដូរ​ដែរ ចៅ​សង្កាត់​ចាស់​ល្អ​​មក​ពី​គណបក្ស​ប្រជាជន​ឈរ​ឈ្មោះ​បោះ​ឆ្នោត ដល់​ពេល​ជាប់​មិន​បាន​ ១ ​ឆ្នាំ​ផង​ក៏​ដូរ​ដាក់​ចៅ​សង្កាត់​រង​ដែល​ល្បី​ថា​ពូកែ​រក​លុយ​ជូន​មេ។

ឥរិយាបថ មេឃុំ ឬ​ចៅ​សង្កាត់

ដល់​ពេល​អាង​ខ្នង​ពេក​កាល​ពី​ឆ្នាំ​ទៅ​នេះ ស្រាប់​តែ​ចៅ​សង្កាត់​ព្រែកប្រា ពី គណបក្ស​ប្រជាជន​ហ្នឹង​ទៅ​វ៉ៃ​សន្តិសុខ​យាម​នៅ​បុរី សន្លប់​បាត់​ស្មារតី យក​ទៅ​​ព្យាបាល​ដល់​ក្រៅ​ប្រទេស​ទៀត នៅ​ពេល​ដីកា​កោះ​ហៅ​គាត់​ឡើង​តុលា​ការ តែគាត់​ដាក់​មេ ផាយ​បាត់​សូន្យ​ឈឹង​ចោល​តំណែង​ចៅ​សង្កាត់​ព្រែក​ប្រា។

សំណុំ​រឿង​ចៅ​សង្កាត់​ព្រែកប្រា​ហ្នឹង​ក៏​ស្ងាត់​ព័ត៌មាន​ពី​ជន​ល្មើស​ហ្នឹង​ក៏​គ្មាន​អ្នក​លើក​ឡើង​មក​និយាយ ដល់​ណា​​ហើយ​សមត្ថកិច្ច​តាម​ចាប់​គាត់​នោះ។

ជាង​នេះ​ទៀត​មាន​ចៅ​សង្កាត់​ខ្លះ នៅ​​កន្លែង​ត្រូវ​ប៉ាន់​ដីធ្លី ជិះ​សុទ្ធ​តែ​ឡិច​ស៊ិស ហ៊ឺហា​ ខ្លះ​ទៀត​លេង​សុទ្ធ​តែ​បាញ់​​បោះ​សេរី​ក៏មាន​។ ដូច​ជា​លោក​ចៅ​សង្កាត់​គោក​រកា ខណ្ឌ​ព្រែក​ព្នៅ​មក​ពី​គណបក្ស​ប្រជាជន បាន​ជួល​​ឃាតករ ២ នាក់ ១ ម៉ឺន​ដុល្លារ​ឲ្យ​បោក​គ្រាប់​បែក​សម្លាប់​គូ​ទំនាស់​មួយ​គ្រួសារ​ត្រូវ​បាន​ចាប់​ខ្លួន។

ទាំង​នេះ​គឺ​ម្ចាស់​សន្លឹក​ឆ្នោត ត្រូវ​ការ​តាម​ដាន​ប្រវត្តិ​របស់​បេក្ខជន​ឈរ​ឈ្មោះ​របស់​គណបក្ស​នីមួយៗ អំពី​ឥរិយាបថ​របស់​ពួកគេ មិន​មែន​ឲ្យ​តែ​បក្ស​ហ្នឹង​បោះ​ឲ្យ​តែ​ម្តង​នោះ​ទេ ព្រោះ​គាត់​ជា​តំណាង​របស់​ម្ចាស់​ឆ្នោត គឺ​ត្រូវ​តែ​មនុស្ស​ល្អ​ ចេះ​ជួយ​ដោះ​ស្រាយ​ទៅ​តាម​តម្រូវ​ការ​របស់​ប្រជាពលរដ្ឋ​នៅ​ក្នុង​មូល​ដ្នាន។

សមត្ថ​ភាព​និង​អាយុ​ចាស់​ពេក​របស់​មេ​ឃុំ ឬ​ក៏​ចៅ​សង្កាត់

ដោយសារ​តែ​មេ​​ឃុំ និង​ចៅ​សង្កាត់ ពួក​គាត់​ជា​អ្នក​នយោបាយ​ហើយ​ខ្លះ​មាន​អាយុ​កាល​ចាស់​ពេក ពពីម​ពពើម ចំណេះ​ដឹង​ក៏តិច​តួច​ គឺមាន​តែបទ​ពិសោធ​ ព្រោះ​ក្នុង​ច្បាប់​​ស្តី​ពី​ការ​ជ្រើស​រើស​ក្រុម​ប្រឹក្សា​ឃុំ-សង្កាត់ មិន​បាន​កំណត់​សញ្ញា​បត្រ​នៃ​ចំណេះ​ដឹង​របស់​បេក្ខ​ជន​នោះ​ទេ គឺឲ្យ​តែ​គាត់​មាន​អាយុ​ចាប់​ពី ១៨​​ឆ្នាំ​ឡើង​ទៅ រស់​នៅ​កន្លែង​ដែល​គាត់​អាច​បោះឆ្នោត​បាន។ អ៊ី​ចឹង​ហើយ​គណបក្ស​នីមួយៗ ​មិន​បាន​គិត​ដល់​ចំណេះ​ដឹង​នោះ​ទេ​គឺ​រក​ឲ្យ​តែ​នរណា​​មាន​ប្រជាប្រិយ​ភាព​ក្នុង​ភូមិ​ ឃុំ សង្កាត់​គាត់​ទៅ​បាន​ហើយ។

នៅ​ពេល​គាត់​ជាប់​ឆ្នោត​ធ្វើ​ជា​មេ​ឃុំ ឬ​ក៏​ចៅ​សង្កាត់​ហើយ​ចំណេះ​ដឹង​គាត់​ទាប​ ខ្វះ​ភាព​ជា​ម្ចាស់​ក្នុង​ការ​ឆ្លើយ​តប​ទៅ​នឹង​តម្រូវ​ការ​ជាក់​ស្តែង​​ក្នុង​មូល​ដ្ឋាន​របស់​​គាត់​ពោល​គឺ​ការ​​ងារ​របស់​មេឃុំ​ឬក៏​ចៅ​សង្កាត់​នោះ​ ធ្លាក់​នៅ​លើ​ស្មៀន ជា​អ្នក​រ៉ាប់​រង​ទៅ​វិញរីឯ​គាត់​ខ្វិច​ខ្វិល​ៗ​ទៅ​តែ​ប្រជុំ​នៅ​សាខា​បក្ស​របស់​ខ្លួន​នៅ​ក្បែរ​ឃុំ​ឬ​ក៏​ក្បែរ​សាលា​ស្រុក​នោះ​ទេ។

ផល​ប៉ះ​ពា​ល់​គឺ​គាត់​មិន​មាន​សមត្ថ-​ភាព​គ្រ​ប់​​គ្រាន់​ក្នុង​ការ​គិត​គូរ ចេញ​ដីកា ការ​គ្រប់​គ្រង​ហិរញ្ញ​វត្ថុ ការ​ធ្វើ​ផែន​​ការ ឬ​ក៏​អនុវត្ត​ទាន់​ផែន​ការ​នោះ​ទេ បើ​ទោះ​បីជា​​ប្រាក់​ខែ​ពួក​គាត់​ត្រូវ​ដំឡើង​ក៏ដោយ​។

ជាង​​នេះ​ទៅ​ទៀត នៅ​ពេល​ដែល​គាត់​ចាស់​គ​ឺ​ខ្វះ​សមត្ថ-​ភាព​ទទួល​យក​ទស្សនៈ​ថ្មីៗ និង​ការ​បណ្តុះ​បណ្តា​ល​​​ប​ន្ថែម​ពីបច្ចេកទេស​​ពី​ថ្នាក់​ជាតិទៅ​ដែល​​រួម​មាន គណៈ​កម្ម​កា​​រ​​ជាតិ​សម្រាប់​ការ​អភិវឌ្ឍ​តាម​បែប​លទ្ធិ​ប្រជាធិប​តេយ្យ​នៅ​ថ្នាក់​ក្រោម​ជាតិ​ ដែ​ល​​ជា​ស្ថាប័ន​រៀប​ចំ​គោ​ល​​នយោ​បាយ​សេច​ក្តី​​ណែ​នាំ និង​លិខិត​បទដ្ឋាន​គតិយុត្ត​ ដើ​ម្បី​កសាង​​សមត្ថ​ភា​ព​ក្រុម​ប្រឹក្សា​​ឃុំ-សង្កា​ត់ ​តាម​រយៈ អនុកម្ម​វិធី​ទី​​ ៦ ​គឺ​សម្ព័ន្ធ​ភាព​ជាតិ​ក្រុម​ប្រឹក្សា​ថ្នាក់​មូ​ល​​ដ្ឋាន​ជា​អ្នក​បណ្តុះ​បណ្តា​ល​​។​

ជា​ពិសេស​គឺ​ការ​ប្រើ​ប្រាស់​ប្រព័​ន្ធ​​បចេ្ច​ក​វិទ្យា ICT ដូច​ជា កុំព្យូ​ទ័រ អីុន​ធឺណិត អីុមែល ហ្វេស​ប៊ុ​ក តេ​ឡេ​ក្រាម ជា​ដើម គឺ​មេឃុំ ចៅ​សង្កាត់​ចាស់ៗ​មិន​មាន​សម​ត្ថ​ភាព​ទទួ​ល​យកបច្ចេក​វិទ្យា​ទាំង​នេះ​ដោយ​ស្រួល​ដូច​មេ​ឃុំ ចៅ​សង្កាត់​ក្មេងៗ​ទេ។

អំពើ​ពុក​រលួយ

តាំង​ពី​មាន​ការ​ចាប់​ផ្តើម​ធ្វើ​កំណែ​ទម្រង់​វិមជ្ឈការ និង​វិសហមជ្ឈការ (D&D) មក នៅ​ពេល​អំណាច និង​ធន​ធាន​ត្រូវ​បាន​ផ្ទេរ​ពី​ថ្នាក់​ជាតិ មក​ថ្នាក់​ក្រោម​ជាតិ​កម្រិត​ ឃុំ-សង្កាត់ ​​នេះ មាន​មេ​ឃុំ ចៅ​សង្កាត់​ខ្លះ​ឆ្លៀត​ឱកាស​យក​ថ្លៃ​លើស​កំណ​ត់ ឬ​ក៏​បង្កប់​អំពើ​ពុក​រលួយ​​តែ​ម្តង តាម​រយៈ​ការ​ធ្វើ​លទ្ធកម្ម​ដេញ​ថ្លៃ​ធ្វើ​ថ្នល់ សង់​ស្ពាន ធ្វើ​លូ និង​ការ​អនុវត្ត​កម្មវិធី​នៅ​ក្នុង​ឃុំ សង្កាត់​ជាដើម។ ឧទាហរណ៍ ដូចជា ការ​ធ្វើ​ផ្លូវ​ថ្នល់​ចាក់​ស្តើង​ស៊ី​ក្រាស់​ឬ​ស៊ី​តាំង​ពី​ទំហំ​ក៏​មាន​ដែរ តើ​មាន​អង្គភាព ឬ​ក៏​ស្ថាប័ន​ណា​ជា​អ្នក​ទទួល​ខុស​ត្រូវ​ក្នុង​ការ​តាម​ដាន​លើ​ការ​ចំណាយ​ទាំង​នេះ?

ជាង​នេះ​ទៀត​ គឺ​ការ​ផ្តល់​ប័ណ្ណ​ផ្ទេរ​កម្មសិទ្ធិ​ដីធ្លី ការ​ធ្វើ​សំបុត្រ​កំណើត​​មរណភាព​និង​អាពាហ៍​ពិពាហ៍ ការ​ចេញ​លិខិត​ឲ្យ​សង់​រោង​ការ រោង​បុណ្យ​ ការ​សង់​ផ្ទះ​បន្ថែម​បន្តិច​បន្តួច សកម្មភាព​ទាំង​នេះ​សុទ្ធ​តែ​អាច​រក​កម្រៃ​ក្រៅ​បាន បើ​ទោះ​បី​ជា​ច្បាប់​ហាម​ឃាត់​ក៏​ដោយ។

ហេតុ​ដូច​នេះ​អ្នក​បោះឆ្នោ​តនៅ​ថ្ងៃ​អាទិត្យ​នេះ ត្រូវតែ​គិត​គូរ ពិចារណា​ឡើង​វិញ​នូវ​ទង្វើ​របស់​មេឃុំ ចៅសង្កាត់​ថា តើពួក​គាត់​មាន​សមត្ថភាព​គ្រប់​គ្រាន់​ហើយ ឬ​នៅ? ចាស់​ពេក ឬ​ក៏ក្មេង​ពេក? ពុក​រលួយ​ពេក? ដូច្នេះ​រឿង​ប្តូរ ឬ​ក៏មិន​ប្តូរ​សូម​កុំថ្ងូរ គឺ​អាស្រ័យ​ទៅ​លើ​ការ​អនុវត្ត​ជាក់​ស្តែង​នៅ​មូល​ដ្ឋាន​របស់​ពួកគាត់​ហ្នឹង​ឆ្លើយតប​ទៅ​នឹង​តម្រូវ​ការ​របស់​ប្រជាពលរដ្ឋ​ហើយ​ឬ​នៅ?

ចូលរួម​ផ្តល់​យោ​បល់​តាម​រយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ