Search form

Login - Register | FOLLOW US ON

Logo of Phnom Penh Post newspaper Phnom Penh Post - ប្រព័ន្ធ​ទំនាក់ទំនង​កាន់​តែ​ទំនើប ការ​ឆបោក​ ​ក៏​កាន់​តែ​មាន​ភាព​ចម្លែក

Content image - Phnom Penh Post
ស្ត្រី​យក​ដុល្លារ​ក្លែងក្លាយ​ឆបោក​គេ​ពេល​ចាប់​ខ្លួន​កន្លង​មក។ រូប សហការី

ប្រព័ន្ធ​ទំនាក់ទំនង​កាន់​តែ​ទំនើប ការ​ឆបោក​ ​ក៏​កាន់​តែ​មាន​ភាព​ចម្លែក

រឿង​ចាយ​លុយ​អស់​រាប់រយ​រាប់​ពាន់​ដុល្លារ​ដើម្បី​ទទួល​ទាន​អាហារ ឬ​ក៏​ការ​សប្បាយ​ដូចជា​​មិន​​ស្ដាយ​ ឬ​បង្ក​ការ​ឈឺចាប់​ទេ តែ​បើ​គេ​បោក​ត្រឹម​តែ​ ១០ ​ដុល្លារ​​វិញ​គឺ​ខឹង និង​ឈឺចាប់​ខ្លាំង​ណាស់​ ប៉ុន្តែ​មាន​សំណួរ​សួរ​ថា​​ តើ​ហេតុ​អ្វី​ក៏​ឲ្យ​គេ​បោក​បាន​ស្រួល​ម្ល៉េះ?

អ្នក​ខ្លះ​មិន​ត្រឹម​តែ​ត្រូវ​គេ​បោក​លុយ ឬ​ក៏​ទ្រព្យសម្បត្តិ​ទេ​តែ​​បោក​បាន​ទាំង​ខ្លួន​ប្រាណ​ទៀត​ផង​ហើយ​ជា​ទូទៅ​កម្រ​ហ៊ាន​ប្រាប់​គេ​ពី​រឿង​នេះ​ណាស់​ព្រោះ​ខ្លាច​ខ្មាស​គេ។

ម្នាក់ៗ​មិន​សូវ​ចាប់​អារម្មណ៍​ពី​រឿង​នេះ​ទេ​ដោយ​គិត​ថា​មិនមែន​ជា​រឿង​របស់​ខ្លួន​ ឬ​ក៏​ពាក់ព័ន្ធ​នឹង​គ្រួសារ​ខ្លួន​តែ​ពេល​ប៉ះ​ចំ​គេ​បោក​ម្ដង​ទើប​​ដឹង​ថា​មាន​លុយ​ច្រើន​ហើយ​​ភ្លាមៗ​ក៏​មិន​ទាន់​ហ៊ាន​ប្រាប់​គេ​ដែរ​ លុះ​ក្រោយ​មក​ទើប​​និយាយ​ព្រោះ​ខ្លាច​គេ​ថា​អន់​ឲ្យ​គេ​បោក​បាន​។ ជួន​កាល​អ្នក​ដែល​ត្រូវ​គេ​បោក​​នោះ​ថា បើ​ដឹង​រឿង​គេ​បោក​អ៊ីចឹងៗ​ម៉េច​មិន​ប្រាប់​គាត់​ផង​ព្រោះ​គាត់​ទើប​ចាញ់​បោក​គេ​ថ្មីៗ​នេះ​មាន​រូបភាព​ដូច​គ្នា​ហ្នឹង​។

វិធី​ឆបោក​មាន​ប្រើ​ទាំង​បុរាណ​ និង​សម័យ​ទំនើប​សូម្បី​តែ​ព្រះសង្ឃ​ខ្លះ​ក៏​និមន្ត​ឆបោក​គេ​ដែរ។

វិធី​ឆបោក​ខ្លះ​ទោះ​ជា​ចាស់ៗ​​បាន​ដឹង​ហើយ​ក៏ដោយ ក៏​នៅ​មាន​អ្នក​ចាញ់​បោក​គេ​ដែរ​ដូចជា បងប្អូន ឬ​ពួកម៉ាក​ខ្ចី​លុយ​មិន​សង លេង​តុងទីន​មេ​ប្រមូល​លុយ​រត់​បាត់ របៀប​ធ្វើ​ជ្រុះ​មាស ហើយ​បបួល​ដូរ​មាស​នៅ​ជាប់​ខ្លួន ការ​យក​លុយ​ដុល្លារ​ក្លែងក្លាយ​មក​ទិញ​ទំនិញ​មនុស្ស​ចាស់ៗ​ដែល​អត់​ចេះ​មើល​លុយ​ ការ​បោក​ដោយ​យក​ឈ្មោះ​អ្នក​ធំៗ​ដើរ​រៃ​លុយ​កសាង​នេះ​កសាង​នោះ ការ​បោក​តាមរយៈ​ការ​រក​ការងារ​ឲ្យ​ធ្វើ​ដោយ​យក​ប្រាក់​ខែ​ខ្លះ​មុន និង​ផ្ញើ​តាម​អ៊ីមែល​ថា​ដើរ​លេង​នៅ​ក្រៅ​ប្រទេស​ហើយ​អស់​លុយ​ជួយ​ផ្ញើ​​តាម​ធនាគារ Western Union ជាដើម​។

ឥឡូវ​នេះ​ចាប់​តាំងពី​មាន​ការ​ផ្ទេរ​លុយ​តាម​​ទូរស័ព្ទ ឬ​តាម​សេវា​ផ្សេងៗ​ដើម្បី​កាត់​បន្ថយ​ពេល​ធ្វើ​ដំណើរ​ទៅ​ជួប​គ្នា ឬ​ក៏​ទីតាំង​ឆ្ងាយ​នោះ​ក៏​មាន​ជន​ឆក់​ឱកាស​​ពី​របៀប​ផ្ញើ​លុយ​តាម​វិធី​នេះ​មក​​ឆបោក​កាន់តែ​ទាន់​សម័យ​ហើយ​អ្នក​ទូរស័ព្ទ​មក​បោក​នោះ​ហាក់បី​ដូច​ដឹង​មុន​ និង​ស្គាល់​អ្នក​រងគ្រោះ​​ច្បាស់​ណាស់​។

ករណី​ទី-១) មាន​អ្នក​ឆបោក​ម្នាក់​ទូរស័ព្ទ​មក​ប្រាប់​អ្នក​​ដែល​ត្រូវ​​ជា​ម្តាយ​ ឬ​ឪពុក​ថា​មីង ឬ​ក៏​ពូ​មាន​កូន​ប្រុស ឬ​កូនស្រី​ឈ្មោះ (ក) ​ជួប​គ្រោះថ្នាក់​ចរាចរណ៍​មុន​នេះ​បន្តិច​នៅ​លើ​ផ្លូវ​នេះ ឬ​ក៏​ផ្លូវ​នោះ​ហើយ​ឥឡូវ​​កូន​មីង-ពូ​កំពុង​នៅ​មន្ទីរពេទ្យ​សង្គ្រោះ​បន្ទាន់​ដាក់​អុកស៊ីហ្សែន​ជាប់​ហើយ​មិន​បាច់​ទូរស័ព្ទ​ទៅ​គាត់​ទេ។

គ្រូពេទ្យ​ឲ្យ​ខ្ញុំ​ទូរស័ព្ទ​មក​មីង-ពូ កូន​ (ក)​ កំពុង​ត្រូវ​ការ​ទិញ​ឈាម​ដើម្បី​បញ្ចូល​ជា​បន្ទាន់​ទុក​យូរ​អត់​បាន​ទេ ឈាម​នោះ​គ្រូពេទ្យ​ថា​តម្លៃ​តែ​ ២០០ ​ដុល្លារ​ទេ អ៊ីចឹង​មីង-ពូជួយ​ផ្ញើ​លុយ​តាម​វីង ឬ​ក៏​ទ្រូម៉ាន់នី​ឲ្យ​ខ្ញុំ​ក៏​បាន​ដែរ​ តាម​លេខ​ទូរស័ព្ទ​រួច​ហើយ​សឹម​មីង-ពូ​មក​ជួប​កូន​នៅ​មន្ទីរពេទ្យ​ជា​ក្រោយ​ក៏​បាន​។

ដោយ​ឮ​គេ​ហៅ​ឈ្មោះ​កូន​ (ក) ចំៗ​ហើយ​ស្គាល់​ទាំង​អត្តសញ្ញាណ​ច្បាស់​ផង​នោះ​ពួកគាត់​ក៏​ប្រញាប់​យក​​លុយ​​តាម​ចំនួន​ដែល​គេ​ប្រាប់​នោះ​ផ្ញើ​តាម​ទីតាំង​ផ្ទេរ​ប្រាក់​ដោយ​ផ្ដល់​លេខ​កូដ​ឲ្យ​ជន​ឆបោក​នោះ​ភ្លាម​។

លុះ​ដល់​ជនល្មើស​បាន​លុយ​ដល់​ដៃ​គេ​ក៏​កាច់​ស៊ីម​ទូរស័ព្ទ​នោះ​ចោល​ហើយ​ពេល​មីង-ពូ​ ទូរស័ព្ទ​ទៅ​ជន​នោះ​ម្តង​ទៀត​លែង​ចូល​ហើយ​ក៏​ងាក​មក​ទូរស័ព្ទ​ទៅ​កូន​ខ្លួនឯង​ម្ដង​តែ​ត្រូវ​កូន (ក) ប្រាប់​ថា​អត់​មាន​បញ្ហា​អី​ផង​ ទើប​ដឹង​ថា​គេ​បោក​អស់​លុយ​ ២០០ ​ដុល្លារ​តែ​មួយ​ប៉ប្រិច​ភ្នែក​​។

ករណី​ទី​ ២) មាន​ចាស់ៗ​នៅ​ផ្ទះ​មើល​ចៅ​ខ្លះ​ពេល​កូនៗ​ទៅ​ធ្វើការ​ ឬ​ទៅ​រៀន​បាត់ ជន​ឆបោក​ដូច​បាន​តាមដាន​ដឹង​មុន​អ៊ីចឹង​ថា​គាត់​មាន​ឈឺ​សន្លាក់​ដៃ​ជើង​ ឬ​ចុក​ដៃ​ចុក​ជើង​រួច​ក៏​​ដើរ​សំដៅ​ឲ្យ​ចំ​ផ្ទះ​ពួកគាត់​ហើយ​ជម្រាប​សួរ​ធ្វើ​ដូចជា​ត្រឹមត្រូវ​ណាស់​បន្ទាប់មក​ក៏​សួរ​ពី​សុខភាព​ និង​ឲ្យ​​សាកល្បង​លាប​រឹតៗ​លើ​សន្លាក់​ដៃ ឬ​ក៏​ជើង​នូវ​ថ្នាំ​សុទ្ធ​ល្អ​ធ្វើឲ្យ​ពួកគាត់​ធូរ​ស្បើយ​ភ្លាមៗ​​ហើយ​ក៏​ចាប់ផ្តើម​ប្រូ​លក់​ថ្នាំ​ភ្លាម​តែ​ពេល​លក់​គេ​បែរ​ឲ្យ​ថ្នាំ​ក្លែងក្លាយ​ដែល​​មាន​សម្បក​ក្រៅ​ដូច​គ្នា​ដោយ​ ២ ​ដប​តម្លៃ​តែ​ ១០ ​ម៉ឺន​រៀល​​ទេ។​

លុះ​ពេល​ទិញ​មក​ប្រើ​គឺ​​គ្មាន​ប្រសិទ្ធភាព​អ្វី​ទាំងអស់​ទើប​ចាស់ៗ​ដឹង​ថា​ចាញ់​បោក​គេ​តែ​មិន​ហ៊ាន​ប្រាប់​កូនៗ​ខ្លាច​គេ​ស្តី​ឲ្យ​ហើយ​អ្វី​ដែល​សំខាន់​កូនគាត់​លក់​ថ្នាំពេទ្យ​ទៅ​ទៀត​។

ករណី​ទី ៣) មាន​បុគ្គលិក​មណ្ឌល​សុខភាព​មួយ​នៅ​ខេត្ត​បាត់ដំបង​បាន​ទទួល​ទូរស័ព្ទ​ពី​ជន​ឆបោក​ដែល​ស្គាល់​ឈ្មោះ​អ្នក​គ្រូពេទ្យ​នៅ​មណ្ឌល​នោះ​ច្បាស់​ថា​អ្នកគ្រូ​មាន​ម្ចាស់​ជំនួយ​​បាន​ផ្តល់​ម៉ូតូ​ ១ ​គ្រឿង​ម៉ាក​ហុងដាឌ្រីម​តាមរយៈ​ក្រសួង​សុខាភិបាល​។

ជន​នោះ​យក​ឈ្មោះ​មន្ត្រី​ជាន់​​ខ្ពស់​នៅ​ក្រសួង​មក​ប្រាប់​អ្នក​គ្រូពេទ្យ​ថា​មន្ត្រី​នៅ​ក្រសួង​បាន​​ឲ្យ​គាត់​ទាក់ទង​ក្រៅ​ផ្លូវការ​កុំ​ឲ្យ​​គេ​ដឹង​ក្រៅពី​អ្នកគ្រូ​អ៊ីចឹង​មន្ត្រី​ថ្នាក់​លើ​នោះ​កំពុង​តែ​​រៀបចំ​ឯកសារ​ដាក់​ឈ្មោះ​អ្នក​​គ្រូ​ឲ្យ​ចំ​តែ​ម្តង​ដើម្បី​ផ្ទេរ​ពី​ក្រសួង​ទៅ​ឲ្យ​អ្នក​គ្រូ​ផ្ទាល់​ តែ​អ្នកគ្រូ​ត្រូវ​ផ្ញើ​លុយ​ក្រៅ​ ៧០០ ​ដុល្លារ​ទៅ​មន្ត្រី​នៅ​ក្រសួង​តាមរយៈ​គាត់​ជា​មុន​ដោយ​ថា​សូម​ផ្ញើ​តាម​លេខ​ហ្នឹង​មក​ឲ្យ​បាន​មុន​គេ បើ​មិន​ដូច្នេះ​ទេ​គាត់​ផ្ទេរ​ឲ្យ​គ្រូពេទ្យ​ផ្សេង​ហើយ​។

ឮ​ដូច្នេះ​អ្នក​គ្រូពេទ្យ​ក៏​ប្រញាប់​ផ្ញើ​តាម​វីង​ទៅ​ឲ្យ​ជន​ឆបោក​នោះ​ស្រាប់តែ​ពេល​​មក​ក្រសួង​សុខាភិបាល​សួរ​មន្ត្រី​ជាន់​ខ្ពស់​នោះ​ថា​អត់​មាន​ម្ចាស់​ជំនួយ​ផ្តល់​ម៉ូតូ​ឯណា​ផង​ទើប​ដឹង​ថា​អ្នកគ្រូ​មណ្ឌល​សុខភាព​នោះ​ចាញ់​បោក​គេ។ ករណី​នេះ​សូម្បី​តែ​អ្នក​មាន​ចំណេះដឹង​ហើយ​ក៏​នៅ​ចាញ់​បោក​គេ​​ដែរ​មកពី​គាត់​មិន​ធ្លាប់​បាន​ដឹង​រឿង​ពី​មុន​មក​។

ករណី​ទី ៤) ​គឺ​ការ​ទាក់ទង​គ្នា​តាម​ហ្វេសប៊ុក រាង​កាលីប​លើ​ហើយ​​ស៊ី​លុយ​ធំ​ទៀត​គឺ​ជន​ឆបោក​​ជា​ក្រុម​តែ​ម្ដង​ ដោយ​បោក​ធ្វើ​ជា​ក្រុមហ៊ុន​អន្តរជាតិ​ និង​មាន​ទំនាក់​ទំនង​អ្នក​នៅ​ក្នុង​ស្រុក​។ ចាប់​ចេញ​ពី​ជនល្មើស​រាវ​រក​មើល​តាម​ហ្វេសប៊ុក​ថា​តើ​អ្នក​លេង​ហ្វេសប៊ុក​នោះ​ហ៊ឺហា មាន​រថយន្ត​ ឬ​ប្រើ​របស់​ទំនើបៗ​អ៊ីចឹង​ពួកគេ​ចាប់​ផ្តើម​រាប់​ជា​មិត្ត​តាមរយៈ​ (Add Friends) ហើយ​ចាប់ផ្តើម​ឆ្លើយ​ឆ្លង​សួរ​សុខទុក្ខ​គ្នា​តាម​ Messenger បន្ទាប់មក​លើក​រឿង​​ផ្ញើ​កាដូ​ធំ​មាន​តម្លៃ​ថ្លៃ​ពី​ក្រុមហ៊ុន​នៅ​ក្រៅ​ស្រុក​ឈ្មោះ​នេះ ឬ​នោះ​។ តែ​មុន​នឹង​បាន​កាដូ​ធំ​អ្នក​ត្រូវ​បង់​ថ្លៃ​ផ្ញើ​ផង សេវា​ផង​ និង​បង់​ពន្ធ​ទៀត​ហើយ​ចាប់ផ្តើម​ផ្ញើ​តាម​ភ្នាក់ងារ​ពួកគេ​នៅ​ស្រុក​ខ្មែរ​ក៏​បាន​រួច​ហើយ​ក៏​ផ្ទេរ​ការ​ទាក់ទង​គ្នា​ក្នុង​ស្រុក​ម្តង​តាមរយៈ​ទូរស័ព្ទ​ដោយ​មិន​ចាំបាច់​ជួប​គ្នា​ផ្ទាល់​ទេ គឺ​ផ្ញើ​លុយ​តាម​វីង ឬ​ក៏​ទ្រូម៉ាន់នី​បាន​ហើយ​។

ពេល​នោះ​អ្នក​ដែល​ត្រូវ​គេ​លួងលោម​បាន​ផ្ញើ​លុយ​​ទៅ​ជនទុច្ចរិត​នោះ​រួច​ហើយ​គ្មាន​បាន​អ្វី​ទាំងអស់​ដែល​ករណី​បោក​ទំនើប​នេះ​មាន​អ្នក​អស់​ដល់​រាប់​ម៉ឺន​ដុល្លារ​ក៏​មាន​ដែរ​។

រីឯ​ករណី​ចាញ់​បោក​តាម​ទូរស័ព្ទ​មក​ថា​ត្រូវ​រង្វាន់​ពី​ក្រុមហ៊ុន​នេះ​ក្រុមហ៊ុន​នោះ​គឺ​កើត​មាន​រាល់​ថ្ងៃ​ម្តង​ឮ​នៅ​​ទី​នេះ ឬ​ក៏​ទី​នោះ​គឺ​នៅ​តែ​បោក​បាន​អ៊ីចឹង​។​

បើ​និយាយ​ពី​បោក​​តាម​ការ​សម្លុត​ជនរងគ្រោះ​ថា​ខ្លួន​ជា​អ្នក​កាសែត​គឺ​តាមរយៈ​រឿង​ពុករលួយ បើ​មិន​ឲ្យ​លុយ​គេ​​នឹង​ផ្សព្វផ្សាយ ឬ​ក៏​ដាក់​ពាក្យ​បណ្តឹង​ទៅ​អង្គភាព​ប្រឆាំង​អំពើ​ពុករលួយ​ឲ្យ​ស៊ើបអង្កេត​។ ករណី​អ្នក​កាសែត​ក្លែងក្លាយ​នេះ​ត្រូវ​បាន​នាយក​រដ្ឋមន្ត្រី​បញ្ជា​ឲ្យ​វ៉ៃ​ខ្នោះ​ភ្លាមៗ​ផង​ដែរ​។

សរុប​មក​វិញ​បញ្ហា​​ងាយ​ចាញ់​បោក​គេ​នោះ​គឺ​មកពី​ជនរងគ្រោះ​ខ្លះ​ចង់​បាន​ពេក​ដោយ​មិន​បាន​គិត​​ឲ្យ​ច្បាស់​​ ខណៈ​ខ្លះ​ភ័យ​ស្លន់ស្លោ​ពេល​ត្រូវ​បាន​ជនល្មើស​បំភ័យ ខ្លះ​ទៀត​មាន​ជំងឺ​ប្រចាំ​កាយ​ឲ្យ​តែ​គេ​ថា​ថ្នាំ​អី​ជា​ទៅ​ណា​ក៏​ទៅ​ដែរ​ ឬ​ក៏​អស់​អី​ក៏​អស់​ទៅ និង​អ្នក​ដែល​ឆាប់​ជឿ ឬ​ក៏​អាណិត​គេ​។ តែ​ឫសគល់​នៃ​បញ្ហា​ដែល​ពិបាក​សម្រាប់​សមត្ថកិច្ច​ស៊ើបអង្កេត​តាម​ចាប់​ជនលើ្មស​នោះ​គឺ​បញ្ហា​ស៊ីម​កាត​ទូរស័ព្ទ​អនាធិបតេយ្យ​ដែល​គេ​ប្រើ​ដោយ​មិន​ចាំបាច់​ចុះ​ឈ្មោះ​។

គ្មាន​រូបមន្ត​ជាក់លាក់​ដើម្បី​ដោះស្រាយ​បញ្ហា​គេ​បោក​នេះ​ទេ​គឺ​មាន​ដោះស្រាយ​មួយ​ករណីៗ​តាម​ការ​បោកប្រាស់​ដូចជា៖ ករណី​ទី​ ១) ចំពោះ​ឮ​ថា​កូន​គ្រោះថ្នាក់​ចរាចរណ៍​ហើយ​កំពុង​នៅ​បន្ទប់​សង្គ្រោះ​បន្ទាន់​ត្រូវ​ការ​ទិញ​ឈាម​នោះ​គឺ​ចាំបាច់​ត្រូវ​តែ​ទូរស័ព្ទ​ទៅ​កូន​នោះ​ភ្លាម​មើល​ថា​តើ​គាត់​ជួប​គ្រោះថ្នាក់​មែន​ឬ​ក៏​អត់? បើ​ទោះបី​ជា​ប្រញាប់​យ៉ាង​ណា​ក្ដី​។ ករណី​នេះ​បើ​គ្រូពេទ្យ​ត្រូវ​ការ​ឈាម​មែន​គឺ​គាត់​តម្រូវ​ឲ្យ​មន្ត្រី​ទទួល​អ្នក​ជំងឺ​ទូរស័ព្ទ​លេខ​លើ​តុ​ក្បាល​ (023) ហើយ​។

ដូច​​គ្នា​នេះ​ដែរ​ទៅ​លើ​ករណី​ត្រូវ​រង្វាន់​គឺ​ត្រូវ​មើល​លេខ​ក្បាល​ទូរស័ព្ទ​លេខ​លើ​តុ​ (023) ជា​ផ្លូវការ​សិន​ដែរ​ ព្រោះ​ក្រុមហ៊ុន​ដែល​ចុះ​បញ្ជី​ក៏​ដូចជា​ស្ថាប័ន​រដ្ឋ​នីមួយៗ​គឺ​គេ​ប្រើ​ឲ្យ​ត្រឹមត្រូវ​ទៅ​តាម​ស្តង់ដារ​ដើម្បី​ឲ្យ​មាន​តម្លាភាព​ និង​គណនេយ្យភាព​ជាមួយ​នឹង​អតិថិជន​ហើយ​លេខ​បន្តបន្ទាប់​មាន​ ៦ ​ខ្ទង់​គឺ​ងាយ​ស្រួល​ផ្ទៀងផ្ទាត់​ថា​លេខ​របស់​ក្រុមហ៊ុន​ពិត​ឬ​ក៏​អត់? តែ​បើ​លេខ​បន្តបន្ទាប់​ ៧ ​ខ្ទង់​គឺ​ទូរស័ព្ទ​សាធារណៈ​យក​ជា​ការ​មិន​បាន​ទេ។

ចំពោះ​ករណី​អ៊ំ​ចាស់ៗ​ដែល​មាន​ជំងឺ​សន្លាក់​ដៃ​ជើង​ហ្នឹង ​កូន​គួរ​តែ​ជម្រាប​គាត់​មុន​ពី​ការ​ទិញ​របស់​របរ​ត្រូវ​សួរ​កូនៗ​សិន​ថា​ តើ​គួរ​ទិញ ឬ​ក៏​អត់​? ព្រោះ​មាន​មនុស្ស​មក​បោក​ប្រភេទ​ហ្នឹង​ច្រើន​ណាស់​។ រីឯ​ករណី​បុគ្គលិក​ពេទ្យ​នៅ​ខេត្ត​បាត់ដំបង​នោះ​គឺ​អ្នក​គ្រូពេទ្យ​អាច​ឲ្យ​ជនល្មើស​នោះ​ចាំ​សិន​ហើយ​ទូរស័ព្ទ​ទៅ​មន្ត្រី​ជាន់ខ្ពស់​នៅ​ក្រសួង​ភ្លាម​តែ​ប៉ុណ្ណឹង​ជន​នោះ​ដាក់​មេផាយ​បាត់​ទៅ​ហើយ​។

ករណី​ចាញ់​បោក​តាម​ហ្វេសប៊ុក​ហ្នឹង​ក៏​កើត​មាន​ច្រើន​ដែរ​ហើយ​អ្នក​ចង់​មាន​ចង់​បាន​គួរ​តែ​ពិភាក្សា​គ្នា​ជាមួយ​សមាជិក​គ្រួសារ​មុន​នឹង​ជឿ​លើ​អ្នក​​​ដែល​មិន​ធ្លាប់​​ជួប​មុខ​គ្នា​សោះ​នោះ​។

បើ​និយាយ​ភាសា​សាមញ្ញ​គឺ​មាន​អ្នក​ទូរស័ព្ទ​ចូល​មក​បើ​មិន​ស្គាល់​ច្បាស់​ទេ​គឺ​បិទ​ ឬ​ក៏​ប្លុក​ចោល​តែ​ម្តង​ទៅ​នេះ​សម្រាប់​អ្នក​ចេះ​ប្រើ​ទូរស័ព្ទ​ច្បាស់​ដើម្បី​កុំ​ឲ្យ​គេ​រំខាន ឬ​ក៏​ប្រាប់​អ្នក​ដែល​អាច​ឆបោក​នោះ​ថា​គ្មាន​ពេល​ជួប​ទេ​។

តាមពិត​ជនល្មើស ឆបោក​ជាច្រើន​ប្រភេទ​ត្រូវ​បាន​សមត្ថកិច្ច​ចាប់​​ញាត់​គុក​ស្ទើរតែ​រក​គុក​ដាក់​លែង​ចង់​បាន​ទៅ​ហើយ តែ​អ្វី​ដែល​សំខាន់​នោះ​គឺ​ម្នាក់ៗ​ត្រូវ​តែ​មាន​ការ​ប្រុងប្រយ័ត្ន​ជា​មុន​ឲ្យ​បាន​ខ្ជាប់ខ្ជួន៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment