Search form

Login - Register | FOLLOW US ON

Logo of Phnom Penh Post newspaper Phnom Penh Post - ពេល​ធ្វើ​ផ្លូវ ស្ពាន ឬ​ក៏​លូ​សម្បូរ​មន្ត្រី​ធំៗ​ចុះ​មើល តែ​​ពេល​ភ្លៀង​លិច​ទឹក​ក្រុង នាំ​គ្នា​លាក់​ខ្លួន​បាត់​អស់

Content image - Phnom Penh Post
ភ្លៀង​លិច​ផ្លូវ​មួយ​ចំនួន​នៅ​ក្នុង​រាជធានី​ភ្នំពេញ​នា​ពេល​ថ្មីៗ​កន្លង​មក​នេះ​។ ហេង ជីវ័ន

ពេល​ធ្វើ​ផ្លូវ ស្ពាន ឬ​ក៏​លូ​សម្បូរ​មន្ត្រី​ធំៗ​ចុះ​មើល តែ​​ពេល​ភ្លៀង​លិច​ទឹក​ក្រុង នាំ​គ្នា​លាក់​ខ្លួន​បាត់​អស់

ភ្នំពេញ: នៅ​ពេល​ភ្លៀង​ធ្លាក់​រួច​លិច​ទឹក​ត្រឹម​ជង្គង់​មាន​អ្នក​បញ្ចេញ​យោបល់​បែប​ខឹង​សម្បា​រៀងៗ​ខ្លួន​តាម​បណ្តាញ​​សង្គម​ហ្វេសប៊ុក​ដោយ​មិន​ពេញ​ចិត្ត​ទៅ​នឹង​ទឹក​លិច​រាជធានី​ភ្នំពេញ​ថា​មក​ដល់​សម័យ​នេះ​ហើយ​ទឹក​នៅ​តែ​លិច​រហូត​ក្រោយ​ភ្លៀង​ធា្លក់​។

រីឯ​មតិ​អ្នក​គាំទ្រ​រដ្ឋាភិបាល​វិញ​ខំប្រឹង​ពន្យល់​ទៅ​តាម​អារម្មណ៍​ថា​ទឹក​លិច​នេះ​ដោយសារ​ភ្នំពេញ​មាន​ប្រវត្តិ​ភ្លៀង​ធ្លាក់​លិច​ទឹក​តាំងពី​ឆ្នាំ​ ៦០ ​មក​ម្ល៉េះ អ៊ីចឹង​បើ​នៅ​លិច​ទឹក​មិន​មាន​អ្វី​ចម្លែក​នោះ​ទេ ហើយ​លើក​ហេតុផល​ថា​ទីក្រុង​ចាស់​លូ​មាន​មុខ​កាត់​តូច​ហូរ​មិន​ទាន់ ហើយ​ឆ្លៀត​ដៀមដាម​ទៅ​នឹង​ចំណេះដឹង​ប្រជាពលរដ្ឋ​ទៀត និង​ដៀមដាម​បែប​នយោបាយ​ទៅ​ចំអក​ដល់​សហរដ្ឋ​អាមេរិក​ក៏​លិច​ទឹក​ដោយសារ​ព្យុះ​ដែរ​។

តែ​រាល់​ការ​បកស្រាយ និង​ការ​បញ្ចេញ​មតិ​ទាំងនេះ​គឺ​ពួកគាត់​មិនមែន​ជា​មន្ត្រី​បច្ចេកទេស​ជំនាញ​ខាង​លូ និង​រដ្ឋមន្ត្រី ក្រសួង​សាធារណការ និង​ដឹកជញ្ជូន​នោះ​ទេ ពួកគាត់​គ្រាន់​រៀន​បកស្រាយ​ទៅ​តាម​ទស្សនៈ​បែប​សារ​នយោបាយ​របស់​ពួកគាត់​ប៉ុណ្ណោះ​។

នៅ​ពេល​ដែល​មាន​មតិ​រិះគន់​ខ្លាំង​ទៅ​លើ​ទឹក​លិច​ផ្លូវ​សាធារណៈ​បែរ​ជា​រដ្ឋាភិបាល​ធ្វើ​ផ្លូវ​មួយ​ខ្សែ​បែប​ចម្លែក​វិញ​កុំ​ឲ្យ​ពូកែ​លិច​ផ្លូវ​ពេក​គឺ​ធ្វើ​ផ្លូវ​ខ្ពស់​ជាង​ផ្ទះ​ប្រជាពលរដ្ឋ​ទៅ​ទៀត​គឺ​ផ្លូវ​ណតប្រ៊ីដ​ផ្សារ​ដីហុយ មុខ​សាកលវិទ្យាល័យ​កម្ពុជា​។

នៅ​ពេល​ផ្លូវ​ហ្នឹង​សង់​ហើយ ទឹក​លែង​លិច​លើ​ផ្លូវ មែន​តែ​បែរ​ជា​លិច​ចូល​ផ្ទះ​ប្រជាពលរដ្ឋ​ទៅ​​វិញ ដែល​ពួកគាត់​កំពុង​តែ​ត្អូញត្អែរ​ថា តើ​ហេតុអ្វី​បាន​ជា​សង់​ផ្លូវ​បែប​ហ្នឹង​ទៅ​វិញ​? តើ​ក្រសួង​សាធារណការ ឬ ក៏​​សាលា​រាជធានី​ជា​អ្នក​ទទួល​ខុសត្រូវ​ចំពោះ​ការ​សង់​ផ្លូវ​ខុស​គេ​បែប​នេះ​? តើ​មាន​បទពិសោធ​ពី​ប្រទេស​ណា​ដែល​សង់​ផ្លូវ​ខ្ពស់​ជាង​ផ្ទះ​ប្រជាពលរដ្ឋ និង​ហាង​ទំនិញ​បែប​នេះ​? ឬ​មួយ​ក៏​គ្រាន់តែ​សង់​ឡើង​ដើម្បី​ចំអក​ទៅ​អ្នក​រិះគន់​វិញ​រឿង​ទឹក​លិច​ផ្លូវ​ក្រោយ​ភ្លៀង​ធ្លាក់​?

ម្យ៉ាង​វិញ​ទៀត​បើ​បន្ទោស​ថា​មកពី​ផ្លូវ​លិច​ទឹក​មកពី​លូ​មុខកាត់​តូច តែ​បើ​មើល​ជាក់ស្តែង​ទៅ​លើ​ផ្លូវ​ ២០០៤ ដែល​លិច​ជ្រៅ​ជាង​គេ​ហើយ​យូរ​ជាង​គេ​ទៀត នោះ​គឺ​លូ​ដែល​ទើប​ហ្នឹង​ធ្វើ​នោះ​គឺ​មុខ​កាត់​ជិត​ ២ ​ម៉ែត្រ​ឯណោះ​។ អ៊ីចឹង​បាន​ថា ចេះ​តែ​បកស្រាយ​ដោយ​មិន​បាន​ចុះ​ទៅ​ពិនិត្យ​មើល​កន្លែង​នោះ​ជាក់ស្តែង​ទេ អ៊ីចឹង​បាន​ថា​មន្ត្រី​​ធំៗ​បាន​ត្រឹម​តែ​ចុះ​មើល​ពេល​​កំពុង​តែ​សាងសង់ និង​សម្ពោធ​ផ្លូវ ស្ពាន ថ្នល់ លូ និង​ប្រឡាយ​យក​មុខ​មាត់​ប្រជាប្រិយភាព​ទេ តែ​ដល់​ពេល​ភ្លៀង​លិច​ក្រុង​នាំ​គ្នា​រត់​ពួន​អស់​បាន​ត្រឹម​តែ​បន្ទោស​គ្នា​ចុះ​ឡើងៗ មិន​រក​​ដំណោះស្រាយ​ណា​មួយ​ឲ្យ​​ប្រសើរ​ជាង​ហ្នឹង​សោះ​។

Content image - Phnom Penh Post
រូប​រថយន្ត​របស់​រដ្ឋ​​ដែល​បាន​លិច​មួយ​កំណាត់​ឡាន​ ដោយសារ​មិន​ដឹង​ថា​មាន​លូ​ ឬ​ប្រឡាយ​នៅ​លើ​ថ្នល់​ ក្រោយ​ពី​ភ្លៀង​មួយ​មេ​ធំ​នៅ​រាជធានី ភ្នំពេញ កាល​ពី​សប្តាហ៍​មុន​នេះ។​ រូបថត​​ ហ្វេសប៊ុក

ជា​ផលវិបាក​នៃ​ការ​លិច​ទឹក​នោះ​គឺ​ផ្លូវ​មួយ​ចំនួន​ធំ​ត្រូវ​បាន​ខូចខាត ហើយ​លូ​ក៏​បាក់បែក​​គម្រប ប៉ះពាល់​ទៅ​នឹង​គ្រោះថ្នាក់​ដែល​កើត​មាន​ជា​ហូរហែ​ដូច​កាលពី​សប្តាហ៍​កន្លង​ទៅ​នេះ​តាម​ហ្វេសប៊ុក​មាន​រថយន្ត​របស់​រដ្ឋ​បាន​លិច​ដាំ​ក្បាល​ចុះ​ក្រោម​ពាក់កណ្តាល​ខ្លួន​ដោយសារ​តែ​ទឹក​លិច​ត្រឹម​ជង្គង់​ហើយ​មិន​ដឹង​ថា​ទីកន្លែង​នោះ​មាន​ប្រឡាយ​បាក់​ស្រុត​ចុះ​ក្រោម​។ មាន​ករណី​អ្នក​ជិះ​ម៉ូតូ​ធ្លាក់​លូ កណ្តាល​ផ្លូវ​ដោយសារ​តែ​ជិះ​លិច​ទឹក​មិន​ដឹង​ថា​មាន​លូ​។

សំណួរ​សួរ​ថា តើ​ឲ្យ​វាយតម្លៃ​ថា​ទីក្រុង​ស្អាត​យ៉ាង​ដូចម្តេច បើ​ស្អាត​តែ​ពេល​ថ្ងៃ​ស្ងួត តែ​ភ្លៀង​ម្តង​ទឹកលូ​ហូរ​ចេញ​មក​ក្រៅ​ស្អុយ​គគ្រុក​យ៉ាង​នេះ​? តើ​មាន​ហេតុផល​អ្វី​បន្ទោស​ប្រជាពលរដ្ឋ​ថា​ខ្ជិល ឬ​ក៏​មកពី​ចោល​សំរាម​ទៀត​? បើ​មើល​ទៅ​ការ​សាងសង់​ប្រព័ន្ធ​លូ​រំដោះ​ទឹក​នៅ បឹងទំពុន និង​បឹង​ជើងឯក​គឺ​ធ្វើ​តាំង​ពី​ជំនាន់​លោក ប៉ា សុជាតិវង្ស ​ទើប​តែ​ឡើង​កាន់​តំណែង​ចៅហ្វាយ​ក្រុង​ឥឡូវ​លោក​ចូល​និវត្តន៍​ហើយ​នៅ​តែ​ធ្វើ​មិន​ទាន់​ហើយ​ទៀត​។

ថវិកា​សម្រាប់​ចំណាយ​សាលា​រាជធានី​ប្រមាណ​ជា ២៧០ ​លាន​ដុល្លារ​ក្នុង​មួយ​ឆ្នាំៗ​គួរ​តែ​គិតគូរ​ផ្លាស់ប្តូរ​ខ្ទង់​ចំណាយ​លើ​សួនច្បារ​តាម​មាត់​ទន្លេ ឬ​ក៏​សួន​តាម​ទីសាធារណៈ​លើ​ផ្លូវ​សហព័ន្ធ​រុស្ស៊ី​ដែល​ល្អ​ស្រាប់​ដដែលៗ​ទៀត​ទៅ​គឺ​យក​ថវិកា​មក​រៀបចំ​ឡើង​វិញ​ធ្វើ​ប្រព័ន្ធ​លូ និង​ប្រឡាយ​ដែល​ខូចខាត និង​ដើរ​មើល​ថ្នល់​គម្រប​លូ​ក្រហេង​​ក្រហូង ហើយ​ធ្វើ​ឡើង​វិញ​ឲ្យ​អស់​ទៅ​គឺ​អាច​រំដោះ​ទឹក​បាន​ច្រើន​ហើយ​។

ប្រព័ន្ធ​លូ​ជា​គំរូ​ដែល​សាលា​រាជធានី​បាន​ធ្វើ​ល្អ​នោះ​គឺ​ធ្វើ​​ប្រឡាយ​បារាំង​ពី​សង្កាត់​និរោធ​មក​ដល់​ផ្លូវ​ទៅ​ព្រែកប្រា តែ​អ្វី​ដែល​ជា​បញ្ហា​នោះ​គឺ​យក​ទឹកលូ​សម្អុយ​ចាក់​ចូល​ទឹក​ទន្លេ​ធ្វើឲ្យ​ខូច​បរិស្ថាន​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ