Search form

Login - Register | FOLLOW US ON

Logo of Phnom Penh Post newspaper Phnom Penh Post - មាន​តែ​អ្នក​ជិះ​ឡាន​ទេ​មិន​ដឹង​ផ្លូវ​ថ្នល់​ក្លិន​ស្អុយ

Content image - Phnom Penh Post
គំនរ​សំរាម​ក្នុង​តំបន់​មួយ​នៅ​ក្នុង​ខណ្ឌ​ដូនពេញ រាជធានី​ភ្នំពេញ​។ ហេង ជីវ័ន

មាន​តែ​អ្នក​ជិះ​ឡាន​ទេ​មិន​ដឹង​ផ្លូវ​ថ្នល់​ក្លិន​ស្អុយ

ជា​រៀងរាល់​ឆ្នាំ​ឲ្យ​តែ​មាន​ពិធី​បុណ្យ​អុំទូក​ម្តង​គឺ​សំរាម និង​ទឹក​សម្អុយ​ចេញ​ពី​សំរាម​ហូរហៀរ​ពេញ​ថ្នល់​នៅ​តាម​ផ្លូវ​ដើរ សំរាម​ខ្លះ​ទៀត​ក៏​ហូរ​ចូល​ទឹកទន្លេ និង​ពេញ​លូ​ស្ទះ​នៅ​តំបន់​កន្លែង​ប្រារព្ធ​ពិធី​មុខ​ព្រះបរមរាជវាំង និង​តាម​សួនច្បារ​តាម​មាត់ទន្លេ បើ​ទោះបី​ជា​ក្រុមហ៊ុន​ស៊ិនទ្រី​ដាក់​វេន​ប្រមូល​ទាំង​កណ្តាល​យប់ និង​ពេល​ព្រឹក​ក៏​នៅ​តែ​មិន​ឈ្នះ​ទៀត​។

ឥឡូវ​បង្គន់​សាធារណៈ​មាន​ហើយ​តែ​ខ្វះ​ស្លាក​សញ្ញា​ចង្អុល​បង្ហាញ​ថា​បង្គន់​មាន​នៅ​កន្លែង​ណា​។ តើ​ការ​ដែល​សំរាម​ហូរហៀរ​ទាំង​ទឹក ទាំង​កាក​សំណល់​ពាសវាល​ពាស​កាល​ហ្នឹង​បណ្តាល​មកពី​គ្មាន​ធុង​សំរាម​​ធំៗ​សម្រាប់​ដាក់​គ្រប់គ្រាន់​? តើ​សាលា​រាជធានី​គួរ​មាន​យុទ្ធនាការ​យ៉ាង​ដូចម្តេច​ដើម្បី​ឲ្យ​មាន​ធុង​សំរាម​គ្រប់គ្រាន់​នោះ​? និង​លើក​កម្ពស់​ចំណេះដឹង​របស់​ប្រជាពលរដ្ឋ​ដែល​មក​ចូលរួម​ពិធី​ដើម្បី​ផ្លាស់ប្តូរ​ឥរិយាបថ​ពួកគាត់​ឲ្យ​ដាក់​សំរាម​ក្នុង​ធុង​? នេះ​គ្រាន់​ជា​ករណី​ដែល​នឹង​កើត​មាន​ឡើង​ដដែលៗ​រាប់​សិប​ឆ្នាំ​មក​ហើយ​នៅ​តែ​មិន​មាន​ការ​ផ្លាស់ប្តូរ​ទម្លាប់​ទាំង​​សំរាម​រឹង​ និង​ទាំង​សំរាម​រាវ​។

ឥឡូវ​ត្រឡប់​មក​ក្លិន​ស្អុយ​តាម​ផ្លូវ​ដែល​ធ្វើឲ្យ​អ្នក​បើកបរ​យានយន្ត​ទ្វារ​បិទ​ជិត និង​អ្នក​ដែល​ដើរ​ហិត​ក្លិន​ស្អុយ​សឹង​តែ​ថប់​ដង្ហើម​នៅ​ពេល​ជិះ ឬ​ក៏​ដើរ​កាត់​ថ្នល់​ដែល​មាន​ឡាន​សំរាម​ស៊ីនទ្រី​ស្រក់​ទឹក​សម្អុយ​ហូរ​កក្លិក​កក្លាក់​តាម​ផ្លូវ ឬ​ក៏​បើកបរ​ពី​​ក្រោយ​ឡាន​សំរាម​តែ​ម្តង​។

ក្លិន​ស្អុយ​ខ្លះ​ទៀត​បណ្តាល​មកពី​ពលរដ្ឋ​ខ្លះ​នៅ​ចោល​លាមក​ដាក់​ថង់​គប់​មក​ថ្នល់ ខ្លះ​ទៀត​កណ្តុរ​ងាប់​ក៏​គ្រវែង​ចូល​មក​ថ្នល់​ដែរ ឯ​ករណី​ខ្លះ​ទៀត​គឺ​មកពី​អ្នក​ជិះ​យានយន្ត​ចោល​ថង់ ឬ​ក៏​កំប៉ុង​ទឹក​ដែល​ផឹក​មិន​អស់​នៅ​ពេល​កំពុង​ធ្វើ​ដំណើរ និង​អ្នក​លក់​តាម​ចិញ្ចើម​ថ្នល់​ជះ​ទឹក​លាងចាន លាង​ខ្ទះ​មក​ចូល​ថ្នល់​តែ​ម្តង ពេល​ខ្លះ​សឹង​តែ​ជះ​លើ​ជើង​អ្នក​ធ្វើ​ដំណើរ​ថែម​ទៀត​ផង​។ ម្យ៉ាង​ទៀត​បុរសៗ​ឈរ​នោម​តាម​ចិញ្ចើមថ្នល់ ឬ​ក៏​ជញ្ជាំង​ផ្ទះ​ក៏​មាន​ក្លិន​ឆ្អេះ​ជះ​មក​ថ្នល់​ដែរ​។

យ៉ាង​ណា​មិញ​ម្នាក់ៗ​តែងតែ​ខឹង​សម្បា​នឹង​ក្រុមហ៊ុន​​ស៊ីនទ្រី​នៅ​ពេល​ដែល​បង់​លុយ​ឲ្យ​ពេញ​ថ្លៃ​តែ​ពេល​ប្រមូល​សំរាម​វិញ អ្នក​បើក​ឡាន​គឺ​បើក​ទៅ​មុខ​រហូត ហើយ​ឲ្យ​ម្ចាស់​ផ្ទះ​រត់​តាម​យក​ទៅ​ចាក់​តាម​ឡាន​មើល​ទៅ​ដូច​ទៅ​សុំ​ទាន​ពួកគេ​អ៊ីចឹង​នៅ​ពេល​ចាក់​ចូល​ក្នុង​ឡាន​គឺ​ធ្លាក់​តាម​ផ្លូវ​ទាំង​គោក​ទាំង​ទឹក​នៅ​លើ​ផ្លូវ រួច​ហើយ​ក្លិន​ស្អុយ​រលួយ​ចេញ​ពី​ទឹក​ទាំង​នោះ​ធ្វើឲ្យ​ម្ចាស់​ផ្ទះ​យក​ទឹក​ជះ​បន្ថែម​ដើម្បី​បំបាត់​ក្លិន​ស្អុយ​ទាំង​នោះ​។

រីឯ​ឡាន​សំរាម​ក្រុមហ៊ុន​ស៊ិនទ្រី​ក៏​កម្រ​លាង​ដែរ គ្រាន់តែ​សម្បក​ឡាន​ក៏​ក្លិន​ស្អុយ​ដែរ តើ​សុខភាព​អ្នក​ធ្វើការ​ឲ្យ​ក្រុមហ៊ុន​ស៊ីនទ្រី​ទាំង​នោះ​នឹង​ទៅ​ជា​យ៉ាង​ណា​?

ផ្លូវ​ដែល​ក្លិន​ស្អុយ​ជាប់​ជាង​គេ​នោះ​គឺ​ផ្លូវ​ស្ទឹងមានជ័យ​ទៅ​ដល់​ចំការដូង​ព្រោះ​ចំ​ផ្លូវ​ទៅ​កន្លែង​ស្តុក​សំរាម​ធំ​ជាង​គេ​នៅ​ភ្នំពេញ​។ បើ​ប្រៀបធៀប​ការ​ប្រមូល​សំរាម​ដូច​គ្នា​នៅ​ប្រទេស​ជឿនលឿន​វិញ​គឺ​មាន​លក្ខណៈ​ខុស​គ្នា​ព្រោះ​ស្រុក​គេ​ធុង​សំរាម​មាន​គម្រប​ពេល​ភ្លៀង​មក​អត់​មាន​ទឹក​ស្រក់​ចូល​ក្នុង​សំរាម​ទេ ហើយ​បែងចែក​គ្នា​រួច​ជា​ស្រេច​គឺ​មាន​ប្រភេទ​វិទ្យុសកម្ម​ប្រភេទ​អាច​យក​កែច្នៃ​បាន និង​កែច្នៃ​មិន​បាន​ហើយ​ពេល​ប្រមូល​គឺ​បញ្ចៀស​ម៉ោង​​កំពុង​ស្ទះ​ចរាចរណ៍​ផង​ដែរ​។ ម្យ៉ាង​គ្មាន​ចោរ​លួច​ធុង​សំរាម​ទេ តែ​នៅ​ស្រុក​ខ្មែរ​យើង​ធុង​សំរាម​ជ័រ ឬ​ក៏​ស្នោ​មាន​គម្រប​គឺ​មាន​ចោរលួច​បាត់​យក​ទៅ​លក់​អេតចាយ​អស់ អ៊ីចឹង​ហើយ​បាន​ជា​ទូទៅ​គឺ​ប្រើ​ធុង​ស្នោ​ចំហ​ពេល​ភ្លៀង​មក​មាន​ទឹក​ដក់​ស្រាប់ ជាង​នេះ​ទៅ​ទៀត​នោះ​គឺ​អ្នក​យក​សំរាម​ចាក់​ចោល​យក​ទាំង​សំរាម​ទាំង​ទឹក​ចូល​នៅ​ក្នុង​ធុង​ទើប​បាន​ជា​ធ្វើឲ្យ​មាន​ទឹក​កក្លិក​កក្លាក់​នោះ​។

ការ​ដែល​ក្រុមហ៊ុន​ស៊ីនទ្រី​ប្រមូល​តែ​សំរាម​រឹង តែ​មិន​ខ្វល់​រឿង​សំរាម​រាវ​ហ្នឹង​មកពី​ការ​ចុះ​កិច្ចសន្យា​ជាមួយ​រដ្ឋ​គឺ​ប្រមូល​តែ​សំរាម​រឹង​? ឥឡូវ​ក្លាយ​ទៅ​ជា​​បញ្ហា​ធំ​មួយ​ហើយ​រឿង​ក្លិន​ស្អុយ​នេះ បើ​មើល​កំណែ​ទម្រង់​វិមជ្ឈការ និង​វិសហមជ្ឈការ​ (D&D) ​វិញ​រឿង​គ្រប់គ្រង​សំរាម​នេះ​គឺ​ក្រសួង​បរិស្ថាន​បាន​ផ្ទេរ​មុខងារ​គ្រប់គ្រង​សំរាម និង​ថវិកា​មក​ថ្នាក់​ក្រោម​ជាតិ​គឺ​​រាជធានី-ខេត្ត ហើយ​រាជធានី​ភ្នំពេញ​ក៏​បាន​ផ្ទេរ​មុខងារ​តាម​បែប​ប្រតិភូកម្ម​មក​ខណ្ឌ​ទាំង​ ១២ រួច​ហើយ​តាំងពី​ឆ្នាំ​ទៅ​មក​ម្ល៉េះ​។

ឥឡូវ​ខណ្ឌ​នីមួយៗ​ជា​អ្នក​គ្រប់គ្រង​សំរាម​រៀងខ្លួន​ហើយ​ចុះ​កុងត្រា​ជាមួយ​ក្រុមហ៊ុន​ស៊ីនទ្រី​ទាំងអស់ តើ​ការ​មិន​យក​ចិត្ត​ទុក​ដាក់​បញ្ហា​សំរាម​រាវ​ក្លិន​ស្អុយ​នេះ​គឺ​មកពី​គ្មាន​ការ​​ប្រកួត​ប្រជែង​ក្រុមហ៊ុន​ប្រមូល​សំរាម​នៅ​រាជធានី​ភ្នំពេញ​?

សរុបមក​វិញ​ គឺ​បញ្ហា​សុខភាព​ជា​ចម្បង​ដោយសារ​សំរាម​រឹង សំរាម​រាវ​ធ្វើឲ្យ​ប៉ះពាល់​សុខភាព​ទាំងអស់ ហេតុ​ដូច្នេះ​សាលា​ខណ្ឌ​ដែល​ចុះ​កុងត្រា​ជាមួយ​នឹង​ក្រុមហ៊ុន​សំរាម​គឺ​​តម្រូវ​ឲ្យ​មាន​ការ​ធ្វើការ​តាមដាន និង​វាយតម្លៃ​ផលប៉ះពាល់​ភាព​ស្អាត​នៃ​បរិស្ថាន​នៅ​រាជធានី​ភ្នំពេញ​មិនមែន​មាន​ន័យ​អស់​សំរាម​រឹង​បាន​ថា​ស្អាត​នោះ​ទេ ដោយសារ​ថវិកា​ពី​រដ្ឋ​ដែល​បាន​ផ្ទេរ​ពី​ថ្នាក់​ជាតិ​ផង និង​ប្រមូល​លុយ​ប្រចាំ​ខែ​ពី​ប្រជាពលរដ្ឋ​ផង​វា​ល្មម​គ្រប់គ្រាន់​ហើយ​។

ករណី​នេះ​ក្រុមហ៊ុន​​សំរាម​ក៏​ធ្វើការ​តាមដាន​ការ​​អនុវត្ត​របស់​បុគ្គលិក​ខ្លួន​ឯង​ផង​ដែរ ដើម្បី​ចៀសវាង​កុំ​ឲ្យ​មាន​ក្លិន​ស្អុយ​នៅ​លើ​ផ្លូវ​ទៀត​។

ជាង​នេះ​ទៅ​ទៀត​ គឺ​បើក​ឲ្យ​ក្រុមហ៊ុន​ប្រមូល​សំរាម​ដទៃ​ទៀត​មាន​ការ​ចូលរួម​ប្រកួត​ប្រជែង​ដេញ​ថ្លៃ​ផង កុំ​មាន​តែ​មួយ​​ផ្តាច់​មុខ​នោះ​គឺ​ធ្វើ​អី​ស្រេច​តែ​នឹង​ចិត្ត​ហើយ​។ នៅ​ពេល​ដែល​សាលា​ខណ្ឌ​ណា​បាន​បាញ់​ទឹក​លាង​ថ្នល់​ម្តងៗ​គឺ​ពេល​អ្នក​ធ្វើ​ដំណើរ​ជិះ​កាត់​ផ្លូវ​នោះ​មាន​អារម្មណ៍​ធូរ​ទ្រូង ស្រួល​ខ្លួន អារម្មណ៍​ស្រស់ថ្លា និង​សប្បាយ​ចិត្ត​។

រីឯ​ករណី​អ្នក​ជះ​ទឹក​លើ​ថ្នល់​ក៏​ជួយ​ប្រាប់​គាត់​ផង គួរ​បញ្ឈប់​ទៅ​ហើយ​បើ​ឃើញ​អ្នក​ឈរ​នោម​នៅ​តាម​ជញ្ជាំង​ទៀត​នាំ​គ្នា​ថត​បង្ហោះ​នៅ​លើ​សង្គម​ហ្វេសប៊ុក​ថា​សូម​កុំ​យក​គំរូ​តាម​គាត់​នេះ​។ រាជរដ្ឋាភិបាល​គួរ​តែ​បង្កើត​កន្លែង​ស្តុក​ចាក់​សំរាម​បន្ថែម​ទៀត​យ៉ាង​ហោច​ណាស់​ក៏​ផ្លូវជាតិ​ចេញ​ពី​រាជធានី​ភ្នំពេញ​ទៅ​មាន​មួយ​កន្លែង​ផង​ដែរ​។

រីឯ​ការ​ចាត់​វិធាន​ដោះស្រាយ​បញ្ហា​សំរាម​នៅ​ពេល​ពិធី​បុណ្យ​អុំទូក​នេះ​ក៏​គួរ​តែ​ឲ្យ​ប្រសើរ​ឡើង​ជាង​មុន​ដែរ​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment