Search form

Login - Register | FOLLOW US ON

Logo of Phnom Penh Post newspaper Phnom Penh Post - យក​លុយ​នៅ​ផ្លូវ​វេងស្រេង តែ​មិន​អភិវឌ្ឍ​ផ្លូវ

យក​លុយ​នៅ​ផ្លូវ​វេងស្រេង តែ​មិន​អភិវឌ្ឍ​ផ្លូវ

130617_02
យានជំនិះទាំងអស់នេះ កំពុងតែកកស្ទះនៅលើដងផ្លូវវេងស្រេង នាពេលកន្លងមក តុង សុប្រាជ្ញ

មាន​យោបល់​របស់​មិត្ត​អ្នក​អាន​មួយ​រូប​នៅ​លើ​គេហទំព័រ​ភ្នំពេញ ប៉ុស្តិ៍​បាន ឌឺដង​ឲ្យ​ខ្ញុំ​ចំពោះ​អត្ថបទ​វិភាគ​មួយ​ដែល​ខ្ញុំ​បាន​ផ្តល់​ជា​យោបល់​ទៅ​លោក​ប៉ា សុជាតិវង្ស អភិបាល​រាជធានី​ភ្នំពេញ​ថ្មី អំពី​ការ​បាញ់​ទឹក​លាង​ថ្នល់​ឲ្យ​ស្អាត​ដើម្បី​កុំ​ឲ្យ​ហុយ​ធូលី​ដី​ចូល​ភ្នែក​ចូល​ច្រមុះ​ថា កាល​ពី​ចុង​ខែ​មុន​នេះ លោក​អភិបាល​ធ្វើ​បាន​មែន​ដូច​ចិត្ត យក​ឡាន​ទឹក​៣​ឡាន​មក​បាញ់​ទឹក​មក​លើ​ថ្នល់​គឺ​ស្អាត​ដោយ​ទាំង​ថ្នល់​ដោយ​ទាំង​បាតុករ​អ្នក​ភូមិ​បឹងកក់ ដែល​មក​តវ៉ា​នៅ​លើ​ផ្លូវ​នៅ​មុខ​សាលា​រាជធានី​ភ្នំពេញ​។ តើ​ហេតុ​អ្វី​បាន​ជា​សម្បូរ​ទឹក​ទៅ​បាញ់​បាតុករ​ជា​ជាង​បាញ់​ទឹក​លាង​ថ្នល់​ឲ្យ​ស្អាត​ដើម្បី​សុខភាព​ប្រជា​ពលរដ្ឋ?

រឿង​ថ្នល់​ស្អាត​ជា​រឿង​ចាំបាច់​មួយ​ដែល​ប្រជា​ពលរដ្ឋ​ត្រូវ​ការ​ប្រចាំ​ថ្ងៃ​នោះ​។ តែ​ឥឡូវ​នេះ មិន​ត្រឹម​តែ​រឿង​ថ្នល់​មិន​ស្អាត​នោះ​ទេ គឺ​ប្រជា​ពលរដ្ឋ​ត្អូញ​ត្អែរ​ខ្លាំង​ជាង​គេ​នោះ​គឺ​ផ្លូវ​មួយ​ចំនួន​ដែល​យក​លុយ​អ្នក​ធ្វើ​ដំណើរ​ហើយ​មិន​ធ្វើ​ឲ្យ​ស្អាត ថែម​ទាំង​មិន​ខ្វល់​ពី​ផ្លូវ​ក្រហេង​ក្រហូង​ទៀត​ផង​។ ជា​ធម្មតា​នៅ​ស្រុក​ខ្មែរ​យើង​មាន​របៀប​ឲ្យ​អ្នក​ធ្វើ​ដំណើរ​តាម​ផ្លូវ​បង់​លុយ​ដើម្បី​ថែ​ទាំ​ផ្លូវ​មាន​២​ប្រភេទ​គឺ​ប្រភេទ​ទី១ ផ្លូវ​របស់​រដ្ឋ​តែ​ក្រុមហ៊ុន​យក​លុយ​ពី​អ្នក​ដំណើរ​ដើម្បី​ជួស​ជុល​ថែ​ទាំ​ផ្លូវ​ឲ្យ​បាន​ល្អ​។ ឧទាហរណ៍​៖ ក្រុមហ៊ុន AZ Group យក​លុយ​ពី​អ្នក​ដំណើរ​ផ្លូវ​ជាតិ​លេខ ៤ ដែល​អាមេរិកាំង​ធ្វើ​ឲ្យ​នោះ និង​ទទួល​ខុស​ត្រូវ​ថែ​ទាំ​ផ្លូវ​នោះ។ ប្រភេទ​ទី ២​ក្រុមហ៊ុន​ជា​អ្នក​សាង​សង់​ផ្លូវ​និង​មើល​ថែទាំ​ផ្លូវ​នោះ គឺ​ក្រុមហ៊ុន​នោះ​ជា​អ្នក​យក​លុយ​ពី​អ្នក​ដំណើរ​។​រាល់​អ្នក​ដំណើរ​ដែល​ឆ្លង​កាត់​ផ្លូវ​និង​ស្ពាន​ព្រែក​ព្នៅ ត្រូវ​បង់​លុយ​ឲ្យ​ក្រុមហ៊ុន លី យ៉ុងផាត់ ដែល​ជា​ម្ចាស់​សាងសង់​ស្ពាន និង​ថ្នល់​នោះ។

ប៉ុន្តែ​ប្រជា​ពលរដ្ឋ​កត់​សម្គាល់​ថា មាន​ផ្លូវ​ខ្លះ​ក្រុមហ៊ុន​យក​លុយ​ហើយ​ធ្វើ​បាន​ល្អ​ទៀត​។​ដូច​ជា​ផ្លូវ​ម៉ៃដារ​ពី​ពោធិ៍ចិនតុង​មក​អូរ​បែក​ក្អម គឺ​ផ្លូវ​ស្អាត​ភ្លឹង តែ​ចុះ​ហេតុ​អ្វី​បាន​ជា​ផ្លូវ​វេងស្រេង​ដែល​យក​លុយ​ពី​រថយន្ត​អ្នក​ដំណើរ​រៀង​រាល់​ថ្ងៃ​ដូច​គេ​ដែរ​តែ​បែរ​ជា​ផ្លូវ​ខូច​វល់​ខ្ទេច​ខ្ទី​អស់​មិន​ជួស​ជុល​? រាល់​ពេល​មិន​ថា​ពេល​ព្រឹក​ឬ​ថ្ងៃ​ទេ​គឺ​ហុយ​ឡើង​ឈ្លក់​ទំាង​អ្នក​ដំណើរ​ទាំង​អ្នក​រស់​នៅ​តាម​ដង​ផ្លូវ​នោះ​ដែរ​ហើយ​បើ​ធ្វើ​ដំណើរ​ពី​ម្ខាង​ទៅ​ម្ខាង​ពី​ស្ទឹង​មាន​ជ័យ​រហូត​ដល់​ចោមចៅ​លើ​ផ្លូវ​វេងស្រេង​នោះ​គឺ ខោ​អាវ​អ្នក​ធ្វើ​ដំណើរ​ដោយ​ម៉ូតូ​ឡើង​ស្រមកៗ ភ្នែក​បើក​មិន​ចង់​រួច​ទេ​។​បើ​នៅ​ខែ​ភ្លៀង​ដូច​រាល់​ថ្ងៃ​នេះ​វិញ គឺ​បែក​ភក់​បែក​ម៉ាំ​វល់ ហើយ​ទឹក​សាច​ប្រឡាក់​គ្នា​និង​ម្នាក់ៗ​នាំ​គ្នា​ជិះ​តែ​គេច​ទឹក​ដក់​លើ​ផ្លូវ​ធ្វើ​ឲ្យ​រឹត​តែ​ស្ទះ​ចរាចរណ៍​ថែម​ទៀត។

តែ​បញ្ហា​សំខាន់​នោះ​ផ្លូវ​នោះ គឺ​មាន​ទីតាំង​នៅ​តំបន់​ឧស្សាហកម្ម​ផង​និង​តំបន់​សេដ្ឋកិច្ច​ផង រថយន្ត​កុងតឺន័រ​ធំៗ និង​រថយន្ត​ក្រុង​ធំៗ បើក​ធ្លាក់​ជង្ហុក​ឡើង​លាន់​គ្រាំងៗ ធ្វើ​អ្នក​បើក​បរ​ដទៃ​ទៀត​ចង់​ស្លុត​ស្រៀវ​សាច់​អស់​ហើយ​ហើយ​ពេល​ខ្លះ​ចំ​ពេល​ដែល​កម្មករ​រោងចក្រ​ចេញ​ផង​និង​អ្នក​ចេញ​ពី​ធ្វើការ​ពី​រាជធានី​ទៅ​ផង​គឺ​ស្ទះ​ចរាចរណ៍​នៅ​លើ​ផ្លូវ​នោះ​រាប់​ម៉ោង​។ ឯ​អ្នក​លក់​នៅ​លើ​ផ្លូវ​ក៏​ចេះ​តែ​រំកិល​ចូល​ថ្នល់​បន្តិច​ម្តងៗ​រឹត​តែ​ស្ទះ​ថែម​ទៀត​តែ​ឃើញ​មាន​ប៉ូលិស​ចរាចរណ៍​តិចតួច​ឬ​ក៏​ក្រុមហ៊ុន​វេងស្រេង​នោះ ចេញ​មក​ដោះស្រាយ​ទេ គឺ​មាន​តែ​ចាំ​តែ​យក​លុយ​ដូច​តែ​គ្នា​ចង់​ស្ទះ​អី​ក៏​ស្ទះ​ទៅ​។

យូរៗ​ទៅ ទៅ​ជា​ផ្លូវ​មិន​យក​លុយ​និង​ផ្លូវ​យក​លុយ​ក៏​រលួយ​ដូច​តែ​គ្នា​ទៅ​ហើយ​បើ​ប្រៀប​ធៀប​ផ្លូវ​វេងស្រេង និង​ផ្លូវ​៣៧១ (​ផ្លូវ​ផ្សារ​ប៉េសេ​)​មិន​យក​លុយ​។​ថ្មីៗ​នេះ​លោក​នាយក​រដ្ឋ​មន្ត្រី ហ៊ុន សែន ធ្លាប់​ថ្លែង​ព្រមាន​អំពី​បញ្ហា​រថយន្ត​ដឹក​ទំនិញ​លើស​ចំណុះ ដែល​ធ្វើ​ឲ្យ​ខូច​គុណភាព​ថ្នល់​ហើយ​ក្រុមហ៊ុន​គ្រាន់​តែ​ផាក​យក​លុយ​តែ​រថយន្ត​នោះ​នៅ​តែ​ឲ្យ​ឆ្លង​កាត់​ធ្វើ​ខូច​ថ្នល់​។ តែ​ក្រុមហ៊ុន​ខ្លះ​មិន​ត្រឹម​តែ​ធ្វើ​មិន​ដឹង​មិន​ឮ​ប្រសាសន៍​លោក នាយក​រដ្ឋ​មន្ត្រី​ទេ គឺ​ថែម​ទាំង​មិន​ជួស​ជុល​ទៀត​ផង។

យ៉ាង​ណា​មិញ បើ​ក្រុមហ៊ុន​ដែល​ធ្វើ​ផ្លូវ​វេងស្រេង​យក​លុយ​ហើយ មិន​ជួស​ជុល​ថែទាំ​និង​មិន​ជួយ​ធ្វើ​ចរាចរ​លើ​ផ្លូវ​នោះ​ទេ​តើ​សាលា​រាជធានី​ភ្នំពេញ អាច​ដក​មក​អភិវឌ្ឍ​ខ្លួន​ឯង​វិញ​បាន​ដែរ​ឬ​ទេ​? ឬ​មួយ​សាលា​រាជធានី​និង​ទីស្តី​ការ​គណៈ​រដ្ឋ​មន្ត្រី​មិន​ហ៊ាន​ធ្វើ​អ្វី​ក្រុមហ៊ុន​វេងស្រេង នេះ​ទេ​ធ្វើ​មិន​កើត​នោះ​មក​ពី​បាន​លុយ​មក​ពី​ប្រជា​ពលរដ្ឋ​ធ្វើ​ដំណើរ​មក​ចែក​គ្នា​ចាយ​ដែរ​? អ៊ីចឹង​ហើយ​បាន​ជា​នាំ​គ្នា​ធ្វើ​មិន​ដឹង​មិន​ឮ​ទាំង​អស់​គ្នា​ទៅ​ចង់​ប្រជា​ពលរដ្ឋ​ត្អូញ​អី​ត្អូញ​ទៅ កំពុង​តែ​ខ្វះ​លុយ​ដាក់​បក្ស និង​ចុះ​មូលដ្ឋាន​ចែក​អំណោយ​ផង​?

កន្លង​មក​យើង​ក៏​ទទួល​ស្គាល់​ដែរ​ថា​កុំ​តែ​បាន​ផ្លូវ​វេងស្រេង​ហ្នឹង​ទេ ជួយ​ដោះស្រាយ​ឡាន​កុងតឺន័រ​បើក​ចូល​ក្រុង​តាម​ផ្លូវ​សហព័ន្ធ​រុស្សី នោះ​។ តែ​អ្វី​ដែល​សំខាន់​នោះ​គឺ​មិន​ទើប​តែ​ឥឡូវ​នេះ​ទេ​ផ្លូវ​នោះ​គឺ​ច្រើន​ឆ្នាំ​មក​ហើយ​ដែល​ក្រុមហ៊ុន​មិន​ជួស​ជុល​ថែទាំ​នោះ​គឺ​ដឹង​តែ​ពី​យក​លុយ​។ ហើយ​អ្វី​ដែល​សំខាន់​នោះ​គឺ​ជា​ផ្លូវ​វេងស្រេង​ងាយ​គ្រោះថ្នាក់​ចរាចរណ៍​ជាង​គេ និង​ថែម​ទាំង​ប៉ះពាល់​សុខភាព​ប្រជា​ពលរដ្ឋ​ដែល​រស់​នៅ​ទី​នោះ និង​អ្នក​ធ្វើ​ដំណើរ​តាម​ផ្លូវ​នោះ​រាល់​ថ្ងៃ​។

ស្រុក​ខ្មែរ​ស្រួល​ម្យ៉ាង​ដែរ​ឲ្យ​តែ​បាន​អាជ្ញាប័ណ្ណ​ពី​រដ្ឋាភិបាល​ហើយ​គឺ​ក្រុមហ៊ុន​ចង់​ធ្វើ​អ្វី​ស្រេច​តែ​នឹង​ចិត្ត​ហាក់​បី​ដូច​ជា​គ្មាន​ឃើញ​មន្ត្រី​ណា​ទៅ​ចុះ​វាយ​តម្លៃ​ឬ​ក៏​ត្រួត​ពិនិត្យ​ការ​អនុវត្ត​ប្រៀប​ធៀប​ទៅ​នឹង​កិច្ច​សន្យា​ទេ​។​ហេតុ​ដូច​នេះ ហើយ​ទីស្តី​ការ​គណៈ​រដ្ឋ​មន្ត្រី ដែល​ឮ​ល្បី​ថា​ពូកែ​ខាង​ប្រមូល​ដាក់​ឲ្យ​ក្រុមហ៊ុន​ដេញ​ថ្លៃ​សាង​សង់​ហេដ្ឋា​រចនា​សម្ព័ន្ធ​ស្ពាន​ថ្នល់ គួរ​គិត​គូរ​ឡើង​វិញ និង​ដោះស្រាយ​រឿង​ផ្លូវ​វេងស្រេង ដែល​ក្រុមហ៊ុន​យក​លុយ​គេ ហើយ​មិន​ជួស​ជុល​ថែ​ទាំ​ផ្លូវ​នោះ​៕

ផ្តល់​យោបល់​តាម​រយៈ soprach.tong@phnompenhpost.com

0

Comments

Please, login or register to post a comment