Search form

Login - Register | FOLLOW US ON

Logo of Phnom Penh Post newspaper Phnom Penh Post - យុវជន​ត្រូវ​តែ​ហ៊ាន​ចេញ​មុខ​ថ្កោលទោស​យុវជន​ណា ​ដែល​ហ៊ាន​ប្រើ​ហិង្សា​លើ​មិត្តស្រី

ជន​ជាប់ចោទ​ជា​គ្រូ​បង្រៀន​ភាសា​អង់គ្លេស​ចាក់​សម្លាប់​មិត្តស្រី​របស់​ខ្លួន​។
ជន​ជាប់ចោទ​ជា​គ្រូ​បង្រៀន​ភាសា​អង់គ្លេស​ចាក់​សម្លាប់​មិត្តស្រី​របស់​ខ្លួន​។ រូបថត នគរបាលជាតិ

យុវជន​ត្រូវ​តែ​ហ៊ាន​ចេញ​មុខ​ថ្កោលទោស​យុវជន​ណា ​ដែល​ហ៊ាន​ប្រើ​ហិង្សា​លើ​មិត្តស្រី

យុទ្ធនាការ​​ពាក់​​បូ​ពណ៌​ស​រយៈពេល ១៦ ថ្ងៃ​ពី​ថ្ងៃ​ទី​ ២៥ វិច្ឆិកា ដល់​ថ្ងៃ​ទី​ ១០ធ្នូ ជា​និមិត្តរូប​ចូលរួម​លុប​បំបាត់​អំពើ​ហិង្សា​ប្រឆាំង​ស្ត្រី និង​កុមារី​ដែល​រួមមាន​អំពើ​ហិង្សា​លើ​រូបរាង​កាយ ផ្លូវ​ចិត្ត ផ្លូវ​ភេទ និង​សេដ្ឋកិច្ច ពាក់ព័ន្ធ​នឹង​គ្រប់​ផ្នែក​នៃ​ការ​បែងចែក​នូវ​ប្រាក់​ចំណូល​វប្បធម៌​ និង​វណ្ណៈ​នៅក្នុង​ជីវភាព​រស់នៅ​ប្រចាំ​ថ្ងៃ​ជា​សាធារណៈ និង​ឯកជន។

អំពើ​ហិង្សា​ផ្នែក​យេនឌ័រ (Gender based violence) មិន​ថា​បុរស ឬ​ស្ត្រី​ទេ​សព្វ​ថ្ងៃ​នេះ​ពោរពេញ​ទៅ​ដោយ​កំហឹង​នៅ​ជាប់​នឹង​ខ្លួន​ឲ្យ​តែ​ឃ្នើស​ចិត្ត​តែ​បន្តិច​ចាប់ផ្តើម​ជះ​កំហឹង​ដាក់​គ្នា​ទៅវិញ​ទៅមក​ដែល​អាច​ឈាន​ទៅ​ដល់​អំពើ​ហិង្សា​​លើ​រូបរាង​កាយ។ បើ​តាម​ទិន្នន័យ​ទាំង​ការ​សិក្សា​ស្រាវជ្រាវ និង​ករណី​ជាក់ស្តែង​គឺជា​ទូទៅ​បុរស​មាន​ទំនោរ​ភាគច្រើន​ប្រើ​អំណាច​កម្លាំង​បាយ និង​អំពើ​ហិង្សា​មកលើ​ស្រ្តី​ និង​កុមារី។ នេះ​បើ​តាមរយៈ​និយមន័យ​ដែល​ជា​អនុសាសន៍​ទូទៅ​លេខ​ ១៩ ​នៃ​សន្ធិ​សញ្ញា​ស្តីពី​ការ​លុប​បំបាត់​រាល់​ទម្រង់​នៃ​ការ​រើសអើង​ប្រឆាំង​នឹង​នារី​ភេទ​ (CEDAW)។ ជាមួយ​គ្នា​នេះ​ដែរ​អំពើ​ហិង្សា​​យេនឌ័រ​នេះ​ដែល​ទស្សនៈ​ទូទៅ​បណ្តាល​មក​ពី​ភាព​ក្រីក្រ​តែ​និន្នាការ​នេះ​បាន​និង​កំពុង​រីក​រាលដាល​ចេញ​មកពី​អ្នក​មាន​ទ្រព្យ​សម្បត្តិ ​អ្នក​មាន​ចំណេះដឹង​អ្នក​មាន​តួនាទី​ធំដុំ​ក៏​ធ្លាក់​ក្នុង​អំពើ​ហិង្សា​ផង​ដែរ​ ដែល​​មូលហេតុ​ចម្បង​គឺ​ស្នេហា​ត្រីកោណ​ សហាយស្មន់ ភ្ជាប់​មក​ជាមួយ​នឹង​ភ្លើង​ប្រចណ្ឌ​ដែល​មាន​បុរស​មាន​ប្រពន្ធ​ហើយ​មាន​​ស្រី​ស្នេហ៍​ទៀត​។

តាមរយៈ​ការ​សិក្សា​ស្រាវជ្រាវ​អង្កេត​ប្រជាសាស្ត្រ និង​សុខភាព​កម្ពុជា​ឆ្នាំ ២០០៥ បាន​បង្ហាញ​ថា​ស្ត្រី​នៅ​ក្នុង​អត្រា​ចំនួន ១២,៨ ភាគរយ​បាន​រាយការណ៍​ថា​បាន​រងគ្រោះ​អំពើ​ហិង្សា​លើ​រូបរាង​កាយ​ពី​ដៃគូ​ស្នេហា​របស់​ពួកគេ​ក្នុង​រយៈពេល​ ១២ ​ខែ​ចុង​ក្រោយ​។

បច្ចុប្បន្ន​នេះ​បញ្ហា​អំពើ​ហិង្សា​ផ្នែក​យេនឌ័រ​ដែល​បណ្តាល​មកពី​ស្នេហា​ត្រីកោណ​កំពុង​តែ​រីក​រាលដាល​ក្នុង​ចំណោម​យុវវ័យ​ដែល​មាន​ចំណេះដឹង​ខ្ពស់​គួរ​ឲ្យ​ព្រួយបារម្ភ​មាន​តាំងពី​ការ​ជះ​ទឹក​អាស៊ីត ការ​វាយដំ​ធ្វើ​ទារុណកម្ម​ ការ​ចាក់​សម្លាប់ ការ​បង្ខំ​រួមភេទ និង​ការ​ចាប់​រំលោភ​សេពសន្ថវៈ​ (បូក) ជាដើម។

គ្រាន់​តែ​សប្តាហ៍​កន្លង​ទៅ​នេះ​​មាន​ករណី​ធ្ងន់ធ្ងរ​ចំនួន​ ៣ ​ករណី​ដែល​យុវជន​ប្រើ​ហិង្សា​មកលើ​យុវនារី​ដែល​ជា​មិត្តស្រី​របស់​ខ្លួន​។ ករណី​ទី​ ១ គឺ​យុវជន​ដែល​ជា​គ្រូ​បង្រៀន​ភាសា​អង់គ្លេស​នៅ​សាលា​ឯកជន​ប៊ែលធី​ក្រុង​តាខ្មៅ​ខេត្ត​កណ្តាល​បាន​ចាក់​សម្លាប់​គូ​ដណ្តឹង​របស់​ខ្លួន​ដែល​ជា​គ្រូបង្រៀន​នៅ​សាលា​នេះ​ដែរ​ដោយសារ​តែ​យុវជន​ដែល​ជា​ជនល្មើស​មាន​កំហឹង​ទៅលើ​មិត្តស្រី​របស់​ខ្លួន​ដែល​សុំ​បញ្ចប់​ទំនាក់​ទំនង​គ្នា​ដែល​នាង​បាន​ចោទ​ប្រកាន់​យុវជន​រូប​នោះ​លួច​មាន​ស្រី​កំណាន់​ម្នាក់​ទៀត​។

ករណី​ទី​ ២ គឺ យុវជន​ម្នាក់​ទៀត​ធ្វើការ​នៅ​ក្រុមហ៊ុន​ទេសចរណ៍​បាន​បង្ខាំង​​មិត្តស្រី​របស់​ខ្លួន​ដែល​ជា​និស្សិត​សាលា​ពេទ្យ និង​ធ្វើ​ទារុណកម្ម​វាយដំ​នាង​យ៉ាង​វេទនា​នេះ​ក៏​ដោយសារ​តែ​ភ្លើង​ប្រចណ្ឌ​​នឹង​មិត្តស្រី​របស់​ខ្លួន​នៅ​សង្កាត់​ទួលសង្កែ​រាជធានី​ភ្នំពេញ។

ករណី​ទី​ ៣ គឺ​ការ​ចាប់​រំលោភ​សេពសន្ថវៈ​ (បូក​) មិត្ត​ស្រី​របស់​ខ្លួន​ដែល​ជា​កម្មករ​រោងចក្រ​ដូច​គ្នា​គឺ​យុវជន​ដែល​មាន​មិត្តភក្តិ​ចំនួន​ ៤ នាក់​បាន​ប្រើ​អំពើ​ហិង្សា​ផ្លូវភេទ​មក​លើ​មិត្តស្រី​ម្នាក់​ក្នុង​ចំណោម​​យុវជន​ ៤ នាក់​នោះ​នៅ​ស្រុក​ឧដុង្គ ខេត្ត​កំពង់ស្ពឺ​។

តើ​យុវជន​ដែល​ហ៊ាន​សម្រេច​ធ្វើការ​វាយប្រហារ​ដោយ​ហិង្សា​ទៅលើ​មិត្តស្រី​របស់​ខ្លួន​បែប​នេះ​ដោយសារ​តែ​ការ​ធ្វើ​ត្រាប់​តាម​មនុស្ស​ចាស់​ដែល​ប្រព្រឹត្ត​អំពើ​ហិង្សា​មកលើ​ស្រ្តី​ដែល​ជា​ដៃគូ ឬ​ប្រពន្ធ​របស់​ខ្លួន​តាមរយៈ​រូបភាព និង​សកម្មភាព​តាម​ព័ត៌មាន និង​ហ្វេសប៊ុក​ដែល​ងាយ​នឹង​ទទួល​បាន​? ឬ​ក៏​មូលហេតុ​អ្វី​បាន​បញ្ហា​ហិង្សា​សាហាវ​ក្នុង​ចំណោម​​យុវជន​បែប​នេះ​ហើយ​តែ​យុវជន​ខ្លួនឯង​មិន​បាន​ធ្វើ​ការ​ចេញ​​មុខ​តវ៉ា​ជា​សាធារណៈ​ប្រឆាំង​នឹង​យុវជន​ការ​ប្រើ​អំពើ​ហិង្សា​លើ​យុវនារី​ដែល​ជា​មិត្តស្រី​របស់​ខ្លួន​? ដែល​ជា​ទូទៅ​យុវជន​បាន​ត្រឹម​តែ​ចេញ​កំហឹង​ទៅលើ​ជនល្មើស​តែ​នៅ​លើ​ហ្វេសប៊ុក​បែប​លក្ខណៈ​ជេរ​ប្រទេច​ ឬ​ហែកហួរ​ទៅ​វិញ​ហាក់បី​ដូចជា​មិន​មាន​ប្រសិទ្ធភាព​ទាល់តែ​សោះ​ឯ​យុវជន​ខ្លះ​ទៀត​ធ្វើ​មិន​ដឹង​មិន​ឮ​មិន​ខ្ចី​ឈឺ​ក្បាល​​វិល​មុខ​ជាមួយ​នឹង​បញ្ហា​ហិង្សា​សាហាវ​ទាំង​នេះ​គឺ​មិន​ដូច​យុវជន​នៅ​ប្រទេស​ឥណ្ឌា​គឺ​គេ​នាំ​គ្នា​ចេញ​មុខ​ធ្វើ​បាតុកម្ម​ប្រឆាំង​ថ្កោល​ទោស និង​ទាមទារ​ទាល់​​តែ​បាន​ជោគជ័យ​ទៅ​នឹង​ជនល្មើស​ដែល​រំលោភ​សេពសន្ថវៈ​ជា​ក្រុម​មក​លើ​យុវនារី​និស្សិត​ពេទ្យ​នៅលើ​រថយន្ត​ក្រុង​កាលពី​ឆ្នាំ​ ២០១៣ ហើយ​វាយដំ​រហូត​ដល់​ស្លាប់​។

រីឯ​ក្រសួង​កិច្ចការ​នារី​ក៏​ដូចជា​បណ្តា​អង្គការ​មិនមែន​រដ្ឋាភិបាល​ដែល​ធ្វើការ​លើ​​សិទ្ធិ​ស្ត្រី ការពារ​ស្ត្រី​មិន​មាន​ប្រតិកម្ម និង​បាន​ចេញ​នូវ​សេចក្តី​ថ្លែងការណ៍​ប្រឆាំង​នឹង​ទង្វើ​សាហាវ និង​សម្លាប់​យ៉ាង​យង់ឃ្នង​របស់​យុវជន​ដែល​ជា​ជនល្មើស​មក​លើ​មិត្តស្រី​របស់​ខ្លួន​។ តែ​បាន​តែ​ក្លាហាន​ចេញ​សេចក្តី​ថ្លែងការណ៍​ប្រឆាំង​អំពើ​ហិង្សា​វ៉ៃតប់​គ្នា​របស់​អ្នក​ល្បីៗ​ដូចជា​តារា​សាសា​រងគ្រោះ​អំពើ​ហិង្សា​ដោយ​ឧកញ៉ា សុខ ប៊ុន ដែល​មើល​ទៅ​ដូចជា​សម្បើម​នាំ​គ្នា​ឈូឆរ​យក​មុខ​យក​មាត់​ណាស់​មួយៗ​។

តែ​ដល់​ពេល​យុវវ័យ​ចាក់​គ្នា​សុសសាច់​បង្ខាំង​ធ្វើ​ទារុណកម្ម​វាយដំ​តាម​ចិត្ត​យក​មិត្តស្រី​ទៅ​រំលោភ​បូក​គ្មាន​ឃើញ​លិខិត​ថ្កោលទោស​ ឬ​ក៏​ការ​តវ៉ា​ប្រឆាំង​នឹង​យុវជន​ដែល​​ជា​ជនល្មើស​មកលើ​មិត្តស្រី​ខ្លួន​ចេញ​ពី​ក្រសួង​កិច្ចការ​នារី និង​អង្គការ​មិនមែន​រដ្ឋាភិបាល​ទាំង​ការពារ​សិទ្ធិ​ស្ត្រី​បណ្តាញ​បុរស​កម្ពុជា អង្គការ​យុវជន សហព័ន្ធ​យុវជន​ទេ នាំ​គ្នា​ដេក​លក់​នៅ​ស្ងាត់​ជ្រាប​សន្សំ​តែ​សុខ​រៀងៗ​ខ្លួន​ពោល​គឺ​មិន​បាន​ជួយ​លុប​បំបាត់​អំពើ​ហិង្សា​ជា​ដុំ​កំភួន​នោះ​ទេ​។

យ៉ាង​ណា​មិញ​គណៈកម្មការ​ទី​ ៨ ​ដែល​ទទួល​បន្ទុក​កិច្ចការ​ស្រ្តី​នៃ​រដ្ឋសភា​ក៏​មិន​ដែល​អើពើ​​កោះ​អញ្ជើញ​រដ្ឋមន្ត្រី​ក្រសួង​កិច្ចការ​នារី​មក​សាកសួរ​ពី​វឌ្ឍនភាព​​របស់​ស្រ្តី និង​កុមារី​ទាំង​សុខុមាលភាព និង​តួនាទី​ស្ត្រី​នៅក្នុង​សង្គម​ដល់​ណា​ហើយ​? តើ​ការ​អនុវត្ត​ផែនការ​សកម្មភាព​ជាតិ​ស្តីពី​ការ​ទប់ស្កាត់​អំពើ​ហិង្សា​ប្រឆាំង​លើ​ស្ត្រី​ឆ្នាំ​ ២០១៤ ដល់​ឆ្នាំ​ ២០១៨ ឆ្លើយតប​ទៅ​នឹង​ស្ថានភាព​ជាក់ស្តែង​របស់​ស្រ្តី​ហើយ​ឬ​នៅ​?

កុំ​ចាំ​ទាល់​តែ​មាន​ការ​ផ្ទុះ​នៃ​ការ​រីក​រាលដាល​ឆ្លង​មេរោគ​អេដស៍​ដូច​នៅ​ឃុំ​រកា​ខេត្ត​បាត់ដំបង​បាន​នំា​គ្នា​ស្ទុះស្ទា​អញ្ជើញ​រដ្ឋមន្ត្រី​ក្រសួង​សុខាភិបាល​មក​ឆ្លើយ​បំភ្លឺ​មើល​ទៅ​វា​ហាក់​ដូចជា​យឺត​ពេល​ទៅ​ហើយ​ក្នុង​ការ​ទប់ស្កាត់ និង​ជួយ​សង្គ្រោះ​ហើយ​បើ​គ្រាន់​តែ​រង់ចាំ​បំពាក់​បូរស​ប្រឆាំង​នឹង​អំពើ​ហិង្សា​លើ​នារី​ភេទ ១ ​ឆ្នាំ​ម្តង​ចំណេះដឹង​ហ្នឹង​សឹង​តែ​នឹង​ភ្លេច​ទៅ​ហើយ​។

នេះ​គឺជា​បញ្ហា​ដ៏​សែន​គ្រោះថ្នាក់​មួយ​ដែល​ជា​ទី​ពេញ​និយម​ក្នុង​ចំណោម​យុវវ័យ​អាច​រៀន​តៗ​គ្នា​ហើយ​យុវនារី​មាន​ការ​ភ័យ​កាន់តែ​ខ្លាំង​ឡើង​ខណៈ​ដែល​យុវវ័យ​ជា​ប្រុស​មួយ​ចំនួន​នោះ​កាន់តែ​ហ៊ាន​សាហាវ​ទៅៗ​បើ​ទោះបី​ជា​ពួកគេ​មាន​ចំណេះដឹង​ខ្ពស់​ក៏ដោយ​។ នេះ​ក៏​ដោយសារ​តែ​ស្ថានភាព​បច្ចុប្បន្ន​របស់​យុវវ័យ​កំពុង​តែ​ស្ថិត​នៅក្នុង​ស្ថានភាព​អន្តរកាល​ពី​ការ​រស់នៅ​បែប​អភិរក្ស​មក​លក្ខណៈ​ទំនើបកម្ម​គឺ​​អាច​​ធ្វើឲ្យ​មាន​ផល​ប៉ះពាល់​ពី​ការ​រួមភេទ​មុន​ពេល​រៀបការ​ (Soprach, 2008) និង​ឈាន​ដល់​ការ​ប្រចណ្ឌ និង​អំពើ​ហិង្សា​កើត​មាន​ឡើង​ចំពោះ​យុវជន​។

ហេតុ​ដូច​នេះ​ហើយ​យុវវ័យ​គួរ​តែ​គិតគូរ​ពី​អនាគត​ដ៏​វែង​ឆ្ងាយ​ជាពិសេស​សម្រេច​ចិត្ត​ឲ្យ​បាន​ច្បាស់លាស់​ក្នុង​ការ​​រួមភេទ​ជាមួយ​ដៃគូរ​របស់​ខ្លួន​ដែល​ឫស​គល់​នៃ​បញ្ហា​ដែល​នាំឲ្យ​មាន​អំពើ​ឃោរឃៅ​កើត​មាន​ឡើង​។ រីឯ​ក្រសួង​កិច្ចការ​នារី​គួរតែ​បន្ថែម​ថវិកា​យេនឌ័រ​ (Gender Budget) ​ឆ្នាំ​ ២០១៦ ក្នុង​ការ​ផ្សព្វផ្សាយ​នូវ​ច្បាប់​ពាក់ព័ន្ធ​អំពើ​ហិង្សា​ប្រឆាំង​នឹង​ស្ត្រី​ឲ្យ​បាន​ទូលំទូលាយ​ដើម្បី​ឲ្យ​ឆ្លើយតប​ទៅ​នឹង​យុទ្ធសាស្ត្រ​សំខាន់ៗ​ដែល​មាន​នៅក្នុង​ផែនការ​ ៤ ឆ្នាំ​នោះ​ (NAPVAW, 2014-2018)។ យ៉ាង​ណា​មិញ​ទាំង​អង្គការ​ស្ត្រី និង​អង្គការ​យុវជន​គួរ​តែ​ចេញ​យុទ្ធនាការ​ឲ្យ​បាន​ខ្លាំងក្លា​ប្រឆាំង​នឹង​ទង្វើ​អមនុស្ស​របស់​យុវជន​មកលើ​មិត្តស្រី​របស់​ខ្លួន​នេះ​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ