Search form

Login - Register | FOLLOW US ON

Logo of Phnom Penh Post newspaper Phnom Penh Post - រដ្ឋ​គួរ​មាន​តម្លាភាព ​រឿង​បំណុល​ជំពាក់​បរទេស

Content image - Phnom Penh Post
ស្ពាន​នៅ​ជ្រោយចង្វារ​ទាំង​ ២ ដែល​បាន​ពី​ការ​ផ្ដល់​ជំនួយ​ពី​ចិន​ និង​ជប៉ុន​។ ហុង មិនា

រដ្ឋ​គួរ​មាន​តម្លាភាព ​រឿង​បំណុល​ជំពាក់​បរទេស

ប្រទេស​ណា​ក៏​ដូចជា​ប្រទេស​ណា​ដែរ សុទ្ធ​តែ​មាន​បំណុល​ជំពាក់​គេ​ទាំងអស់ គ្រាន់តែ​តិច​ ឬ​ក៏​ច្រើន​ប៉ុណ្ណោះ តែ​អ្វី​ដែល​សំខាន់​គឺ​មាន​លទ្ធភាព​សង​គេ​ទាន់​កាលកំណត់​ដែរ​ឬ​ក៏​អត់​? ហើយ​លទ្ធភាព​អាច​សង​ផ្អែក​លើ​កត្តា​អ្វី​ខ្លះ​?

កាលពី​សម័យ​អង្គរ​គឺ​បុព្វបុរស​យើង​បាន​សាង​ទុក​កេរមរតក​ឲ្យ​កូន​ខ្មែរ​ជំនាន់​ក្រោយ​រកស៊ី​​តកូន​តចៅ ដោយសារ​ប្រាង្គប្រាសាទ​រហូត​មក​ដល់​បច្ចុប្បន្ន​នេះ តែ​មក​ដល់​សម័យ​នេះ​កូនចៅ​ខ្មែរ​បែរ​ជា​ចូល​ដល់​ដំណាក់កាល​កើត​មក​ជំពាក់​គេ​ទៅ​​វិញ​។

ការ​ខ្ចី​លុយ​ពី​បរទេស​ដែល​មាន​ការប្រាក់​តិច​យក​មក​អភិវឌ្ឍ​ចេះ​តែ​កើន​ឡើងៗ​រហូត​មក​ដល់​ខែ​មិថុនា​ឆ្នាំ​ ២០១៧ ​នេះ​​គឺ​កើន​ដល់​ទៅ​ ៦,២ ​ពាន់​លាន​ដុល្លារ​។ ​នេះ​បើ​យោង​តាម​សេចក្ដី​ព្រាង​ថវិកា​ជាតិ​ឆ្នាំ​ ២០១៨ ដែល​បាន​ចេញ​ផ្សាយ​កាលពី​សប្តាហ៍​មុន​នេះ​ហើយ​អត្រា​ ២៨ ​ភាគរយ​ធៀប​នឹង ​GDP ​របស់​ប្រជាជន​កម្ពុជា​ជាង​ ១៥ លាន​នាក់​ដែល​ក្នុង​ម្នាក់ៗ​ជំពាក់​បំណុល​ ៤០០ ​ដុល្លារ​។

វា​ជា​រឿង​ល្អ​ដែល​កម្ចី​ត្រូវ​បាន​យក​មក​អភិវឌ្ឍ តែ​កន្លង​មក​រាជរដ្ឋាភិបាល​នៅ​មិន​ទាន់​មាន​តម្លាភាព​ក្នុង​ការ​បង្ហាញ​ជា​សាធារណៈ​នូវ​ថវិកា​ដែល​បាន​ចាយ​ជាក់​ស្តែង​អស់​ទាំង​នោះ​ ខណៈ​ថវិកា​ដែល​ខ្ចី​យក​ធ្វើ​គឺ​ដដែលៗ​ដោយ​ធ្វើ​ថ្នល់​ដែល​កន្លែង​ខ្លះ​នៅ​តែ​អនុវត្ត​របៀប​ចាក់​ស្តើង​ស៊ី​ក្រាស់ ធ្វើ​លូ ចោះ​ថ្នល់ ធ្វើ​ស្ពាន រួច​ហើយ​ជួសជុល​ស្ពាន និង​ការ​បង្កើន​ថាមពល​វារីអគ្គិសនី​...​។ រីឯ​ការ​ត្រួត​ពិនិត្យ​គុណភាព​ក៏​នៅ​មាន​កម្រិត​នៅ​ឡើយ​ដែរ​។

ប៉ុន្តែ​អ្វី​ដែល​នៅ​រួញរា​ក្នុង​ការ​សង​ទៅ​ម្ចាស់​បំណុល​វិញ​នោះ​គឺ​ពេល​ខ្លះ​ដូចជា មាន​ការ​រុញ​ដាក់​​គ្នា​ទៅវិញ​ទៅមក​ដើម្បី​គេច​ចេញ​ពី​ការ​ទទួល​ខុសត្រូវ​ពី​​របប​មួយ​ទៅ​របប​មួយ​ទៀត​នៅ​ពេល​ដែល​ខ្លួន​កំពុង​កាន់​អំណាច​​ចុះហត្ថលេខា​ស្នើសុំ​ខ្ចី​លុយ​ពី​គេ តែ​នៅ​ពេល​អ្នក​ថ្មី​មក​កាន់​អំណាច​ថា​មិន​ទទួល​ស្គាល់​បំណុល​អ្នក​ចាស់​នោះ​។ ​

ដូច​ករណី​ខ្ចី​លុយ​ពី​រដ្ឋាភិបាល​សហរដ្ឋ​អាមេរិក​យក​មក​អភិវឌ្ឍ​កាលពី​ជំនាន់​លោក លន់ នល់ អតីត​ប្រធានាធិបតី​នៃ​ប្រទេស​កម្ពុជា​ក្នុង​សម័យ​សាធារណរដ្ឋ​ខ្មែរ​ឆ្នាំ​ ១៩៧០ ​ដល់​ ១៩៧៥ ដោយ​​កម្ចី​គិត​ជា​ទឹក​ប្រាក់​មាន​ប្រមាណ​ជាង​ ៣៥០ ​លាន​ដុល្លារ​ក្នុង​បំណង​យក​មក​អភិវឌ្ឍ​លើ​វិស័យ​កសិកម្ម​គាំទ្រ​ដោយ​សហរដ្ឋអាមេរិក​។ ​តែ​ដោយសារ​តែ​និន្នាការ​នយោបាយ​មិន​ស៊ី​គ្នា​បំណុល​របស់​អាមេរិក​នេះ​ត្រូវ​បាន​រាជរដ្ឋាភិបាល​ដែល​មាន​និន្នាការ​ប្រកាន់​យក​គោលនយោបាយ​ប្រទេស​ចិន​តែ​មួយ​អះអាង​ថា​លុយ​យក​មក​ទិញ​សព្វាវុធ​ដើម្បី​ធ្វើ​សង្គ្រាម ហើយ​​ក៏​បាន​ស្នើសុំ​ឲ្យ​សហរដ្ឋអាមេរិក​លុប​បំណុល​នេះ​ចោល តែ​សហរដ្ឋ​អាមេរិក​មិន​ទាន់​ឃើញ​មាន​ការ​ឆ្លើយតប​។

ចុះ​បើ​ឧបមាថា​រាជរដ្ឋាភិបាល​ជាប់​បំណុល​ច្រើន​ទៅៗ​ដោយ​បន្សល់​ទុក​សម្រាប់​អ្នក​ដឹកនាំ​ក្រោយៗ​ទៀត ហើយ​ត្រូវ​បដិសេធ​សង​បំណុល​ដោយសារ​មិន​បាន​បង្ហាញ​ទិន្នន័យ​ដែល​ចាយ​ទៅ​លើ​អ្វី​ខ្លះ​នោះ តើ​ឲ្យ​អ្នក​ណា​ជា​អ្នក​ទទួល​ខុសត្រូវ​ចេញ​សង​បំណុល​បច្ចុប្បន្ន​នេះ​ទៅ​?

នៅ​ប្រទេស​រីកចម្រើន​គឺ​បោះ​មូលបត្រ​បំណុល​ (Bound or T. Bill) ​សម្រាប់​លក់​ទៅ​ឲ្យ​ពលរដ្ឋ​គេ​ផង​ និង​លក់​ជា​លក្ខណ​អន្តរជាតិ​ជាមួយ​នឹង​អត្រា​ការប្រាក់​ទាប​ផង​ដើម្បី​យក​លុយ​មក​អភិវឌ្ឍ​ប្រទេស​របស់​គេ ដូចជា​​ប្រទេស​ជប៉ុន​គេ​ពេញ​និយម​លក់​មូលបត្រ​បំណុល​ឲ្យ​ពលរដ្ឋ​របស់​ខ្លួន​ជា​ជាង​ដើរ​ខ្ចី​លុយ​ពី​គេ​ត្រង់ៗ​។

​រីឯ ​សហរដ្ឋ​អាមេរិក​ជំពាក់​បំណុល​ប្រទេស​ចិន​មួយ​ផ្នែក​ធំ​ក៏​ដោយសារ​តែ​លក់​មូលបត្រ​បំណុល​ទៅ​ឲ្យ​ប្រទេស​ចិន​។ ​ទាំង​នេះ​គឺជា​របៀប​ខ្ចី​លុយ​​តាម​វិធី​លក់​ទិញ​មូលបត្រ​ក្នុង​ផ្សារ​មូលបត្រ​។

ចំណែកឯ​ផ្សារ​មូលបត្រ​កម្ពុជា​ (CSX) ​វិញ ចាប់​តាំងពី​ដំណើរការ​ក្នុង​ឆ្នាំ​ ២០១០ ដោយ​យឺតៗ​មក​នោះ​គឺ​​បណ្ដាល​មកពី​មិន​ទាន់​យល់​ច្បាស់​ និង​មិន​ចាប់​អារម្មណ៍​ពី​ការ​លក់​ទិញ​មូលបត្រ​។ អ៊ីចឹង​ហើយ​ឲ្យ​តែ​ភ្លែត​ឡើង​ដាក់​សុំ​ជំនួយ​ ឬ​ក៏​សុំ​ខ្ចី​លុយ​ពី​គេ តើ​ពេល​ណា​ទើប​កម្ពុជា​ចេះ​លេង​ភាគហ៊ុន និង​ផ្សារ​មូលបត្រ​ខ្លួនឯង​ច្បាស់​ដោយ​មិន​ចាំបាច់​ដើរ​ខ្ចី​លុយ​គេ​?

បច្ចុប្បន្ន​នេះ​ដូចជា​គ្រាន់​បើ​ជាង​មុន​ដែល​បាន​ដឹង​ពី​ចំនួន​ទឹកប្រាក់​បំណុល​ខ្លះ តែ​បើ​ប៉ុន្មាន​ឆ្នាំ​មុន​បំណុល​ជំពាក់​គេ​ក៏​រាជរដ្ឋាភិបាល​មិន​ធ្លាប់​ផ្សព្វផ្សាយ​ឲ្យ​ដឹង​ទេ​។

សំណួរ​សួរ​ថា ហេតុអ្វី​បាន​ជា​រាជរដ្ឋាភិបាល​នៅ​តែ​បន្ត​ខ្ចី​លុយ​ពី​ប្រទេស​បន្ថែម​ទៀត​បើ​សេដ្ឋកិច្ច​មាន​កំណើន​ឡើង​ថេរ​ប្រមាណ​ជាង​ ៧ ​ភាគរយ​ហើយ​​ពន្ធ​ក៏​ដំឡើង​ថ្លៃ​ទៀត​នោះ​តើ​យើង​ត្រូវ​សង​គេ​វិញ​តាម​របៀប​ដូចម្តេច បើ​មើល​ទៅ​ព្រៃឈើ​ត្រូវ​បាន​គេ​កាប់​បំផ្លាញ​ចង់​អស់ រីឯ​ពឹង​លើ​ផល​បាន​មកពី​រ៉ែ​ក៏​ខ្ទេច​ទៅៗ​ដែរ​នោះ​? រីឯ​រោងចក្រ​កាត់ដេរ​ដែល​នាំ​ចេញ​ដ៏ធំ​ទៅ​អឺរ៉ុប និង​សហរដ្ឋអាមេរិក​ក៏​កំពុង​មាន​សញ្ញា​នៃ​ភាព​មិន​នឹងនរ​ដែរ ខណៈ​បញ្ហា​នយោបាយ​កំពុង​តានតឹង​ជាមួយ​នឹង​ការ​គោរព​សិទ្ធិ​មនុស្ស​នៅ​កម្ពុជា​​ក៏​ប្រែប្រួល​ខុស​ពី​មុន​ដែរ​នោះ​។ នេះ​បើ​យោង​តាម​តួលេខ​របស់​ក្រសួង​ពាណិជ្ជកម្ម​ដែល​ភ្នំពេញ​ប៉ុស្ដិ៍​ទទួល​បាន​គឺ​ការ​នាំ​ចេញ​របស់​កម្ពុជា​បាន​កើនឡើង​ដល់​ ៧,៧ ​ពាន់​លាន​ដុល្លារ​ក្នុង​រយៈពេល​ ៩ ​ខែ​ដំបូង​នៃ​ឆ្នាំ​នេះ​។

ហេតុ​ដូច្នេះ​រាជរដ្ឋាភិបាល​គួរ​តែ​បង្ហាញ​ទិន្នន័យ​ដែល​ពាក់ព័ន្ធ​ជាមួយ​នឹង​បំណុល​ឲ្យ​ពលរដ្ឋ​បាន​ដឹង​ផង ហើយ​វិធីសាស្ត្រ​ដោះស្រាយ​សង​បំណុល​នោះ​រៀប​​ចំ​ដូចម្តេច​ក៏​គួរ​តែ​បង្ហាញ​ផង​ដែរ ហើយ​បំណុល​ដែល​ខ្ចី​នោះ​យក​មក​ចាយ​ជាក់ស្តែង​លើ​អ្វី​ខ្លះ​? ​ព្រោះ​កន្លង​មក​ឮ​តែ​រាជរដ្ឋាភិបាល​ថា​ជំពាក់​បំណុល​គេ តែ​កម្រ​ឮ​ថា​បាន​ដោះ​បំណុល​គេ​​ និង​ចំណាយ​ជាក់ស្តែង​ណាស់ ផ្ទុយ​ទៅ​វិញ​ធ្លាប់​តែ​ឮ​សុំ​លុប​បំណុល​ចោល​ដូចជា​បំណុល​របស់​រុស្ស៊ី​ក្នុង​ទសវត្សរ៍​ឆ្នាំ​ ៨០ ​និង​បំណុល​អាមេរិក​ក្នុង​ទសវត្សរ៍​ឆ្នាំ​ ៧០ ​ជាដើម​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment