Search form

Login - Register | FOLLOW US ON

Logo of Phnom Penh Post newspaper Phnom Penh Post - វិស័យ​សុខាភិបាល​បាន​ធ្វើ​កំណែ​ទម្រង់​ខ្លះ​ តែ​ហេតុ​អ្វី​ក៏​អ្នក​ក្រ​មិន​អាច​សម្រាក​នៅ​មន្ទីរ​ពេទ្យ​ដោយ​សេរី​?

Content image - Phnom Penh Post
ទិដ្ឋភាព​នៅ​មន្ទីរ​ពេទ្យ​គន្ធ​បុប្ផា​ដែល​បម្រើ​សេវា​សុខភាព​គំរូ​តែ​មួយ​របស់​កម្ពុជា។ ស្រេង ម៉េងស្រ៊ុន

វិស័យ​សុខាភិបាល​បាន​ធ្វើ​កំណែ​ទម្រង់​ខ្លះ​ តែ​ហេតុ​អ្វី​ក៏​អ្នក​ក្រ​មិន​អាច​សម្រាក​នៅ​មន្ទីរ​ពេទ្យ​ដោយ​សេរី​?

​បញ្ហា​នៃ​ការ​សម្រេច​ចិត្ត​លក់​ដី​ធ្លី ផ្ទះ​សំបែង​របស់​ប្រជា​ពលរដ្ឋ​ក្រីក្រ​ដែល​មូលហេតុ​ចម្បង​នោះ​គឺ​ដោយ​សារ​តែ​ការ​ចំណាយ​ទៅ​លើ​ថ្លៃ​ព្យាបាល​ជំងឺ​។ ​នេះ​បើតាម​ការ​សិក្សា​ស្រាវជ្រាវ​របស់​អង្គការ​អុក​ស្វាម​អំពី​ឫសគល់​នៃ​បញ្ហា​ការ​បាត់បង់​ដីធ្លី​និង​ផ្ទះ​សំបែង​របស់​ប្រជា​ពលរដ្ឋ​ក្រីក្រ​(Oxam UK, 20០1)​។

​បន្ទាប់​ពី​ដំណាក់​កាល​មួយៗ អ្នក​ជំងឺ​ធ្ងន់ៗ​ឬក៏​រ៉ាំ​រ៉ៃ​បាន​ព្យាយាម​តាំង​ពី​មាន​លុយ​នៅ​តាម​គ្លីនិក​ឯកជន​អស់​ចិត្ត ហើយ​មិន​ជា ក៏​ចាប់​ផ្តើម​ទៅ​ពេទ្យ​រដ្ឋ​វិញ​ម្តង តែ​នៅ​ពេល​ដល់​មន្ទីរពេទ្យ​បង្អែក​រដ្ឋ​ទាំង​តាម​ស្រុក​និង​ខេត្ត ការ​ព្យាបាល​សុទ្ធតែ​ត្រូវ​បង់​លុយ​មុន​ទាំងអស់​។ ទោះបីជា​យ៉ាងណា ក៏មាន​ជំងឺ​ខ្លះ​គឺ​រដ្ឋាភិបាល​និង​ម្ចាស់​ជំនួយ​ជួយ​ទាំង​ស្រុង ដូចជា ជំងឺ​អេដស៍ ជំងឺ​របេង និង​ជំងឺ​គ្រុន​ចាញ់ ជា​ដើម ហើយ​ក៏​នៅ​មាន​មូលនិធិ​សមធម៌​ពី​អង្គការ​មិនមែន​រដ្ឋាភិបាល​សម្រាប់​អ្នក​ជំងឺ​ដែល​មាន​ប័ណ្ណ​ក្រីក្រ​អាច​ជួយ​សម្រាប់​ការ​ស្នាក់​នៅ​ពី​មួយ​យប់​ទៅ​មួយ​យប់​ផង​ដែរ​។

នៅ​ពេល​ដែល​នៅ​ពេទ្យ​ស្រុក​ទប់​មិន​រួច មក​ពេទ្យ​ខេត្ត ពេទ្យ​ខេត្ត​ទប់​មិន​រួច​ទៀត​ក៏​បញ្ជូន​មក​មន្ទីរពេទ្យ​នៅ​ភ្នំពេញ​ដែល​ក៏​ជា​មន្ទីរពេទ្យ​មាន​មូលនិធិ​សមធម៌​ដែរ ដូច​មន្ទីរពេទ្យ​រុស្ស៊ី​ជាដើម​។ ប៉ុន្តែ​ក្នុង​ករណី​នេះ វា​ក៏​មិនអាច​ដែរ​សម្រាប់​អ្នក​ជំងឺ​ក្រីក្រ​ដែល​ទៅ​រក​សេវា​នៅ​ពេទ្យ​កាល់ម៉ែត ជា​ពិសេស​ការ​ព្យាបាល​ជំងឺ​បេះដូង​ដោយ​គ្រាន់​តែ​១​យប់​គិត​ថ្លៃ​១០០​ដុល្លារ​ទៅ​ហើយ នេះ​មិន​ទាន់​គិត​ដល់​ករណី​ដាច់​សរសៃ​ឈាម​ក្នុង​ខួរ​ក្បាល គាំង​បេះដូង​ផង​គឺ​អ្វីៗ​សុទ្ធ​តែ​មាន​តារាង​ចំណាយ​ស្រាប់​គូស​យកៗ​ចុងក្រោយ​ចេញ​វិក្កយបត្រ​ដែល​ត្រូវ​បង់​សម្រាប់​អ្នកធូរធារ​។

ជា​ទូទៅ ការ​អនុវត្ត​ជាក់ស្តែង​សម្រាប់​អ្នក​ជំងឺ​ក្រីក្រ​ភាគច្រើន​គឺ​ទទួលរង​នូវ​ការរើសអើង​ពី​ការ​ព្យាបាល​មិន​ពេញដៃ ពេញ​ជើង​ឬក៏​ការ​ប្រើ​ពាក្យ​សម្តី​គំរោះ​គំរើយ​របស់​គ្រូ​ពេទ្យ​អសីលធម៌​មួយ​ចំនួន​ឬក៏​គ្រូពេទ្យ​ខ្លះ​យក​ពេលវេលា​ធ្វើ​ការងារ​រដ្ឋ​ទៅ​បម្រើការ​នៅ​គ្លីនិក​ខ្លួនឯង​ឬក៏​នៅ​ផ្នែក​ឯកជន​។​

​នៅ​ទី​បំផុត​អ្នកជំងឺ​ធ្ងន់ៗ​ក្រីក្រ​ទាំងនោះ​ដែល​អាច​ព្យាបាល​ឲ្យ​រស់​បាន​សោះ​ក៏​សម្រេច​ចិត្ត​ចាកចេញ​ពី​មន្ទីរពេទ្យ​រដ្ឋ​ត្រឡប់​ទៅ​ស្រុកភូមិ​វិញ ដោយ​សម្រេច​ប្រើ​ថ្នាំខ្មែរ​ផឹក​ជំនួស ហើយ​នៅពេល​ជួយ​មិនបាន​ក៏​ស្លាប់ទៅ​។ ចំណុច​ទាំង​នេះ ធ្វើ​ឲ្យ​គ្រួសារ​អ្នកជំងឺ​ធ្លាក់​ក្នុង​ភាពក្រីក្រ​តែម្តង ហើយ​ជម្រើស​ចុង​ក្រោយ​គឺមាន​តែ​ធ្វើ​ចំណាកស្រុក​ទៅរក​ការងារ​នៅក្រៅ​ប្រទេស​។

​រីឯ​សេវា​សុខាភិបាល​ឯកជន​វិញ​គឺ​មិនមែន​សម្រាប់​អ្នកជំងឺ​ក្រីក្រ​ទេ ហើយ​អ្នកបើក​បម្រើសេវា​គ្លីនិក សម្ភព ឱសថស្ថាន ឬក៏​ការពិគ្រោះ​យោបល់​សុទ្ធតែ​ស្វះ​ស្វែងរក​ខ្នង​អ្នកធំៗ​ឬក៏​អ្នក​មាន​អំណាច​មក​ធ្វើជា​បង្អែក ជាជាង​ធ្វើ​អ្វីដែល​ក្រសួង​ឬក៏​មន្ទីរ​សុខាភិបាល​រាជធានី​-​ខេត្ត បានចេញ​អាជ្ញាប័ណ្ណ​ឲ្យ​។

ពួកគេ​ឲ្យ​តែ​ក្រសួង​ឬក៏​មន្ទីរ​ចេញ​អាជ្ញាប័ណ្ណ​ឲ្យ​គឺ​គេ​លេង​ម៉ា​សេរី ដោយ​គ្លីនិក​ខ្លះ​ធ្វើ​អ្វីៗ​ហាក់​បី​ដូចជា​មិនមាន​ការទទួលខុសត្រូវ​សោះ យក​អ្នកជំងឺ​មក​ធ្វើជា​បទពិសោធ​របស់ខ្លួន អ៊ីចឹង​គឺ​ត្រូវ​វះកាត់​ឬក៏​ព្យាបាល​ឲ្យ​អស់ចិត្ត​សិន មើល​តែ​អ្នកជំងឺ​ផ្តឹ​កៗ​ជិត​ស្លាប់​ទើបបាន​រៀបចំ​ឡាន​សង្គ្រោះ​បន្ទាន់ ហើយ​ពេល​ដឹក​ចេញ​បាន​តែ​បន្តិច អ្នក​ជំងឺ​ក៏​ស្លាប់ រួច​តាំង​សរសេរ​ក្នុង​កំណត់ហេតុ​ដាក់ថា អ្នកជំងឺ​ស្លាប់​នៅតាម​ផ្លូវ​ពេល​បញ្ជូន​មក​មន្ទីរពេទ្យ ហើយ​ក្រសួង​កម្រ​ចុះ​មក​បិទ​ឬក៏​ឲ្យ​ម្ចាស់​គ្លីនិក​ទទួល​ទោស​ទណ្ឌ​នោះដែរ​គឺ​ភាគ​ច្រើន​ពួកគេ​រួចខ្លួន​រហូត​ពីព្រោះ​ម្ចាស់​គ្លីនិក​លេង​សុទ្ធតែ​ខ្សែ​ធំៗ​នៅ​ពី​ក្រោយ​ខ្នង​។

ឧទាហរណ៍ ដូចជា កាលពី​សប្តាហ៍​មុននេះ នៅ​សម្ភព​សោភា​ហ្គោល​ដែល​មាន​ទារក​ស្លាប់​ដោយសារ​គិលានុបដ្ឋាយិកា​បាន​បំបៅ​ទឹក​ដោះគោ​ដែល​ករណីនេះ​មិនមាន​ឃើញ​ការ​ប្តឹង​ប្ដល់​ឬ​ការតវ៉ា​ឬក៏​ចេញ​សេចក្តី​ព្រមាន​ពី​ក្រសួង​ឲ្យ​បញ្ឈប់​ដូច​ករណី​ស្លាប់​បុរស​ម្នាក់​ដោយ​សារ​ការ​ចាក់​ថ្នាំ​២​ម្ជុល​នៅ​គ្លីនិក ឃឹម រ៉ានី ដែល​ក្រសួង​បាន​ចុះ​បិទ​ភ្លាមៗ​ក្រោម​ហេតុផល​ថា​មកពី​គ្លីនិក​ហ្នឹង​មាន​បញ្ហា​ការស្លាប់​មួយ​ចំនួន នោះ​ឡើយ​។ ចុះ​សម្រាប់​សម្ភព​សោភា​និង​គ្លីនិក​មួយ​ចំនួន​ទៀត​ដែល​ធ្វើ​ឲ្យ​អ្នកជំងឺ​ស្លាប់​ដែរ​នោះ ក្រសួង​មាន​ចំណាត់ការ​យ៉ាង​ដូច​ម្តេច​?​ឬមួយ​ក៏​នៅតែ​ស៊ុមគ្រលុំ​គ្នា​ឬក៏​ខ្នង​ម្ចាស់​ក្រាស់ៗ​ពេក​បានជា​នាំគ្នា​ធ្វើ​មិនដឹងមិនឮ​ដដែល​?

​នេះ​ក៏​ជា​ផ្នែក​មួយ​ដែល​ធ្វើ​ឲ្យ​មិនមាន​ការទុកចិត្ត​ពី​អ្នកជំងឺ​ធូរធារ​គឺ​គេ​ទៅ​មើល​តែ​នៅក្រៅ​ប្រទេស​វិញ​ប្រសើរ​ជាង​។​

​តើ​ក្រសួងសុខាភិបាល មាន​យន្តការ​ឬក៏​កំណែទម្រង់​ណាមួយ​ដើម្បី​ឲ្យ​អ្នកជំងឺ​ក្រីក្រ​និង​ធូរធារ ត្រូវ​ធានា​អាយុជីវិត​តាមរយៈ​សេវាសាធារណៈ​ឬ​សេវា​ឯកជន​?​បើ​ក្រឡេក​មើលទៅ​ស្ថិតិ​នៃ​ការសិក្សា​ស្រាវជ្រាវ​ថ្មីៗ​នេះ​បានបង្ហាញ​អំពី​ជំងឺឆ្លង​មានការ​ថយចុះ តែ​ជំងឺ​រ៉ាំរ៉ៃ​មានការ​កើនឡើង​នោះ​គឺ​៤៤ ភាគរយ​នៃ​អ្នកជំងឺ​សម្រាក​ព្យាបាល​នៅ​មន្ទីរពេទ្យ​សាធារណៈ​សព្វថ្ងៃនេះ​ជា​ជំងឺមិនឆ្លង​។​

ជាង​នេះ​ទៅ​ទៀត ជំងឺ​បេះដូង ជំងឺ​ទឹក​នោម​ផ្អែម ជំងឺ​មហារីក​ជា​ជំងឺ​រ៉ាំរ៉ៃ​ដែល​ឈានមុខ​គេ​ក្នុង​ចំណោម​ប្រជាជន​អាយុ​២៥-៦៤​ឆ្នាំ​។ ឧទាហរណ៍​ត្រួសៗ​នៃ​ជំងឺមិនឆ្លង​ដែលមាន​ការ​កើន​ឡើង​ដូចជា មាន​អ្នកជំងឺ​លើស​ឈាម​ពី​៩​នាក់​ក្នុង​ចំណោម​ប្រជាជន​១​ពាន់​នាក់​នៅ​ឆ្នាំ​២០០៨ មក​ដល់ ឆ្នាំ​២០១២ កើន​ឡើង​១៣ នាក់​ក្នុង​ចំណោម​ប្រជាជន​១​ពាន់​នាក់​ទៅ​វិញ​។​

​រីឯ​ជំងឺ​ទឹក​នោម​ផ្អែម​វិញ​ក្នុង​រយៈពេល​តែ​៥​ឆ្នាំ​ពី​២០០៨​ទៅ​២០១២ គឺ​កើន​ឡើង​ចំនួន​អ្នកជំងឺ​ដល់​ទៅ​៤​ដង​ពី​៥២៧ នាក់​ទៅ​២០៨២​នាក់ ដែល​មក​សម្រាក​នៅ​មន្ទីរ​ពេទ្យ​។​ចុះ​នៅ​អ្នកជំងឺ​មិន​មក​សម្រាក​នៅ​មន្ទីរ​ពេទ្យ​ក្នុង​ស្រុក តែ​ទៅ​ព្យាបាល​នៅ​ក្រៅ​ប្រទេស​ទៀត​នោះ​តើ​មាន​ប៉ុន្មាន​នាក់​ទៀត​?​ផល​ប៉ះពាល់​ខ្លាំង​ជាង​គេ​គឺ​អ្នក​ជំងឺ​រ៉ាំរ៉ៃ​ហើយ​ក្រក្រី​ទៀត​។

តែ​ករណី​បែប​នេះ ក្រសួង​សុខាភិបាល​ត្រូវ​មាន​យុទ្ធនាការ​ធំ​មួយ​ទៀត​ក្នុង​ការ​ដោះស្រាយ​ឫសគល់​នៃ​បញ្ហា​ដែល​បង្ក​ឲ្យ​មាន​ជំងឺ​រ៉ាំរ៉ៃ​ទាំង​នេះ​ដូចជា ថ្មីៗ​ក្រសួង​បាន​ចេញ​បញ្ជា​ផាកពិន័យ​ទៅ​តាម​ច្បាប់​គ្រប់គ្រង​បារី​ទៅលើ​អ្នក​ជក់បារី​តាម​ទីសាធារណៈ​ដែល​ធ្វើ​ឲ្យ​ប៉ះពាល់​សុខភាព​អ្នក​ជំងឺ​និង​ក្រុមហ៊ុន​ផលិត​បារី​អំពី​រូបភាព​និង​សារ​គ្រោះថ្នាក់​ដោយ​សារ​បារី​។

តែ​ក្រសួង​មិន​សម្រេច​បាន​នូវ​កិច្ច​ខំ​ប្រឹងប្រែង​ក្នុង​ការ​អនុម័ត​ច្បាប់​គ្រប់គ្រង​ស្រា​នៅ​ឡើយ​ទេ គឺ​ជាប់​គាំង​នៅ​ត្រឹម​ទីស្តីការ​គណៈ​រដ្ឋ​មន្ត្រី​នៅ​ឡើយ​។ តើ​មក​ពី​មន្ត្រី​ដែល​ចូលរួម​តាក់តែង​ឬ​ក៏​សែ​ស្រឡាយ​មន្ត្រី​អនុម័ត​ច្បាប់​គ្រប់គ្រង​ស្រា​នេះ​មាន​ភាគ​ហ៊ុន​នៅ​តាម​បណ្តា​ក្រុមហ៊ុន​នាំ​ចូល​និង​ផលិត​ស្រា​ទើប​បាន​ជា​មាន​ការ​អូសបន្លាយ​យូរ​ម្ល៉េះ? គឺ​ស្រា​និង​ស្រា​បៀរ​ដែល​ធ្វើ​ឲ្យ​អ្នក​ផឹក​ចេះ​តែ​ក្រ​ទៅៗ​ដោយ​សារ​តែ​ជំងឺ​រួតរឹត​ច្រើន​ប្រភេទ​ហើយ​ធ្វើ​ប៉ះពាល់​វិស័យ​សុខាភិបាល​និង​ភាពក្រីក្រ​។ ហេតុដូច្នេះ​រាជរដ្ឋាភិបាល​គួរ​តែ​ពន្លឿន​ការ​អនុម័ត​ច្បាប់​គ្រប់គ្រង​ស្រា​ឲ្យ​ដូច​ច្បាប់​បារី​និង​ធ្វើ​កំណែ​ទម្រង់​បន្ថែម​ទៅលើ​ការចុះ​ត្រួតពិនិត្យ​ការអនុវត្ត​ជាក់​ស្តែង​ពី​ថ្នាក់​ក្រសួង​ឲ្យ​បាន​ជាប់លាប់​ទាំង​រដ្ឋ ទាំង​ឯកជន ជា​ពិសេស​ជួយ​អ្នកជំងឺ​ក្រីក្រ​ដែល​គ្មាន​លទ្ធភាព​អ្វី​សោះ​ឲ្យ​អាចរ​ស់បាន​៕

ចូលរួម​ផ្តល់​យោបល់​តាម​រយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ