Search form

Login - Register | FOLLOW US ON

Logo of Phnom Penh Post newspaper Phnom Penh Post - សារ​ព័ត៌មាន​ជា​កន្លែង​នាំ​មុខ​ ជួយ​បំបាត់​ឃាតកម្ម​លើ​ស្ដ្រី

Content image - Phnom Penh Post
អ្នក​ប្រើ​ទូរស័ព្ទ​កំពុង​មើល​រូបភាព​ឃាតកម្ម​ដែល​គេ​បង្ហោះ​តាម​ហ្វេសប៊ុក​ខ្វះ​វិជ្ជាជីវៈ។ ហេង ជីវ័ន

សារ​ព័ត៌មាន​ជា​កន្លែង​នាំ​មុខ​ ជួយ​បំបាត់​ឃាតកម្ម​លើ​ស្ដ្រី

មនុស្ស​មិន​ស្រឡាញ់​គ្នា​សោះតែ​បើ​ចំអន់​លេង​ចុះ លេង​ឡើង​អាច​ស្រឡាញ់គ្នា​បាន រីឯ​អ្នក​មិនមាន​ទំនាស់​គ្នា​សោះ គ្រាន់តែ​ពាក្យ​ពន្យុះ​ពី​អ្នក​ទី​ ៣ ​ឬក៏​ធ្វើ​ត្រាប់​តាម​អ្នកកំប្លែង​ឬ​អ្នក​សម្ដែង​រឿង និង​ខារ៉ាអូខេ​ឬក៏​សារព័ត៌មាន​ជា​ក្រដាស និង​តាម​ឌីជីថល​ក៏​អាច​ជំរុញ​ឲ្យ​មនុស្ស​ឈ្លោះ​វ៉ៃតប់​គ្នា និង​សម្លាប់​គ្នា​បាន​តាមចិត្ត​ដែរ​។

​ចុះបើ​យ៉ាងនេះ ហេតុអ្វី​បានជា​ពួកគេ​នៅតែ​ផ្សព្វផ្សាយ​រូបភាព​ហិង្សា​សាហាវៗ​ដោយ​គ្មាន​នឹក​ដល់​វិជ្ជាជីវៈ​អ្វី​បន្តិច​សោះ​អ៊ីចឹង​?

​បើ​និយាយ​ពី​សង្គ្រាម​នៅ​ស្រុក​ខ្មែរ​ជាង ​៣ ​ទសវត្សរ៍​កន្លងមក​នេះ ​គឺ​រឿង​អំពើហិង្សា​កាប់សម្លាប់បាញ់សម្លាប់​គ្នា​រវាង​ខ្មែរ និង​ខ្មែរ​គ្នាឯង​ហ្នឹង​គឺ​ល្មម​ឆ្អែតឆ្អន់​ណាស់​ទៅហើយ តែ​ស្នាមរបួស​ផ្លូវចិត្ត​នៅតែ​មិន​ទៅណា​ឆ្ងាយ​ពី​សម័យ​បច្ចុប្បន្ន​នោះទេ​។

បើ​ថា​កាលពី​ទសវត្សរ៍​ឆ្នាំ​ ៨០ ទៅ​ថា ការឈ្លោះគ្នា​ក្នុង​គ្រួសារ​កើតមក​ពី​ក្រ​អត់​អី​ហូប ឥឡូវ​មានគ្រួសារ​ខ្លះ​មាន​ធូរធារ​សល់​ចាក់ច្រាស​ទៅ​ហើយក៏​នៅតែ​ខាំ​គ្នា​សាហាវ​ជាង​សត្វ​ទៅទៀត​គឺ​អំពើហិង្សា​ទាំងនោះ​កើតឡើង​មកពី​បុរស​ជា​ប្តី​ឬក៏​ជា​សង្សារ​ដៃគូ​រួមរស់​ជាមួយគ្នា​ជា​ឃាតករ​សម្លាប់​ប្រពន្ធ​ឬក៏​សង្សារ​របស់ខ្លួន​ទៅវិញ​។

ចំណុច​ដែល​កំសាក​មួយ​នៅត្រង់ថា បន្ទាប់ពី​ប្រព្រឹត្ត​អំពើ​ឃាតកម្ម​រួច​បុរស​ជា​ឃាតករ​ទាំងនោះ​ក៏​តាំង​មក​ធ្វើអត្តឃាត​ឬក៏​រត់ចោលស្រុក​ដែល​ការធ្វើ​ទង្វើ​ស្មោកគ្រោក​មកលើ​ស្ត្រី​ទន់​ខ្យោ​យ​បែបនេះ​បើ​ថា​បណ្តាលមកពី​របប​ខ្មែរក្រហម​កាប់សម្លាប់​ខ្មែរ​ដូចជា​មិន​ទំនង ព្រោះ​ឃាតករ​ភាគច្រើន​កើត​មិនទាន់​របប​នោះ​ផង ហើយ​បើ​ទម្លាក់កំហុស​ថា​រឿង​ឃាតកម្ម​រឿង​ប្រចណ្ឌ ឬក៏​សហាយស្មន់​ថា​ប្រទេស​ណា​ក៏​កើតមាន​ដែរ ហាក់បីដូចជា​ឆើ្ល​យ​គ្មាន​ការទទួលខុសត្រូវ​សោះឡើយ​។

​ស្ថិត​នៅ​ក្នុង​បរិបទ​បែបនេះ សារព័ត៌មាន​ដែល​ងាយ​នឹង​ទទួលបាន​ព័ត៌មាន​ពី​គ្រប់ទិសទី​តាមរយៈ​កាសែត​បែប​ឌីជីថល និង​កាសែត​ក្រដាស អ៊ីចឹង​បើ​អត្ថបទ និង​រូបភាព​ណា​ដែល​ល្អៗ​គឺ​ធ្វើ​ឲ្យ​មាន​ប្រយោជន៍​ដល់​សង្គម និង​ការអប់រំ​ប៉ុន្តែ​បច្ចុប្បន្ន​វា​ជា​រឿង​អវិជ្ជមាន និង​ជះឥទ្ធិពល​យ៉ាងខ្លាំង​ណាស់​ដល់​សង្គម​ខណៈ​ដែល​ការបង្ហាញ​មិន​ត្រឹមតែ​ជា​រូបភាព​ទេ​គឺមាន​វីដេអូ​ឃ្លី​ប​ដែលមាន​លក្ខណៈ​ច្បាស់ៗ​ទៅទៀត​។

ដោយសារ​សកម្មភាព​ហិង្សា​សាហាវ និង​ឃាតកម្ម​នៅក្នុង​រូបថត និង​វីដេអូ​ឃ្លី​ប​នេះហើយ​ដែល​ធ្វើ​ឲ្យ​ឃាតករ​ស្រករ​ក្រោយ​ងាយ​នឹង​ចាប់​យកបាន និង​ចងចាំ​នូវ​ទង្វើ​ដែលជា​គំ​រូពី​អ្នកប្រព្រឹត្ត​មុនៗ​មកហើយ​ ដាក់​សំណួរ​ឲ្យ​ខ្លួនឯង​ថា ហេតុអ្វី​បានជា​គេ​ធ្វើអំពើ​ហិង្សា​សាហាវ និង​ឃាត​កម្មបាន ហើយ​ខ្លួន​ធ្វើ​មិនបាន​? ​ដោយសារ​ការ​ដិតដាម​នូវ​រូបភាព​អស់​ទាំងនេះ​នៅក្នុង​អារម្មណ៍​ក៏បាន​ជំរុញ​ចិត្ត​ពួកគេ​ឲ្យ​ពុះកញ្ជ្រោល​គិត​ខ្លី​រួច​សម្រេចចិត្ត​ប្រព្រឹត្ត​សកម្មភាព​ទាំងនេះ​ភ្លាមៗ​ទៅលើ​ប្រពន្ធ​ឬក៏​មិត្តស្រី​ជាទី​ស្រឡាញ់​របស់គេ​តែម្ដង​។

មាន​ឃាតករ​ខ្លះ​មានកូន​ចិត្ត​គិតទុក​ជាមុន​ថា ប្រសិនបើ​នារី​ដែល​ខ្លួន​ស្រឡាញ់​មិនបាន​នោះ ក៏​គ្មាន​នរណាម្នាក់​អាច​ឆក់យក​បេះដូង​ពី​គេ​បានដែរ គឺ​ទី​១)​ សម្លាប់​នារី​នោះ​ហើយ​បានសម្លាប់​ខ្លួនឯង និង​ទី ​២) បើ​សម្លាប់​ហើយ​ចិត្ត​មិន​ដាច់​សម្លាប់​ខ្លួនឯង​មានតែ​ដាក់​មេ​ប្រូច​គេច​ខ្លួន​បាត់​។

​ហេតុអ្វី​បានជា​បុរស​ឃោរឃៅ​ហិង្សា​លើ​ស្ត្រី​ខ្មែរ​បែបនេះ​នៅតែ​កើតមាន​ក្នុងសង្គម​ខ្មែរ​?​តើ​ក្នុងនាម​ជា​បុរស ហេតុ​អ្វី​បានជា​នៅ​ចាត់ទុក​ស្ត្រី​ដែល​ខ្លួន​ស្រឡាញ់​នោះ​ជា​ទាសករ​ផ្លូវភេទ​ទៀត បើ​ស្ត្រី​ទាំង​នោះគេ​មិន​ពេញចិត្ត​ទៅ​ហើយ​នោះ​?

​ករណី​អំពើហិង្សា​ពី​បុរស​កំសាក​ធ្វើឃាត​កម្ម​លើ​ស្ត្រី​ដែលជា​ប្រពន្ធ​ឬក៏​មិត្តស្រី​បែបនេះ​កើតឡើង​មួយៗ​ទេ តែមាន​សភាព​ធ្ងន់ធ្ងរ​តែម្តង​ដោយសារ​ផ្អើល​នៅ​ទូទាំងប្រទេស ហើយ​កន្លងមក​បានកើត​ឡើងជា​ហូរហែ ទោះបីជា​ប្រពន្ធ​លែងលះគ្នា​តាមផ្លូវ​ច្បាប់​ក៏ដោយ ក៏​បុរស​កំសាក​ទាំងនោះ​នៅតែ​ចងអាឃាត​អតីត​ភរិយា​ទៀត​។

ដូច​ករណី​ស្រី​ឡៃ អតីត​អ្នក​ប្រឡង​ចម្រៀង The Voice ត្រូវបាន​សម្លាប់​ដោយ​អតីត​ប្តី​ជា​មន្ត្រី​គយ​កាលពី​សប្តាហ៍​មុននេះ រួចហើយ​ធ្វើអត្តឃាត​ភ្លាមៗ​ដែល​រូបថត​សាកសព​របស់​ពួកគេ​ត្រូវ​កាសែត​តាម​អន​ឡាញ​ និង​ឌីជីថល ​ដែល​បាន​ពី​សមត្ថកិច្ច​យកមក​ផ្សព្វផ្សាយ​ឃើញ​រូបថត​សាកសព​ស្លាប់​ឡើង​ច្រងាង​នៅក្នុង​ថ្លុក​ឈាម គួរ​ឲ្យ​រន្ធត់​។​

ជាងនេះទៀត​គឺ​រូបភាព​នៅក្នុង​វីដេអូ​ឃ្លី​ប​ឃាតកម្ម​ប្តី​សម្លាប់​ប្រពន្ធ​ខ្លួនឯង​នេះ​រឹតតែ​រន្ធត់​ថែមទៀត​នៅ​លើ​វេបសាយ​កាសែត​។​

​ដើម្បី​ឲ្យ​សារព័ត៌មាន​តាម​អន​ឡាញ និង​ឌីជីថល​មាន​អ្នកមើល​ច្រើន​ក្នុង​បំណង​បង្កើន​ការ​ផ្សាយ​ពាណិជ្ជកម្ម​របស់​ខ្លួន​តែ​បែរជា​មិនបាន​គិតពី​ផលប៉ះពាល់​សង្គម​ទាំង​ពេលបច្ចុប្បន្ន​និង​អនាគត​សោះ​។​

កាលពីមុន​ចុះ​ថា​ មានតែ​កាសែត​ក្រដាស​ទេ​ដែល​ផ្សាយ​រូបភាព​ហិង្សា និង​ឃាតកម្ម​សាហាវៗ​នៅ​ទំព័រមុខ តែ ឥឡូវនេះ​កាសែត​ឌីជីថល​ក៏​ផ្តល់​ដល់​អ្នកអាន​បាន​លឿន​ហើយ​ចែករំលែក​តៗ​គ្នា​តាម​បណ្តាញ​សង្គម​ផងដែរ​។ ​មាន​អ្នកអាន​ដែល​មើល​អត្ថបទ​ទាក់ទង​ទៅនឹង​ឃាតកម្ម​លើ​ស្រី​ឡៃ​ខ្លះ​បាន​បញ្ចេញមតិ​រិះគន់​ចំពោះ​រូបភាព​ហិង្សា​ទាំងនោះ ដោយ​ពួកគេ​បាន​ស្ដីបន្ទោស​ចំពោះ​ការមិន​គោរព​ក្រមសីលធម៌​វិជ្ជាជីវៈ​ជា​អ្នកកាសែត ដោយសារ​អ្នកអាន​ទាំងនោះ​យល់ថា រូបភាព​ទាំងនោះ​ធ្វើ​ឲ្យ​ប៉ះពាល់​កិត្តិយស​សាកសព ហើយ​អាច​វាយតម្លៃ​បាន​ថា ឃាតករ​សម្លាប់​ជា​ប្តីស្រី​ឡៃ​ហ្នឹង សុទ្ធតែ​បានទទួល​រូបភាព​បែប​គំរូ​ហិង្សា​បាញ់ និង​ធ្វើ​អត្តឃាត​ខ្លួនឯង​។​

​រូបភាព​ឃាតកម្ម​លើ​ស្រី​ឡៃ​បែបនេះ​គឺ​អនាគត​ឆាប់ៗ​នេះ​អាច​នឹងមាន​ករណី​សម្លាប់​ស្ត្រី​ហើយ​អាង​អី​ធ្វើ​អត្តឃាត​ខ្លួនឯង​ទៅ​ចប់​រឿង​ហើយ ព្រោះ​ទាំង​រូបថត និង​រូប​វីដេអូ​ឃើញ​ប្តីស្រី​ឡៃ បាញ់​សម្លាប់​ស្រី​ឡៃ​ដូចជា​ងាយ​ស្រួល​ពេក​។

​បើ​សង្គម​នាំគ្នា​បន្ទោស​ទៅលើ​សមត្ថកិច្ច​តែមួយ​ក៏​មិន​ទំនង​ដែរ ព្រោះ​សមត្ថកិច្ច​ធ្វើ​សកម្មភាព​តែ​នៅ​ក្រោយ​ពេល​មាន​ព្រឹត្តិការណ៍​ការ​បាញ់​ប្រហារ​កើត​ឡើង​រួច​ហើយ​ប៉ុណ្ណោះ​។​

​ម្យ៉ាង​ប្តីស្រី​ឡៃ​ជាម​ន្ត្រី​គយ​មាន​សិទ្ធិ​ប្រើ​កាំភ្លើង​ស្របច្បាប់​ទៀត​ដែល​ប្រការនេះ​គឺជា​បញ្ហាលំបាក​សម្រាប់​ស​ម​ត្ថ​កិច្ច​។​អ្វីដែល​គួរ​សម្លឹងមើល​មក​ខ្លួនឯង​នោះ​គឺ​សារព័ត៌មាន​ឌីជីថល និង​សង្គម​ដែល​តែង​នាំគ្នា​ចែកចាយ​រូបភាព និង​វីដេអូ​ឃាតកម្ម​នេះ​ទៅវិញ​ទេ​ដែល​គួរ​រិះ​គិតពី​ការសម្រេចចិត្ត​របស់ខ្លួន​ក្នុងការ​បញ្ចេញ​រូបភាព​អវិជ្ជមាន​ជា​សាធារណៈ​ដោយ​កុំ​ព្រោះតែ​ខ្លាច​មិនបាន​ល្បី​ឬ​មិន​បានធ្វើ​អាជីវកម្ម​លើ​សាកសព​សិច​ស៊ី​នោះ​ថា​ជា​រឿង​បាត់បង់​ទីផ្សារ​នោះ​។ ​

ប្រសិនបើ​គិត​មួយ​ជ្រុង​បែបនេះ​ គឺ​ហាក់បីដូចជា​លើកទឹកចិត្ត​ដល់​អ្នក​ក្រោយ​ឲ្យ​ចង់​ប្រព្រឹត្ត​ឬ​ធ្វើ​ត្រាប់​តាម​ឃាតកម្ម​ដោយសារ​ប្រចណ្ឌ​ឬក៏​សហាយស្មន់​នេះ​មិន​ខុស​ឡើយ​។ ប៉ុន្តែ​សមត្ថកិច្ច​ក៏មាន​ចំណែក​នៃ​កំហុស​ខ្លះ​ផងដែរ​បន្ទាប់ពី​ធ្វើ​កោសល្យវិច័យ​រូបភាព​សិច​ស៊ី​របស់​ស្រី​ឡៃ​រួចហើយ​បែរជាយក​រូបភាព​មក​ចែករំលែក​គ្នា​មើល​នៅក្នុង​ក្រុម​របស់ខ្លួន​ហើយក៏​ធ្លាយ​ចេញ​មកក្រៅ​ដែល​ធ្វើ​ឲ្យ​លោកស្នងការ​រាជធានី​ភ្នំពេញ​ស្វែងរក​មន្ត្រី​ដែល​ចែករំលែក​នោះ​។​

​រីឯ​ លោក​រដ្ឋមន្ត្រីក្រសួង​ព័ត៌មាន​ បានត្រឹមតែ​ហួសចិត្ត​ហើយ​បញ្ចេញយោបល់​ឆ្លើយឆ្លង​នៅក្នុង​ហេ្វស​ប៊ុក​ដោយ​មាន​ប្រសាសន៍​ចំអក​ទៅ​អ្នកសារព័ត៌មាន​ដែល​ផ្សព្វផ្សាយ​ថា​៖ «​ព្រោះ​គាត់​ត្រូវ​ការ​ដូរ​បាយ​»​។​

​ចំពោះ​ការ​ប្រកួត​ប្រជែង​បង្ហោះ​រូបភាព​ហិង្សា​គឺ​គ្មាន​ក្រមសីលធម៌ គ្មាន​វិជ្ជាជីវៈ គ្មាន​ចំណេះ​ដឹង​ស្តីពី​យេនឌ័រ​ទាល់​តែ​សោះ​។

​ក្លិប​អ្នក​កាសែត សមាគម​អ្នក​កាសែត និង​សហភាព​សហព័ន្ធ​អ្នកសារព័ត៌មាន​ជាដើម គួរ​ចេញ​ប្រតិកម្ម​ដើម្បី​បញ្ឈប់​សារព័ត៌មាន​ដែល​ពន្យុះ​ឲ្យ​មាន​អំពើហិង្សា និង​ជំរុញ​ឃាតកម្ម​លើ​ស្ត្រី​ដើម្បី​ចូលរួម​លុបបំបាត់​អំពើហិង្សា និង​លើកតម្កើង​យេនឌ័រ​នៅក្នុង​សង្គម​ផង​។

បើ​មើលទៅ​អ្នកសារព័ត៌មាន​ដែល​ខ្វះ​ការ​យល់​ដឹង​អំពី​យេនឌ័រ​ គឺ​ត្រូវ​ដាក់សំណើ​ទៅ​ក្រសួង​កិច្ចការនារី​ឬក៏​អង្គ​ការដែល​ធ្វើ​កិច្ចការ​យេនឌ័រ​ក្នុងសង្គម​ ដើម្បី​មក​បណ្តុះបណ្តាល​កុំ​ឲ្យ​ពួកគេ​នៅតែ​ឆ្លើយថា​អត់​ចេះ​យេនឌ័រ​ទៀត​ហើយ​នៅតែ​ផ្សាយ​រូបភាព​ហិង្សា​លើ​ស្ត្រី​ទាំង​មិនបាន​គិតពី​កិត្តិយស​របស់​ជនរងគ្រោះ​នោះ​៕

ចូលរួម​ផ្តល់​យោបល់​តាម​រយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ