Search form

Login - Register | FOLLOW US ON

Logo of Phnom Penh Post newspaper Phnom Penh Post - ស្ងាត់ៗ​ មន្ត្រី​កំពូលៗ​ ឆ្លៀត​ដាក់​តំណែង​ជាន់​ខ្ពស់​ឲ្យ​កូន

Content image - Phnom Penh Post
លោក សុខ សូកេន ដែល​ទើប​មាន​តំណែង​ធំ និង​កញ្ញា កឹម មនោវិទ្យា​ ដែល​មាន​តួនាទី​ធំ​ក្នុង​បក្ស។ រូបថត ហ្វេសប៊ុក

ស្ងាត់ៗ​ មន្ត្រី​កំពូលៗ​ ឆ្លៀត​ដាក់​តំណែង​ជាន់​ខ្ពស់​ឲ្យ​កូន

«​ទីណា​មាន​ការ​ជិះជាន់ ទី​នោះ​មាន​ការ​រើបម្រះ​!» នេះ​គឺ​ទស្សនៈ​មនោគមន៍​វិជ្ជា​ដើម្បី​ធ្វើ​មាន​ភាព​ស្មើ​គ្នា​នៅ​ក្នុង​សង្គម​ដែល​ទទួល​រង​នូវ​ការ​គាប​សង្កត់ និង​កេងប្រវ័ញ្ច ជាពិសេស​គឺ​សំដៅ​ទៅ​រក​វណ្ណៈ​សក្តិភូមិ​ប្រើ​អំណាច​ផ្តាច់ការ​សង្កត់​សង្កិន​លើ​រាស្ត្រ​របស់​ខ្លួន​។

ប៉ុន្តែ​មក​ទល់​សម័យ​បច្ចុប្បន្ន​វិញ​ទស្សនៈ​នេះ​ហាក់​ដូចជា​កាន់តែ​រយាល​ទៅៗ​វិញ​ ដោយសារ​តែ​​ជំងឺ​បាក់​ស្បាត​ក្នុង​សង្គម​ខ្មែរ​​ក្រោយ​​សង្គ្រាម​ញាំញី​ជាច្រើន​ឆ្នាំ​នោះ បើ​ទោះបី​​ជា​មាន​ការ​ជិះជាន់​ដោយ​រំលោភ​ច្បាប់​ ឬ​ក៏​ប្រើ​អំពើ​ហិង្សា​ក៏​លែង​តវ៉ា ឬ​ក៏​រើបម្រះ​ដែរ តែ​អ្នក​ដែល​ត្រូវ​គេ​ជិះជាន់​នោះ​បែរ​ជា​សុំ​​ចុះ​ចូល ឬ​ក៏​ទៅ​ធ្វើការ​ឲ្យ​របប​ដែល​មាន​ការ​ជិះជាន់​​ទៅ​វិញ បើ​ទោះបី​ជា​ដឹង​ថា​ខ្លួន​ថា​ទៅ​បម្រើ​ឲ្យ​គេ​គ្មាន​តួនាទី​ធំដុំ​ក៏ដោយ​។

បើ​បកស្រាយ​តាម​លទ្ធិប្រជាធិបតេយ្យ​សកម្មភាព​នោះ​គឺជា​សិទ្ធិ​បុគ្គល​ម្នាក់ៗ​ក្នុង​ការ​ចូលរួម​សកម្មភាព​នយោបាយ​ ឬ​ក៏​តំណាង​ឲ្យ​បក្ស​​ណា​មួយ​។

ផ្ទុយ​ទៅវិញ​ការ​ជិះជាន់ ឬ​ក៏​ការ​កេងប្រវ័ញ្ច​សម័យ​ទំនើប​មិនមែន​មាន​ន័យ​ត្រឹម​តែ​ប្រើ​អំពើ​ហិង្សា និង​រំលោភ​ច្បាប់​តាម​បែប​បុរាណ​នោះ​ទេ​គឺ​​ការ​កាន់​តំណែង​ និង​តួនាទី​សម្រេច​កិច្ចការ​តាម​ស្ថាប័ន​រដ្ឋ​នីមួយៗ​នៅ​ក្រោម​ស្លាក​កំណែ​ទម្រង់ និង​ការ​ដាក់​បញ្ចូល​ឈាម​ថ្មី​ជា​យុវជន​នៅក្នុង​បក្ស​ ឬ​ក៏​តំណែង​ជាន់​ខ្ពស់​ក្នុង​រាជរដ្ឋាភិបាល ឬ​សមាជិក​សភា​ដើម្បី​រក​ឱកាស​ឲ្យ​កូនៗ និង​ក្មួយ​ដែល​ជា​សែ​ស្រឡាយ​​របស់​ថ្នាក់ដឹកនាំ​ជាន់​ខ្ពស់​ក្ដាប់​អំណាច​ក្នុង​កិច្ចការ​សម្រេច​ចិត្ត​។ ការ​រៀបចំ​នេះ​លែង​ឈូឆរ​ដូច​មុន​ទៀត​ហើយ​គឺ​ទៅ​សន្សឹម​ម្តង​មួយៗ ម្តង​ឮ​កូន​លោក​នេះ ម្តង​កូន​លោក​នោះ​ឡើង​តំណែង​ក្នុង​ជួរ​រាជរដ្ឋាភិបាល​ហើយ​បើ​ងាក​មក​សមាជិក​ក្នុង​បក្ស​ខ្លះ​បម្រើ​បក្ស​រាប់​ឆ្នាំ​ហើយ​បាន​ត្រឹម​តែ​ឈឺចាប់​​ប៉ុណ្ណោះ​នៅ​ពេល​គេ​ដាក់​តំណែង​កូន​គេ​ឡើង​តំណែង​ធំៗ​ជាង​ខ្លួន​ហើយ​ត្រួតត្រា​ខ្លួន​ទៅ​វិញ​នោះ​។

ជាក់ស្តែង ​ក្រោយ​ពី​ការ​បោះឆ្នោត​ជ្រើសរើស​តំណាងរាស្ត្រ​អាណតិ្ត​ទី​ ៥ ​ឆ្នាំ​កន្លង​​ទៅ​នេះ​គណបក្ស​ប្រជាជន​ឈ្នះ​សំឡេង​ភាគច្រើន​បាន​ដាក់​បញ្ចូល​កូនៗ​របស់​ខ្លួន​នៅ​ក្នុង​តំណែង​​ជាន់​ខ្ពស់​ ខ្លះ​​បាន​ដាក់​តាំង​ពី​ពេល​ឈរ​ឈ្មោះ​មក​ម្ល៉េះ​ ខ្លះ​​អត់​ទេ​គឺ​ហោះ​មកពី​ទីស្តីការ​គណៈរដ្ឋមន្ត្រី​តែ​ម្តង​។

ដំណើរការ​នេះ​មាន​តាំង​ពី​អ្នក​​តំណាងរាស្ត្រ​វ័យក្មេង លោក ហ៊ុន ម៉ានី កូន​របស់​លោក​នាយក​រដ្ឋមន្ត្រី ហ៊ុន សែន លោក ឌី វិជ្ជា កូនប្រសា​លោក​នាយក​រដ្ឋមន្ត្រី លោក ស សុខា កូនប្រុស​លោក​​ឧបនាយក​រដ្ឋមន្ត្រី ស ខេង លោក សុខ សូកាន កូន​ប្រុស​​របស់​លោក សុខ អាន រួម​ទាំង​​កូន​លោក ឌិត មន្ទីរ និង​កូន​លោក ជាម យៀប ផង​ដែរ​។ រីឯ​តំណែង​​រដ្ឋមន្ត្រី​វ័យក្មេង​នោះ​បាន​ទៅ​លោក សាយ សំអាល់ រដ្ឋមន្ត្រី​ក្រសួង​បរិស្ថាន​ដែល​ជា​កូន​ប្រុស​របស់​លោក សាយ ឈុំ អនុប្រធាន​បក្ស​។

ការ​តែងតាំង​នេះ​គឺ​គ្មាន​សមាជិក​ណា​ម្នាក់​ហ៊ាន​​តវ៉ា​នោះ​ទេ​ទុក​ឲ្យ​ថ្នាក់ដឹកនាំ​បក្ស​ជ្រើស​តាម​ចិត្ត។ នេះ​គឺជា​រូបភាព​មួយ​ប្រាវ​ក្រោយ​ការ​បោះឆ្នោត រីឯ​យុវជន​កូន​អ្នកក្រ​ ឬ​ក៏​​​សមាជិក​សកម្ម​របស់​បក្ស​វិញ​គឺ​ខ្លះ​បាន​ត្រឹម​ទីប្រឹក្សា​ ឬ​ខ្លះ​ជា​ជំនួយការ​យួរ​កាបូប​ត្រុកៗ​ឲ្យ​កូនៗ​ថ្នាក់ដឹកនាំ​ជាន់ខ្ពស់​​នោះ​គឺ​​អរ​ចង់​ប្រកាច់​​ប្រកិន​ទៅ​ហើយ​រួច​ប្រឹង​អួត​ប្រាប់​គេ​តាម​ហ្វេសប៊ុក​ទៀត​ថា​សុទ្ធ​តែ​ទីប្រឹក្សា​ ឬ​ជំនួយការ​ផ្ទាល់​។

ចំណែកឯ​អ្នក​ខ្លះ​ទៀត​សមាជិក​សកម្ម​របស់​បក្ស បើ​ទោះបី​ជា​មាន​សញ្ញាបត្រ​សុទ្ធ​តែ​បណ្ឌិតៗ​មកពី​បរទេស​ក៏ដោយ ក៏​អត់​បាន​តំណែង​ក្នុង​ការ​សម្រេច​ចិត្ត​នោះ​ដែរ​គឺ​អស់​បាន​ត្រឹម​​តំណែង​ទីប្រឹក្សា​ថ្នាក់ដឹកនាំ និង​អ្នក​នាំពាក្យ​ឲ្យ​បក្ស​តែ​ប៉ុណ្ណោះ​ដូច បណ្ឌិត ឈឹម ផលវរុន ជាដើម។

ក្រៅពី​តំណែង​នយោបាយ​គណបក្ស​ប្រជាជន​បង្កើត​យន្តការ​ផ្តល់​តំណែង​ជាន់ខ្ពស់​នៅ​ក្នុង​ជួរ​រដ្ឋាភិបាល​ថ្មីៗ​ស្ងាត់ៗ​ទៀត​ដើម្បី​ធ្វើ​ឲ្យ​មន្ត្រី​ជាន់​ខ្ពស់​ដទៃ​របស់​បក្ស​មាន​ការ​សប្បាយ​ចិត្ត​ខ្លះ​កុំ​ឲ្យ​មាន​ការ​រើបម្រះ​ប្រឆាំង​​ការ​សម្រេច​ចិត្ត​របស់​ថ្នាក់ដឹកនាំ​ដែល​ភាសា​សាមញ្ញ​ថា​មិន​សូវ​គិតគូរ​មន្ត្រី​ដែល​ខិតខំ​ប្រឹងប្រែង​ពិតប្រាកដ​នោះ​ពោល​គឺ​ធ្វើ​យ៉ាង​ណា​កុំ​ឲ្យ​មាន​លេចឮ​រឿង​អាស្រូវ​​ទៅ​បាន​ហើយ​។

បើ​មាន​ឮ​គឺ​លោក​នាយក​រដ្ឋមន្ត្រី​គ្រាន់​តែ​គ្រហែម​បន្តិច​ទៅ​ក៏​ស្ងាត់​ទៅ​វិញ​ហើយ​ដូច​ការ​ដែល​លោក​រិះគន់​​ខ្លាំងៗ​ទៅ​លើ​ក្រសួង​គ្រួសារ​និយម​ដែល​ផ្តោត​លោក ចម ប្រសិទ្ធ អតីត​រដ្ឋមន្ត្រី​ក្រសួង​ពាណិជ្ជកម្ម និង​លោក ស៊ុយ សែម រដ្ឋមន្ត្រី​ក្រសួង​រ៉ែ និង​ថាមពល​។ តែ​ក្រោយ​មក​រដ្ឋមន្ត្រី​ទាំង​ ២ ​ចែក​ក្រសួង​គ្នា​ជា​ពីរ​ទៅ​កាន់​តំណែង​ជា​រដ្ឋមន្ត្រី​ដដែល​ហៅ​កូន​ក្មួយ​អូស​ទៅ​តាម​ជាមួយ​​ដដែល​ទៅ​។ ​

និន្នាការ​បែប​នេះ ​គឺ​នៅ​តែ​ដដែល​មាន​ន័យ​ថា​បើ​ឪពុក​មា្តយ ឬ​ក៏​ពូ​ មីង ធ្វើ​ប្រធាន​ស្ថាប័ន ឬ​ក៏​អង្គភាព​ណា​មួយ​នោះ​គឺ​​មាន​កូន ឬ​ក៏​ក្មួយ​នៅ​សឹង​តែ​គ្រប់​ស្ថាប័ន​រដ្ឋ​ទាំង​នោះ​ខ្លះ​ទៀត​កូន​ប្រសា​ដែល​ឪពុក​ធ្វើ​ដន្លង​នឹង​គ្នា​ក៏​មាន​ដែរ​។

ជាង​នេះ​ទៀត​តំណែង​ជាន់​ខ្ពស់​ខ្លះ​អាច​មាន​លើស​ពី​ ១ ​ក៏​មាន​ដូចជា​ឧត្តមសេនីយ៍ឯក ហ៊ុន ម៉ាណែត កូនប្រុស​ច្បង​របស់​​លោក​នាយក​រដ្ឋមន្ត្រី ហ៊ុន សែន ជា​ប្រធាន​នាយកដ្ឋាន​ប្រឆាំង​ភេរវកម្ម និង​ជា​អគ្គមេបញ្ជាការរង​កងយោធពល​ខេមរភូមិន្ទ​របស់​ក្រសួង​ការពារ​ជាតិ​ផង​ដែល​បាន​ដើរ​តួនាទី​សំខាន់​នៅ​ក្នុង​ព្រឹតិ្តការណ៍​កីឡា​ថ្ងៃ​ ៧​ មករា​សប្តាហ៍​កន្លង​ទៅ​ដោយ​​មាន​មន្ត្រី​ជាន់​ខ្ពស់​ដទៃ​ទៀត​អម​រួម​ទាំង​ឧត្តមសេនីយ៍ ផាត វិបុលភ័ក្រ ជា​ប្រធាន​នាយកដ្ឋាន​​ទំនាក់​ទំនង​អន្តរជាតិ​ដែល​ជា​កូន​បង្កើត​របស់​លោក នាង ផាត រដ្ឋលេខាធិការ​ក្រសួង​ការពារ​ជាតិ និង​ត្រូវ​ជា​កូន​ប្រសា​​លោក ចម ប្រសិទ្ធ ផង​ដែរ​។

លោក​ ម៉ាណែត ធ្លាប់​បាន​ឆ្លើយតប​ទៅ​នឹង​ទូរទស្សន៍​​ ABC របស់​​អូស្ត្រាលី​ថា​តើ​លោក​មាន​ចង់​ធ្វើ​​ជា​នាយក​រដ្ឋមន្ត្រី​ទេ​? លោក​ឆ្លើយ​បែប​លក្ខណៈ​រារែក​ថា​បាទ​ ឬ​ក៏​​ទេ​តែ​លោក​នឹង​ទទួល​តំណែង​នេះ​បើ​​ពលរដ្ឋ​ពេញចិត្ត​។ រីឯ​ប្អូនប្រុស​​បង្កើត​លោក ហ៊ុន ម៉ានិត វិញ មាន​តួនាទី​ប្រធាន​នាយកដ្ឋាន​ចារកម្ម​នៃ​ក្រសួង​ការពារ​ជាតិ​ផង​ និង​អនុប្រធាន​ខុទ្ទកាល័យ​នាយក​រដ្ឋមន្ត្រី​ផង និង​តំណែង​ថែម​មួយ​ទៀត​ថ្មីៗ​នៅ​​ក្នុង​បក្ស​គឺ​សមាជិក​ក្នុង​គណៈកម្មការ​ត្រួតពិនិត្យ​នៅក្នុង​ជួរ​បក្ស​។

រីឯ​កូនប្រុស​ទាំង​ ៤ ​របស់​លោក សុខ អាន ឧបនាយករដ្ឋមន្ត្រី​គឺ​គ្មាន​អ្នក​ណា​ម្នាក់​កាន់​​តំណែង​តូច​ទេ​ដូចជា​នៅក្នុង​ព្រះរាជក្រឹត្យ​ថ្មីៗ​នេះ​បាន​តែងតាំង​លោក សុខ សូកេន ជា​អនុរដ្ឋលេខាធិការ​ក្រសួង​ការបរទេស និង​​សហប្រតិបត្តិការ​អន្តរជាតិ និង​លោក សុខ សង្វារ ជា​អគ្គនាយករង​អាជ្ញាធរ​ជាតិ​អប្សរា​លោក សុខ ពុទ្ធិវុឌ្ឍ ជា​ប្រធាន​សហព័ន្ធ​ផលិត​ស្រូវ​អង្ករ​​កម្ពុជា និង​លោក សុខ សូកាន ជា​តំណាង​រាស្ត្រ​ខេត្ត​តាកែវ​​របស់​បក្ស​ប្រជាជន។

ករណី​​​តែងតាំង​សាច់ញាតិ​នេះ​ត្រូវ​បាន​លោក យឹម សុវណ្ណ អ្នក​តំណាង​រាស្ត្រ​មកពី​គណបក្ស​សង្គ្រោះ​ជាតិ​រិះគន់​ថា​គណបក្ស​របស់​លោក​នឹង​មិន​រៀបចំ​សែស្រឡាយ​កូនក្មួយ​និយម​ធ្វើ​ដូច​គណបក្ស​ប្រជាជន​ទេ​ហើយ​ការ​ដែល​លោក​ហ៊ាន​លើក​ឡើង​បែប​នេះ​មកពី​កូនប្រុស​ទាំង​ ២ ​របស់​លោក​ទៅ​រៀន និង​ធ្វើការ​​រស់នៅ​បរទេស​អស់​​ហើយ​។

តែ​លោក​ សុវណ្ណ ភ្លេច​គិត​រឿង​កូនៗ​របស់​ថ្នាក់ដឹកនាំ​​ជាន់ខ្ពស់​របស់​បក្ស​ប្រឆាំង​របស់​ខ្លួន​ដែល​ជា​​ឆ្អឹង​ទទឹង​ក​របស់​បក្ស​ទៅ​វិញ​ដូចជា តំណាងរាស្ត្រ គង់ សុភា ដែល​ត្រូវ​គេ​វ៉ៃ​នៅ​មុខ​រដ្ឋសភា​កាលពី​ចុង​ឆ្នាំ​ ២០១៥ ​នោះ​គឺជា​កូនប្រុស​របស់​លោក​ គង់ គាំ ជា​អតីត​អនុប្រធាន​បក្ស​ សម រង្ស៊ី ដែល​បញ្ចូល​គ្នា​នៅ​ក្នុង​បក្ស​សង្គ្រោះ​ជាតិ​នោះ រីឯ​លោក កឹម សុខា អនុប្រធាន​បក្ស​ប្រឆាំង​នេះ​ដែល​ធ្លាប់​រិះគន់​រដ្ឋាភិបាល​ខ្លាំងៗ​យក​មុខ​យក​មាត់​ខ្លួន​ឯង​សម្បើម​ណាស់​តែ​ដាក់​បញ្ចូល​កូនស្រី​ច្បង​របស់​ខ្លួន​កញ្ញា កឹម មនោវិទ្យា ឲ្យ​មាន​តំណែង​តាំងពី​នៅ​ក្នុង​បក្ស​មក​ម្ល៉េះ​គឺ​កាន់​​តួនាទី​ជា​អនុប្រធាន​នាយកដ្ឋាន​កិច្ចការ​សាធារណៈ។ តើ​ឲ្យ​ប្រជាពលរដ្ឋ​ជឿជាក់​បក្ស​ប្រឆាំង​យ៉ាង​ម៉េច​ទៅ? បើ​រិះគន់​បក្ស​កាន់​អំណាច​កប់ៗ​មាត់​រឿង​គ្រួសារ​និយម​ដែល​បង្ក​ឲ្យ​មាន​អំពើ​ពុករលួយ​តែ​ខ្លួនឯង​ដាក់​កូនស្រី​ធ្វើ​ដូច​គេ​ដែរ​យ៉ាង​នេះ​?

ការ​និយម​ដាក់​សមាជិក​គ្រួសារ​ទៅ​ក្នុង​កិច្ចការ​សាធារណៈ​នេះ​សហរដ្ឋអាមេរិក​ហាក់​ចង់​ដើរ​លើ​គន្លង​ចាស់​​ផង​ដែរ​។

ខណៈ​លោក ដូណាល់ ត្រាំ ឈ្នះ​ឆ្នោត​សេតវិមាន​ថ្មីៗ​នេះ​គឺ​មាន​គម្រោង​ឲ្យ​តំណែង​ទៅ​កូនប្រសា​ឈ្មោះ Jared Kushner ចូល​ធ្វើការ​នៅ​សេតវិមាន​។ លោក Kushner ស្វះស្វែង​រក​ផ្លូវ​ច្បាប់​ណា​មួយ​ដើម្បី​បាន​ចូលរួម​ក្នុង​កិច្ចការ​សាធារណៈ​ព្រោះ​ច្បាប់​សហព័ន្ធ​ប្រឆាំង​នឹង​របប​គ្រួសារ​និយម​បាន​អនុម័ត​តាំងពី​ឆ្នាំ​ ១៩៦៧ ​មក​ម្ល៉េះ​គឺ​មាន​ការ​​រឹតបន្តឹង​យ៉ាង​ខ្លាំង​ទៅ​លើ​សាច់ញាតិ​​ «Relative»​ ​នេះ។

ចំណុច​នេះ​​មាន​មតិ​វិភាគ​នៅ​ក្នុង​វិទ្យុ​ជាតិ​សហរដ្ឋអាមេរិក​ (NPR) បាន​លើក​ឡើង​ថា​បើ​តែងតាំង​លោក Kushner ជា​នាយខុទ្ទកាល័យ ឬ​​អគ្គនាយក​នៅ​សេតវិមាន​ជា​តំណែង​សម្រេច​ចិត្ត​គឺ​មិន​បាន​ទេ​តែ​បើ​​ធ្វើ​ជា​ទីប្រឹក្សា​ផ្ទាល់​លោក ត្រាំ ​ដែល​គ្មាន​តួនាទី​សម្រេច​ចិត្ត​គឺ​អាច​។

ដោយសារ​ច្បាប់​អាមេរិក​​តឹងរ៉ឹង​ហ្នឹង​ហើយ​ទើប​កូនស្រី​ច្បង​ បារ៉ាក់ អូបាម៉ា មិន​បាន​ធ្វើការ​ក្នុង​សេតវិមាន​គឺ​ពេល​វ៉ាកង​ទៅ​សុំ​ការងារ​ធ្វើ​នៅ​ភោជនីយដ្ឋាន​យក​បទពិសោធ​ទៅ​វិញ​។ រីឯ​កូនស្រី​លោក ចូកូវី ដូដូ ប្រធានាធិបតី​ឥណ្ឌូនេស៊ី​វិញ​គឺ​ដាក់​ពាក្យ​ប្រឡង​ចូល​មន្ត្រី​រាជការ​ដូច​គេ​ឯង​ដែរ​។

ដើម្បី​លុប​បំបាត់​របប​គ្រួសារ​និយម លុប​បំបាត់​អំពើ​ពុករលួយ ឬ​ក៏​ទំនាស់​ផលប្រយោជន៍​ក្នុង​ស្ថាប័ន​រដ្ឋ​តើ​កម្ពុជា​អាច​តាក់តែង​ច្បាប់​មួយ​ដូច​នៅ​អាមេរិក​សម្រាប់​មន្ត្រី​មុខងារ​សាធារណៈ​មិន​ឲ្យ​យក​សមាជិក និង​សាច់ញាតិ​គ្រួសារ​​ចូល​ធ្វើការ​នៅ​ស្ថាប័ន​ជាមួយ​គ្នា​បាន​ទេ ទោះបី​មាន​ចំណេះដឹង​ក៏​ដោយ​?

នេះ​គឺជា​ចំណុច​​ត្រូវ​ពិចារណា​ថា​តើ​គួរ​ធ្វើ​យ៉ាង​ណា​ឲ្យ​មាន​តម្លាភាព​នៅក្នុង​សង្គម​ខ្មែរ​គឺ​ចាំបាច់​ត្រូវ​ឲ្យ​មាន​ច្បាប់​ប្រឆាំង​នឹង​របប​គ្រួសារ​និយម​នេះ​។

សរុប​មក​វិញ​ការ​តែងតាំង​កូនៗ​ថ្នាក់ដឹកនាំ​កំពូលៗ​បាន​ធ្វើ​ឲ្យ​មន្ត្រី​ថ្នាក់​ក្រោម​បាក់​ទឹកចិត្ត​ហើយ​យុវជន​ដែល​ខំ​បម្រើ​បក្ស​គ្មាន​ឥទ្ធិពល​បាន​ត្រឹម​បម្រើ​ឲ្យ​កូន​អ្នកធំ​ប៉ុណ្ណោះ។

ករណី​ជាក់ស្តែង​នេះ​គឺ​ឆ្លើយតប​នឹង​ការ​ស្រាវជ្រាវ​របស់​អង្គការ KAS របស់​អាល្លឺម៉ង់​ថ្មីៗ​នេះ​ស្តីពី​យុវជន​បាន​ប្រៀបធៀប​រចនាសម្ព័ន្ធ​យុវជន​របស់​ CPP និង​ CNRP​ ថា​មាន​លក្ខណៈ​ពឹង​ផ្អែក​ខ្លាំង​លើ «​គណបក្ស​របស់​ខ្លួន​»​។

សួរ​ថា​តើ​សង្គម​មួយ​គួរ​តែ​បន្ត​ឲ្យ​មាន​ការ​បែងចែក​បែប​អាណានិគម​លើ​ជាតិ​សាសន៍​ខ្លួន​បែប​កូន​គេ និង​កូន​ខ្ញុំ​ទៅ​ទៀត​ឬ​យ៉ាង​ណា​?

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ