Search form

Login - Register | FOLLOW US ON

Logo of Phnom Penh Post newspaper Phnom Penh Post - ស្រុក​ខ្មែរ​ឡើង​កម្ដៅ​ទាំង​នយោបាយ និង​អាកាសធាតុ

ប្រឡាយ​ទឹក​នៅ​ស្រុក​គាស់ក្រឡ ខេត្ត​បាត់ដំបង​សាង​សង់​ក្រោម​ជំនួយ​ចិន​តាំងពី​ឆ្នាំ ២០១២។ ប្រឡាយ​នេះ​គឺជា​គំរូ​មួយ​ល្អ​សម្រាប់​ជួយ​ស្រោចស្រព​ដំណាំ​ក្នុង​រដូវប្រាំង​ផង​ដែរ។
ប្រឡាយ​ទឹក​នៅ​ស្រុក​គាស់ក្រឡ ខេត្ត​បាត់ដំបង​សាង​សង់​ក្រោម​ជំនួយ​ចិន​តាំងពី​ឆ្នាំ ២០១២។ ប្រឡាយ​នេះ​គឺជា​គំរូ​មួយ​ល្អ​សម្រាប់​ជួយ​ស្រោចស្រព​ដំណាំ​ក្នុង​រដូវប្រាំង​ផង​ដែរ។ រូបថត តុង សុប្រាជ្ញ

ស្រុក​ខ្មែរ​ឡើង​កម្ដៅ​ទាំង​នយោបាយ និង​អាកាសធាតុ

ប្រជាពលរដ្ឋ​ភាគច្រើន​សព្វថ្ងៃ​មាន​អារម្មណ៍​ក្តៅ​ទាំង​ចិត្ត​ក្តៅ​ទាំង​កាយ​ដោយ​ស្ថានភាព​នយោបាយ​ចេះ​តែ​ប្រែប្រួល​ធ្វើ​ឲ្យ​អ្នក​រកស៊ី​លក់ដូរ​ត្អូញត្អែរ និង​មាន​សភាព​ស្ងប់ស្ងាត់​ខណៈ​ដែល​អ្នក​យក​លុយ​ដាក់​ធនាគារ ឬ​ ទិញ​អចលនទ្រព្យ​ក៏​មាន​ការ​ស្ទាក់ស្ទើរ​រីឯ​អ្នក​រក​ការងារ​ធ្វើ​ក៏​ចេះ​តែ​ពិបាក​ទៅៗ​ជាពិសេស​អ្នក​ធ្វើការ​ឲ្យ​អង្គការ​ដែល​ទទួល​ថវិកា​ពី​សហគមន៍​អឺរ៉ុប​ ដោយសារ​តែ​រឿង​ឆ្មា និង​កណ្តុរ (Tom & Jerry) ​ចាក់​គូទ​គ្នា​ទៅវិញ​ទៅមក​នោះ​ធ្វើឲ្យ​សភា​អឺរ៉ុប​កាត់​ផ្តាច់​ជំនួយ​ទឹកប្រាក់​ចំនួន ​៤៥០ ​លាន​ដុល្លារ​​អាមេរិក​កាលពី​សប្តាហ៍​មុន​នេះ​។

ចំណែកឯ ​អ្នក​នៅ​ជនបទ​វិញ​រង់ចាំ​តែ​ទទួល​រងគ្រោះ​ធម្មជាតិ​ច្រើន​ជាង​អ្នក​ទីក្រុង​ដោយសារ​កា​ប្រែប្រួល​អាកាសធាតុ​បណ្តាល​មកពី​មនុស្ស​ជា​អ្នក​ប្រព្រឹត្ត​ធ្វើឲ្យ​មាន​ការ​កើនឡើង​កម្តៅ​គ្រោះ​រាំងស្ងួត​មាន​ទឹក​ជំនន់ មាន​​ខ្យល់​ព្យុះ​ខុស​ពី​ធម្មតា​ដូចជា​កាលពី​សប្តាហ៍​មុន​នេះ​ក្រសួង​ធនធាន​ទឹក​បាន​ប្រកាស​ដោយ​ព្យាករ​ថា​នៅ​ឆ្នាំ​ក្រោយ​នេះ​ស្រុក​យើង​នឹង​មាន​កម្តៅ​កើនឡើង​ ១ ​អង្សាសេ​ជាពិសេស​នៅ​ខែ​មេសា​ និង​​ឧសភា​ពី​ ៤០ ទៅ​ ៤១ ​អង្សាសេ​ហើយ​បើ​តាម​ស្ថិតិ​របស់​គណៈកម្មការ​ជាតិ​គ្រប់គ្រង​គ្រោះ​មហន្តរាយ​នៅ​ឆ្នាំ​នេះ​មាន​ការ​ខូចខាត​ផ្ទះ​សំបែង​ ៣៤៦៤ ខ្នង​ជនរងគ្រោះ​ដោយសារ​រាំង​ស្ងួត​ចំនួន​ ២ ៥១៥ ៣៥៨ នាក់​ហើយ​មាន​​អ្នក​ស្លាប់​ ២៥ ​នាក់​។

ឆ្នាំ​ដែល​មាន​ជន​រងគ្រោះ​ស្លាប់​ដោយសារ​គ្រោះ​មហន្តរាយ​ច្រើន​ជាង​គេ​គឺ​នៅ​ឆ្នាំ​ ២០១១ មាន​ចំនួន​ ៤៥៨ នាក់​ និង​នៅ​ឆ្នាំ​ ២០១៣ ​មាន​ចំនួន​ ៣៧៥ ​នាក់​។

តាមរយៈ​របាយការណ៍​ដែល​បាន​សិក្សា​ស្រាវជ្រាវ​ដោយ​អង្គការ​សហប្រជាជាតិ និង​មជ្ឈមណ្ឌល​សម្រាប់​ការ​ស្រាវជ្រាវ​អំពី​ជំងឺ​ឆ្លង​ដោយសារ​គ្រោះ​ធម្មជាតិ​ (CRED) បាន​បង្ហាញ​ថា ​ប្រជាជន​កម្ពុជា​ ស្ថិត​នៅក្នុង​ចំណោម​ប្រទេស​ទាំង​ ១០ ដែល​ទទួល​ផលប៉ះពាល់​ពី​គ្រោះ​ធម្មជាតិ​ខ្លាំង​ជាង​គេ​បំផុត​។

បើ​គិត​ជា​ស្ថិតិ​ជា​មធ្យម​គឺ​ ៨៤០០ ​នាក់​ក្នុង​ចំណោម​ប្រជាជន​កម្ពុជា​ ១០០ ០០០ ​នាក់​ដែល​ទទួល​រង​ផលប៉ះពាល់​ហើយ​របាយការណ៍​នេះ​ត្រូវ​បាន​លើក​នៅក្នុង​កិច្ចប្រជុំ​កំពូល​អង្គការ​សហប្រជាជាតិ​ស្តីពី​ការ​ប្រែប្រួល​អាកាសធាតុ (Climate Change) ​នៅ​ទីក្រុង​ប៉ារីស​ប្រទេស​បារាំង​នៅ​សប្តាហ៍​នេះ​ដើម្បី​ធ្វើ​យ៉ាង​ណា​កុំ​ឲ្យ​សីតុណ្ហភាព​នៅ​លើ​ពិភពលោក​ឡើង​លើស​ពី​ ២ ​អង្សាសេ​។

ការ​ដែល​​ធ្វើឲ្យ​កម្ពុជា​ចេះ​តែ​រងគ្រោះ​ទៅៗ​ប៉ុន្មាន​ឆ្នាំ​ចុងក្រោយ​នេះ​ដោយសារ​តែ​ការ​បំផ្លាញ​សម្បត្តិ​ធម្មជាតិ​ដូច​ការ​កាប់​បំផ្លាញ​ព្រៃឈើ​ខុស​ច្បាប់​យ៉ាង​អនាធិបតេយ្យ​គួរ​ឲ្យ​សង្វេគ ​ការ​បូម​ខ្សាច់​ដោយ​គំហុកៗ ជីក​រក​រ៉ែ ការ​នេសាទ​ខុស​ច្បាប់ និង​​ការ​​ធ្វើ​ទំនប់​វារីអគ្គិសនី​ជាដើម​ដែល​ធ្វើឲ្យ​មាន​ការ​ប្រែប្រួល​អាកាសធាតុ​ខុស​ពី​ធម្មតា​តាំង​ពី​កម្ពស់​ទឹក​ភ្លៀង កម្តៅ​សីតុណ្ហភាព​ឡើង​ចុះ​ខុស​ពី​ប្រក្រតី​ គ្រោះ​រាំងស្ងួត​អស់​ព្រៃព្រឹក្សា​កុំ​ថា​ឡើយ​មនុស្ស​សូម្បី​តែ​សត្វ​ព្រៃ​ក៏​ពុំ​អាច​រស់នៅ​បាន​ដោយ​រត់​ទៅ​ប្រទេស​ជិត​ខាង​ដែល​មាន​ព្រៃឈើ​ចង់​អស់​ហើយ​សត្វ​ព្រៃ​ដែល​នៅ​សល់​គេ​បាញ់​សម្លាប់​យ៉ាង​អនាធិបតេយ្យ​ដែរ​។

បើ​ទោះបី​ជា ​ខំ​ប្រឹង​ធ្វើ​វារីអគ្គិសនី​ខ្លួនឯង​ហើយ​នៅ​តែ​ប្រើ​មិន​គ្រប់​ផង​ដូច​កាលពី​សប្តាហ៍​មុន​នេះ​គ្រាន់​ដាច់​ភ្លើង​ពី​ប្រទេស​វៀតណាម​ភ្លាម​ស្រុក​ខ្មែរ​ក៏​ដាច់​ភ្លើង​ទូទាំង​ប្រទេស​។

នេះ​សបញ្ជាក់​ឲ្យ​ឃើញ​ថា​ការ​ធ្វើ​ទំនប់​វារីអគ្គិសនី​ហាក់បី​ដូចជា​គ្មាន​ប្រយោជន៍​ជួយ​បាន​តែ​បន្តិចបន្តួច​ពី​ភ្នំ​កំចាយ​គឺ​បាន​ត្រឹម​តែ​បំផ្លាញ​បរិស្ថាន និង​ទេសចរណ៍​ទៅវិញ​ទេ​ដោយ​ប្រទេស​មួយ​​ទាំង​មូល​មក​ទល់​ពេល​នេះ​ហើយ​នៅ​តែ​មិន​មាន​អគ្គិសនី​ខ្លួនឯង​ផ្ទាល់​។ ចុះ​បើ​មាន​កិច្ចប្រជុំ​ធំៗ​ហើយ​មាន​ភ្លើង​ដាច់​កណ្តាល​ទី​ពី​វៀតណាម​ទៀត​តើ​ស្រុក​ខ្មែរ​ខ្មាស់​គេ​យ៉ាង​ដូចម្តេច​? ហើយ​មិន​មាន​សុវត្ថិភាព​ជូន​ថ្នាក់​ដឹកនាំ និង​គណៈប្រតិភូ​ទៀត​ផង​។

ប៉ុន្តែ​ដោយសារ​ក្តីស្រឡាញ់​ធម្មជាតិ​មាន​អ្នក​តស៊ូ​មតិ និង​រាយការណ៍​ស្តីពី​បរិស្ថាន​នៅ​ប្រទេស​កម្ពុជា​ទាំង​មន្ត្រី​អង្គការ​មិនមែន​រដ្ឋាភិបាល​ទាំង​អ្នក​កាសែត​មួយ​ចំនួន​ប្រឈម​គ្រោះថ្នាក់​ខ្ពស់ និង​ត្រូវ​បាន​គេ​សម្លាប់​ដូចជា​អ្នក​ការពារ​បរិស្ថាន លោក ឈុត វុទ្ធី និង​អ្នក​កាសែត ហេង សេរីឧត្តម ជាដើម​។ បើ​គិត​ជា​ចំណាត់​ថ្នាក់​វិញ​គឺ​កម្ពុជា​នៅ​ចំណាត់​ថ្នាក់​លេខ​ ១៤៤ ក្នុង​ចំណោម​ ១៨០ ​ប្រទេស​។ នេះ​បើ​តាម​របាយការណ៍​អ្នក​សារព័ត៌មាន​គ្មាន​ព្រំដែន​ដែល​មូលដ្ឋាន​នៅ​ទីក្រុង​ប៉ារីស (RSF,2015)​។

បញ្ហា​ដែល​សម្បត្តិ​ធម្មជាតិ​ត្រូវ​បាន​គេ​បំផ្លាញ​យ៉ាង​អនាធិបតេយ្យ​បែប​នេះ​គឺ​មកពី​តម្រូវការ និង​​អ្នក​ផ្គត់ផ្គង់​ដូច​គ្នា​ជា​រួម​គឺ​ប្រទេស​​ចិន​តម្រូវ​ការ​ខ្ពស់​ធនធាន​នេះ​ខ្ពស់​រីឯ​ប្រទេស​កម្ពុជា​ជា​អ្នក​ផ្គត់ផ្គង់​ក៏​ត្រូវ​ការ​ថវិកា​ខ្ពស់​ដែរ​​ដើម្បី​ឲ្យ​ថវិកា​មួយ​ផ្នែក​អាច​យក​មក​ចិញ្ចឹម​កងទ័ព និង​អង្គរក្ស​អ្នក​ធំៗ​ផង​ធ្វើឲ្យ​រដ្ឋាភិបាល​មិន​អាច​គ្រប់គ្រង​ធនធាន​ធម្មជាតិ​ទាំងនោះ​បាន​។

តម្រូវការ​ប្រទេស​ចិន​យក​ធនធាន​ពី​ស្រុក​ខ្មែរ​នេះ​គឺ​ដូច​កាល​ពី​សម័យ​របប​ខ្មែរ​ក្រហម​ដែល​ប្រទេស​ចិន​តម្រូវ​ស្រូវ​ខ្ពស់​យក​ពី​ស្រុក​ខ្មែរ​ជំនាន់​នោះ​ដើម្បី​ចិញ្ចឹម​ពលរដ្ឋ​របស់​គេ​ដែល​មាន​ការ​ដោះដូរ​ជាមួយ​នឹង​សព្វាវុធ​។

ចំពោះ​សម័យ​នេះ​វិញ​គឺ​ដោះដូរ​ជាមួយ​នឹង​ជំនួយ​ឥត​សំណង និង​កម្ចី​ការប្រាក់​តិច​រាប់​ពាន់​លាន​ដុល្លារ​ជាមួយ​នឹង​ធនធាន​ធម្មជាតិ​គឺ​ឲ្យ​តែ​ក្រុមហ៊ុន​ចិន​ដាក់​ដេញ​ថ្លៃ​ដី​សម្បទាន​សេដ្ឋកិច្ច​គឺ​ច្រើន​តែ​ជាប់​ហើយ​។ ម្យ៉ាង​ដើម្បី​រក្សា​ចំណង​មិត្ត​ភាព និង​អំណាច​បាន​យូរ​ផង​ដែរ​។ ឧទាហរណ៍​គ្រាន់​មាន​សង្គ្រាម​តាម​ព្រំដែន​ជាមួយ​ប្រទេស​ថៃ ​នៅ​ខេត្ត​ព្រះវិហារ ​ព្រៃឈើ​នៅ​ខេត្ត​នោះ​ត្រូវ​បាន​គេ​កាប់​យ៉ាង​ពាយ​ បើ​មាន​សត្រូវ​ចង់​ផ្លោង​តាម​ផែនទី GPS​ មក​គឺ​នៅ​លើ​គោក​គ្មាន​ព្រៃ​ក្រាស់​គ្រាន់តែ​ទប់ទល់​ទេ​។

ជាង​នេះ​ទៅ​ទៀត​ ក្រសួង​ធនធាន​ទឹក​មិន​បាន​ធ្វើ​អ្វី​ជា​ដុំ​កំភួន​ទេ​ជាពិសេស​រឿង​ប្រព័ន្ធ​ធារាសាស្ត្រ​បើ​មើល​ទៅ​ប្រឡាយ​ទឹក​ដែល​មាន​លទ្ធភាព​អាច​រំដោះ​ទឹក​បាន​មួយ​ផ្នែក​ធំ​ និង​អាច​បម្រុង​ទឹក​ទុក​ប្រើ​ពេល​ខែ​ប្រាំង​បាន​ឲ្យ​ដូច​ឈ្មោះ​ធនធាន​ទឹក​ផង​។ តែ​ក្រសួង​បាន​ដោះ​ស្រាយ​​តិចតួច​ណាស់​មើល​ទៅ​ប្រឡាយ​ និង​ទំនប់​សព្វថ្ងៃ​នេះ​សុទ្ធតែ​សល់​ចាស់ៗ​ពី​ដើម និង​ជំនាន់​ខ្មែរ​ក្រហម​មក​ម្ល៉េះ។ នេះ​ក៏​ជា​ផលវិបាក​មួយ​ដែល​ចូលរួម​ដោះស្រាយ​បញ្ហា​ប្រែប្រួល​អាកាសធាតុ​ផង​ដែរ​។

ជា​រួម​គឺ​ថ្នាក់​ជាតិ​ជា​អ្នក​អនុញ្ញាត​ឲ្យ​កាប់​បំផ្លាញ និង​ការ​កាប់​ដោយ​ឈ្មួញ​ទុច្ចរិត​តែ​នៅពេល​ថ្នាក់​ក្រោម​ជាតិ​រដ្ឋបាល​ស្រុក​ជា​អ្នក​ជួយ​ទប់ស្កាត់​ពី​គ្រោះ​ធម្មជាតិ​ដូចជា​សង់​ទំនប់ សង់​ទីទួល​ជម្រក​សម្រាប់​ជន​រងគ្រោះ​ជាដើម​ហើយ​ដូរ​ពាក្យ​ឲ្យ​ទៅ​ជា​គួរសម​ទៅ​ជា​ការ​ប្រែប្រួល​អាកាសធាតុ​ទៅវិញ​។

ចំណែក​ការ​ទប់ស្កាត់​ជា​លក្ខណៈ​បន្ទាន់​នៃ​ការ​ប្រែប្រួល​អាកាសធាតុ និង​ផលប៉ះពាល់​របស់​វា​នេះ​ក៏​ជា​ចំណុច​មួយ​នៃ​គោលដៅ​អភិវឌ្ឍន៍​ប្រកប​ដោយ​ចីរភាព​ (SDG 2015) ​ផង​ដែរ​។

ហេតុ​ដូច​នេះ​ហើយ​តើ​ទុក​ឲ្យ​ពលរដ្ឋ​ខ្មែរ​នៅ​ទទួល​រង​ទាំង​កម្តៅ​នយោបាយ និង​រស់នៅ​ក្រោម​កម្តៅ​ពី​ការ​ប្រែប្រួល​អាកាសធាតុ​ដល់​ណា​ទៀត​បាន​បន្ថយ​វា​? តើ​ក្នុង​នាម​ពលរដ្ឋ​ខ្មែរ​ទាំងអស់​គ្នា​សុំ​ម៉ា​រស់​ដោយ​សុខសាន្ត​បាន​ទេ​?

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ