Search form

Login - Register | FOLLOW US ON

Logo of Phnom Penh Post newspaper Phnom Penh Post - ហេតុ​អ្វី​បាន​ជា​គ្មាន​ស្ថាប័ន​ណា​ថ្កោល​ទោស​អំពើ​ឃោរឃៅ​កាត់ ​ក ​ស្ត្រី?

ការ​រាំ​ចង្វាក់​ម៉ាឌីហ្សូន និង​រូប​តូច​បំពាក់​បូ​ប្រឆាំង​អំពើ​ហិង្សា​លើ​ស្ត្រី និង​កុមារ​កន្លង​មក។
ការ​រាំ​ចង្វាក់​ម៉ាឌីហ្សូន និង​រូប​តូច​បំពាក់​បូ​ប្រឆាំង​អំពើ​ហិង្សា​លើ​ស្ត្រី និង​កុមារ​កន្លង​មក។ ផា លីណា

ហេតុ​អ្វី​បាន​ជា​គ្មាន​ស្ថាប័ន​ណា​ថ្កោល​ទោស​អំពើ​ឃោរឃៅ​កាត់ ​ក ​ស្ត្រី?

៣៦៥ ​ថ្ងៃ​រង់ចាំ​ទម្រាំ​តែ​ដល់​ទិវា​សិទ្ធិ​នារី​អន្តរជាតិ​លើក​កម្ពស់​សិទ្ធិ​នារី​ហើយ​ជា​ទូទៅ​នៅ​កម្ពុជា​ការ​ប្រារព្ធ​ពិធី​នោះ​គឺ​ច្រើន​តែ​ធ្វើ​នៅ​រាជធានី​ភ្នំពេញ​តែ​មិន​បាន​បែងចែក​ទៅ​តាម​បណ្តា​ខេត្ត ស្រុក និង​ជនបទ​ដើម្បី​ឲ្យ​មាន​សកម្មភាព​ផុស​ផុល​ប្រយុទ្ធ​ប្រឆាំង​នឹង​អំពើ​ហិង្សា​លើ​ស្ត្រី​ និង​កុមារ​ទេ។ ជាមួយ​នឹង​ការ​រង់ចាំ​រហូត​ដល់​យុទ្ធនាការ​ ១៦ ​ថ្ងៃ និង​ ១ ​កោដិ​សំឡេង​ដើម្បី​ប្រយុទ្ធ​ប្រឆាំង​អំពើ​ហិង្សា​លើ​ស្ត្រី និង​កុមារ​បាន​មក​ដល់​ម្តង។

ផ្ទុយ​ទៅ​វិញ​នៅពេល​ដែល​មាន​បញ្ហា​អំពើ​ហិង្សា​លើ​ស្ត្រី និង​កុមារី​ធ្ងន់ធ្ងរ​បែរ​ជា​ស្ថាប័ន​ពាក់ព័ន្ធ​រដ្ឋាភិបាល និង​អង្គការ​មិនមែន​រដ្ឋាភិបាល​ដែល​ធ្វើការ​លើក​កម្ពស់​សិទ្ធិ​ស្ត្រី​មួយ​ចំនួន​បែរ​ជា​ស្ងប់ស្ងាត់​ទៅវិញ​។ ដូចជា​ករណី​ឃាតកម្ម​កាត់​ក​ស្ត្រី​ដោយ​បុរស​មាន​ប្រពន្ធ​កូន​ ២ ​ទៅ​ហើយ​ខឹង​ចូល​ដណ្តឹង​មិន​បាន​នៅ​ខេត្ត​សៀមរាប​កាលពី​សប្តាហ៍​មុន​នេះ ​ករណី​រំលោភ​សេពសន្ថវៈ​ហើយ​សម្លាប់​ក្មេង​ស្រី​សិស្ស​នៅ​ខេត្ត​ កំពត​ ដោយ​គ្រាន់​តែ​កុមារី​នោះ​ថា​ឲ្យ​ជន​សង្ស័យ​មុខ​អាក្រក់​គ្មាន​នរណា​គេ​ស្រឡាញ់​ទេ និង​ករណី​ឃាតកម្ម​មួយ​គ្រួសារ​ទាំង​កុមារា-កុមារី​នៅ​ខេត្ត​ព្រះសីហនុ​កាលពី​ខែ​មុន​នេះ​ដោយសារ​តែ​រឿង​ចោទ​ជន​សង្ស័យ​នោះ​ថា​ចោរ​លួច​មាន់​ប៉ុណ្ណោះ​។

ហេតុ​អ្វី​បាន​ជា​ស្ថាប័ន​ពាក់ព័ន្ធ​មិន​ធ្វើ​យុទ្ធនាការ​ប្រឆាំង​នឹង​អំពើ​ឃោរឃៅ​របស់​បុរស​មកលើ​ស្ត្រី និង​កុមារ​បែប​នេះ​តាមរយៈ​ការ​ថ្កោល​ទោស​ធ្ងន់ៗ​? កុំ​ចាំ​ទម្រាំ​ដល់​ពេល​យុទ្ធនាការ​ ១៦ ​ថ្ងៃ​សំឡេង ១ ​កោដិ ឬ​ក៏​ទិវា​សិទ្ធិ​នារី​ ៨ ​មីនា​នោះ​ហាក់​ដូច​ជា​យឺត​ពេល​ទៅ​ហើយ​។ បើ​មាន​គេ​សួរ​ថា​ក្រសួង​កិច្ចការ​នារី​ធ្វើ​អ្វី​ខ្លះ​? អង្គការ​ធ្វើការ​ជួយ​ស្ត្រី​បាន​ធ្វើ​អ្វី​ខ្លះ​ដែល​ជា​ជោគជ័យ​គួរ​ឲ្យ​កត់សម្គាល់​? តាំង​ចាប់​ផ្តើម​ខឹង​គេ​ ខឹង​ឯង​ហើយ​អ្នក​មក​ពី​ណា​បាន​ជា​មិន​ដឹង​អី​សោះ​អ៊ីចឹង​?

បើ​និយាយ​ពី​ស្ថិតិ​នៃ​អំពើ​ហិង្សា​ហាក់​មិន​បាន​ធ្វើ​បច្ចុប្បន្ន​ភាព​សោះ​ប្រើ​ទិន្នន័យ​ដដែល​ចាស់​របស់​ក្រសួង​កិច្ចការ​នារី​តាំង​ពី​ឆ្នាំ​ ២០០៩ ​មក​ម្ល៉េះ​ដែល​បាន​រក​ឃើញ​ថា​ស្ត្រី​ម្នាក់​ក្នុង​ចំណោម​ស្ត្រី​ ៥ ​នាក់​បាន​រងគ្រោះ​អំពើ​ហិង្សា​ដោយសារ​ប្តី ឬ​ក៏​បុរស​ជា​ដៃ​គូ។ មក​ទល់​ពេល​បច្ចុប្បន្ន​នេះ​គ្រាន់តែ​ដឹង​ថា​មាន​និន្នាការ​ថយ​ចុះ​តែ​មិន​ដឹង​ប៉ុន្មាន​ឲ្យ​ច្បាស់លាស់​នៅ​ឡើយ​ទេ​។ តែ​គ្រាន់​តែ​របៀប​ប្រើ​អំពើ​ហិង្សា​វិញ​កាន់តែ​សាហាវ​ជាង​មុន​ទៅ​វិញ​ដោយ​បុរស​លេង​សុទ្ធតែ​កាត់​ក​ស្ត្រី​ដូច​ពួក​អាយស៊ីស​ (ISIS) ​អ៊ិស្លាម​និយម​ជ្រុល​ទៅ​ហើយ​។

តើ​មកពី​ឃាតករ​ទាំង​នេះ​ទទួល​ព័ត៌មាន និង​រូបភាព​សាហាវៗ​ពី​ហ្វេសប៊ុក​ដែល​អ្នក​ចែក​រំលែក​ខ្វះ​ការ​ពិចារណា​ចេះ​តែ​ខំប្រឹង​ចែក​រំលែក​តៗ​គ្នា​ឲ្យ​តែ​គេ​សរសើរ​ថា​ខ្លួន​បាន​ដឹង​ឮ​មុន​គេ​តែ​មិន​ដឹង​ថា​ផលប៉ះពាល់​ទៅ​អ្នក​ដែល​មើល​ហ្នឹង​ប៉ុន​ណា​នោះ​ទេ​? រីឯ​សារព័ត៌មាន​ក្នុង​ស្រុក​ខ្លះ​ក៏​ខំ​ប្រឹង​ដំឡើង​រូបភាព​បែប​ឃោរឃៅ​នៅ​លើ​ទំព័រ​មុខ​ដោយ​មិន​ដាក់​រូប​ព្រាលៗ​ ឬ​ រូបថត​ពី​ចម្ងាយ​ឲ្យ​ឃើញ​តូចៗ​នោះ​ទេ​។

ឧទាហរណ៍​ពី​ការ​អត្ថាធិប្បាយ និង​រូបភាព​កាត់​ក​កាលពី​សង្គ្រាម​រវាង​កងទ័ព​រដ្ឋាភិបាល និង​កងទ័ព​ខ្មែរ​ក្រហម​ចុង​ក្រោយ​ជិត​បញ្ចប់​នៅ​ចុង​ទសវត្យរ៍​ទី​ ៩០ មាន​កាសែត​ក្នុង​ស្រុក​រស្មី​កម្ពុជា​ធ្លាប់​បាន​បង្ហាញ​រូបភាព​នៅ​ទំព័រ​មុខ​មាន​ទាហាន​រដ្ឋាភិបាល​បោច​សក់​ក្បាល​ដែល​ទើប​តែ​កាត់​ក​ទាហាន​ខ្មែរ​ក្រហម​បាន​ហើយ​កាន់​តែ​ក្បាល​នោះ​ដើរ​នៅ​លើ​វាលស្រែ​ដែល​មើល​ទៅ​រូបភាព​នោះ​គឺ​ខ្មែរ​សម្លាប់​ខ្មែរ​គួរ​ឲ្យ​សោក​សង្រេង​ណាស់​។

ឧទាហរណ៍​ករណី​ស្ត្រី​ត្រូវ​បាន​គេ​កាត់​ក​នៅ​ខេត្ត​សៀមរាប​ហ្នឹង​ស្លាប់​យ៉ាង​អាណោច​អាធ័ម​នាំ​គ្នា​ចែក​រំលែក​រូប​ននលគក​បាត់​ក្បាល​ដោយ​មនុស្ស​ភាគច្រើន​នាំ​គ្នា​ផ្អើល​មើល​រូប​ដែល​បង្ហោះ​តាម​ហ្វេសប៊ុក​។

ជាមួយ​គ្នា​នោះ​ដែរ​​ នៅ​ពេល​សមត្ថកិច្ច​ចាប់​បាន​ក៏​បង្ហាញ​តាម​វីដេអូ​ឃ្លីប​តាំងពី​ចាប់​បាន​សួរ​ចម្លើយ​នៅ​វាល​ស្រែ​ក្រោយ​ផ្ទះ​ជនល្មើស និង​ការ​ឲ្យ​ជនល្មើស​ធ្វើ​ត្រាប់​តាម​អ្វី​ដែល​ខ្លួន​ធ្វើ​នោះ​ហើយ​មាន​ទូរទស្សន៍​ខ្លះ​ចាក់​បង្ហាញ​ហើយ​ថែម​ទាំង​អត្ថាធិប្បាយ​បន្ថែម​ល្បោយ​ដូចជា​ តាម​ចម្លើយ​សារភាព​របស់​ជនល្មើស​នោះ​ថា​ការ​ដែល​ឈាន​ដល់​កាត់​ក​ស្ត្រី​អតីត​គូ​ដណ្តើង​នោះ​ គឺ​ដោយសារ ​តែ​ឃាតករ​ខ្លាច​ជាប់​រូប​របស់​ខ្លួន​នៅ​លើ​កែវ​ភ្នែក​ជនរងគ្រោះ​ងាយ​នឹង​សមត្ថកិច្ច​រកឃើញ​តាមរយៈ​ភ្នែក​ហ្នឹង​។

នេះ​គឺជា​បញ្ហា​ផ្ញើសារ និង​រូបភាព​នៅ​លើ​កញ្ចក់​ទូរទស្សន៍​របស់​អ្នក​អត្ថាធិប្បាយ​ដើម្បី​ឲ្យ​គេ​ចូលចិត្ត​ខ្លួន​ឯង​តែ​ផលប៉ះពាល់​មាន​ទំហំ​ធំ​ណាស់​នៅ​ក្នុង​សង្គម​ដោយ​អ្នក​ទស្សនា​​មាន​ភាព​ដិតដាម​នៅ​ជាប់​ នឹង​ អារម្មណ៍​ចាំ​មិន​ងាយ​ភ្លេច​ទេ​នូវ​រូបភាព​អាក្រក់ៗ​បែប​នេះ​។ ការ​ចងចាំ​នេះ​នៅ​ថ្ងៃ​ណា​មួយ​នៅ​ពេល​ដែល​គេ​ទាល់​ច្រក​ចង់​ធ្វើ​ឃាត​នរណា​ម្នាក់​គឺ​មាន​លក្ខណៈ​បែប​សាហាវ​ដូច​​អ្វី​ដែល​គេ​បាន​ឃើញ និង​ការ​អត្ថាធិប្បាយ​នៅ​លើ​កញ្ចក់​ទូរទស្សន៍​មាន​ទាំង​របៀប​កាត់​ក ឬ​ ខ្វេះ​ភ្នែក​ជនរងគ្រោះ​ជាដើម។

រហូត​មក​ទល់​ពេល​នេះ​មិន​ទាន់​មាន​ភ័ស្តុតាង​ណា​ឲ្យ​ពិតប្រាកដ​ថា​កែវ​ភ្នែក​ជនរងគ្រោះ​គឺ​ថត​ជាប់​នូវ​រូបភាព​បាន​ដូច​នៅ​រស់​ដែល​មាន​ចំណាំង​ប្លាត​នោះ​ទេ​តែ​នេះ​គឺជា​កំហុស​នៃ​ការ​យល់​ឃើញ ឬ ក៏​អបិយ​ជំនឿ​របស់​ឃាតករ​ឮ​គេ​ថា​តៗ​គ្នា​។ អ៊ីចឹង​ ជនល្មើស​លើក​ក្រោយៗ​ឲ្យ​តែ​សម្លាប់​ជនរងគ្រោះ​តាម​របៀប​ណា​ក៏ដោយ​តែ​ទីបញ្ចប់​ខ្វេះ​ភ្នែក​ ឬ​ក៏​កាត់​ក​ ឬ​យក​ថ្ម​វាយ​កម្ទេច​មុខ​មាត់​ភ្នែក​ចោល​តែ​ម្តង​។

នេះ​គឺជា​ផលប៉ះពាល់​ពី​ប្រព័ន្ធ​ផ្សព្វផ្សាយ​យ៉ាង​ធ្ងន់ធ្ងរ​អាង​តែ​បាន​ក្បាល​មេក្រូ​មក​ចេះ​តែ​ថាៗ​ឲ្យ​គេ​សើច​ឲ្យ​គេ​សរសើរ​ថា​ខ្លួន​ដឹង​រឿង​ច្រើន​ជាង​គេ​តែ​គ្មាន​យល់​ដឹង​អំពី​ផលប៉ះពាល់​នោះ​ទេ​រីឯ​នៅ​លើ​ទំព័រ​មុខ​កាសែត​វិញ​ខំប្រឹង​សម្ញែង​ខ្លួន​របស់​ជនរងគ្រោះ​អាក្រាត​ និង​ថ្លុក​ឈាម​គួរ​ឲ្យ​រន្ធត់​តក់ស្លុត​គឺ​ហាក់បី​ដូច​ជា​រំលោភ​សិទ្ធិ និង​ធ្វើ​អាជីវកម្ម​លើ​សាកសព​។ ករណី​បែប​នេះ​គ្មាន​ស្ថាប័ន​ណា​ឈឺ​ក្បាល​វិល​មុខ​ចេញ​សេចក្តី​ថ្លែងការណ៍​ប្រឆាំង​នឹង​ប្រព័ន្ធ​ផ្សព្វផ្សាយ​បែប​នេះ​ទេ។

កន្លង​មក​ក្រសួង​ព័ត៌មាន​ធ្លាប់​បាន​ចេញ​សារ​ព្រមាន​ដែរ​តែ​ចេញ​ហើយ​ក៏​ចោល​ធ្វើ​ហី​ទៅ​ព្រោះ​វា​មិន​មែន​ចរិត​លក្ខណៈ​នយោបាយ​។ ទោះ​បី​ជា​យ៉ាង​ណា​កាលពី​ប៉ុន្មាន​ឆ្នាំ​មុន​នេះ​ធ្លាប់​មាន​ករណី​គំរាម​ប្តឹង​ពី​ក្រុម​គ្រួសារ​ជនរងគ្រោះ​ចំពោះ​សារព័ត៌មាន​ដែល​បាន​យក​រូប​លលាដ៍​ក្បាល​សាកសព​ជនជាតិ​បារាំង​ដែល​ត្រូវ​បាន​គេ​សម្លាប់​នៅ​ក្នុង​ខេត្ត​កំពង់​ស្ពឺ​មក​បង្ហាញ​ជា​សាធារណៈ​នោះ​។

មាន​ករណី​ខ្លះ​ទៀត​សមត្ថកិច្ច​ក៏​មាន​កំហុស​ដែរ​ដោយសារ​តែ​ចង់​យក​រូបថត ឬ​ក៏​វីដេអូ​ឃ្លីប​សាហាវៗ និង​ឃោរឃៅ​ទាំង​នោះ​យក​មក​លក់​ឲ្យ​ម៉ូយ​ដែល​ជា​អ្នក​សារព័ត៌មាន​ចាំ​ទិញ​ដើម្បី​រក​កម្រៃ​ជើងសា​ក្រៅ​ខ្លះ​គ្រាន់​ចិញ្ចឹម​ឆ្នាំង​ បើ​ទោះ​បី​ជា​ករណី​ភាគច្រើន​គឺ​សុទ្ធតែ​នៅ​ក្នុង​ស្ថានភាព​ស៊ើប​អង្កេត​របស់​សមត្ថកិច្ច​ក៏ដោយ​។ ជួន​កាល​ទៅ​សមត្ថកិច្ច​ខំ​បញ្ចេញ​បែប​នេះ​គឺ​អាច​បាត់​ដាន​ទៅ​វិញ​ពេល​ខ្លះ​ចាប់​បាន​ថត​បាន​តែ​ម្នាក់​ទេ​ថា​ជា​ជន​ដៃដល់​តែ​ការ​ពិត​មេ​ខ្លោង​ពិតប្រាកដ​ដាក់​មេ​ផាយ​បាត់​ហើយ​បាត់​ដាន​ទៀត​។

ដោយសារ​តែ​សង្គ្រាម​រ៉ាំរ៉ៃ​ជាង​ ៣ ​ទសវត្សរ៍​មក​ហើយ​ដូច្នេះ​ការ​ដែល​ជាប់​ស្នាម​ទុរគត​នៃ​អំពើ​ហិង្សា​នៅ​ជាប់​ក្នុង​បេះដូង​ខ្មែរ​នៅ​ឡើយ។

ម្យ៉ាង​វិញ​ទៀត​ដោយសារ​តែ​ចំណេះដឹង​តិចតួច​លាយឡំ​ជាមួយ​នឹង​បច្ចេកវិទ្យា​ថ្មីៗ និង​ការ​បំពុល​ពី​សារព័ត៌មាន​ថែម​ទៀត​ផង​ធ្វើឲ្យ​មនុស្ស​ភាគច្រើន​ងប់ងុល​ទៅ​នឹង​រូបភាព​ហិង្សា​អាក្រក់ៗ​សាហាវៗ​យក​មក​ចែក​រំលែក​គ្នា​ហើយ​ងាយ​ចងចាំ និង​ងាយ​ធ្វើ​ត្រាប់​តាម​នូវ​រូប​ភាព​យង់ឃ្នង​ទាំង​នោះ​ណាស់​។

ជាក់ស្តែង​ការ​បង្ហាញ​ការ​បង្ក្រាប​បែប​ហិង្សា​ពី​សមត្ថកិច្ច និង​ការ​ធ្វើ​បាតុកម្ម​វាយដំ​លើ​តំណាង​រាស្ត្រ​ ២ ​រូប​កាល​ពី​ប៉ុន្មាន​ខែ​កន្លង​ទៅ​នេះ​ធ្វើឲ្យ​ភាព​ហិង្សា​មនុស្ស​វាយ​មនុស្ស និង​មនុស្ស​បាញ់​សម្លាប់​មនុស្ស​ងាយស្រួល​ពេក​។ ពេល​ខ្លះ​ថ្នាក់​ដឹកនាំ​បក្ស​នយោបាយ​ខ្មែរ​ឃើញ​តែ​បញ្ចេញ​ភាសា​ហិង្សា​សម្លុត​ដាក់​គ្នា​គួរ​ភ័យ​ខ្លាច​ទាំង​នេះ​ហើយ​គឺ​សុទ្ធតែ​ជា​ឫសគល់​នៃ​បញ្ហា​បណ្តាល​ឲ្យ​មាន​អំពើ​ហិង្សា​នៅ​ក្នុង​សង្គម​ផង​ដែរ​។

សរុប​មក​វិញ​បើ​ស្ថាប័ន​ពាក់ព័ន្ធ និង​ម្នាក់ៗ​នៅ​តែ​ព្រងើយ​កន្តើយ​មិន​នាំ​គ្នា​ថ្កោលទោស មិន​រិះគន់​គ្នា​មិន​នាំ​គ្នា​ជួយ​ទប់​ស្កាត់​នូវ​រាល់​អំពើ​ហិង្សា​រូប​រាងកាយ និង​ពាក្យ​សម្តី និង​ការ​បង្ហាញ​រូបភាព​ហិង្សា​ទាំង​នោះ​ទេ​រូបភាព​ទាំង​នោះ​នឹង​កាន់តែ​សាហាវ​ទៅៗ​ហើយ​អ្នក​ដែល​ងាយ​រងគ្រោះ​ពី​អំពើ​រំលោភ​បំពាន​ជាង​គេ​គឺ​ស្ត្រី និង​កុមារី​។

ជាពិសេស​គួរ​បង្កើន​ថវិកា​ជាតិ​ទៅ​រដ្ឋបាល​ថ្នាក់​ក្រោម​ជាតិ​ដែល​មាន​គណៈកម្មការ​ធ្វើការ​ដើម្បី​ស្ត្រី និង​កុមារ​នៅ​គ្រប់​ថ្នាក់​ក្រុង-ស្រុក និង​ថ្នាក់​ឃុំ-សង្កាត់​ដែល​នៅ​កៀក​នឹង​ប្រជាពលរដ្ឋ​ដើម្បី​បង្កើន​ចំណេះដឹង​អំពើ​ហិង្សា​យេនឌ័រ​ថ្មីៗ និង​ការ​ទប់ស្កាត់​បន្ថែម​ព្រម​ទាំង​ផ្សព្វផ្សាយ​ពី​ច្បាប់​ប្រឆាំង​នឹង​អំពើ​ហិង្សា​ក្នុង​គ្រួសារ​ទៅ​តាម​សហគមន៍​។

បើ​មិន​ដូច្នេះ​ទេ​កម្ពុជា​នឹង​មិន​អាច​ឆ្លើយតប​ទៅ​នឹង​គោលដៅ​អភិវឌ្ឍន៍​ប្រកប​ដោយ​ចីរភាព​ជា​សកល​ទី​ ៥ ដែល​ធានា​សម្រេច​នូវ​សមភាព​យេនឌ័រ និង​ការ​ផ្តល់​អំណាច​ទៅ​ស្ត្រី និង​កុមារី​​នោះ​ទេ​៕

ចូលរួម​ផ្តល់​យោបល់​តាមរយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ