Search form

Login - Register | FOLLOW US ON

Logo of Phnom Penh Post newspaper Phnom Penh Post - ហ៊ាន​លាលែង​ពី​តំណែង​ទេ​បើ​អន្តរាគមន៍​គ្មាន​ប្រសិទ្ធ​ភាព​ក្នុង​ពិធី​អុំទូក?

សាក​សព​យុវជន​ត្រូវ​គ្រាប់​កាំជ្រួច​ស្លាប់​នៅ​ជ្រោយចង្វារ កាល​ពី​សប្តាហ៍​មុន។
សាក​សព​យុវជន​ត្រូវ​គ្រាប់​កាំជ្រួច​ស្លាប់​នៅ​ជ្រោយចង្វារ កាល​ពី​សប្តាហ៍​មុន។ ហុង មិនា

ហ៊ាន​លាលែង​ពី​តំណែង​ទេ​បើ​អន្តរាគមន៍​គ្មាន​ប្រសិទ្ធ​ភាព​ក្នុង​ពិធី​អុំទូក?

ស្រុក​ខ្មែរ​មិន​មាន​វប្បធម៌​លាលែង​ចេញ​ពី​តំណែង​នៅ​ឡើយ​ទេ ទោះ​បី​ជា​មាន​ការ​ធ្វេស​ប្រហែស ឬ​ក៏​បណ្តោយ​ឲ្យ​ព្រឹត្តិ​ការណ៍​ណា​មួយ​កើត​ឡើង​ក៏​ដោយ គឺជា​រឿយៗ​បាន​ត្រឹម​តែ​ទម្លាក់​កំហុស​ទៅ​លើ​ឧបទ្ទវ​ហេតុ គ្រោះ​ធម្មជាតិ គ្រោះ​មហន្តរាយ ជាដើម សូម្បី​តែ​បើក​យន្ត​ហោះ​ធ្វេស​ប្រហែស​ធ្លាក់​ខ្លួន​ឯង​ក៏​ប្រែ​ក្លាយ​ព័ត៌មាន​ទៅ​ជា​គ្រោះ​ធម្មជាតិ​ដែរ។

ជាក់​ស្តែង​តាំង​ពិធី​បុណ្យ​យាង​គ្រង​រាជ្យ​ជា​ថ្មី និង​ចម្រើន​ព្រះ​ជន្មាយុ អតីត​សម្តេច​ឪ កាល​ពី ឆ្នាំ​១៩៩២ នៅ​ឯ​ព្រះ​បរម​រាជវាំង មាន​កម្មវិធី​បុណ្យ​តាំង​តុ បើក​ឲ្យ​ប្រជា​ពលរដ្ឋ​ចូល​ទស្សនា​ប្រជ្រៀត​គ្នា​ស្លាប់ ២០ នាក់​នៅ​ច្រក​ចេញ​ខាង​ជើង ដាក់​តម្រៀប​គ្នា​នៅ​ក្បែរ​របង​វាំង​នោះ។ នៅឆ្នាំ​២០០៧ កីឡាករ​ប្រណាំង​ទូក​សម្រាប់​ជន​បរទេស​លិច​ទូក​នៅ​ក្បែរ​កំពង់ផែ​ស្វយ័ត​ទាំង​ប៉ូលិស​និង​ទាំង​កងទ័ព​ជើង​ទឹក ដែល​ជា​គណៈកម្មការ​ជាតិ​រៀបចំ​បុណ្យ​អុំទូក​មួយ​ដែរ​ជួយ​មិន​ទាន់​ពេល​វេលា បណ្តាល​ឲ្យ​ស្លាប់​ជនជាតិ​សិង្ហបុរី ៥ នាក់។ បាន​មួយ​ឆ្នាំ​ក្រោយ​មក​ទៀត​មាន​ស្លាប់​ស្ត្រី​រាំ​នៅ​ក្បាល​ទូក ដោយ​សារ​ទូក​ប្រណាំង​មួយ​បាន​លិច​ទឹក​ហូរ​ខ្លាំង ហើយ​ជួយ​មិន​ទាន់។

បន្ទាប់​មក​ទៀត​បុណ្យ​អុំទូក​ដដែល​នៅ ឆ្នាំ​២០១០ មាន​អ្នក​ស្លាប់​ដល់​ទៅ ៣៥៣ នាក់​ដោយ​សារ​ការ​រត់​ជាន់​គ្នា​នៅ​លើ​ស្ពាន​ពេជ្រ​នៅ​កោះពេជ្រ និង​អ្នករ​បួស​រាប់​រយ​នាក់​ទៀត។ កាល​ពី​សប្តាហ៍​មុន​មាន​យុវជន​ម្នាក់​ស្លាប់​ដោយ​សារ​ការ​បាញ់​កាំជ្រួច​អបអរ​សាទរ​ខួប​លើក ទី១០ នៃ​ពិធី​យាង​គ្រង​រាជ្យ​សម្បត្តិ​ព្រះ​មហាក្សត្រ សីហមុនី។ បញ្ហា​ទាំង​អស់​នេះ គឺ​គ្មាន​អ្នក​ទទួល​ខុស​ត្រូវ​ច្បាស់​លាស់ គ្មាន​មន្ត្រី​ណា​ម្នាក់​លា​លែង​ចេញ​ពី​តំណែង​ដោយ​សារ​តែ​ការ​ធ្វេស​ប្រហែស​របស់​អាជ្ញាធរ​ទេ គឺ​បាន​តែ​ឆ្លើយ​យក​រួច​ខ្លួន​រៀងៗ​ខ្លួន​ហើយ​ទម្លាក់​កំហុស​ទៅ​លើ​ឧបទ្ទវ​ហេតុ​ទៅ​ចប់។

ជីវិត​អ្នក​ស្លាប់​នៅ​ស្រុក​ខ្មែរ​ហាក់​បី​ដូច​ជា​គ្មាន​តម្លៃ​និង​គ្មាន​ន័យ​បើ​ស្លាប់​ទៅ​រៃ​លុយ​គ្នា​ចូល​បុណ្យ​ប្រកាស​តាម​ទូរទស្សន៍​ដដែលៗ ហើយ​លោក​នាយក​រដ្ឋ​មន្ត្រី ហ៊ុន សែន ចាំ​តែ​ចូល​បុណ្យ​និង​ជួយ​ឧបត្ថម្ភ​ដដែលៗ ហាក់​បី​ដូច​ជា គ្មាន​ដំណោះ​ស្រាយ​យូរ​អង្វែង​សោះ។

តើ​គួរ​តែ​ធ្វើ​តាម​របៀប​លំៗ​ទុក​ឲ្យ​ព្រឹត្តិការណ៍​កើត​ឡើង​ដដែលៗ​ទៀត​ឬ​យ៉ាង​ណា? តើ​មាន​ចាត់​វិធាន​ការ​ណា​មួយ​ដែរ​ឬ​ទេ បើ​អន្តរាគមន៍ មិន​ទាន់ ឬ​ក៏​ធ្វេស​ប្រហែស​ចំពោះ​ពិធី​បុណ្យ​អុំ​ទូក​ឆ្នាំ​នេះ ដូច​ជា​ការ​លាលែង​ចេញ​ពី​តំណែង ឬ​ក៏​ដក​ចេញ​ពី​តំណែង?

ឧទាហរណ៍ នៅ​ប្រទេស​កូរ៉េ​ខាង​ត្បូង បន្ទាប់​ពី​លិច​កប៉ាល់​ធ្វើ​ឲ្យ​សិស្ស​សាលា​ស្លាប់​ជាង ៣០០ នាក់​គឺ​លោក Chung Hong-won នាយក​រដ្ឋ​មន្ត្រី​កូរ៉េ​ខាង​ត្បូង​នោះ ហ៊ាន​លាលែង​ចេញ​ពី​តំណែង ហើយ​ចាប់​មន្ត្រី ១៥ នាក់​ដែល​ពាក់ព័ន្ធ​ដាក់​ពន្ធនាគារ។ ឬ​មួយ​មន្ត្រីៗ​ស្រុក​ខ្មែរ មិន​ហ៊ាន​លា​លែង​ចេញ​ពី​តំណែង​ដូច​គាត់​ទេ ព្រោះ​ខ្លាច​ចេញ​ទៅ​មិន​ដឹង​ទៅ​រក​ការងារ​អ្វី​ធ្វើ? ឬ​ក៏​ខ្លាច​ខ្មាស​គេ? ហេតុ​ដូច្នេះ​អាជ្ញាធរ​ត្រូវ​តែ​មាន​ការ​ប្តេជ្ញា​ចិត្ត​ឲ្យ​បាន​ខ្ពស់​បន្ថែម​ទៀត ដើម្បី​ទប់​ទល់​នឹង​សភាពការណ៍​ដែល​នឹង​អាច​កើត​មាន​ទាំង​នៅ​តំបន់​ពិធី​បុណ្យ​អុំ​ទូក និង​តំបន់​នៅ​ខាង​ក្រៅ​ពិធី​ដូច​ជា៖ ខាង​ក្នុង​តំបន់​ពិធី​បុណ្យ​អុំ​ទូក (តំបន់​ហាម​ឃាត់​យាន​យន្ត​ចូល)៖

- កម្លាំង​ជួយ​សង្គ្រោះ​បន្ទាន់​មិន​មែន​ត្រឹម​តែ​នៅ​លើ​ផ្ទៃ​ទឹក និង​លើ​គោក​ប៉ុណ្ណោះ​ទេ​គឺ​ត្រូវ​បន្ថែម​ក្រុម​កងទ័ព​ឆត្រ​យោង​បន្ថែម​ទៀត គឺ​ឧទ្ធម្ភាគចក្រ​អាច​មើល​ឃើញ​ហើយ​ឲ្យ​ព័ត៌មាន​នៅ​លើ​ទឹក នៅ​លើគោ​ក​បាន​លឿន និង​អន្តរាគមន៍​ក៏​លឿន​ដែរ។

- នៅ​លើ​ទូក​ប្រណាំង​ត្រូវ​ដាក់​ពង្រាយ​អាវ​ពោង​ជួយ​សង្គ្រោះ​សម្រាប់​ហែល​ទឹក​ឲ្យ​បាន​គ្រប់​គ្នា។

- គ្រប់​ច្រក និង​ផ្លូវ​ធ្វើ​ដំណើរ​គួរ​តែ​បែង​ចែក​ផ្លូវ​បាន​តែ​ទៅ ឬ​ក៏​បាន​តែ​មក ដើម្បី​ចៀស​វាង​ដើរ​ទល់​បុក​គ្នា ការ​ជ្រៀត​គ្នា​កាន់​តែ​ខ្លំាង ដូច​មាន​បទ​ពិសោធ​សោកនាដកម្ម​នៅ​កោះពេជ្រ កាល​ពី ឆ្នាំ​២០១០ រួច​មក​ហើយ។

- ពង្រឹង​កម្លាំង​បង្កប់ ដើម្បី​បង្ក្រាប​ទៅ​លើ​ក្រុម​ក្មេង​ទំនើង​លូក​លាន់​ស្ត្រី អុក​ឡុក​បង្ក​ចលាចល​និង​លួច​ឆក់​នៅ​ពេល​មាន​មនុស្ស​អ៊ូអរ​ច្រើន។

- ត្រូវ​បន្ថែម​រថយន្ត​សង្គ្រោះ​បន្ទាន់​ឲ្យ​បាន​ច្រើន បើ​ផ្អែក​ទៅ​លើ​រថយន្ត​សង្គ្រោះ​បន្ទាន់​របស់​រដ្ឋ​នៅ​ភ្នំពេញ​មាន​ជាង ១០ គ្រឿង តើ​ត្រូវ​បន្ថែម​រថយន្ត​សាម៊ុយ​នោះ​ដោយ​របៀប​ណា? បើ​ក្រសួង​សុខាភិបាល​បាន​បម្រាម​ទៅ​រថយន្ត​សាម៊ុយ​របស់​គ្លីនិក​ឯកជន ព្រោះ​ខ្លាច​ពេល​អ្នក​លើក​អ្នក​ជំងឺ​ខ្វះ​វិជ្ជាជីវៈ ដែល​អាច​បង្ក​គ្រោះថ្នាក់​កាន់​ខ្លាំង​ទៅ​វិញ។ ចំណុច​នេះ​ក៏​មាន​ការ​ជជែក​ដេញ​ដោល​គ្នា​ពី​អាជ្ញាធរ​បាន​ហាម​ឃាត់​រថយន្ត​សាម៊ុយ​របស់​មន្ទីរពេទ្យ សែន​សុខ មិន​ឲ្យ​ទៅ​ចូល​រួម​ជួយ​យក​អ្នក​ជំងឺ​ចេញ​ពី​កន្លែង​ឧបទ្ទវ​ហេតុ​រត់​ជាន់​គ្នា​នៅ​កោះពេជ្រ​នោះ​ទេ។

ខាង​ក្រៅ​តំបន់​ពិធី​បុណ្យ​អុំ​ទូក៖

- គ្រប់​មធ្យោបាយ​ធ្វើ​ដំណើរ​ទាំង​ផ្លូវ​គោក ទាំង​ផ្លូវ​ទឹក​ត្រឹម​ដាក់​កម្រិត​ទម្ងន់​ឲ្យ​បាន ជា​ពិសេស​សាឡាង ឬ​ទូក​ដ​ដឹក​អ្នក​ដំណើរ​មិន​ត្រូវ​លើស​ចំណុះ​ទេ​ព្រោះ​ពេល​នេះ​អ្នក​ធ្វើ​ដំណើរ​អ្នក​នៅ​ភ្នំពេញ​នាំ​គ្នា​ចេញ​ទៅ​ខេត្ត ហើយ​អ្នក​មក​ពី​បណ្តា​ខេត្ត​នានា​ចូល​រាជធានី​ដើម្បី​ចូល​រួម​ពិធី​បុណ្យ​អុំទូក។

- រីឯ​ចរាចរណ៍​ផ្លូវ​គោក​វិញ​គឺ​គ្រោះថ្នាក់​កើត​ឡើង​ជា​រៀង​រាល់​ថ្ងៃ សម្រាប់​ថ្ងៃ​បុណ្យ​អុំទូក​ត្រូវ​ប្រុង​ប្រយ័ត្ន​ទាំង​អស់​គ្នា​បន្ថែម​ទៀត។ រាជ​រដ្ឋាភិបាល​គួរ​តែ​បន្ថែម​កម្លាំង​ប៉ូលិស​ចរាចរណ៍​ទៀត នៅ​តាម​ផ្លូវ ហើយ​កម្រិត​រថយន្ត​ដឹក​អ្នក​ដំណើរ​ធំៗ កុំ​ឲ្យ​ចូល​រាជធានី ដូច​លើក​មុនៗ​ឲ្យ​តែ​ឲ្យ​លុយ​ទៅ​ប៉ូលិស​ទៅ​រថយន្ត​ទាំង​នោះ​បាន​ចូល​ហើយ។ ជា​រៀង​រាល់​ឆ្នាំ​ប៉ូលិស​ចរាចរណ៍​ជាច្រើន មក​នៅ​ផ្តុំ​គ្នា​នៅ​មុខ​វាំង និង​ជិត​កន្លែង​រោង​ពិធី​បុណ្យ ព្រោះ​ពេល​បើក​ផ្លូវ​រថយន្ត​អ្នក​ធំៗ​បាន​ទទួល​លុយ​តាម​មាត់​បង្អួច បាន​ជា​ពួក​គាត់​មិន​សូវ​ខ្វល់​កន្លែង​ផ្សេងៗទេ៕

ចូល​រួម​ផ្តល់​យោបល់​តាម​រយៈ soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ