Search form

Login - Register | FOLLOW US ON

Logo of Phnom Penh Post newspaper Phnom Penh Post - ឡាន​ស៊ីរ៉ែន ខ.ម និង​ ន.ប ក្លាយ​ជា​តាក់ស៊ី​របស់​វិនិយោគិន​ចិន​?

Content image - Phnom Penh Post
រថយន្ត​ពាក់​ស្លាក​លេខ​ ខ.ម ដែល​បើកបរ​នៅលើ​ដងផ្លូវ​ក្នុង​រាជធានី​ភ្នំពេញ​នា​ពេល​កន្លង​មក​​។ រូបថត ម៉ៃ វីរៈ

ឡាន​ស៊ីរ៉ែន ខ.ម និង​ ន.ប ក្លាយ​ជា​តាក់ស៊ី​របស់​វិនិយោគិន​ចិន​?

ម្នាក់ៗ​ចេះ​តែ​ឆ្ងល់​ហើយ​ខ្សឹបខ្សៀវ​គ្នា​ថា ហេតុ​អ្វី​បាន​ជា​ប៉ុន្មាន​ខែ​ចុង​ក្រោយ​នេះ​ឃើញ​ឡាន​ស៊ីរ៉ែន​បន្លឺ​សំឡេង​ឈូឆរ ឆ្វេចឆ្វាច​ច្រើន​ម្ល៉េះ​? ​មកពី​គេ​ចល័ត​កម្លាំង​គំរាម​មន្ត្រី​គណបក្ស​សង្គ្រោះ​ជាតិ​?

នៅ​ពេល​ឡាន​ស៊ីរ៉ែន​ដែល​មាន​ស្លាក​លេខ​ខេមរភូមិន្ទ​ (​ខម​) ​និង​ស្លាក​លេខ​នគរបាល​ (​នប​) ទាំង​នោះ​មក​ដល់​សណ្ឋាគារ​ទំនើបៗ ឃើញ​មាន​អ្នក​ជិះ​ពី​​ក្រោយ​ចេញ​មក​សុទ្ធតែ​ក្មេងៗ​អាយុ​ប្រមាណ​ពី​ ២៥ ទៅ​ ៣៥​ ​ឆ្នាំ និយាយ​ភាសា​ចិន​ជក់​បារី​បង្ហុយ​និយាយ​ឡូឡា​ជា​លក្ខណៈ​អ្នក​ជំនួញ​។

រីឯ​អ្នក​បើកបរ​សម្លៀកបំពាក់​ស៊ីវិល​ធម្មតា​មិន​បាន​និយាយ​ជាមួយ​ពួក​ចិនៗ​នោះ​ទេ គឺ​ដូចជា​អ្នក​រត់​តាក់ស៊ី​អ៊ីចឹង​។

ហេតុ​អ្វី​បាន​ជា​ឡាន​ស៊ីរ៉ែន​នាំ​មុខ​សម្រាប់​ថ្នាក់ដឹកនាំ​បេសកកម្ម​ ឬ​ក៏​ទទួល​គណៈប្រតិភូ​អន្តរជាតិ​ជាន់​ខ្ពស់​បែរ​ទៅ​ជា​រថយន្ត​អម​ដំណើរ និង​ដឹក​ពាណិជ្ជករ​ចិន​ទៅ​វិញ​? ​តើ​ស្ថាប័ន​ណា​ជា​អ្នក​អនុញ្ញាត​ឲ្យ​ធ្វើ​ដូច្នេះ​? ឬ​ក៏​តាក់ស៊ី​ធ្វើ​ស្លាក​លេខ និង​ឡាន​ស៊ីរ៉ែន​ក្លែងក្លាយ​? ព្រោះ​ថ្មីៗ​នេះ​រថយន្ត​ស្លាក​លេខ​នគរបាល និង​ខេមរភូមិន្ទ​ហ្នឹង​ត្រូវ​បាន​លើកលែង​ពន្ធ​ដោយ​តម្រូវ​ចាត់​ចូល​ជា​សម្បត្តិ​រដ្ឋ ហើយ​មាន​បិទ​តែម​ឡូហ្គូស្ថាប័ន​ដើម្បី​បញ្ជាក់​អត្តសញ្ញណ​ជា​របស់​រដ្ឋ តែ​នៅ​ពេល​រថយន្ត​ស៊ីរ៉ែន​មាន​ភ្លើង​ពី​លើ​ដឹក​មុខ​ និង​រថយន្ត​ស្លាក​លេខ​របស់​ស្ថាប័ន​ប៉ូលិស ឬ​ក៏​កងទ័ព​ហ្នឹង​គ្មាន​​ឡូហ្គោ​របស់​ស្ថាប័ន​នោះ​ទេ​។

កន្លង​មក​លោក​នាយក​រដ្ឋមន្ត្រី​ ហ៊ុន សែន បាន​ប្រកាស​ហើយ​ថា​រថយន្ត​ស៊ីរ៉ែន​ហែហម​ហ្នឹង​បាន​តែ​សម្តេច​ទាំង ៣ ទេ​កុំ​រំខាន​អ្នក​ធ្វើ​ដំណើរ កុំ​រំខាន​ពលរដ្ឋ ជាពិសេស​ទៅ​ជួប​ស្រី​ស្នេហ៍​សោះ ក៏​ស៊ីរ៉ែន​ផ្អើល​គេ​​ឯង​ដែរ ទៅ​មើល​ដី មើល​ចម្ការ​ផ្ទាល់​ខ្លួន​ក៏​ដាក់​ឡាន​ស៊ីរ៉ែន​ដែរ​នោះ​។

ឥឡូវ​រឿង​នោះ​ដូចជា​ស្ងាត់​ច្រើន​ហើយ តែ​ស្រាប់​តែ​ចេញ​ឡាន​ស៊ីរ៉ែន​ដែល​មាន​ស្លាក​​លេខ​ខេមរភូមិន្ទ និង​នគរបាល​ចេញ​ឆ្វេចឆ្វាច ឡូកឡំ​គ្នា​ដូច​មុន​ព្រឹត្តិការណ៍​ថ្ងៃ​ ៥-៦ ខែ​កក្កដា​ឆ្នាំ​ ១៩៩៧ ដោយ​មិន​ដឹង​ឲ្យ​ប្រាកដ​ថា តើ​ជូន​ថ្នាក់ដឹកនាំ​ទៅ​​ណា​មក​ណា​? ឬ​ក៏​គណៈប្រតិភូ​អន្តរជាតិ​ជាន់​ខ្ពស់​? ​ឬ​ភ្ញៀវ​ទេសចរ​? ​ឬ​ក៏​វិនិយោគិន​បរទេស​? នោះ​ទេ​។ ដឹង​តែ​ពី​បន្លឺ​ស៊ីរ៉ែន កន្លែង​កកស្ទះ​ដើម្បី​បាន​អាទិភាព​ទៅ​មុន​គេ ឆាប់​ដល់​គោលដៅ​តែ​ប៉ុណ្ណោះ​ដោយ​មិន​ខ្វល់​ពី​អ្នក​ដំណើរ​នោះ​ទេ​។ ហេតុ​​អ្វី​បាន​ជា​ត្រឹម​ភ្ញៀវទេសចរ ឬ​ក៏​​មន្ត្រី​បរទេស​មក​ទស្សនកិច្ច​សាមញ្ញ​ ឬ​ក៏​វិនិយោគិន​សោះ​អាច​ប្រើ​រថយន្ត​ស៊ីរ៉ែន​ក៏​បាន​រថយន្ត​រដ្ឋ​ស្លាក​លេខ​ខេមរភូមិន្ទ​ ឬ​ក៏​​ស្លាក​លេខ​នគរបាល​បាន​ទៀត​?

បើ​ប្រៀបធៀប​ជាមួយ​រដ្ឋមន្ត្រី​វិញ​គឺ​ភាគច្រើន​សាមញ្ញៗ​ទៅ​វិញ​ដូច​រថយន្ត​លោក ស ខេង រដ្ឋមន្ត្រី​ក្រសួង​មហាផ្ទៃ​វិញ​ធម្មតា​បើក​ពី​ក្រសួង​ទៅ​ផ្ទះ យ៉ាង​ច្រើន​ចុច​តែ​ស៊ីប្លេ​ទេ ដូច​គ្នា​នេះ​ដែរ​លោក ប្រាក់ សុខុន រដ្ឋមន្ត្រី​ក្រសួង​ការបរទេស​វិញ រឹត​តែ​សាមញ្ញ​ទៅទៀ​ត​គឺ​លោក​ទៅ​ណា​មក​ណា​តែ​ម្នាក់ឯង ខ្ញុំ​ធ្លាប់​ឃើញ​គាត់​នៅ​បណ្ណាគារ​។

សូម្បី​តែ​ក្បួន​រថយន្ត​ស៊ីរ៉ែន​ដង្ហែ​របស់​កងអង្គរក្ស​លោក​នាយរដ្ឋមន្ត្រី ហ៊ុន សែន ដែល​មាន​បិទ​ឡូហ្គោ​ (“BHQ”-Bodyguard Head-quarter) ពី​ទួល​ក្រសាំង​មក​វិមានឯករាជ្យ​ក៏​កម្រ​បន្លឺ​សំឡេង​ដែរ ប្រសិន​បើ​លោក​មិន​នៅ​ក្នុង​ក្បួន​នោះ​ទេ​។

ការ​ប្រើ​រថយន្ត​រដ្ឋ​មិន​ត្រឹមត្រូវ​​ច្រងេង​ច្រងាង​បង្ហាញ​សាច់ដុំ​លើ​​ផ្លូវ​សាធារណៈ​ដូច្នេះ​ត្រូវ​បាន​គេ​វាយតម្លៃ​ជាតិ​ទាំង​មូល​រឿង​ឲ្យ​តម្លៃ​តាម​ទឹក​លុយ​។ បើ​អ្នក​មាន​លុយ​ច្រើន​រាប់​អាន​អ្នក​នោះ​យក​ចិត្ត​យក​ថ្លើម​ធ្វើឲ្យ​បាត់បង់​នូវ​តម្លៃ​ខ្លួនឯង​ជា​ខ្មែរ​ម្ចាស់​ស្រុក​ទៅ​វិញ បើ​ទោះបី​ជា​របៀប​ធ្វើ​ដៃគូ​ពាណិជ្ជកម្ម​នៅ​កម្ពុជា​ដែល​ចែង​ក្នុង​ច្បាប់​ឲ្យ​តម្លៃ​ខ្មែរ​ខ្លួន​ឯង​តាមរយៈ​ ៥១ ​ភាគរយ​ជា​របស់​វិនិយោគ​ក្នុង​ស្រុក​ និង​ ៤៩ ភាគរយ​ជា​របស់​បរទេស​ក៏ដោយ​។​ ​

ជាង​នេះ​ទៀត​នោះ​គឺ​ការ​បន្លឺ​សំឡេង​របស់​រថយន្ត​ស្លាក​លេខ​ទាំង​នោះ​មាន​សិទ្ធិ​អំណាច​ជាង​រថយន្ត​សាមុយ​សង្គ្រោះ​បន្ទាន់ និង​រថយន្ត​ពន្លត់​អគ្គិភ័យ​ទៅ​ទៀត​ព្រោះ​ខ្លាច​ប៉ះពារ​ទៅ​មិន​ដឹង​រក​អ្នក​ណា​ជា​អ្នក​ចេញ​សង​ថ្លៃ​គ្រោះថ្នាក់​ពិតប្រាកដ​បាន​។

ការ​ប្រែប្រួល​តាម​ទឹក​លុយ និង​អំណាច​បរទេស​ពី​មួយ​ទៅ​មួយ​នៅ​ប្រទេស​កម្ពុជា បើ​គិត​ចាប់​តាំង​ពី​ឆ្នាំ ១៩៧៩ មក​គឺ​ប្រទេស​វៀតណាម សហភាព​សូវៀត​មក​ដល់​អ៊ុនតាក់ អឺរ៉ុប អាមេរិក​ឥឡូវ​ចូល​ដល់​ប្រទេស​ចិន​វិញ​ម្តង​។ តើ​ពេល​ណា​ទើប​កម្ពុជា​អាច​ធ្វើ​ម្ចាស់​ខ្លួន​ដោយ​មិន​រង​ឥទ្ធិពល​ពី​បរទេស​?

ហេតុ​ដូច្នេះ​ហើយ​រាជរដ្ឋាភិបាល​គួរ​តែ​ពិនិត្យ​មើល និង​ចាត់​វិធានការ​ទៅ​លើ​ការ​ហែក្បួន​​រថយន្ត​ស៊ីរ៉ែន​បែប​មិន​សមរម្យ​ដែល​បាន​ធ្វើឲ្យ​ប៉ះពាល់​ដល់​សណ្តាប់ធ្នាប់​ក្នុង​សង្គម និង​ការ​ប៉ះពាល់​កិត្តិយស​តម្លៃ​ប្រជាជាតិ​នោះ​៕

ចូលរួម​ផ្តល់​យោបល់​តាមរយៈ ​soprach.tong@phnompenhpost.com

0

Comments

Please, login or register to post a comment

ព័ត៌មានពាក់ព័ន្ធ