Search form

Login - Register | FOLLOW US ON

Logo of Phnom Penh Post newspaper Phnom Penh Post - ករណី​សុគត​ព្រះសង្ឃ​នៅ​មន្ទីរពេទ្យ ម៉ាលីយ៉ា កំពុង​ស៊ើប

ករណី​សុគត​ព្រះសង្ឃ​នៅ​មន្ទីរពេទ្យ ម៉ាលីយ៉ា កំពុង​ស៊ើប

131219_09a
ចៅអធិការវត្តអង្គអណ្តែត ស្រុកជុំគិរី ខេត្តកំពត សុគតពេលមកព្យាបាលអាពាធនៅមន្ទីរពេទ្យម៉ាលីយ៉ា រូបសហការី

ភ្នំពេញៈ មន្ត្រី​អះអាង​ថា ក្រសួង សុខាភិបាល កំពុង​ធ្វើការ​ស៊ើប​អង្កេត​លើ​ករណី​សុគត​លោក​សង្ឃ​ជា ព្រះចៅ​អធិការ​វត្ត​មួយ​នៅ​ខេត្ត កំពត ដែល​ត្រូវ​គេ​សង្ស័យ​ថា បណ្តាល​មក​ពី​ការ​ចាក់​ថ្នាំ​ព្យាបាល​ជំងឺ​ដុះ​សាច់​បំពង់​ក នៅ​មន្ទីរពេទ្យ ឯកជន ម៉ាលីយ៉ា ក្នុង​សង្កាត់ បឹង​កេង​កង ១ រាជធានី​ភ្នំពេញ។

តាម​សេចក្តី​រាយការណ៍​របស់​ប្រព័ន្ធ​ព័ត៌មាន​ក្នុង​ស្រុក ព្រះ​តេជគុណ ងឹម វ៉ាន់នី ព្រះជន្ម ២៥ វស្សា ជា​ចៅ​អធិការ​វត្ត អង្គ​អណ្តែត នៅ​ក្នុង​ឃុំ ជម្ពូវ័ន ស្រុក ជុំគិរី ខេត្ត កំពត ដែល​មាន​អាពាធ​ដុះ​សាច់​បំពង់​ក បាន​និមន្ត​មក​កាន់​មន្ទីរពេទ្យ ម៉ាលីយ៉ា ដើម្បី​ព្យាបាល​កាត់​យក​ដុំ​សាច់​នោះ​ចេញ​ហើយ​នៅ​ព្រឹក​ថ្ងៃ ទី១៧ ខែ ធ្នូ ព្រះ​តេជគុណ ត្រូវ​គ្រូពេទ្យ​មន្ទីរពេទ្យ​នេះ​ពិនិត្យ​ឈាម និង​បាន​ចាក់​ថ្នាំ​មួយ​ម្ជុល ប៉ុន្តែ ក្រោយ​មក​ក៏​ប្រកាច់​បែក​ពពុះ​មាត់​រួច​សុគត​តែ​ម្តង។ ភ្លាមៗ​នោះ​ខាង​គ្រូពេទ្យ ម៉ាលីយ៉ា ឃើញ​សភាព​មិន​ស្រួល ក៏​បញ្ជូន​ភិក្ខុ​អង្គ​នេះ​បន្ត​ទៅ​កាន់​មន្ទីរពេទ្យ កាល់ម៉ែត របស់​រដ្ឋ តែ​ត្រូវ​គ្រូពេទ្យ​រដ្ឋ​ប្រាប់​ថា លោក​បាន​សុគត​មុន​បញ្ជូន​មក​ពេទ្យ​នេះ​ទៅ​ទៀត។

លោក សុខ សុគន្ធ ប្រធាន​មន្ទីរ​សុខាភិបាល​រាជធានី​ភ្នំពេញ បាន​ប្រាប់ ភ្នំពេញ ប៉ុស្តិ៍ កាល​ពី​ម្សិលមិញ​ថា មន្ត្រី​ជំនាញ បាន​ចុះ​ទៅ​កាន់​មន្ទីរពេទ្យ ម៉ាលីយ៉ា ដើម្បី​ធ្វើការ​ស៊ើប​អង្កេត និង​ធ្វើ​របាយ​ការណ៍​ជូន​ថ្នាក់​លើ​អំពី​ករណី​នៃ​ការ​សុគត​ព្រះសង្ឃ នាម ងឹម វ៉ាន់នី នេះ​ហើយ។

នៅ​ពេល​សួរ​ថា តើ​ត្រូវ​បិទ​មន្ទីរពេទ្យ​នេះ​ជា​បណ្តោះ​អាសន្ន​ដើម្បី​ធ្វើ​ការ​ស្រាវជ្រាវ ឬ​ក៏​តម្រូវ​ឲ្យ​មាន​ការ​ផ្តល់​ជា​សំណង​ទៅ​គ្រួសារ​ជន​រងគ្រោះ​យ៉ាង​ម៉េច? លោក​ប្រធាន​មន្ទីរ​សុខាភិបាល​រាជធានី​បាន​បញ្ជាក់​ថា៖ «យើង​គ្រាន់​តែ​ចុះ​ធ្វើ​កោសល្យ​វិច័យ រួច​ធ្វើ​កំណត់​ហេតុ​ជូន​ទៅ​ថ្នាក់​ក្រសួង​ដើម្បី​សម្រេច​ថា ត្រូវ​ធ្វើ​ដូច​ម៉េច​បន្ត​ទៀត​ប៉ុណ្ណោះ។ ខ្ញុំ​មិន​ទាន់​បាន​មើល​របាយ​ការណ៍ ពី​មន្ត្រី​បច្ចេកទេស​នៅ​ឡើយ តែ​តាម​របាយ​ការណ៍​ពី​ខាង​មន្ទីរពេទ្យ​ថា ព្រះសង្ឃ​អង្គ​នោះ មាន​ជំងឺ​ដុះ​សាច់​បំពង់​ក»។

មិន​មាន​ក្រុម​គ្រួសារ​សព​ភិក្ខុ​សង្ឃ អង្គ​នេះ ចេញ​មក​បកស្រាយ​អំពី​ករណី​សុគត​សង្ឃ​នេះ​យ៉ាង​ណា ឬ​ក៏​អះអាង​ពី​ការ​ដាក់​ពាក្យ​បណ្តឹង ឬ​មួយ​ព្រម​ទទួល​យក​សំណង​បញ្ចប់​រឿង​នោះ​យ៉ាង​ណា​នៅ​ឡើយ​ទេ។

លោក គល់ សុផាត នាយ​ប៉ុស្តិ៍​នគរបាល​សង្កាត់ បឹង​កេង​កង ១ បាន​ប្រាប់​ឲ្យ​ដឹង​ថា លោក​មិន​បាន​ដឹង​ពី​ការ​ស៊ើប​អង្កេត​របស់​មន្ត្រី​បច្ចេកទេស ថា​គេ​បាន​ដោះស្រាយ​យ៉ាង​ណា​ឡើយ ប៉ុន្តែ ថា ករណី​នេះ​បាន​បញ្ចប់​ហើយ។

នៅ​ពេល ភ្នំពេញ ប៉ុស្តិ៍ ចុះ​ដល់​មន្ទីរពេទ្យ ម៉ាលីយ៉ា ម្សិលមិញ អ្នក​ទទួល​ភ្ញៀវ​របស់​មន្ទីរពេទ្យ ហាក់​ស្ទាក់​ស្ទើរ​ក្នុង​ការ​ឆ្លើយ​ថា ព្រះសង្ឃ​បាន​សុគត ដោយ​សារ​មន្ទីរពេទ្យ​នេះ តែ​ថា សាកសព​ត្រូវ​បាន​ដឹក​ចេញ​បាត់​ហើយ​។ ស្ត្រី​បុគ្គលិក​មន្ទីរពេទ្យ​នេះ​បាន​និយាយ​ប្រាប់​ថា៖ «ខ្ញុំ​ទទួល​ភ្ញៀវ​តែ​ប៉ុណ្ណោះ អត់​ដឹង​អី​ទេ។ អត់​មាន​រឿង​អី​ទៀត​ទេ គេ​យក​ចេញ​អស់​ហើយ»។

តាម​ការ​ពិនិត្យ​មន្ទីរពេទ្យ​នេះ​មាន​វេជ្ជបណ្ឌិត​ជា​ជនជាតិ ចិន ភាគ​ច្រើន ហើយ​បាន​ទទួល​អាជ្ញាប័ណ្ណ​បើក​ព្យាបាល​ជំងឺ​ពី​ក្រសួង សុខាភិបាល កម្ពុជា នៅ​ខែ កក្កដា ឆ្នាំ ២០១២។

បើ​តាម​លោក សុខ សុគន្ធ តាម​ច្បាប់ មន្ទីរពេទ្យ​ចិន​មួយ​នេះ មាន​វេជ្ជបណ្ឌិត​ខ្មែរ​ជា​អ្នក​ឈរ​ឈ្មោះ​ឲ្យ ដើម្បី​តម្រូវ​ទៅ​តាម​ច្បាប់​ប្រទេស​ខ្មែរ តែ​មាន​ភាគ​ហ៊ុន ចិន-ខ្មែរ។

មន្ទីរពេទ្យ ​​កម្ពុជា តែង​កើត​មាន​ករណី​ដែល​ធ្វើ​ការ​ខុស​វិន័យ ក្រម​សីលធម៌ និង​ព្យាបាល​ជំងឺ​ខុស​រហូត​ដល់​ឲ្យ​មនុស្ស​សា្លប់​បាត់បង់​ជីវិត។ ជាក់ស្តែង​ករណី​កាល​ពី​ដើម​ឆ្នាំ ២០១៣ មាន​ស្ត្រី​មាន​ផ្ទៃពោះ​ឈ្មោះ យី ស្រីនី អាយុ ២១ឆ្នាំ និង​ប្តី​មាន​ជីវភាព​ក្រីក្រ ត្រូវ​មជ្ឈមណ្ឌល​ជាតិ​គាំពារ​មាតា​និង​ទារក មិន​បាន​ផ្តល់​ការ​យក​ចិត្ត​ទុក​ដាក់​ឲ្យ​បាន​ទាន់​ពេល​រហូត​ដល់​ធ្វើ​ឲ្យ​ទារក​កើត​មក​ដោយ​គ្មាន​ពេទ្យ​ឆ្មប៕

0

Comments

Please, login or register to post a comment

ព័ត៌មានពាក់ព័ន្ធ