Search form

Login - Register | FOLLOW US ON

Logo of Phnom Penh Post newspaper Phnom Penh Post - ក្រុម​ចោរប្លន់​ ៧ ​នាក់​នឹង​ត្រូវ​បញ្ជូន​ទៅ​តុលាការ​ថ្ងៃ​នេះ

ក្រុម​ចោរប្លន់​ ៧ ​នាក់​នឹង​ត្រូវ​បញ្ជូន​ទៅ​តុលាការ​ថ្ងៃ​នេះ

ភ្នំពេញៈ ក្រុម​ចោរប្លន់​​ប្រដាប់​​អាវុធ​ចំនួន​ ៧​ នាក់​នឹង​ត្រូវ​នាយកដ្ឋាន​ព្រហ្មទណ្ឌ​ក្រសួង​មហាផ្ទៃ​​​​​បញ្ជូន​​ទៅ​សាលា​​ដំបូង​រាជធានី​​នៅ​ថ្ងៃ​ចន្ទ​នេះ​ បន្ទាប់​ពី​កម្លាំង​សមត្ថកិច្ច​ក្រសួង​មហាផ្ទៃ​ និង​នគរបាល​​ខេត្ត​កំពង់ស្ពឺ​បើក​ប្រតិបត្តិការ​បង្ក្រាប​នៅ​រាជធានី​ភ្នំពេញ និង​នៅ​ខេត្ត​កំពង់ស្ពឺ​កាលពី​ថ្ងៃ​ទី​ ៦ ​ខែ​មករា​​។

លោក​ សុខ​ ខេមរិន្ទ​ ប្រធាន​នាយកដ្ឋាន​ព្រហ្មទណ្ឌ​​ក្រសួង​មហាផ្ទៃ​បាន​ឲ្យ​ដឹង​កាលពី​ម្សិលមិញ​ថា​ពាក់ព័ន្ធ​ជនសង្ស័យ​ក្នុង​សំណុំ​រឿង​ប្លន់​ប្រដាប់​អាវុធ​ដែល​កម្លាំង​សមត្ថកិច្ច​បើក​ការ​បង្ក្រាប​ហើយ​ចាប់​ខ្លួន​មក​ក្រសួង​នោះ​សមត្ថកិច្ច​របស់​លោក​បាន​បញ្ចប់​​ការ​ស៊ើបសួរ​ហើយ​ ហើយ​នឹង​បញ្ជូន​ទៅ​សាលា​ដំបូង​នៅ​ថ្ងៃ​ចន្ទ​​នេះ​។​ នៅ​ពេល​ដែល​​សួរ​ថា​តើ​ក្រុម​ចោរ​ប្លន់​​នោះ​ធ្លាប់​ធ្វើ​សកម្មភាព​ប្លន់​ប៉ុន្មាន​ករណី​​ លោក​ ខេមរិន្ទ ​ថ្លែង​ថា​លោក​​មិន​ចាំ​ទេ​ព្រោះ​ឯកសារ​នៅ​ការិយាល័យ​ហើយ​នៅ​ពេល​នេះ​លោក​កំពុង​​បើក​ឡាន​។

ទោះ​យ៉ាង​ណា​បើ​តាម​របាយការណ៍​នគរបាល​បង្ហាញថា​​ក្រុម​ជនសង្ស័យ​​ដែល​សមត្ថកិច្ច​ចាប់​ខ្លួន​​បាន​ទាំង​ ៧ នាក់​ដែល​សុទ្ធ​តែ​ភេទ​ប្រុស ទី ១-ឈ្មោះ អ៊ី សុភ័ណ្ឌ អាយុ ៣៥​ ឆ្នាំ ជា​អ្នក​កាន់​កាំភ្លើង​ភ្ជង់ និង​បាញ់​ជនរងគ្រោះ​ ទី ២- ស៊ុន ប៊ុនធឿន អាយុ​ ៣៥​ ឆ្នាំ ទី ៣- សាត ធឹម អាយុ​ ៣៨​ ឆ្នាំ ២ ​នាក់​នេះ​ជា​អ្នក​ចូលរួម​ធ្វើ​សកម្មភាព និង​ជា​អ្នក​ប្រមូល​ទ្រព្យសម្បត្តិ​ក្នុង​អំពើ​ប្លន់​ទី ៤- អឿន សុផា អាយុ ៣៣ ឆ្នាំ ជា​អ្នក​ឌុប​បក្ខពួក​ទម្លាក់​នៅ​តាម​​គោលដៅ​ដើម្បី​​ធ្វើ​សកម្មភាព​ទី ៥.-ហម ហាន អាយុ​ ៤៤ ឆ្នាំ ទី ៦- មាស ធឹម អាយុ​ ៣៦ ​ឆ្នាំ ២ ​នាក់​នេះ​ជា​អ្នក​ដើរ​ស៊ើប​មើល​ផ្ទះ​ជនរងគ្រោះ​ដើម្បី​កំណត់​ឲ្យ​បក្ខពួក​ធ្វើ​សកម្មភាព និង​ទី ៧-ស្វាយ តាក់ ហៅ ច អាយុ​ ៣៨ ​ឆ្នាំ​ជា​អ្នក​ធ្វើ​សកម្មភាព។

ពាក់ព័ន្ធ​ការ​បង្ក្រាប​នេះ​ដែរ​លោក​ ហ៊ុន សុហុន ​អធិការ​ស្រុក​ថ្ពង​ ខេត្ត​​កំពង់ស្ពឺ​បាន​​ឲ្យ​ដឹង​ដែរ​ថា​ចំពោះ​​ការ​បង្ក្រាប​ក្រុម​ចោរ​ប្លន់​ប្រដាប់​អាវុធ​នេះ​លោក​បាន​ចូលរួម​ជាមួយ​សមត្ថកិច្ច​ក្រសួង​មហាផ្ទៃ​ព្រោះ​​​ជនសង្ស័យ​​​ ២ ​នាក់​រស់នៅ​ក្នុង​ដែនដី​របស់​លោក​។ ​

ប៉ុន្តែ​លោក​មិនមែន​ជា​ម្ចាស់​ករណី​ទេ​ខណៈ​ក្រុម​ចោរ​បាន​ធ្វើ​សកម្មភាព​​ប្លន់​ជនរងគ្រោះ​នៅ​​ភ្នំពេញ​។​

លោក​ថ្លែង​​ថា ​សមត្ថកិច្ច​បាន​បង្ក្រាប​ក្រុម​ជនសង្ស័យ​តាំងពី​ព្រឹក​ថ្ងៃ​ទី​ ៦ ​ខែ​មករា​រហូត​ដល់​ល្ងាច​ដោយ​ក្នុង​ស្រុក​ថ្ពង​របស់​លោក​ សមត្ថកិច្ច​ចាប់​ជនសង្ស័យ​បាន​ ២ ​នាក់​បន្ទាប់មក​នាំ​ទៅ​ឆែកឆេរ​ផ្ទះ​បាន​កាំភ្លើង​អាកាស្វាយ​បត់​ចំនួន ១ ​ដើម​ និង​គ្រាប់​ ១ ​បង់​មាន​ចំនួន​ ៣០ ​គ្រាប់​។​ ស្រុក​ឱរ៉ាល់​​ឃាត់​ខ្លួន​បាន​ម្នាក់​រឹបអូស​​អាវុធ​ ១ ​ដើម។

សមត្ថកិច្ច​បន្ត​ទៅ​ចាប់​បាន​ ២ ​នាក់​ទៀត​នៅ​​ស្រុក​ឧដុង្គ​ និង​នៅ​ឃុំ​​ត្រែងត្រយឹង​​ ស្រុក​ភ្នំស្រួច​បាន​ម្នាក់​ទៀត​​ និង​នៅ​​ភ្នំពេញ​បាន​ម្នាក់​​។​

លោក​បញ្ជាក់​ថា​៖ ​«​ជន​ ២ ​នាក់​នោះ​កំពុង​ចូលរួម​ពិធី​ខួប​កំណើត​កូន​គេ​ប៉ុន្តែ​សមត្ថកិច្ច​យើង​ចាប់​ជនសង្ស័យ​សូម្បី​តែ​មនុស្ស​ក្នុង​​កម្មវិធី​បុណ្យ​ក៏​មិន​ដឹង​ផង​។​ ខ្ញុំ​មិនមែន​ជា​ម្ចាស់​ករណី​ទេ​ខាង​ក្រសួង​មហាផ្ទៃ​ និង​ស្នងការ​ក្រុង​ភ្នំពេញ​ជា​ម្ចាស់​ករណី​។ ​ខ្ញុំ​ជា​អាជ្ញាធរ​គ្រាន់តែ​ចូលរួម​ចាប់​ជនសង្ស័យ​ទេ​ព្រោះ​ជា​ម្ចាស់​ភូមិសាស្រ្ត​។​ ក្រុម​ប្លន់​ប្រដាប់​អាវុធ​ប្រើ​​ដល់​កាំភ្លើង​អាការ​ ៥ ​ដើម​មិន​ធម្មតា​ទេ​»​។

គួរ​រំឭក​ថា​អំពើ​ប្លន់​កើតឡើង​កាលពី​យប់​ថ្ងៃ​ទី​ ២៦ ​​ខែ​ធ្នូ​ឆ្នាំ ​២០១៦ នៅ​ភូមិ​ព្រៃក្រាយ សង្កាត់​ស្នោ ខណ្ឌ​ពោធិ៍សែនជ័យ។ ឯ​ម្ចាស់​ផ្ទះ​រងគ្រោះ​ឈ្មោះ​ កែម កន អាយុ ៤២ ឆ្នាំ ​និង​ប្រពន្ធ​​ឈ្មោះ ភី ធឿន អាយុ ៣៨ ឆ្នាំ​ពួកគាត់​មាន​រោង​ម៉ាស៊ីន​កិន​ស្រូវ​ខ្នាត​តូច​មួយ​ម៉ាស៊ីន​បោក​ស្រូវ​ ១ ​គ្រឿង​​​។​ ​​

ក្រុម​ចោរប្លន់​មាន​គ្នា​ចំនួន​ ៧ ​នាក់​ និង​ប្រដាប់​ដោយ​កាំភ្លើង​អាកា​ព្រម​ទាំង​កណ្ដៀវ​ច្រូត​ស្រូវ​ផង​នោះ​បាន​ចូល​​ប្លន់​​​ដោយ​​ចាប់​ម្ចាស់​ផ្ទះ​ ២ ​នាក់​ប្ដី​ប្រពន្ធ​​ និង​កូន​ ២ ​នាក់​ទៀត​ចង​ស្លាប​សេក​។ ​​

បន្ទាប់​មក​យក​ស្កុត​បិទ​មាត់​​ដោយ​​ពេល​នោះ​ក្រុម​ចោរ​បាន​បាញ់​​ ២ ​គ្រាប់​​ត្រូវ​បុរស​ម្នាក់​ដែល​ត្រូវ​ជា​បងប្រុស​ជីដូន​មួយ​របស់​ម្ចាស់​ផ្ទះ​​ និង​ជា​ប្រជាការពារ​ភូមិ​​ធ្លាយ​ពោះវៀន​ និង​ត្រូវ​ដៃ ខណៈ​ជនរងគ្រោះ​រូប​នេះ​កាន់​កាំភ្លើង​ខ្យល់​ ១ ​ដើម​ចូល​ទៅ​ជួយ​ម្ចាស់​ផ្ទះ​ដែល​ជា​ប្អូន​៕

0

Comments

Please, login or register to post a comment

ព័ត៌មានពាក់ព័ន្ធ