Search form

Login - Register | FOLLOW US ON

Logo of Phnom Penh Post newspaper Phnom Penh Post - ខ្មាន់​កាំភ្លើង​បាញ់​នគរបាល​ឲ្យ​របួស​ធ្ងន់​មិន​ដឹង​មូលហេតុ

Content image - Phnom Penh Post
មន្ត្រី​នគរបាល​ដែល​រងរបួស​ពី​ការ​បាញ់​ដោយ​ខ្មាន់​កាំភ្លើង​។ រូប Fresh News

ខ្មាន់​កាំភ្លើង​បាញ់​នគរបាល​ឲ្យ​របួស​ធ្ងន់​មិន​ដឹង​មូលហេតុ

ភ្នំពេញៈ ​មន្ត្រី​នគរបាល​នៃ​អធិការដ្ឋាន​ខណ្ឌ​ ៧ ​មករា​ម្នាក់​ត្រូវ​បាន​ខ្មាន់​កាំភ្លើង​មិន​ស្គាល់​អត្តសញ្ញាណ​ ២ ​នាក់​បាញ់​ចំនួន​ ៤ ​គ្រាប់ តែ​ត្រូវ​ ១ ​គ្រាប់​បណ្ដាល​ឲ្យ​របួស​ធ្ងន់ ហើយ​ត្រូវ​បាន​បញ្ជូន​ទៅ​មន្ទីរពេទ្យ ខណៈ​មូលហេតុ​នៃ​ករណី​នេះ​សមត្ថកិច្ច​កំពុង​ស្រាវជ្រាវ​នៅ​ឡើយ​។

ហេតុការណ៍​នេះ​បាន​កើតឡើង​កាលពី​វេលា​ម៉ោង​ ១០: ៥០ ​នាទី​យប់​ថ្ងៃ​ទី​ ៥ ខែ​កញ្ញា​ក្បែរ​វិទ្យាល័យ​យុគន្ធរ​ក្នុង​សង្កាត់​បឹងកេងកង​ ២ ខណ្ឌ​ចំការមន រាជធានី​ភ្នំពេញ​។

លោក អ៊ុក ផាន សមាជិក​ក្រុមប្រឹក្សា​ចៅសង្កាត់​បឹងកេងកង​ ២ ​បាន​ឲ្យ​ដឹង​ពី​ម្សិលមិញ​ថា​រហូត​មក​ទល់​ពេល​នេះ​ជនរងគ្រោះ​បាន​ដឹង​ខ្លួន​វិញ​ហើយ តែ​លោក​មិន​ព្រម​ប្រាប់​ឈ្មោះ​ទេ ខណៈ​ជនរងគ្រោះ​មាន​សភាព​ធ្ងន់ និង​កំពុង​សង្គ្រោះ ។

លោក​បញ្ជាក់​ថា​៖ «​ជន​រងគ្រោះ​កំពុង​ស្ថិត​ក្នុង​ដំណាក់កាល​សង្គ្រោះ​ហើយ​ត្រូវការ​ពេលវេលា​ច្រើន​ទៀត​ដើម្បី​តាមដាន​របួស​ព្រោះ​ត្រូវ​ទម្លុះ​ដោយ​គ្រាប់​កាំភ្លើង​នៅ​ដើម​ទ្រូង​ខាង​ឆ្វេង​ធ្លាយ​មក​ខ្នង​»​។ រីឯ​មូលហេតុ​វិញ​លោក​ថា​មិន​បាន​ដឹង​ច្បាស់​ទេ ខណៈ​សមត្ថកិច្ច​កំពុង​ស្រាវជ្រាវ​។

លោក​បន្ថែម​ថា​គ្រាប់​កាំភ្លើង​បាន​ហោះ​ឆ្លង​ផ្លូវ​ទៅ​បុក​ជញ្ចាំង​ផ្ទះ​ពលរដ្ឋ នៅ​តាម​បណ្ដោយ​ផ្លូវ​ព្រះសីហនុ​ស្ទើរ​ធ្លុះ តែ​សំណាង​ល្អ​មិន​បង្ក​គ្រោះថ្នាក់​ដល់​អ្នក​ដំណើរ និង​រស់នៅ​ក្បែរ​នោះ​។

ពលរដ្ឋ​ដែល​នៅ​ជិត​កន្លែង​កើតហេតុ​សុំ​មិន​ប្រាប់​ឈ្មោះ​បាន​ឲ្យ​ដឹង​ថា​មុន​កើតហេតុ គេ​ឃើញ​ជន​រងគ្រោះ​ជិះ​ម៉ូតូ​ម្នាក់​ឯង​នៅ​លើ​ដង​ផ្លូវ​ព្រះសីហនុ​ភ្លាម​នោះ​ក៏​ត្រូវ​បាន​ក្រុម​ជនសង្ស័យ​មាន​គ្នា​ ២ ​នាក់​បាន​ជិះ​ម៉ូតូ​ ១ ​គ្រឿង​ឌុប​គ្នា​មក​បាញ់​ប្រហារ​ប្រហែល ៤ ​គ្រាប់​បណ្ដាល​ឲ្យ​ត្រូវ​ជន​រងគ្រោះ​របួស​។

ក្រោយ​កើតហេតុ​ភ្លាម​ក្រុម​ជនសង្ស័យ​គេច​ខ្លួន​បាត់​។ ​ចំណែក​ជនរងគ្រោះ​ត្រូវ​បាន​សមត្ថកិច្ច​ដូច​គ្នា​ដឹក​តាម​ម៉ូតូ​សង្គ្រោះ​នៅ​មន្ទីរពេទ្យ​។ នៅ​កន្លែង​កើតហេតុ​គេ​ឃើញ​សម្បក​កាទូស និង​ក្បាល​គ្រាប់​ជា​ប្រភេទ​អាវុធ​ខ្លី​ ២ ​គ្រាប់​នៅ​ទី​នោះ​។

អធិការ​នគរបាល​ខណ្ឌ​ ៧ ​មករា​លោក នេត ស៊ីថុន បាន​ប្រាប់​ថា​កំពុង​ជាប់​ប្រជុំ​មិន​អាច​និយាយ​ទូរស័ព្ទ​បាន​ទេ ខណៈ​លោក ឃិន សាន អធិការ​នគរបាល​ខណ្ឌ​ចំការមន​ប្រាប់​យ៉ាង​ខ្លី​ថា អត់​ដឹង​ហើយ​ថា​ជនរងគ្រោះ​មិនមែន​កូនចៅ​របស់​លោក​៕

0

Comments

Please, login or register to post a comment